1. So lege azi na e ti sambela Jéhovah, a yeke nzoni e bâ ni tongana nyen?

 A MÛ na e pendere pasa ti ga nduru na Lo so asara yayu na sese na lege ti sambela. Gbu gï li kete: E peut ti zi bê ti e na Jéhovah na ngoi kue nga na yanga ti kodro kue, sân ti sara tënë ni na lo kozo. E peut ti sambela lo tongana e yeke na ndö ti gbogbo ti hôpital, wala e yeke na kanga, na hingango so Babâ ti e so aye e ayeke mä e. E kiri singila mingi ndali ti pasa so.

2. Tongana nyen la Gbia David afa so lo bâ na nene ni pasa so lo yeke na ni ti sambela?

² Gbia David abâ lani na nene ni pasa so lo yeke na ni ti sambela. Lo he bia na Jéhovah, lo tene: “Zia si sambela ti mbi aduti tongana dukane so a leke ni nzoni si a yâa ni na mo.” (Ps. 141:1, 2). Na ngoi ti David, a yeke leke nzoni mingi dukane so ayeke nzoni-kue so aprêtre ayeke sara kua na ni ndali ti tâ vorongo Nzapa (Ex. 30:34, 35). David aye lani ti gbu li nzoni na ndö ti tënë so lo yeke tene na Jéhovah na yâ ti sambela gï tongana ti so azo so ayeke leke dukane ayeke leke ni tâ nzoni mingi. A yeke ye so e nga kue e ye mingi ti sara. E ye ti tene asambela ti e anzere na Jéhovah.

3. Bango ndo wa la a yeke nzoni e duti na ni na ngoi so e yeke sambela Jéhovah? Ngbanga ti nyen?

³ Na ngoi so e yeke sambela Jéhovah, a yeke nzoni e ne lo mingi. Gbu li na ndö ti avision so apika bê mingi so Ésaïe, Ézéchiel, Daniel nga na Jean abâ lani. Avision ni ayeke nde nde, me mbeni ye ayeke dä so ague oko. Avision ni kue afa so Jéhovah ayeke Gbia so ayeke kota mingi. Ésaïe ‘abâ Jéhovah  so aduti na ndö ti trône so ayo na nduzu.’ (És. 6:1-3). Ézéchiel abâ Jéhovah aduti na ndö ti char ti lo ti yayu, na “mbeni zango ye angoro terê ti lo kue na akpa arc-en-ciel”. (Ézéch. 1:26-28). Daniel abâ “Lo so ayeke dä ngbene ye giriri” so ayü vuru bongo, wâ ayeke za na terê ti trône ti Lo (Dan. 7:9, 10). Jean abâ nga Jéhovah so aduti na ndö ti mbeni trône so mbeni pendere ye so ayeke tongana arc-en-ciel ti émeraude angoro ni (Apoc. 4:2-4). Tongana e gbu li na ndö ti gloire ti Jéhovah so mara ni ayeke dä ape, a dabe ti e na pendere pasa so e yeke na ni ti sambela lo nga so a yeke kota ye ti sara ni na nengo lo. Me nyen la a yeke nzoni e sambela ndali ni?

4. Nyen la e manda na lege ti akozo tënë ti tapande ti sambela so ayeke na Matthieu 6:9, 10?

⁴ Diko Matthieu 6:9, 10. Na yâ ti Fango tënë ti Jésus na ndö ti hoto, lo fa na adisciple ti lo ti sambela na mbeni lege so anzere na Nzapa. Na peko ti so Jésus atene “a lingbi ala sambela tongaso,” lo fa kozoni aye so ayeke akota ye so ague oko na ye so bê ti Jéhovah aye: sarango si iri ti Lo aga nzoni-kue, gango ti Royaume so ayeke futi ande awato ti Nzapa kue nga na anzoni ye so lo leke ti sara ndali ti sese nga na azo. Tongana e sambela ndali ti aye so, e fa so ye so bê ti Nzapa aye ayeke kota ye na lê ti e.

5. Eskê a yeke na lege ni ti sambela ndali ti aye so abâ e wani?

⁵ Na pekoni na yâ ti sambela ni, Jésus afa so a yeke na lege ni ti sambela ndali ti aye so abâ e wani. E peut ti hunda Jéhovah ti mû na e kobe ti lango ni, ti pardonné asiokpari ti e, ti bata e si e tï na yâ ti tara ape nga ti zi e na maboko ti zo ti sioni (Mat. 6:11-13). Tongana e hunda Jéhovah na aye so, e fa so e bezoin mungo maboko ti lo nga e ye ti zia ngia na bê ti lo.

6. Eskê e doit ti sambela gï ndali ti aye so ayeke na yâ ti tapande ti sambela so? Fa ndani so mo tene tongaso.

⁶ Jésus aye lani ape ti tene adisciple ti lo atene gï peko ti atënë so ayeke na yâ ti tapande ti sambela so. Na yâ ti ambeni sambela ti Jésus, lo sara tënë ti ambeni ye nde so ayeke kota ye na lê ti lo na ngoi ni so (Mat. 26:39,  42; Jean 17:1-26). Legeoko nga, e peut ti sambela ndali ti ye kue so ayeke kota ye na lê ti e. Tongana e doit ti mû mbeni desizion, e peut ti sambela ti wara ndara nga na hingango ndo (Ps. 119:33, 34). Tongana e ye ti komanse mbeni kua so ayeke ngangu, e peut ti sambela ti wara mungo maboko ti hinga tongana nyen ti sara ni (aProv. 2:6). Ababâ na amama apeut ti sambela ndali ti amolenge ti ala, amolenge apeut ti sambela ndali ti ababâ na amama ti ala; nga e kue e peut ti sambela ndali ti azo so e yeke manda Bible na ala nga na azo so e yeke fa tënë na ala na a yeke nzoni e sara ni. Me tongana e yeke sambela, a yeke nzoni e hunda gï ye na Jéhovah ape.

7. Ngbanga ti nyen la a yeke nzoni e gonda Jéhovah na yâ ti asambela ti e?

⁷ A yeke nzoni e girisa ape ti gonda Jéhovah na yâ ti asambela ti e. Mbeni zo so alingbi na gonda tongana Nzapa ti e ayeke dä ape. Lo yeke ‘nzoni nga lo yeke nduru ti pardonné zo’. Lo yeke ‘sara nga nzoni bê na zo nga lo bâ mawa ti zo, lo sara ngonzo hio hio pëpe, lo si singo na tâ ndoye nga lo yeke be-ta-zo mingi.’ (Ps. 86:5, 15). E yeke biani na nzoni raison ti gonda Jéhovah ndali ti aye so e hinga lo na ni nga na aye so lo sara.

8. Ambeni ye wa la e peut ti kiri singila na Jéhovah ndali ni? (Psaume 104:12-15, 24).

⁸ Na ndö ti so e yeke gonda Jéhovah na yâ ti asambela ti e, bê ti e apusu e ti kiri singila na lo ndali ti apendere ye so lo mû na e. Na tapande, e peut ti kiri singila na lo ndali ti apendere couleur ti afleur, anzerengo kobe nde nde so lo yeke mû na e lakue nga ngia so e yeke na ni ti duti na akota kamarade. Babâ ti e so aye e amû na e aye so nga na ambeni mingi mingi gï ti sara si e duti na ngia. (Diko Psaume 104:12-15, 24.) A yeke même kota ye mingi so e kiri singila na Jéhovah ndali ti gbâ ti akobe ti yingo so lo mû na e nga ndali ti pendere beku ti kekereke so e yeke na ni.

9. Nyen la apeut ti aidé e ti girisa ape ti kiri singila na Jéhovah? (1 aThessalonicien 5:17, 18).

⁹ A peut ti duti ngangu ape ti girisa ti kiri singila na Jéhovah ndali ti aye kue so lo sara na e. Nyen la apeut ti aidé mo ti girisa ape? Mo peut ti sara molongo ti ambilimbili ye so mo  hunda Jéhovah na ni, nga ngoi na ngoi gi ti bâ tongana nyen la lo kiri tënë na ni. Na pekoni, sambela Jéhovah ti kiri singila na lo ndali ti mungo maboko ti lo. (Diko 1 aThessalonicien 5:17, 18.) Gbu li na ndö ti ye so: A yeke nzere ka na e nga e ye ti tene azo akiri singila na e. Legeoko nga, tongana e girisa ape ti kiri singila na Jéhovah ndali ti so lo kiri tënë na asambela ti e, a yeke nzere na lo (aCol. 3:15). Me mbeni kota raison nde wa la e yeke na ni ti kiri singila na Nzapa?

10. Ti gue oko na 1 Pierre 2:21, ngbanga ti nyen la e yeke na raison ti kiri singila na Jéhovah ndali ti so lo tokua Jésus na sese?

¹⁰ Diko 1 Pierre 2:21. A yeke nzoni e kiri singila na Jéhovah ndali ti so lo tokua Molenge ti lo so lo ye lo mingi ti fa ye na e. Tongana e manda ye na ndö ti fini ti Jésus, e yeke hinga ye mingi na ndö ti Jéhovah nga e yeke hinga tongana nyen ti zia ngia na bê ti lo. Tongana e mä na bê na sandaga ti Christ, e peut ti ga mbeni kota kamarade ti Jéhovah Nzapa nga e yeke duti na siriri na Lo.—aRom. 5:1.

11. Ngbanga ti nyen la e yeke sambela na iri ti Jésus?

¹¹ E kiri singila na Jéhovah so e peut ti sambela lo na lege ti Molenge ti lo. Jéhovah ayeke mû na e aye so e hunda na lo na lege ti Jésus. Jéhovah ayeke mä asambela so a tene ni na lo na iri ti Jésus nga lo yeke kiri tënë na ni. Jésus atene: “Aye kue so ala hunda na iri ti mbi, mbi yeke sara ni, tongaso si Babâ ni alingbi ti wara gloire na lege ti Molenge ni.”—Jean 14:13, 14.

12. Mbeni raison wa la e yeke na ni ti kiri singila na Jéhovah ndali ti Molenge ti lo?

¹² Jéhovah ayeke pardonné asiokpari ti e ndali ti ye so Jésus afuta ti zi azo. Bible atene so Jésus ayeke “kota prêtre [ti e so aduti] na terê ti trône ti Kota Gbia na yayu na mbage ti koli”. (aHéb. 8:1). Jésus ayeke “zo ti mungo maboko [na e] so ayeke na terê ti Babâ ni.” (1 Jean 2:1). E kiri singila mingi na Jéhovah so lo mû na e mbeni Kota prêtre so ayeke bâ mawa ti e na acomprendre awokongo ti e nga lo yeke “hunda ye ndali ti e.” (aRom. 8:34; aHéb. 4:15). So e yeke mbilimbili-kue ape, sân sandaga ti Jésus, e lingbi pëpe ti ga nduru na Jéhovah na lege ti sambela. Kite ayeke dä ape so mo yeda so e peut lâ oko ape ti kiri singila na Jéhovah alingbi na pendere cadeau so lo mû na e, so ayeke Molenge ti lo so lo ye lo mingi.

13. Na bï so na ndade ni Jésus akui, tongana nyen la lo fa so lo ye adisciple ti lo?

¹³ Na bï so na ndade ni Jésus akui, lo sambela aninga ndali ti adisciple ti lo, lo hunda Babâ ti lo ti “bâ ndo na ndö ti ala ngbanga ti Zo ti sioni.” (Jean 17:15). Ye so afa so Jésus aye ala mingi. Atâa so lo hinga so fafadeso lo yeke bâ pasi mingi, lo gi bê ti lo ndali ti abazengele ti lo.

14. Tongana nyen la e peut ti fa so e ye aita?

¹⁴ Tongana e mû tapande ti Jésus, e yeke pensé gï na abezoin ti e ape. Me, e yeke sambela lakue ndali ti aita. Tongana e sara ni andâ e yeke sara ye alingbi na commandement so Jésus amû so lo hunda na e ti ye terê na popo ti e nga e yeke fa na Jéhovah so e ye amba ti e aChrétien mingi (Jean 13:34). Ti sambela ndali ti aita ayeke bubango ngoi ape. Bible afa na e so “sambela ti zo ti mbilimbili ti voro terê na Nzapa ayeke sara aye mingi.”—Jacq. 5:16.

15. Ngbanga ti nyen la aita ti e abezoin asambela ti e?

¹⁵ Aita ti e abezoin asambela ti e ndali ti so  ala yeke wara akpale mingi. E peut ti hunda Jéhovah ti aidé ala ti gbu ngangu na yâ ti kobela, akpale tongana ngu so asuku amû ndo, bira, sarango ye ti ngangu na zo wala ambeni kpale nde. E peut nga ti sambela ndali ti aita so ayeke sara kua ngangu ti mû maboko na aita so ayeke na yâ ti kpale. Peut-être mo hinga ambeni ita so awara mara ti kpale tongaso. Mo peut ti di iri ti ala na yâ ti asambela ti mo. E yeke fa tâ ndoye ti aita tongana e hunda Jéhovah ti aidé ala ti gbu ngangu.

16. Ngbanga ti nyen la a yeke nzoni e sambela ndali ti azo so ayeke mû li ni na popo ti e?

¹⁶ Aita so ayeke mû li ni akiri singila mingi ndali ti asambela so aita ti congrégation ayeke sara ndali ti ala nga asambela ni ayeke aidé ala. Tënë so ayeke tâ tënë na ndö ti bazengele Paul. Lo tene: “Ala sambela nga ndali ti mbi si a mû na mbi tënë na ngoi so mbi zi yanga ti mbi, tongaso si mbi sara tënë na mbeto pëpe na ndö ti tënë so Nzapa ahonde ndani, so ayeke nzoni tënë.” (aÉph. 6:19). Laso nga, e yeke na aita mingi so ayeke mû li ni na popo ti e so ayeke sara kua ngangu. E yeke fa so e ye ala tongana e hunda na Jéhovah ti sara tufa na ndö ti kua ti ala.

17-18. Na angoi wa la a peut ti hunda na e ti sambela ndali ti amba ti e? Nyen la a yeke nzoni e girisa ape?

¹⁷ Na ambeni ngoi, a yeke hunda na e ti sambela ndali ti amba ti e. Na tapande, mbeni ita-wali so ayeke sara étude apeut ti hunda na mba ti lo so lo na lo ayeke fa tënë ti sambela. Peut-être ita-wali so lo na lo aga ahinga zo so ayeke manda Bible ni nzoni ape, tongaso peut-être lo yeke bâ so a yeke nzoni lo sambela na hunzingo ti étude ni. Tongana lo sara tongaso, a peut ti duti ngangu na lo ape ti sambela alingbi na bezoin ti zo so ayeke manda ye ni.

¹⁸ A peut ti hunda na mbeni ita-koli ti sambela na ngoi ti bungbi ti fango tënë wala na ngoi ti mbeni bungbi ti congrégation. Aita-koli so ayeke na pasa so adoit ti girisa ape nda ti bungbi ni. Nda ti sambela ayeke pëpe ti mû wango na azo wala ti tene atokua. Ti mingi ti abungbi ti congrégation, a mû penze-ngbonga oku ndali ti bia nga na sambela,  tongaso ita-koli so ayeke sambela abezoin ti ‘sara tënë mingi’ ape, mbilimbili na tongo nda ti mbeni bungbi.—Mat. 6:7.

19. Nyen la ayeke aidé e ti leke terê ti e ndali ti lâ ti fango ngbanga ti Jéhovah?

¹⁹ E doit ti sara si sambela aga même kota ye mingi na yâ ti fini ti e na ngoi so e yeke pusu nduru na lâ ti fango ngbanga ti Jéhovah. Na ndö ti tënë so, Jésus atene: “Tongaso, zia lê ti ala angbâ na zingo ni, ala voro terê ti ala na Nzapa lakue, tongaso si ala wara lege ti sigi na yâ ti aye kue so adoit ti si.” (Luc 21:36). Tongana e yeke sambela lakue, mabe ti e ayeke kpengba nga e yeke duti nduru na ngoi so lâ ti fango ngbanga ti Nzapa ayeke si.

20. Tongana nyen la asambela ti e apeut ti duti tongana dukane so afun pendere?

²⁰ Nyen la e bâ fade? E bâ pasa so e yeke na ni ti sambela na nene ni mingi. Akota ye so a yeke nzoni e sambela ndali ni adoit ti gue oko na ye so Jéhovah aleke na bê ti lo ti sara. E kiri nga singila ndali ti Molenge ti Nzapa nga ndali ti komandema ti Royaume ti lo, nga e yeke sambela ndali ti amba ti e aChrétien. Jéhovah aye nga ti tene e sambela ndali ti abezoin ti e nga ti tene e ngbâ ti duti na kpengba songo na lo. Tongana e gbu li nzoni na ndö ti atënë so e yeke tene na yâ ti asambela ti e, e fa so e bâ na nene ni pendere pasa so. Atënë ti e ayeke duti tongana dukane so afun pendere na hôn ti Jéhovah, so ti tene ‘a nzere na Lo.’—aProv. 15:8.