Papa ayeke lani ancien na yâ ti Église unie du Canada, tongaso lakue na dimanche lo yeke tokua mbi na ita ti mbi ti wali na ekole ti dimanche, na pekoni na 11 heure e yeke gue na peko ti lo na bungbi. Na après-midi, e na Mama e yeke gue na Da ti Royaume. A yeke lani ngangu ape ti bâ kangbi so ayeke na popo ti abungbi use so.

Mama afa afini ye so lo mä na bê na ni na azo so lo na ala ayeke akamarade aninga awe, Bob na Marion Hutcheson, so ala nga ayeda na tâ tënë. Na ngu 1958 aHutcheson amû mbi na amolenge ti ala ti koli ota, e gue na assemblée internationale ti lango miombe so a sara na gbata ti New York. Mama-tene ti assemblée ni ayeke “La volonté divine.” Laso, mbi bâ so a yeke lani kete ye na ala ape ti mû mbi na terê ti ala, me assemblée ni ayeke lani mbeni oko ti apendere ngoi na yâ ti gigi ti mbi.

Na ngoi so lani mbi yeke maseka, e lango na yâ ti mbeni ferme na mbi ye mingi ti bâ lege ti anyama. Mbi pensé lani ti ga docteur ti anyama. Mama asara tënë ni na mbeni ancien. Na nzoni bê lo dabe ti mbi so e yeke na “lâ ti nda ni” nga lo hunda mbi na ndö ti ye so guengo na université teti angu mingi ayeke sara na ndö ti songo ti mbi na Jéhovah (2 Tim. 3:1). A sara si mbi mû desizion ti gue na université ape.

 Mbi ngbâ lani ti hunda terê ti mbi na ye so mbi yeke sara na peko ti so mbi hunzi ekole na lycée. Atâa so mbi yeke fa lani tënë lakue na anda-yenga, fango tënë anzere na mbi ape nga mbi bâ so mbi peut ti ga pionnier ape. Babâ ti mbi nga na ngambe ti lo ti koli ayeke wa lani mbi ti sara kua na yâ ti mbeni kota ndokua ti assurance na Toronto. Babâ-kete ti mbi ayeke lani kota zo na yâ ti ndokua ni, tongaso mbi yeda ti sara kua ni.

Na Toronto, so mbi mû ngoi mingi ti sara kua nga ti duti na terê ti azo so ayeke aTémoin ape akanga lege na mbi ti gue na abungbi nga ti fa tënë lakue. Kozo, mbi na âta ti mbi ti koli so lo yeke Témoin ape la e yeke lango, me na peko ti so lo kui mbi bezoin mbeni ndo ti lango dä.

A-Hutcheson, so amû lani mbi e na ala e gue na kota bungbi na 1958, ayeke tongana babâ na mama ti mbi. Ala hunda na mbi ti ga ti lango na ndo ti ala nga ala aidé mbi ti kpengba songo ti mbi ti kamarade na Jéhovah. Na ngu 1960, mbi na molenge ti ala ti koli John e wara batême. John akomanse ti sara kua ti pionnier na apusu mbi ti fa tënë mingi. A-ancien abâ so mbi yeke gue na li ni, tongaso ala mû mbi ti sara kua tongana ita so laso ayeke surveillant ti bungbi ti Kusala ti e nga na gigi ti e ti Chrétien.

Na ngu 1966, mbi sara mariage na Randi Berge, mbeni pionnier so ayapu nga so aye mingi ti gue na ndo so a bezoin awafango tënë mingi dä. Surveillant ti circonscription ti e apensé na e mingi na lo wa e ti gue ti aidé na congrégation ti Orillia, na Ontario. Tongaso, e kanga kungba ti e na e hon kâ.

Gï so e si na Orillia, mbi komanse kua ti pionnier tongana Randi. A nzere na mbi mingi ti fa tënë tongana lo. Na peko ti so mbi sara ngangu ti ga mbeni nzoni pionnier, mbi komanse ti wara ngia so zo ayeke wara tongana lo sara kua na Bible nga lo bâ so azo amä yâ ti tâ tënë. Mbi yeke lani na ngia mingi ti aidé mbeni nzoni couple na Orillia ti sara achangement na yâ ti gigi ti ala na ti ga awakua ti Jéhovah.

Na ngoi so mbi sara vizite na Toronto, mbi wara terê na Arnold MacNamara so ayeke mbeni oko ti aita-koli so ayeke mû li ni na Béthel. Lo hunda mbi wala e ye ti sara kua ti pionnier spécial. Hio mbi tene: “En! Na ndo kue me na Québec ape.” Mbi yeke lani na sioni bango ndo so azo ti Canada so ayeke tene Anglais ayeke na ni na ndö ti azo ti Québec so ayeke tene Français. Na ngoi ni so, azo ayeke fa lani ngonzo ti bê ti ala na terê ti gouvernement nga ala ye ti tene Québec awara indépendance.

Arnold atene: “Na ndembe so gï Québec la filiale ayeke tokua apionnier spécial dä.” Hio, mbi yeda ti gue. Mbi hinga awe so Randi asara nzara ti gue ti fa tënë kâ. Na pekoni mbi bâ so, so ayeke lani mbeni pendere desizion la e mû na yâ ti gigi ti e.

Na peko ti so e manda Français teti yenga oku, mbi na Randi na mbeni couple e gue na Rimouski, so ayo kilomètre 540 tongaso na nord-est ti Montréal. Aye angbâ mingi so e doit ti manda ni, a sigi polele na ngoi so mbi diko mbeni tokua na ngoi ti bungbi. Mbi tene lani so na kota bungbi ti e so ayeke ga e yeke wara ande “gbâ ti a-autruche” (andeke) ahon ti tene e yeke wara ande “gbâ ti aita so alondo na Autriche.”

Na Rimouski, aita-wali kumbamba osio so ayapu na fango tënë nga na couple Huberdeaus na amolenge ti ala ti wali use aga na terê ti e. Couple Huberdeaus aloué mbeni kota da, na apionnier kue so alango kâ abungbi nginza ti aidé lo na payengo ni. E iri da ni Vuru da ndali ti so devant ni nga na apilier ni ayeke vuru. Mingi ni e 12 wala 14 la e yeke lango na yâ ni. So mbi na Randi e yeke apionnier spécial, e yeke fa tënë na ndapre, na après-midi nga na lakui, tongaso a nzere na e ti tene mbeni zo aduti lakue dä ti tene e na lo e fa tënë même na alakui so dë ayeke mingi na ngoi ti hiver.

E ga nduru mingi na apionnier so ayeke be-ta-zo so na ala ga tongana afami ti e. Na ambeni ngoi e duti na terê ti wâ wala na mbeni lango e tö ye ndo oko. Mbeni ita-koli ni ayeke lani zo ti pikango mozoko, tongaso na asamedi na bï mingi ni e yeke he bia nga e dodo.

Azo mingi aye ti manda Bible na Rimouski. Na yâ ti ngu oku, a nzere na e mingi ti bâ gbâ ti azo so e manda Bible na ala ague na li ni na awara batême. Wungo ti awafango tënë ti congrégation ni ague na li ni asi 35 tongaso.

Na Québec, a fa ye na e nzoni mingi si e duti awafango nzoni tënë. E bâ tongana nyen la Jéhovah a-aidé e na fango tënë nga lo aidé e ti wara aye so e bezoin ni. Na ndö ni, e ye azo so ayeke tene Français, yanga ti kodro ti ala nga na ngobo ti ala, a sara si e ye nga ambeni ngobo nde.—2 aCor. 6:13.

Béthel ahunda na e ti gue na gbata ti Tracadie, na mbage ti est ti yanga ti ngu ti Nouveau-Brunswick, na e ku terê ti e na ni ape. Ye so ayeke lani mbeni kpale ndali ti so e londo ti loué mbeni da nga mbi yeke fa mbeti teti ambeni l’heure na yâ ti mbeni ekole. Na ndö ni, ambeni zo so e yeke manda Bible na ala akomanse ti fa tënë ade ti ninga ape nga e ngbâ ti leke Da ti Royaume ti e.

Na yâ ti week-end ni kue, e sambela na ndö ti guengo na Tracadie nga e gue e bâ ni; Tracadie  ayeke nde mingi na Rimouski. Me e mû desizion e tene so Jéhovah aye ti tene e gue kâ, e yeke gue. E tara Jéhovah na e bâ so lo zi akpale kue na devant ti e (Mal. 3:10). So Randi ayeke na kpengba songo na Jéhovah, lo yeke zo ti kion ape nga lo ye tënë ti ngia mingi, hongo ni ayeke lani ngangu oko ape.

Oko ancien ti fini congrégation ti e ni ayeke lani Robert Ross. Lo na wali ti lo, Linda, ayeke lani apionnier kâ, na ala mû desizion ti ngbâ kâ na peko ti so ala dü kozo molenge ti ala. Même na ngoi so ala yeke bâ lege ti kete molenge ti ala, ala kpengba e ndali ti so ala yamba zo mingi nga ala yapu na fango tënë mingi.

Na peko ti so e sara kua ti pionnier ngu use na Tracadie, mbeni ye so e ku terê ti e na ni ape akiri asi: a tisa e ti sara kua ti circonscription. E sara kua na yâ ti acirconscription ti Anglais ngu mbasambala, na pekoni a tokua e na yâ ti mbeni circonscription ti Français na Québec. Léonce Crépeault, surveillant ti district ti e na Québec, ayeke gonda ka mbi ndali ti adiskur so mbi sara. Me na pekoni, lakue lo yeke hunda ka mbi: ‘Tongana nyen la mo peut ti sara si adiskur ti mo ni a-aidé mingi azo?” a So lo pensé na mbi a-aidé mbi ti sara si afango ye ti mbi aduti ngangu ape ti mä yâ ni.

Mbeni kua so mbi yeke girisa ni lâ oko ape ayeke ti so mbi sara lani na ngu 1978 na ngoi ti Assemblée Internationale “La victoire divine” so a sara ni na Montréal. Mbi sara lani kua na Service so abâ tënë ti kobe. E doit lani ti mû kobe na azo 80000 na e doit ti sara ni na mbeni fason so ayeke nde na ti so e yeke sara lani. Ye kue ayeke lani fini ye: akungba ti tongo na kobe ni, kobe ni nga na kode ti tongo ni. E yeke lani na akota frigo 20 tongaso, me na ambeni ngoi a sara kua nzoni ape. Kozo ti tene kozo lango ni akomanse, e peut ti lï na yâ ti stade ni ape ti leke aye juska na minuit ndali ti ballon so a pika na lango ni so. E doit lani ti zia afour na marche kozo si ndo ahan ti leke na kobe ti ndapre. E fatigué lani, me mbi manda ye mingi na mbage ti amba ti mbi avolontaire so ayeke sara kua ngangu, so ayeke abiazo nga so aye tënë ti ngia mingi. E ngbâ akamarade juska laso. Mbi yeke lani na ngia mingi ti mû mbage na kota bungbi so, so a sara na Québec, ndo so a  sara lani aye ti ngangu mingi na aita na popo ti ngu 1940 ti si na ngu 1960.

Mbi manda lani ye mingi na mbage ti amba ti mbi asurveillant na ngoi ti akota bungbi ti e na Montréal. Na mbeni ngu, David Splane, so ayeke fadeso membre ti Bebungbi, la ayeke lani surveillant ti mbeni kota bungbi ni. Ambeni ngoi na pekoni, na ngoi so a hunda na mbi ti duti surveillant ti mbeni kota bungbi ni, David amû lani maboko na mbi mingi.

Na ngu 2011, na peko ti so e sara ngu 36 na yâ ti kua ti circonscription, a tisa mbi ti fa ye na Ekole ti a-ancien. Na yâ ti ngu use, mbi na Randi e lango na ndö ti agbogbo nde nde 75, me asacrifice kue so e sara aga na e nzoni ye. Na hunzingo ti yenga oko oko, a-ancien ni ayeke kiri singila mingi ndali ti so ala bâ so Bebungbi ayeke sara kue ti kpengba songo ti ala na Jéhovah.

Na pekoni, mbi fa ye na Ekole ti awafango nzoni tënë ti Royaume. Fani mingi, a-élève ni afatigué nga ala yeke gi bê ti ala ndali ti so ala yeke na gbâ ti aye ti sara: ala yeke duti na yâ ti klase l’heure mbasambala tongaso ti manda ye lâ oko oko, ala yeke manda ye l’heure ota lakue na lakui nga ala yeke na devoir osio wala oku yenga oko oko. Mbi na mbeni wafango ye ni e fa na ala so ala peut ti sara aye so sân mungo maboko ti Jéhovah ape. Mbi yeke dabe ti mbi lakue so li ti a-élève ni akpe ti bâ so, so ala zia bê ti ala na Jéhovah, ala sara aye so ala pensé so ala peut ti sara ape.

So mama ti mbi apensé na azo so lo yeke manda Bible na ala a-aidé ala ti gue na li ni nga a-aidé même babâ ti mbi ti changé bango ndo ti lo na ndö ti tâ tënë. Lango ota na peko ti so Mama akui, babâ ti mbi asara mbeni ye so ahon gbungo li ti e: lo ga na Da ti Royaume ti mä diskur, nga lo ngbâ ti ga na abungbi na yâ ti angu 26 so aga na pekoni. Atâa so Babâ awara batême lâ oko ape, a-ancien atene na mbi so lakue lo yeke kozo zo so asi na Da ti Royaume yenga oko oko.

Mama azia nzoni tapande na mbi na aita ti mbi ti wali. Aita ti mbi ti wali ota kue nga na akoli ti ala ayeke sara na Jéhovah be-ta-zo. Aita ti mbi ti wali use ayeke sara kua na Béthel: oko ayeke na Béthel ti Portugal, na oko ayeke na Béthel ti Haïti.

Mbi na Randi e yeke fadeso apionnier spécial na Hamilton, na Ontario. Na ngoi so e yeke sara lani kua ti circonscription, e yeke na ngia ti tene e na aita e gue e sara avizite nga na a-étude ti ala. Me laso e yeke na ngia ti bâ azo so e yeke manda Bible na ala ague na li ni. So e sara kamarade na aita ti fini congrégation ti e, a kpengba e ti bâ tongana nyen la Jéhovah amû maboko na ala na angoi so aye atambela nzoni nga na angoi ti kpale.

Tongana e pensé na aye so e vivre ni, e kiri singila mingi na gbâ ti azo so afa so ala pensé na e. E nga e gi ti ‘bi bê’ na amba ti e, e wa ala ti sara ye kue so ala peut ti sara ti sara na Jéhovah (2 aCor. 7:6, 7). Na yâ ti mbeni sewa, mama ni, molenge ti ala ti koli nga na molenge ti ala ti wali ayeke na yâ ti kua ti ngoi kue. Mbi hunda koli ni wala lo pensé lâ oko awe ti sara kua ti pionnier. Lo tene so lo yeke mû maboko na apionnier ota. Tongaso mbi hunda lo: “Eskê mo peut ti mû maboko na ala nzoni mingi ahon Jéhovah?” Mbi wa lo ti gi ti wara ngia so ala yeke wara. Nze omene na pekoni lo ga pionnier.

Mbi na Randi e yeke ngbâ ti fa tënë ti “akusala ti [Jéhovah] so adö bê” na “azo so a yeke dü ala laso,” na e yeke na beku so ala yeke sara na Jéhovah na ngia tongana e.—Ps. 71:17, 18.