1. Ngbanga ti nyen Jéhovah ayeke nzoni Zo ti lekengo ye ahon azo ti lekengo ta kue?

NA Novembre ngu 2010, a zia kozo ngere ti mbeni ngbene ta ti basenzi ti aChinois so a kä ni, nduru na million 70 ti dollar na Londres, na Angleterre. A yeke polele so mbeni zo ti lekengo ta alingbi ti mû senge sese lo leke ni aga mbeni pendere ta so ngere ni ayeke ngangu. Ye oko, mbeni zo ti lekengo ta oko alingbi ti haka tere ti lo na Jéhovah ape. Na lango omene ti création, Nzapa amû “pupu-sese ti sese” lo sara na kozo koli so ayeke nzoni-kue nga lo mû na lo ngangu ti sara ye tongana ti Walekengo lo (Gen. 2:7). A yeke na lege ni so a iri Adam, koli so ayeke nzoni-kue so a sara lo na sese so, “molenge ti Nzapa.”—Luc 3:38.

2, 3. Tongana nyen la e lingbi ti duti na mara bango ndo ti azo ti Israël so achangé bê ti ala lani?

² Me, na ngoi so Adam asara kpengba-li lani na Wasarango lo, lo yeke molenge ti lo encore ape. Ye oko, na yâ ti mbaï ti azo, amolenge ti Adam “mingi mingi” asoro Jéhovah tongana Gbia ti ala (aHéb. 12:1). So ala mä yanga nga ala woko tere na gbe ti Zo so acréé ala, ala fa so ala ye ti tene lo duti Babâ ti ala nga Zo ti lekengo ala, me pëpe Satan (Jean 8:44). So ala duti be-ta-zo na Nzapa adabe ti e na tënë so Ésaïe atene na ndo ti azo ti Israël so achangé  bê ti ala, lo tene: “O L’Éternel, Mo yeke Babâ ti e; e yeke ndô, na Mo yeke Wasongota so aleke e; e kue e yeke ye so tïtî Mo asara.”—És. 64:7.

³ Laso nga kue, azo kue so ayeke voro Jéhovah na yingo nga na tâ tënë ayeke sara kue ti sara tere ti ala kete nga ti woko tere na gbe ti Jéhovah. Ala bâ so a yeke mbeni pasa ti iri Jéhovah Babâ nga ti woko tere na gbe ti lo ndali ti so lo yeke Zo ti lekengo ala. Mo bâ tere ti mo tongana mbeni sese ti sarango na ta so awoko na yâ ti maboko ti Nzapa? Mo yeke yeda hio ti tene lo leke mo si mo ga tongana mbeni ta so ayeke pendere na lê ti lo? Mo yeke bâ nga aita ti mo tongana mbeni ye so Nzapa angbâ ti sara kua na ndo ni yeke yeke? Ti mû maboko na e na ndo ti tënë so, zia e bâ alege ota so Jéhovah ayeke sara na kua tongana Zo ti lekengo e: (1) tongana nyen la lo yeke soro azo so lo yeke leke ala, (2) ndani so lo yeke leke ala nga (3) tongana nyen la lo yeke leke ala.

4. Tongana nyen la Jéhovah ayeke soro azo so lo yeke gboto na mbage ti lo? Mû ambeni tapande.

⁴ Tongana Jéhovah ayeke bâ azo, lo yeke bâ pëpe gi ye so lê ti e azo ayeke bâ. Me lo yeke bâ gi bê ti zo, zo ti yâ ni. (Diko 1 Samuel 16:7b.) A yeke ye so asigigi polele na ngoi so Jéhovah asara si congrégation ti aChrétien abâ gigi lani. Jéhovah agboto na mbage ti lo nga na Molenge ti lo azo mingi so na bango ndo ti zo ala kpa ye oko ape (Jean 6:44). Tapande ti mbeni zo ni ayeke ti mbeni Farizien so iri ti lo ayeke Saul, “mbeni zo ti zongango ndo, zo ti sarango ye ti ngangu na azo ti [Christ Jésus] nga zo ti sioni yanga.” (1 Tim. 1:13). Me Jéhovah so “atara bê ti azo” abâ Saul tongana senge sese ape (aProv. 17:3). Nzapa abâ so a lingbi ti leke lo ti ga mbeni pendere ta, “mbeni ta so [Nzapa asoro] ni awe” ti fa tënë “na amara, agbia nga na amolenge ti Israël.” (Kus. 9:15). Na popo ti ambeni zo so Nzapa abâ so ala lingbi ti ga ata “ndali ti kota kusala”, mo yeke wara azo so kozo ayeke angbâ ti sämba, azo ti sarango lango-sioni nga na azo ti nzi (aRom. 9:21; 1 aCor. 6:9-11). Na ngoi so ala hinga Mbeti Nzapa nzoni, mabe so ala yeke na ni na Jéhovah akpengba nga ala zia si lo leke ala.

5, 6. So e bâ Jéhovah tongana Zo ti lekengo e, a lingbi e duti na bango ndo wa na ndo ti (a) azo ti territoire ti e? (b) aita ti e?

⁵ Ye so e londo ti bâ so alingbi ti mû maboko na e tongana nyen? So e hinga na bê ti e kue so Jéhovah ayeke na ngangu ti hinga ye so ayeke na bê ti zo nga ti gboto azo so lo soro na mbage ti lo, a sara si e yeke fâ ngbanga na ndo ti azo pëpe atâa na yâ ti territoire wala na yâ ti congrégation ti e. Bâ tapande ti mbeni koli so iri ti lo ayeke Michael. Lo tene: “Lani tongana aTémoin ti Jéhovah ayeke ga na ndo ti mbi, mbi yeke kanga porte na ndo ti mbi nga mbi yeke sara sanka ti ala. Mbi ne ala oko ape. Mbeni lâ, mbi tingbi na mbeni sewa so mbi ye ala mingi ndali ti nzoni sarango ye ti ala. Na pekoni, li ti mbi akpe ti hinga so ala yeke aTémoin ti Jéhovah. Sarango ye ti ala apusu mbi ti bâ ndani so mbi ke aTémoin ti Jéhovah. Kete na pekoni, mbi ga ti bâ so a yeke ndali ti aye so mbi hinga ape na ndo ti aTémoin ti Jéhovah nga mvene so azo atene na ndo ti ala la asara si mbi ke ala me a yeke pëpe ndali ti so ala sara mbeni sioni ye.” Ti hinga tâ tënë, Michael ayeda ti manda Bible. Na pekoni, lo wara batême nga lo ga wakua ti ngoi kue.

⁶ Tongana e bâ Jéhovah tongana Zo ti lekengo e, a yeke sara nga si e duti na nzoni bango ndo na ndo ti amba ti e Chrétien. Mo yeke bâ aita ti mo tongana ti so Nzapa ayeke bâ na ala? Mo yeke bâ ala tongana mbeni kua so a de a hunzi ni ape me so a ngbâ ti sara ni? Nzapa alingbi ti bâ ye so ayeke na bê ti zo nga mara ti zo wa la lo lingbi ti sara si mbeni zo aga ni. Tongaso, Jéhovah ayeke na nzoni bango ndo na ndo ti azo me lo yeke luti pëpe na  ndo ti awokongo ti ala so ayeke hon hongo (Ps. 130:3). E lingbi ti sara ye tongana lo na lege so e gi ti duti na nzoni bango ndo na ndo ti awakua ti lo. E lingbi ti sara kua legeoko na Zo ti lekengo e na lege so e yeke mû maboko na aita ti e na ngoi so ala yeke sara kue ti gue na li ni (1 aThes. 5:14, 15). A lingbi ‘akoli so a mû ala tongana amatabisi’ amû li ni ti sara ni.—aÉph. 4:8, 11-13.

7. Ngbanga ti nyen la mo bâ sengo ndo ti Jéhovah na nene ni?

⁷ Peut-être mo mä awe mbeni zo so atene: ‘Gi na ngoi so mbi wara amolenge ti mbi wani la mbi ga ti bâ na nene ni asengo ndo so mbi wara lani na mbage ti babâ na mama ti mbi.’ Tongana e yeke kono, bango ndo ti e na ndo ti sengo ndo alingbi ti changé nga e yeke bâ so Jéhovah andoye e la lo se e so. (Diko aHébreu 12:5, 6, 11.) Biani, so Jéhovah aye e amolenge ti lo mingi, lo yeke kanga bê na e na ngoi so lo yeke leke e. Lo ye ti tene e sara ye na ndara, e duti na ngia nga e kue e ye lo (aProv. 23:15). A nzere na lo oko ape ti bâ e na bango pasi; lo ye nga pëpe si e kui tongana “amolenge so [a] lingbi na ngonzo ti Nzapa”, so ayeke ye ti héritier so e wara na lege ti Adam.—aÉph. 2:2, 3.

8, 9. Tongana nyen la Jéhovah ayeke fa ye na e laso? Tongana nyen la lo yeke ngbâ ti fa ye na e mingi na yâ ti ngoi so ayeke ga?

⁸ So e yeke “amolenge so e lingbi na ngonzo ti Nzapa”, kozo si e hinga Jéhovah, peut-être e yeke lani na asioni sarango ye mingi. Me Jéhovah aleke e nga lo mû maboko na e ti changé. Na nda ni, e yeke fadeso na anzoni sarango ye (És. 11:6-8; aCol. 3:9, 10). Tongaso, a bâ ndo so Jéhovah ayeke leke e laso na yâ ni so tongana mbeni paradis na lege ti yingo. Atâa so e yeke na yâ ti sioni dunia so, e duti nzoni nga na siriri. Na ndo ni, azo so akono na yâ ti sewa so ndoye nga na mango tere ayeke dä ape, awara fadeso aita so andoye ala biani na yâ ti paradis ti yingo so (Jean 13:35). E manda nga tongana nyen ti ndoye amba ti e. Kota ye ni kue ayeke so, e hinga Jéhovah nga e bâ laso tongana nyen la lo yeke babâ so aye e mingi.—Jacq. 4:8.

⁹ Na yâ ti fini dunia, e yeke wara gbâ ti anzoni ye na lege ti paradis ti yingo. E yeke duti nga na fini na yâ ti paradis na ndo ti sese na gbe ti komandema ti Royaume ti Nzapa. Na ngoi ni so, Jéhovah ayeke ngbâ lakue ti leke e nga lo yeke fa ye na e na mbeni lege so ahon gbungo li ti e (És. 11:9). Jéhovah ayeke sara ande nga si pensé ti e nga na tere ti e aga nzoni-kue, tongaso si e lingbi ti hinga aye so lo yeke fa na e nga ti sara ye alingbi na ni kue. Tongaso, zia e leke na bê ti e ti ngbâ ti woko tere na gbe ti Jéhovah, ti fa na lo so e bâ kusala ti lo ti lekengo e tongana mbeni ye so afa so lo ye e.—aProv. 3:11, 12.

10. Tongana nyen la Jésus sara ye lani na kangango bê nga na kode tongana ti Kota Zo ti lekengo e?

¹⁰ Legeoko tongana mbeni zo ti lekengo ta so ahinga kua ti lo nzoni, Jéhovah ahinga e nzoni mingi. (Diko Psaume 103:10-14.) Lo yeke sara ye na zo oko oko alingbi na wokongo ti lo, ngangu ti lo nga na dutingo ti lo na lege ti yingo. Bango ndo ti lo na mbage ti awakua ti lo so ayeke na siokpari na tere ti ala asigigi lani na yâ ti sarango ye ti Molenge ti lo. Bâ ye so lo sara na ngoi so abazengele ti lo apapa na popo ti ala, mbilimbili ti hinga zo wa la ayeke kota na popo ti ala. Tongana mo yeke lani dä na ngoi ti sioni papa ti abazengele so, mo yeke bâ ala tongana azo so asara tere ti ala kete nga so awoko na yâ ti maboko ti Nzapa? Me Jésus aduti na sioni bango ndo na ndo ti ala lani ape. Lo hinga so anzoni wango so lo yeke mû na ala lakue nga tapande ti lo ti sarango tere kete so ala bâ alingbi ti mû maboko na ala ti changé (Marc 9:33-37; 10:37, 41-45; Luc 22:24-27). Na peko ti so a zingo Jésus na kuâ nga yingo vulu aga na ndo  ti abazengele ni, ala zia lê ti ala na ndo ti kota ndo wala yango iri encore ape, me na ndo ti kua so a mû na ala ti sara.—Kus. 5:42.

11. Na alege wa la David afa lani so lo yeke tongana sese ti sarango na ta so awoko? Tongana nyen la e lingbi ti sara ye tongana lo?

¹¹ Jéhovah ayeke leke awakua ti lo laso kozoni kue na lege ti Bible, yingo vulu ti lo nga na congrégation. Bible alingbi ti leke e tongana e zia ambeni ye na gbele e na ngoi so e yeke diko ni, tongana e gbu li na ndo ni nga e hunda na Jéhovah ti mû maboko na e ti sara ye alingbi na ye so e diko. David atene: “Na ndo tange ti mbi, tongana mbi dabe mbi na Mo, mbi bi bê ti mbi na Mo na bï kue.” (Ps. 63:7). Lo tene nga: “Mbi sara tënë nzoni na L’Éternel, Lo so amû wango na mbi; biani, bê ti mbi awa mbi na bï.” (Ps. 16:7). Biani, David azia si wango ti Jéhovah ague na gbe ti bê ti lo ti leke apensé nga na atënë ti bê ti lo, même tongana wango ni ayeke ngangu mingi (2 Sam. 12:1-13). David azia tâ na e pendere tapande ti sarango tere kete nga ti wokongo tere. Mo kue mo yeke gbu li na ndo ti Mbeti ti Nzapa, mo yeke zia si a gue a ndu gbe ti bê ti mo? Mo lingbi ti sara ni encore ahon ti so?—Ps. 1:2, 3.

12, 13. Tongana nyen la Jéhovah ayeke leke e na lege ti yingo vulu nga na congrégation?

¹² Yingo vulu alingbi ti leke e na alege mingi. Na tapande, yingo vulu alingbi ti mû maboko na e ti gi ti duti na asarango ye ti Christ, so na yâ ni a yeke wara lengo ti yingo (aGal. 5:22, 23). Mbeni mbage ti lengo ti yingo so ayeke ndoye. E ndoye Nzapa, e ye ti mä yanga ti lo nga e ye ti tene lo leke e ndali ti so e hinga so acommandement ti lo ayeke nengo ye ape. Yingo vulu alingbi nga ti mû ngangu na e ti ke dunia so nga na sioni bibe so ayeke na yâ ni (aÉph. 2:2). Na ngoi so bazengele Paul ayeke lani maseka, akota zo ti Nzapa ti aJuif so asara ye na baba apusu nga lo ti sara ye na baba mingi. Na peko ti so yingo vulu asara si lo changé, lo tene: “Mbi wara ngangu ti sara aye kue ndali ti lo so lo mû ngangu ni na mbi.” (aPhil. 4:13). Tongaso, legeoko tongana Paul, zia e ngbâ lakue ti sambela ti hunda yingo vulu. Jéhovah ayeke kanga mê pëpe na asambela ti azo so asara tere ti ala kete si ayeke sara na lo na bê ti ala kue.—Ps. 10:17.

 ¹³ Jéhovah ayeke leke e oko oko na lege ti congrégation nga na azo so ayeke bâ ndo na ndo ni. Na tapande, tongana a-ancien abâ so e yeke na akpale na lege ti yingo, ala yeke gi ti mû maboko na e. Ala yeke sara ni na lege ti ndara ti ala wani ape (aGal. 6:1). Me ala yeke sara tere ti ala kete, ala yeke hunda na Nzapa ti mû na ala ndara nga ti sara si ala bâ yâ ti aye nzoni. So ala hinga akpale ti e ni awe, ala yeke sara ye alingbi na asambela ti ala na lege so ala yeke sara recherche na yâ ti Bible nga na ambeti ti e. Ye so asara si ala yeke mû maboko na e alingbi na abezoin ti e. Tongana ala ga ti mû wango na mo na nzoni bê nga na ndoye, na tapande na ndo ti fason ti yungo bongo ti mo, mo yeke bâ ni tongana ndoye la Nzapa afa na mbage ti mo nga mo yeke yeda na ni? Tongana mo sara tongaso, andâ mo fa so mo ye ti duti na yâ ti maboko ti Jéhovah tongana mbeni sese ti sarango na ta so awoko nga mo ye si lo leke mo ndali ti nzoni ti mo.

14. Atâa so Jéhovah ayeke na ngangu na ndo ti e, tongana nyen la lo fa so lo bâ liberté ti e na nene ni?

¹⁴ Tongana e hinga lege so Nzapa ayeke leke na e, a yeke sara si e yeke duti na nzoni songo na aita ti e nga e yeke duti na nzoni bango ndo na mbage ti azo ti territoire ti e, même azo so e yeke manda Bible na ala. Giriri, mbeni zo ti lekengo ta ayeke de mbeni sese tongaso na hio lo yeke komanse ti leke na ta ape. Lo yeke leke sese ti sarango na ta ni kozoni si. Na mbeni lege, lo yeke zi atênë nga na ambeni ye so ayeke na yâ ni. Na lege ti yingo, Nzapa ayeke mû maboko na azo so aye ti tene lo leke ala. Lo yeke gbu ala na ngangu ti changé ape, me lo yeke fa na ala andia ti lo so ayeke mbilimbili tongaso si ala lingbi ti zi asioni ye na yâ ti fini ti ala, wala ti sara achangement na bê ti ala wani.

15, 16. Tongana nyen la azo so e yeke manda Bible na ala yeke fa so ala ye ti tene Jéhovah aleke ala? Mû mbeni tapande.

¹⁵ Bâ tapande ti Tessie, mbeni ita-wali na Australie. Ita-wali so amanda Bible na lo atene: “A yeke lani ngangu na Tessie ape ti manda tâ tënë ti Bible. Ye oko, lo gue na li ni hio ape, lo yeke ga même na abungbi ape. Tongaso, na peko ti so mbi sambela mingi na ndo ni, mbi mû desizion ti zia lege ti étude ni. Me mbeni ye ti kpene asi. Na lango so mbi pensé mbi tene tanga ti étude ti e la, Tessie afa na mbi ye so ayeke na yâ ti bê ti lo. Lo tene so lo bâ so lo yeke sara ye tongana zo ti handango lê ti zo ndali ti so lo ye sarango angia ti nginza mingi. Me lo tene so fadeso, lo mû desizion awe ti zia lege ni.”

¹⁶ Kete na pekoni, Tessie akomanse ti gue na abungbi nga ti sara ye tongana Chrétien, même na ngoi so amba ti lo ayeke he lo. Ita-wali ni akiri atene: “A si na mbeni ngoi, Tessie awara batême nga na pekoni lo ga pionnier permanent atâa so lo yeke na akete molenge ota.” Biani, na ngoi so awamandango Bible akomanse ti sara achangement ti nzere na lê ti Nzapa, lo yeke ga nduru na ala nga lo yeke leke ala ti ga apendere ta na lege ti yingo.

17. (a) Nyen la anzere na mo na mbage ti Jéhovah so ayeke Zo ti lekengo mo? (b) Mbeni lege ti lekengo e wa la e yeke sara ande tënë na ndo ni na yâ ti article ti peko?

¹⁷ Laso nga kue, a ngbâ ti leke ata na maboko. Azo ti lekengo ta ni ayeke sara kua nzoni na aye ti kua ti ala. Legeoko nga, Zo ti lekengo e ayeke sara kua nzoni na awango ti lo ti leke e nga lo yeke bâ wala e yeke sara ye alingbi na awango ni. (Diko Psaume 32:8.) Mo bâ so Jéhovah ayeke bi bê na mo wani? Mo bâ so Jéhovah ayeke leke mo nzoni? Tongana mo yeda, asarango ye wa la ayeke mû maboko na mo encore ti ngbâ tongana sese ti sarango na ta so awoko na maboko ti Jéhovah? Asarango ye wa la a lingbi mo kpe ni si mo ga pëpe mbeni kpengbango sese ti sarango na ta? Tongana nyen la ababâ na amama alingbi ti sara kua maboko na maboko na Jéhovah ti leke amolenge ti ala? E yeke wara akiringo tënë ni na yâ ti article ti peko.