NA NGOI so azo ti Israël ayeke leke terê ti ala lani ti fâ Ngu ti Jourdain ti lï na Sese ti zendo, ambeni zo aga ti bâ ala. Azo so aga lani so ayeke awali-wande so atisa akoli ti Israël ti gue na mbeni matanga. Akoli ni alingbi lani ti bâ tisango ndo so tongana mbeni pendere ye so ayeke si ka hio hio ape. Ti wara afini kamarade, ti dodo nga ti te nzoni kobe alingbi ti gbu bê ti zo mingi. Atâa so angobo nga na asarango ye ti awali so ayeke lani nde na aye so Ndia ti Nzapa afa na azo ti Israël ti sara, peut-être ambeni koli ti Israël apensé lani atene: ‘Awali so ayeke sara ye oko na e ape. E yeke sara hange.’

 Nyen la asi lani? Bible atene: “Azo ni akomanse ti sara lango-sioni na amolenge-wali ti kodro ti Moab.” Biani, awali so aye lani ti tene akoli ti Israël avoro anzapa ti wataka. Na ala sara ni lani. A yeke na lege ni so “Jéhovah asara ngonzo ngangu na terê ti Israël.”—Nom. 25:1-3.

Azo ti Israël adoro Ndia ti Nzapa na alege use: Ala kuku ala voro ayanda nga ala sara lango-sioni. Azo saki mingi akui lani ndali ti so ala mä yanga ti Nzapa ape (Ex. 20:4, 5, 14; Deut. 13:6-9). Nyen la asara si ye so ala sara so ayeke ye ti vundu mingi? A yeke ngoi so ye ni asi na ni. Tongana fade akoli so adoro Ndia ti Nzapa ape, na yâ ti kete ngoi azo ti Israël saki mingi so adoit ti fâ Ngu ti Jourdain ti lï na Sese ti zendo.—Nom. 25:5, 9.

Na ndö ti aye so asi so, bazengele Paul atene: “Aye so asi na ala tongana atapande, na a sû ni na Mbeti ti Nzapa ti gboto mê ti e, e so nda ti aye ti angoi nde nde aga na ndö ti e.” (1 aCor. 10:7-11). Kite ayeke dä ape so a nzere na Satan mingi so ambeni zo ti Israël atï na yâ ti kota siokpari na asara si ala lingbi pëpe ti lï na Sese ti zendo. A lingbi e manda ye na lege ti afaute so ala sara so ndali ti so e hinga so a yeke nzere na Satan mingi tongana lo lingbi ti kanga lege na e ti lï na yâ ti fini dunia ti Nzapa.

Satan aye ti sara sioni na aChrétien laso, na ti sara ni lo yeke sara kua na akûkû so lo sara kua na ni nzoni kozo awe ti gbu na azo mingi. Tongana ti so a fa fade, ti gbu azo ti Israël, lo sara kua lani na lango-sioni. Na ngoi ti e, lango-sioni angbâ lakue mbeni kûkû so ayeke sioni mingi. Mbeni kpengba lege so lango-sioni alingbi ti gbu e ayeke na lege ti bango porno.

Laso, mbeni zo alingbi ti bâ porno sân ti tene azo ahinga. Ândö, peut-être zo so aye ti bâ porno adoit ti gue na ciné si lo bâ afilm so ayeke na lege ni ape wala ti gue na ando so a yeke kä ambeti dä si lo vo aye so andu porno. Azo mingi ague peut-être na aplace ni so ape ndali ti so kamene asara ala ti tene azo abâ ala kâ. Me laso, tongana zo ague na ndö ti Internet, lo lingbi ti bâ porno na place ti kua wala même na yâ ti oto na ngoi so lo garé. Nga na akodro mingi, mbeni koli wala mbeni wali alingbi ti bâ porno na yanga-da.

A ngbâ gï ge ape. A yeke ngangu ape ti bâ porno na lege ti aye tongana téléphone wala tablette. Na ngoi so azo ayeke tambela na ndö ti lege wala ala yeke na yâ ti bus wala train, ala lingbi ti bâ asioni image na lê ti écran ti téléphone wala tablette ti ala.

Ndali ti so a yeke ngangu ape ti bâ porno nga ti sara ni na hondengo ni, porno asara sioni na azo mingi na yâ ti dunia ahon ti kozo. Azo mingi so abâ porno abuba mariage ti ala, abi nengo ti ala na sese nga abuba conscience ti ala. Ye so ayeke sioni mingi ayeke so a lingbi ti buba songo ti ala na Nzapa. Tongana mo tene bango porno ayeke sara sioni na azo so abâ ni, mo yeke na raison. Mingi ni, a yeke zia asioni kä na bê ti zo. Akä so alingbi ti mü yeke yeke me place ni ayeke ngbâ aninga.

Me a lingbi e hinga so Jéhovah aye ti bata e si kûkû ti Satan so agbu e ape. Tongana e ye ti tene Jéhovah abata e, a lingbi e sara ye so akoli ti Israël asara ni lani ape: ‘e sara gï ye so Jéhovah ahunda na e ti sara’. (Ex. 19:5). A lingbi e hinga so Nzapa ake porno na kuru go. Ngbanga ti nyen la e tene tongaso?

Gbu li na ndö ti ye so: Andia so Nzapa amû na azo ti Israël ti ândö, mara ni ayeke dä ape. Andia so ayeke tongana mbeni gbagba so abata azo ti Israël na azo ti akodro so ayeke na terê ti ala nga na asioni sarango ye ti ala (Deut. 4:6-8). Andia so asara si mbeni kpengba tâ tënë ayeke polele: Jéhovah ake lango-sioni.

Na ngoi so Jéhovah ayeke fa na azo ti Israël asioni sarango ye ti azo ti akodro so ayeke na terê ti ala, lo tene na ala, lo tene: “Ala sara ye pëpe tongana ti azo ti sese ti Canaan, so mbi yeke gue na ala dä; . . . sese ni aga sioni; mbi  yeke fâ ngbanga na ndö ti azo ni nga a yeke tomba ala na ndö ti sese ni.” Na lê ti Nzapa ti Israël so ayeke nzoni-kue, fason so azo ti Canaan ayeke vivre na ni ayeke sioni mingi asara si sese ni aga sioni nga abuba.—Lév. 18:3, 25.

Atâa so Jéhovah apunir lani azo ti Canaan, ambeni zo angbâ lani ti sara lango-sioni. A hon ngu 1 500 na pekoni, Paul atene so azo so ayeke na yâ ti akodro so aChrétien ayeke dä ‘adö nzoni lege ti tambela kue ala zia awe’. Ti tâ tënë ni, “ala bi terê ti ala na yâ ti sarango sioni ye sân kamene ti sara sioni ye nde nde kue na bê ti warango ye.” (aÉph. 4:17-19). Laso nga kue, azo mingi ayeke sara sioni ye sân kamene. Atâ wakua ti Nzapa ayeke sara kue ti ke ti bâ asioni ye so azo ti dunia so ayeke sara.

Porno ane Nzapa oko ape. Nzapa asara azo na image ti lo, na lege so ala kpa lo. Lo sara e na mbeni fason so e yeke na ngangu ti hinga so mbeni ye ayeke na lege ni wala mbeni ye ayeke na lege ni ape. Na ndara, Nzapa alu andia na ndö ti bungbingo koli na wali. Lo leke lani ti tene acouple so asara mariage awara ngia na lege ti bungbingo koli na wali (Gen. 1:26-28; aProv. 5:18, 19). Me nyen la azo so asigi na porno wala asara si porno amû ndo ayeke sara? Ala sara sanka ti andia ti Nzapa na ndö ti anzoni sarango ye. Biani, azo so ayeke sara si porno amû ndo ane Jéhovah ape. Nzapa ayeke fâ ande ngbanga na ndö ti azo so asara sanka ti aye so lo hunda na e ti sara na lege so ala sigi na porno wala ala sara si asioni ye amû ndo.—aRom. 1:24-27.

Me ka ti azo so na bê ti ala wani ala yeke diko ye na ndö ti porno wala ala yeke bâ ni? Ambeni zo alingbi ti bâ so a yeke mbeni ngia so ayeke sara sioni na zo ape. Ye oko, ala yeke mû maboko biani na azo so asara sanka ti aye so Jéhovah ahunda na e ti sara. A yeke peut-être pëpe ye so ala ye ti sara na ngoi so ala komanse ti bâ porno. Me Bible afa polele so awakua ti tâ Nzapa adoit ti ke porno na kuru go. Bible awa e, atene: “Ala azo so aye Jéhovah, ala ke ye ti sioni.”—Ps. 97:10.

Même azo so aye ti zia lege ti bango porno alingbi ti bâ so a yeke ngangu ti sara ni. E yeke mbilimbili-kue ape, na peut-être a lingbi e tiri tiringo si e ke asioni nzara ti bungbingo koli na wali. Na ndö ni, bê ti e so ayeke mbilimbili-kue ape alingbi ti pusu e ti gi ti wara mbeni  lege ti sara ye ague nde na andia ti Nzapa (Jér. 17:9). Me azo mingi so aga aChrétien asö benda na yâ ti tiri so. So mo hinga ni alingbi ti sara si mo hinga so mo kue mo lingbi ti zia lege ti bango porno. Bâ tongana nyen la Bible alingbi ti mû maboko na mo ti kpe kûkû ti Satan so ayeke bango porno.

Tongana ti so a fa fade, azo ti Israël mingi azia lani si asioni nzara amaï na yâ ti bê ti ala na ague na ala juska ti wara ngangu kpale. Mara ti ye so alingbi nga ti si na e laso. Jacques, so mama ti lo na Jésus ayeke oko, afa mbeni kpale so e lingbi ti wara: ‘Nzara ti bê ti zo oko oko ayeke gboto lo na ahanda lo. Na pekoni, tongana nzara ti bê ni amû ngo awe, a yeke dü siokpari.’ (Jacq. 1:14, 15). Tongana mbeni zo azia si mbeni sioni nzara amaï na yâ ti bê ti lo, na mbeni ngoi zo ni alingbi ti sara siokpari. Tongaso, a lingbi e zi asioni pensé na yâ ti li ti e na e ngbâ ti pensé na ndö ni ape.

Tongana mo bâ so mo ngbâ ti pensé na ndö ti asioni ye, sara mbeni ye ndali ni hio. Jésus atene: “Tongana maboko ti mo wala gere ti mo asara si mo pika gere ti mo, fâ ni mo bi ni yongoro. . . . Nga, tongana lê ti mo asara si mo pika gere ti mo, gboto ni mo bi ni yongoro.” (Mat. 18:8, 9). Jésus atene lani pëpe so a lingbi e fâ gere ti e wala maboko ti e wala e gboto lê ti e vrai tongaso. Lo mû gï tapande ti mû maboko na e ti hinga mbilimbili ye so ayeke sara si e pensé na asioni ye na ti sara hio achangement so a lingbi e sara. Tongana nyen la e lingbi ti sara ye alingbi na wango so tongana andu tënë ti porno?

Tongana lê ti mo atï na ndö ti porno, tene pëpe: ‘A yeke sara ye oko na mbi ape.’ Zi lê ti mo dä hio. Kanga télé ni hio. Kanga ordinateur wala téléphone ni hio. Zia li ti mo na ndö ti ye so sioni ayeke dä ape. Tongana mo sara tongaso, a lingbi ti mû maboko na mo ti ngbâ ti pensé na anzoni ye ahon ti tene asioni nzara ahon ndö ti mo.

Ka tongana mo zia lege ti bango porno, me aye so mo bâ lani ayeke ga na li ti mo na  ambeni ngoi? A-image ti porno wala asioni pensé na ndö ti porno alingbi ti ngbâ na li ti zo aninga. A lingbi ti kiri na li ti zo na ngoi kue. Tongana a si, peut-être a yeke mû na mo nzara ti sara mbeni sioni ye, na tapande ti sara ngia na terê ti mo ti koli wala ti wali. Tongaso, hinga so mara ti apensé so alingbi ti kiri hio na li ti mo, na leke terê ti mo ti tiri na ni.

Leke na bê ti mo ahon ti kozo ti pensé nga ti sara ye tongana ti so Nzapa ahunda na mo. Mû tapande ti bazengele Paul so ayeke lani nduru ti “pika terê ti [lo] na [ti] sara lo tongana ngbâa”. (1 aCor. 9:27). Zia pëpe si asioni nzara agbu mo na ngbâa. Bible atene: “Ala changé na lege so ala sara si bibe ti ala akiri fini ni, si ala wani alingbi ti hinga ye so bê ti Nzapa aye, so ayeke nzoni, so anzere nga so ayeke mbilimbili-kue.” (aRom. 12:2). Girisa ape: Tongana apensé nga na asarango ye ti mo ague oko na ye so bê ti Nzapa aye, a yeke mû na mo ngia mingi ahon sarango ye alingbi na asioni nzara ti bê ti mo.

Gi ti bata ambeni versê na li. Tongaso, tongana asioni pensé aga na li ti mo, sara ngangu ti gbu li na ndö ti aversê ni. Aversê tongana Psaume 119:37; Ésaïe 52:11; Matthieu 5:28; aÉphésien 5:3; aColossien 3:5 nga na 1 aThessalonicien 4:4-8 ayeke mû maboko na mo ti bâ porno tongana ti so Jéhovah abâ na ni nga ti hinga ye so lo ye ti tene mo sara.

Ka tongana, na ambeni ngoi, nzara ti bâ asioni ye wala ti pensé na ni asara mo ngangu? Mû tâ gï peko ti gere ti Jésus so ayeke tapande ti e (1 Pi. 2:21). Na peko ti batême ti Jésus, Satan angbâ lani ti tara lo. Nyen la Jésus asara lani? Lo ngbâ ti dö sese. Lo sara kua na aversê na peko ti terê ti ke atara so Satan aga na ni na ndö ti lo. Lo tene: “Hon kâ, Satan!” na Satan azia lege ti lo. Gï tongana ti so Jésus azia lâ oko ape ti luti na Zabolo, mo nga, zia lâ oko ape ti luti na lo (Mat. 4:1-11). Satan na dunia ti lo ayeke ngbâ ti gi ti yôro asioni pensé na yâ ti li mo, me zia pëpe lege ti tiri na lo. Mo lingbi ti sö benda na yâ ti tiri so mo yeke tiri na porno. Jéhovah alingbi ti mû maboko na mo ti hon ndö ti wato ti mo.

Ngbâ ti sambela Jéhovah ti mû maboko na mo. Paul atene: “Ala hunda na Nzapa aye so agbu bê ti ala, na fade siriri ti Nzapa so ahon ndö ti bibe kue ayeke bata bê ti ala nga na lege ti hingango ndo ti ala na lege ti Christ Jésus.” (aPhil. 4:6, 7). Nzapa ayeke mû na mo siriri ti bê so ti mû maboko na mo ti ke ti sara sioni ye. Tongana mo ga nduru na Jéhovah, “lo yeke ga ande nduru na” mo.—Jacq. 4:8.

Tongana e ngbâ ti duti na kpengba songo na Kota Gbia ti dunia kue, a yeke bata e si Satan asara sioni na e ape. Jésus atene: “Mokonzi ti dunia so [Satan] ayeke ga, na lo yeke na ngangu oko pëpe na ndö ti mbi.” (Jean 14:30). Ngbanga ti nyen la Jésus ayeke na mara ti confiance so? Mbeni lâ lo tene: “Lo so atokua mbi ayeke na mbi. Lo zia mbi gï mbi oko pëpe, ngbanga ti so mbi yeke sara lakue aye so anzere na bê ti lo.” (Jean 8:29). Tongana mo nga mo gi ti zia ngia na bê ti Jéhovah, mo lingbi ti hinga biani so lo yeke zia mo lâ oko ape. Kpe porno, so ayeke mbeni kûkû, na Satan ayeke wara ande lege ape ti gbu mo.