1. Wango wa la bazengele Paul amû lani na aChrétien so a soro ala ti gue na yayu?

BAZENGELE PAUL amû lani wango so: “Ala zia ti mû lege na aye ti ngoi so ti changé sarango ye ti ala.” (aRom. 12:2). Paul amû lani wango so na akozo Chrétien. Ngbanga ti nyen la lo mû lani ngangu wango so na akoli na awali so amû terê ti ala na Nzapa awe nga so a soro ala na lege ti yingo vulu ti gue na yayu?​—aRom. 1:7.

2-3. Tongana nyen la Satan ayeke gi ti sara si e ke Jéhovah? E lingbi ti sara nyen ti zi na yâ ti li ti e aye so “gere ni aluti ngangu”?

² Paul agi lani bê ti lo ndali ti so na bango ni ambeni Chrétien azia lani si asioni pensé ti dunia, so ayeke na gbe ti komandema ti Satan, asara ngangu na ndö ti ala (aÉph. 4:17-19). Ye so alingbi nga ti si na e oko oko kue. Satan, nzapa ti dunia so, ayeke sara kua na akode nde nde ti sara si e ke Jéhovah. Na tapande, tongana e ye ti wara kota ndo wala ti duti zo so iri ti lo awu mingi, Satan ayeke sara kua na bibe so ti gi ti sara si e ke Jéhovah. Lo lingbi même ti sara kua na aye so asi na e lani, angobo ti e wala mandango mbeti ti e ti sara si e pensé tongana ti so lo ye.

³ Eskê lege ayeke dä ti zi na yâ ti li ti e aye so “gere ni aluti ngangu”? (2 aCor. 10:4). Bâ tongana nyen la Paul akiri tënë na  hundango ndo so: “E yeke kinda atënë so ayeke na lege ni pëpe nga na kota ye kue so alondo ti ke hingango ye ti Nzapa. Na e mû bibe kue na ngbâa ti sara si bibe ni amä yanga ti Christ.” (2 aCor. 10:5). Biani, tongana Jéhovah amû maboko na e, e lingbi ti zi asioni bibe so e yeke na ni. Legeoko tongana ti so yorö alingbi ti zi asioni ye so poison ayeke sara na zo, Bible alingbi ti mû maboko na e ti zi asioni ye so dunia ti Satan asara na ndö ti e.

4. Achangement wa la mingi ti e adoit lani ti sara na ngoi so e yeda na tâ tënë pan?

⁴ Kiri mo gbu li na ndö ti achangement so mo doit lani ti sara na ngoi so mo yeda na tâ tënë ti Bible pan nga mo mû desizion ti sara na Jéhovah. Ti azo mingi na popo ti e, a hunda lani ti tene ala zia ti sara asioni ye (1 aCor. 6:9-11). E kiri singila mingi na Jéhovah ndali ti so lo mû maboko na e ti hon ndö ti asioni sarango ye ti e!

5. Aye use wa la aRomain 12:2 atene na e ti sara?

⁵ Ye oko, a lingbi e bâ lâ oko ape so e bezoin pëpe ti ngbâ ti sara achangement. Atâa so e zia lege ti sarango akota siokpari so e yeke sara lani kozo na batême ti e, e yeke lakue na bezoin ti sara kue ti ke aye kue so alingbi ti pusu e ti kiri na terê ti asioni ye so e yeke sara lani. E lingbi ti sara ni tongana nyen? Paul akiri tënë, lo tene: “Ala zia ti mû lege na aye ti ngoi so ti changé sarango ye ti ala, me ala changé na lege so ala sara si bibe ti ala akiri fini ni.” (aRom. 12:2). Tongaso, a lingbi e sara aye use. Kozoni, a lingbi e “zia ti mû lege na” dunia so “ti changé” e, wala ti sara ngangu na ndö ti e. Use ni, a lingbi e “changé” fason so e yeke pensé na ni.

6. Nyen la atënë ti Jésus so ayeke na Matthieu 12:43-45 afa na e?

⁶ Changement so Paul apensé na ni andu aye mingi ahon gï ti changé aye so lê ti azo abâ. Changement so andu aye kue na yâ ti fini  ti e. (Bâ encadré “ Mo changé vrai wala mo changé gï ye so lê ti zo abâ?”) A lingbi fason so e yeke pensé na ni achangé kue. So ti tene abango ndo ti e, atënë ti bê ti e nga na anzara ti bê ti e adoit ti changé. Ni la a lingbi e kue e hunda terê ti e: ‘Achangement so mbi yeke sara ti ga mbeni Chrétien angbâ gï na ndö ti aye so lê ti azo abâ, wala na gbe ti bê ti mbi kâ, mbi yeke changé biani ti ga Chrétien?’ Changengo aye so lê ti azo abâ ayeke nde mingi na changengo aye so ayeke na yâ ti bê ti e. Na yâ ti atënë so Jésus atene na Matthieu 12:43-45, lo fa ye so e bezoin ti sara. (Diko ni.) Atënë so afa na e kpengba tâ tënë so: Gï ti zi asioni pensé alingbi ape; e bezoin ti zia na place ni apensé so anzere na Nzapa.

7. Tongana nyen la e lingbi ti changé zo ti yâ ni ti e?

⁷ Eskê lege ayeke dä ti changé bibe so ayeke fa lege na e wala ti changé biani zo ti yâ ni ti e? Bible akiri tënë atene: “A yeke nzoni ala ngbâ lakue ti sara si bibe so ayeke fa lege na ala akiri fini ni, na a yeke nzoni ala ngbâ lakue ti yü fini zo so a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo.” (aÉph. 4:23, 24). Biani, lege ayeke dä ti changé zo ti yâ ni ti e, me sarango ni ayeke kete ye ape. A lingbi e ngbâ gï pëpe na ndö ti kengo ti sara ye alingbi na asioni nzara ti bê ti e wala ti zia lege ti sarango asioni ye. Me a lingbi e changé “bibe so ayeke fa lege na” e. Ye so aye ti tene e changé anzara ti bê ti e, asarango ye ti e nga na abibe so apusu e ti sara ye. Ye so ahunda ti sara ngangu lakue.

8-9. Tongana nyen la ye so asi na mbeni ita-koli afa so e bezoin ti changé zo ti yâ ni ti e?

⁸ Zia e bâ tapande ti mbeni ita-koli so ândö lo yeke zo ti sarango ye ti ngangu na zo. Na peko ti so lo zia lege ti nyongo sämba nga na tiringo na azo, lo lingbi awe ti wara batême. Ye so ayeke lani mbeni pendere témoignage na yâ ti kete kodro so lo yeke dä. Me a ninga mingi ape na peko ti batême ti lo, na mbeni lakui, lo wara mbeni tara so lo ku terê ti lo na ni ape. Mbeni koli so asoulé aga na yanga-da ti lo na lo ye ti tiri na ita ni. Na tongo nda ni ita ni akanga bê lo tiri na lo ape. Me na nda ni, na ngoi so koli ni atene sioni tënë ti Jéhovah, ngonzo agbu ita ni ngangu na lo kanga bê gbä. Lo sigi lo pika koli ni. Nyen la asara si lo pika koli ni? Atâa so mandango Bible amû maboko na lo ti kanga nzara so lo yeke na ni ti tiri, ade lo changé bibe so ayeke fa lege na lo ape. So ti tene ade lo changé biani zo ti yâ ni ti lo ape.

⁹ Ye oko, ita-koli so adécouragé ape (aProv. 24:16). Grâce na mungo maboko ti a-ancien, lo ngbâ lani ti maï nzoni. Na nda ni lo ga ancien. Na pekoni, na mbeni lakui, na devant ti Da ti Royaume lo tingbi na tara so akpa ti so lo wara lani asara ambeni ngu awe. Mbeni koli so asoulé aye ti pika mbeni ancien. Nyen la ita-koli so asara? Lo sara terê ti lo kete, lo sara tënë yeke na koli ni na bê ti koli ni ade, na pekoni lo mû maboko na koli ni ti kiri na yanga-da. Ngbanga ti nyen la ita-koli so asara ye nde na ti kozo? Ita ni achangé bibe so ayeke fa lege na lo. Na gbe ti bê ti lo kâ, lo changé lo ga zo so aye siriri nga so asara terê ti lo kete. Ye so amû gonda na Jéhovah.

10. Nyen la a lingbi e sara ti changé zo ti yâ ni ti e?

¹⁰ Achangement so ayeke si gï hio tongaso ape nga a lingbi zo asara ngangu si lo sara ni. Peut-être e bezoin ti “sara ngangu” ti sara achangement so na yâ ti angu mingi (2 Pi. 1:5). E yeke sara pëpe achangement so gï ndali ti so e yeke sara na Jéhovah asara angu mingi awe. A lingbi e sara ye kue so e lingbi ti sara ti changé zo ti yâ ni ti e. Ambeni ye ayeke dä so e lingbi ti sara ti mû maboko na  e ti sara changement so. Zia e bâ ambeni ye ni so.

11. Tongana nyen la sambela ayeke mû maboko na e ti changé bibe so ayeke fa lege na e?

¹¹ Sambela ayeke kozo kota ye so a lingbi e sara. A lingbi e sambela tongana ti so mbeni zo ti sungo psaume asara lani: “Nzapa ti mbi, sara si mbi wara mbeni bê so avuru, nga mbeni fini bibe so ayeke sara si mbi luti ngangu.” (Ps. 51:10). A lingbi e hinga so e doit ti changé bibe so ayeke fa lege na e nga e doit ti hunda Jéhovah ti mû maboko na e. Ngbanga ti nyen la e yeke na kite ape so Jéhovah ayeke mû maboko na e ti sara changement so? Zendo so Jéhovah amû lani na azo ti Israël ti ngoi ti Ézéchiel, so li ti ala akpengba, alingbi ti mû ngangu na e. Lo tene: “Mbi yeke sara ande si bê ti ala aga oko nga mbi yeke zia mbeni fini yingo na yâ ti ala . . . na mbi yeke mû na ala bê so awoko, [so ti tene bê so ayeda na ye so Nzapa afa.]” (Ézéch. 11:19; kete tënë na gbe ni.) Jéhovah ayeke lani nduru ti mû maboko na azo ti Israël so ti changé, na lo yeke nga nduru ti mû maboko na e.

12-13. (a) Ti gue oko na Psaume 119:59, nyen la a lingbi e gbu li na ndö ni? (b) Ahundango ndo wa la a lingbi mo hunda terê ti mo na ni?

¹² Use kota ye ni ayeke gbungo li. Na ngoi so lâ oko oko e yeke diko Bible nzoni, a lingbi e mû ngoi ti gbu li nzoni na ndö ti apensé nga na abango ndo ti e so a lingbi e changé ni. (Diko Psaume 119:59; aHéb. 4:12; Jacq. 1:25.) A lingbi e gi ti hinga apensé nga na abango ndo ti e so apensé ti dunia so asara ngangu na ndö ni. A lingbi e yeda so e yeke na awokongo nga e sara ngangu ti hon ndö ni.

¹³ Na tapande, hunda terê ti mo: ‘Eskê na yâ ti bê ti mbi, mbi yeke sara kota bê kamême kete?’ (1 Pi. 2:1). ‘Eskê mbi yeke sara kamême baba ti kodro ti mbi, ti mandango mbeti ti mbi wala ti gbâ ti nginza so mbi yeke na ni?’(aProv. 16:5). ‘Eskê mbi yeke bâ amba ti mbi so ayeke pëpe na a-oko ye so mbi yeke na ni wala so mara ti ala ayeke nde tongana ambumbuse zo?’ (Jacq. 2:2-4). ‘Eskê mbi ye mingi ti wara aye ti dunia ti Satan?’ (1 Jean 2:15-17). ‘Eskê angia so lango-sioni nga na sarango ye ti ngangu na zo ayeke na yâ ni anzere na mbi?’ (Ps. 97:10; 101:3; Amos 5:15). Tongana mo kiri tënë na ahundango ndo so, peut-être mo yeke hinga aye so a lingbi mo changé ni. Tongana e zi na yâ ti bê ti e aye so “gere ni aluti ngangu”, e yeke zia ngia na bê ti Babâ ti e ti yayu.​—Ps. 19:14.

14. Ngbanga ti nyen la a yeke kota ye mingi ti soro anzoni kamarade?

¹⁴ Sorongo anzoni kamarade ayeke ota kota ye ni. Atâa e hinga wala e hinga ape, akamarade ti e ayeke sara ngangu mingi na ndö ti e (aProv. 13:20). Na place ti kua wala na ekole, peut-être azo so ayeke na terê ti e ayeke mû maboko na e pëpe ti pensé tongana Nzapa. Me e lingbi ti wara azo so ayeke nzoni mingi ti sara kamarade na ala na ngoi ti abungbi ti e. Na bungbi, ala lingbi ti pusu e wala ti zia na bê ti e nzara “ti duti na ndoye na ti sara anzoni kusala”.​—aHéb. 10:24, 25, kete tënë na gbe ni.

15-16. Tongana nyen la Satan agi ti changé fason so e yeke pensé na ni?

¹⁵ A lingbi e girisa ape so Satan aye gï ti changé fason so e yeke pensé na ni. Lo yeke sara kua na mara ti afango ye nde nde kue ti buba anzoni pensé so e wara na lege ti atâ tënë ti Bible.

¹⁶ Satan angbâ ti hunda oko hundango ndo so lo hunda lani na Ève na yaka ti Éden:  “Tâ tënë, Nzapa atene . . . ?” (Gen. 3:1). Na yâ ti dunia so ayeke na gbe ti Satan, fani mingi e mä mara ti ahundango ndo so: ‘Eskê a yeke tâ tënë so Nzapa ake ti tene zo amû awali mingi? Eskê a yeke tâ tënë so Nzapa aye pëpe ti tene mo sara matanga ti Noël wala matanga ti dungo mo? Eskê a yeke tâ tënë so Nzapa ti mo ake ti tene mo mû mênë? Eskê a yeke tâ tënë so Nzapa ti ndoye ahunda na mo ti sara songo pëpe na azo so mo ye ala mingi so a bi ala na gigi ti bungbi?’

17. Tongana mbeni zo ahunda atënë na e na ndö ti aye so e mä na bê na ni ti pusu e ti duti na kite na ndö ni, a lingbi e sara nyen? Tongana ti so aColossien 2:6, 7 afa, nyen la alingbi ti si na pekoni?

¹⁷ A lingbi e hinga na bê ti e kue so aye so e mä na bê na ni ayeke tâ tënë. Tongana e gi pëpe ti hinga akiringo tënë na ahundango ndo na ndö ti aye so e mä na bê na ni, e lingbi ti komanse ti dë kite na ni. Kite so alingbi yeke yeke ti buba apensé ti e na ti futi mabe ti e. Tongaso, nyen la a lingbi e sara? Bible awa e ti sara si bibe ti e akiri fini ni, tongaso si e wani e lingbi ti hinga “ye so bê ti Nzapa aye, so ayeke nzoni, so anzere nga so ayeke mbilimbili-kue.” (aRom. 12:2). Tongana e yeke manda Bible lakue, e yeke duti na confiance so aye so e manda na yâ ti Bible ayeke na lege ni. Nga e yeke duti na confiance so aye so Jéhovah ahunda na e ti sara ayeke na lege ni. Na pekoni, legeoko tongana mbeni keke so gunda ni alï sese ngangu, gere ti e ayeke lï sese ngangu, na e yeke “yengi pëpe na yâ ti mabe”.​—Diko aColossien 2:6, 7.

18. Nyen la ayeke mû maboko na e ti bata terê ti e si dunia ti Satan asara sioni na e ape?

¹⁸ Gï mo wani la mo lingbi ti sara si mabe ti mo akpengba, tongaso, ngbâ lakue ti sara si bibe so ayeke fa lege na mo akiri fini ni. Sambela lakue; voro yanga na Jéhovah ti mû na mo yingo ti lo. Gbu li nzoni; ngbâ ti bâ yâ ti fason so mo yeke pensé na ni nga na aye so apusu mo ti sara ye. Gi ti duti na anzoni kamarade; duti na terê ti azo so ayeke mû maboko na mo ti changé fason so mo yeke pensé na ni. Tongana mo sara aye so, mo yeke zi asioni ye so dunia ti Satan asara na ndö ti mo nga mo yeke wara lege ti kinda “atënë so ayeke na lege ni pëpe nga na kota ye kue so alondo ti ke hingango ye ti Nzapa.”​—2 aCor. 10:5.