Aye ti sara tënë ti angangu turugu ti yayu so amû mbage lani na futingo Jérusalem nga so ayeke mû mbage ande na futingo sioni dunia ti Satan so na ngoi ti Harmaguédon. Ngbanga ti nyen ayeke na lege ni ti changé fason ti gbungo nda ti ye ti e na ndo ti tënë so?

Na peko ti so Ézéchiel abâ asioni ye so a-apostat asara na Jérusalem kozo si a futi ni na ngu 607 kozo ti Christ, lo bâ na yâ ti mbeni suma aye so asi na peko ti tere juska na futingo ni. Lo bâ akoli omene so ayeke na aye ti bira. Lo bâ nga na popo ti ala mbeni koli so ayü “bongo ti lin” nga lo yeke “na nza ti encre ti écrivain”. (Ézéch. 8:6-12; 9:2, 3). A tene na koli so: “Mo gue, mo hon na yâ kodoro, . . . na mo zia marque na ndo lê ti azo so abima, ala so atoto teti ye kue ti sioni mingi so azo asara na yâ ni.” Na pekoni, a tene na akoli so ayeke na aye ti bira ni ti fâ azo kue ti yâ ti gbata ni so marque ayeke na ndo ti lê ti ala ape (Ézéch. 9:4-7). Nyen la suma so afa na e? Koli so akanga na yâ ti lo nza so encre ti écrivain ayeke na yâ ni so ayeke zo wa?

Ézéchiel abâ suma so na ngu 612 kozo ti Christ. Ngu oku na pekoni, tënë ni aga tâ tënë ti kozoni, na ngoi so aturugu ti Babylone afuti Jérusalem. Na sarango tongaso, Jéhovah sara kua na azo ti Babylone ti punir na azo ti lo so amä yanga lani ape (Jér. 25:9, 15-18). Ka ti aJuif so ayeda lani pëpe na asioni sarango ye ti azo ti yâ ti gbata ni so ayeke tongana nyen? Jéhovah asara si a sö ala.

Ézéchiel amû mbage lani na ziango marque na ndo ti lê ti azo nga na yâ ti bira ni ape. Me, a-ange la amû li ni lani na futingo Jérusalem. Tongaso, prophétie so amû lege na e ti bâ aye so apassé na yayu. Jéhovah atene na a-ange ti leke ti tene a futi azo ti sioni nga ti bâ si a futi anzoni zo ape. *

Ândö, e tene so na ngoi ti gango tâ tënë ti prophétie so na ngoi ti e, koli so akanga na yâ ti lo nza so encre ti écrivain ayeke na yâ ni so aye ti sara tënë ti tanga ti aChrétien so a soro ala ti gue na yayu. E pensé so a zia marque ti fini fadeso awe na ndo ti lê ti azo so ayeda na tënë so e yeke fa. Me na yâ ti angu so ahon ade ti ninga ape, e bâ polele so ayeke na lege ni ti changé fason ti fango nda ti tënë so. Ti gue oko na tënë so ayeke na Matthieu 25:31-33, Jésus la a mû na lo kua ti fango ngbanga. A yeke ye so lo yeke sara ande na ngoi ti kota ye ti vundu. Lo yeke zia azo so ayeke tongana ataba, so ayeke sö kuâ ande nde, na azo so ayeke tongana angasa, so a yeke futi ala nde.

Tongaso, ti gue oko na changement so, nyen la e manda na lege ti suma ti Ézéchiel so? Aye oku tongaso:

1. Kozo si a futi Jérusalem, Ézéchiel na Jérémie asara kua lani tongana zo ti bembengo ndo gi tongana ti so Ésaïe asara kozo. Laso, Jéhovah ayeke sara kua na mbeni kete groupe ti aChrétien so a soro ala ti gue na yayu ti mû kobe na awakua ti lo nga ti wa azo kozo si kota ye ti vundu ato nda ni. Nga, azo ti Nzapa kue, so ti tene azo ti kua ti Christ, ayeke mû mbage na yâ ti kua ti wango azo so.—Mat. 24:45-47.

2. Ézéchiel amû mbage lani pëpe na ziango tâ marque na ndo ti lê ti azo ti tene ala sö kuâ; même awakua ti Jéhovah ti laso nga kue. Ala yeke fa gi tënë na azo nga ala yeke wa ala na ndo ti aye so ayeke si ande. A-ange ayeke mû maboko na yâ ti kua  ti fango tënë so a yeke sara na yâ ti dunia kue.—Apoc. 14:6.

3. Na ngoi ti Ézéchiel, zo oko awara pëpe mbeni tâ marque na ndo ti lê ti lo. Laso nga kue ayeke tongaso. Nyen la a lingbi azo asara ti wara marque na lege ti fä ti sö kuâ ande? A lingbi ala yeda na tënë so e yeke fa, ala duti na sarango ye ti aChrétien, ala mû tere ti ala na Jéhovah nga ala mû maboko na aita ti Christ (Mat. 25:35-40). Azo so asara aye so ayeke wara ande marque ti sö kuâ na ngoi ti kota ye ti vundu so ayeke ga.

4. Ti ngoi ti e laso, koli so akanga na yâ ti lo nza so encre ti écrivain ayeke na yâ ni so, aye ti sara tënë ti Jésus Christ, so ayeke zia marque na ndo ti lê ti azo so ayeke sö kuâ ande. Azo mingi mingi ayeke wara marque ti ala ande na ngoi so a yeke bâ ala tongana ataba na ngoi ti kota ye ti vundu. Na pekoni, ala yeke wara pasa ti ngbâ na fini lakue lakue na ndo ti sese ge.—Mat. 25:34, 46. *

5. Ti ngoi ti e laso, akoli omene so ayeke na aye ti bira so, aye ti sara tënë ti angangu turugu ti Jésus so Jésus wani ayeke na li ti ala. Na yâ ti ngoi kete ala yeke futi ande amara nga na asioni ye kue.—Ézéch. 9:2, 6, 7; Apoc. 19:11-21.

Tongana e mä yâ ti akpengba ye ti manda so, e yeke kiri ti duti na confiance mingi na Jéhovah so ayeke futi azo ti mbilimbili pëpe na ngoi so lo yeke futi azo ti sioni (2 Pi. 2:9; 3:9). Aye so e manda adabe ti e nga so a yeke kota ye mingi ti fa tënë laso. A lingbi azo kue amä wango kozo si nda ni aga.—Mat. 24:14.