Mo diko a-article ti Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Ngbanga ti nyen Jéhovah ayeda lani na bira na ngoi ti azo ti Israël?

Jéhovah ayeke ndoye. Ye oko, na ambeni ngoi, lo mû yanga ti tene awakua ti lo atiri bira na ngoi so ambeni zo asara lani pasi nga na asioni ye mingi na ala. Nzapa lo wani la afa lani zo so ayeke tiri bira ni nga na ngoi ni.—w15 1/11, l. 4-5.

Akpengba ye wa la ababâ na amama alingbi ti sara ti fa na amaseka ti ala ti sara na Jéhovah?

A yeke kota ye ti tene ababâ na amama aye amaseka ti ala nga ala fa so ala sara tere ti ala kete na lege ti tapande ti ala. A yeke nga kota ye ti tene ala sara ye na ndara nga ala comprendre amaseka ti ala.—w15 15/11, l. 9-11.

Ngbanga ti nyen a lingbi e bâ pape pëpe tongana zo so asara kua na peko ti Pierre?

Matthieu 16:17, 18 atene pëpe so bazengele Pierre la ayeke duti li ti congrégation. Bible afa so ahon ti tene a bâ Pierre tongana kota zo, Jésus la ayeke kozo tênë ti gere ti congrégation (1 Pi. 2:4-8).—w15 1/12, l. 12-14.

Aye wa la a lingbi e gbu li ti e na ndo ni kozo si e sara tënë?

Ti sara si tënë ti yanga ti e aduti nzoni, a lingbi e bata na li (1) ngoi so e lingbi ti sara tënë (Zo-ti. 3:7), (2) ye so e lingbi ti tene (aProv. 12:18), nga na (3) fason so e lingbi ti sara na tënë ni (aProv. 25:15).—w15 15/12, l. 19-22.

Ambeni sarango ye so ayeke na lege ni ape so a lingbi aChrétien akpe ni ayeke so wa?

Atâ Chrétien ayeke kpe ti tene mvene na amba ti ala nga ti pa ala. Ala yeke handa pëpe amba ti ala ti wara nginza wala mbeni ye na maboko ti ala, ala yeke tene pëpe asioni tënë ti wataka ti buba na iri ti amba ti ala, ala yeke sara ye ti likisi ape nga ala yeke nzi ape.—wp16.1, l. 5.

Azo wa la ayeke lani “aprêtre-mokonzi” so a sara tënë ti ala na yâ ti Bible so?

Tënë “aprêtre-mokonzi” aye mbilimbili ti sara tënë ti akota membre ti yâ ti bungbi ti aprêtre, so a lingbi ti wara na popo ti ala ambeni kota zo ti yâ ti sewa ti akota prêtre nga na ambeni ngbene kota prêtre.—wp16.1, l. 10.

A lingbi e sara ye tongana nyen na mbage ti mbeni zo so ate mapa na anyon vin na ngoi ti Dango bê na kuâ ti Christ?

A-Chrétien ayeke yä pëpe iri ti azo so ate mapa na anyon vin. Mbeni zo so a soro lo biani ti gue na yayu ayeke yeda ape ti tene a yä iri ti lo. Lo yeke yeda pëpe ti fa na azo so Nzapa asoro lo ti gue na yayu (Mat. 23:8-12).—w16.01, l. 23-24.

Nyen la e lingbi ti manda na ndo ti lege so Abraham aga lani kamarade ti Nzapa na ni?

Abraham ahinga lani Nzapa, peut-être na lege ti Sem. Nga lo manda aye mingi na ndo ti fason so Nzapa asara ye na mbage ti lo nga na afami ti lo. E nga kue e lingbi ti tara ti sara legeoko tongaso.—w16.02, l. 9-10.

Achapitre nga na anuméro ti versê ti yâ ti Bible abâ gigi tongana nyen?

Na yâ ti angu so aga na peko ti ngu 1200, Stephen Langton, mbeni bua so ayeke Anglais, la akangbi yâ ti Bible na achapitre. A-Juif so asû peko ti Bible, la akangbi lani kozoni kue mbage ti Mbeti ti Nzapa so alondo na Genèse ti si na Malachie, na aversê. Nga na yâ ti angu 1550 tongaso, Robert Estienne, mbeni wandara so ayeke Français, la akangbi ti lo yâ ti Mbeti ti Nzapa so alondo na Matthieu ti si na Apocalypse, na aversê.—wp16.2, l. 14-15.

Satan ague lani biani na Jésus na temple na ngoi so lo tara lo?

E hinga mbilimbili ape. Matthieu 4:5 nga na Luc 4:9 aye peut-être ti tene so lo gue na Jésus kâ na yâ ti mbeni ye tongana suma wala lo luti na mbeni ndo so ayo na nduzu mingi na yâ ti temple ni.—w16.03, l. 31-32.

Na alege wa la fango tënë ti e ayeke tongana ngu ti pere?

Angu ti pere ayeke sigigi yeke yeke, ayeke dë bê ti zo nga ayeke bata fini. Biani ngu ti pere ayeke mbeni tufa ti Nzapa (Deut. 33:13). Ngangu so awakua ti Nzapa ayeke sara na fango tënë nga ayeke legeoko tongaso.—w16.04, l. 4.