E KUE e yeda so Jéhovah ayeke fa lege na azo ti lo nga lo yeke kpengba ala na lege ti yingo na “lâ ti nda ni” so (2 Tim. 3:1). Me a lingbi e kue e mä yanga ti Jéhovah. E lingbi ti haka dutingo ti e na ti azo ti Israël na ngoi so ala yeke lani na benyama. Ala doit lani ti sara mbeni ye tongana ala mä totongo ti mbeni trompette.

Jéhovah ahunda lani na Moïse ti mû marteau ti leke na atrompette use ti argent so a yeke hûru ni “ti bungbi azo ti Israël wala ti tene ala londo ti hon.” (Nom. 10:2). Aprêtre ayeke hûru lani atrompette ni na afason nde nde ti fa ye so a lingbi azo ni asara (Nom. 10:3-8). Laso, awakua ti Nzapa ayeke wara afango lege na alege nde nde. Zia e bâ ambeni lege ni ota so adabe ti e na totongo ti atrompette ti ândö. Laso a yeke tisa e ti gue na akota bungbi, a yeke fa ye na a-ancien so a zia ala na kua nga bungbi ti Jéhovah ayeke sara achangement so abâ acongrégation kue.

Na ngoi so Jéhovah aye lani ti tene “bungbi ti azo ni kue” abungbi na yanga ti tabernacle na mbage ti est, aprêtre ayeke hûru atrompette ni use kue (Nom. 10:3). Groupe osio kue ti amara ti Israël so asara camp na terê ti tabernacle ayeke mä totongo ti trompette ni. Amara so asara camp nduru na yanga ti tabernacle ayeke si hio. Me ala so asara camp ayo na yanga ti tabernacle ni ayeke si hio ape nga a hunda ti tene ala sara effort. Atâa azo ni ayeke nduru wala ala yo na yanga ti tabernacle, Jéhovah aye ti tene ala kue abungbi amä awango ti lo.

Laso, e yeke bungbi na tabernacle ape, me a tisa e ti bungbi na azo ti Nzapa. Na popo ti abungbi so a tisa e dä, mo yeke wara akota bungbi ti lango ota nga na ambeni kota bungbi nde so na ngoi ni e yeke mä akpengba tënë nga na awango. Na yâ ti akodro ti dunia kue, awakua ti Jéhovah ayeke wara a-oko kapa ti abungbi. Tongaso, azo kue so ayeda ti ga na abungbi so ayeke na ngia ti wara terê na amba ti ala. Ando so ambeni alondo dä si aga ayo ahon ti ambeni. Me azo kue abâ so, so ala sara effort si ala ga, a yeke nzoni.

Ka ti azo so ayeke na yâ ti agroupe so ayo na ando ti kota bungbi? Grâce na aye so awandara asigi na ni, ala mingi awara lege ti bâ nzoni na lege ti a-oko kapa nga même ti bâ so ala yeke mbage ti gbâ ti aita so abungbi. Na tapande, na ngoi ti mbeni vizite ti ita so aga na iri ti kota ndokua ti e na Bénin, filiale asara si aita ti Arlit, na Niger, so ayeke mbeni kete gbata ti azo ti gingo mosoro ti gbe ti sese na yâ ti désert ti Sahara, abâ kapa ni. Azo 21 so na popo ni mo yeke wara aita nga na azo so aye tënë ti Nzapa abungbi ti bâ kapa ni. Atâa so ala yeke na ndo so ayo, ala bâ lani so ala yeke beoko na azo 44 131 so aga na bungbi so. Mbeni  ita-koli atene: “Na bê ti e kue e tene merci na ala so ala sara si e bâ kapa ni so. A kiri afa na e so ala ye e mingi.”

Tongana aprêtre ti Israël ahûru trompette gï fani oko, “gï amokonzi so ayeke na ndö ti azo ahon saki oko” la ayeke ga na tente ti bungbi (Nom. 10:4). Kâ, Moïse ayeke tene na ala akpengba tënë nga lo yeke fa ye na ala. Ye so ayeke mû maboko na ala ti bâ lege ti akua so ala yeke sara na popo ti amara ti ala. Tongana mo yeke lani oko ti amokonzi so, kite ayeke dä ape so mo yeke sara kue ti duti dä na ngoi ni so nga ti wara nzoni dä.

Laso, a-ancien ti congrégation ayeke pëpe “amokonzi”; ala yeke sara nga mokonzi pëpe na ndö ti kundu ti ataba ti Nzapa so ala yeke bâ ndo na ndö ni (1 Pi. 5:1-3). Me kite ayeke dä ape so ala yeke sara kue ti bâ lege ti kundu ni. Ni la, tongana a tisa ala ti kiri ti fa ye na ala, na tapande ti gue na Ekole ti kusala ti Royaume, ala yeke yeda na bê ti ala kue ti gue. Na ngoi ti ekole ni, a yeke fa na a-ancien tongana nyen ti bâ lege ti aye so andu congrégation nzoni mingi. So a fa ye na a-ancien asara si ala na aita ti congrégation alingbi ti ga nduru mingi na Jéhovah. Atâa tongana mo gue na mbeni oko ti a-ekole so ape, mo lingbi ti wara anzoni ye ti peko ni na lege ti aita so asara ni awe.

Na ambeni ngoi aprêtre ti Israël ayeke hûru trompette ni atoto na nduzu nga na gbe ni. Ye so afa so Jéhovah ahunda na azo kue so asara camp ti londo ti hon (Nom. 10:5, 6). Na ngoi so azo ayeke londo ti hon, ala yeke hon na yâ ti wusuwusu ape, me a yeke mbeni ngangu kua ndali ti azo kue. Na ambeni ngoi peut-être ambeni zo ti Israël aye ti londo ti hon ape. Ngbanga ti nyen?

Peut-être ambeni abâ so fani mingi a yeke hûru trompette ti tene ala londo ala hon nga mingi ni ala ku terê ti ala na ni ape. “Na mbeni ngoi, mbinda ni angbâ na ndö ni gï na bï ti si na ndapre awe”. Na ambeni ngoi nde “a yeke lango use wala nze oko wala alango mingi” la ala yeke londo ti gue na mbeni ndo nde (Nom. 9:21, 22). Fani oke la azo ni alondo ti gue na mbeni ndo nde? Nombre chapitre 33 asara tënë ti ando 40 tongaso so azo ti Israël asara camp dä.

Na ambeni ngoi, peut-être azo ti Israël ayeke wara mbeni ndo so gbe ti dê ayeke dä. Ti sara camp na ndo so gbe ti dê ayeke dä anzere na ala mingi na ngoi so ala yeke na yâ ti “kota désert so asara ka zo mbeto mingi”. (Deut. 1:19). Peut-être bê ti ala yeke pusu ala ti pensé so tongana ala quitté, ala yeke wara pëpe mbeni ndo so ayeke nzoni tongana ti so.

Tongana amara ni akomanse ti hon, peut-être a yeke ngangu na ambeni ti kanga bê ti ku tour ti ala. Amara ni kue ayeke mä trompette ni so atoto na nduzu nga na gbe ni, me ala kue alingbi ti hon na oko ngoi ape. Totongo ti trompette ni afa so amara so asara camp na mbage ti est, mbilimbili mara ti Juda, ti Issacar nga na ti Zabulon, la adoit ti londo ti hon (Nom. 2:3-7; 10:5, 6). Na peko ti so ala hon, aprêtre ni ayeke hûru trompette ni ti use ni ti fa so amara ota so asara camp na mbage ti sud la adoit ti londo ti hon. Aprêtre ni ayeke ngbâ ti sara tongaso juska amara ni kue alondo ahon.

Peut-être a yeke ngangu na mo ti yeda na ambeni changement so a sara na yâ ti bungbi ti Jéhovah. Ngbanga ti nyen? Na ngoi so a sara gbâ ti achangement so mo ku terê ti mo na ni ape, li ti mo akpe kue. Wala peut-être mo bâ so fason so a sara na aye lani ayeke nzoni nga mo pensé so tongana aye achangé lani ape a yeke nzoni. Peut-être a yeke lani ngangu na mo ti kanga bê ti mo na ngoi so mo gi ti sara ye alingbi na achangement ni, na a hunda ngoi ti tene mo sara ye alingbi na ni. Ye oko, tongana e gi ti sara ye so e hinga so e doit ti sara, peut-être e yeke bâ so Jéhovah ayeke iri tënë nzoni na ndö ti e.

Na ngoi ti Moïse, Jéhovah afa lege na akoli, awali nga na amolenge kutu mingi ti hon na yâ ti benyama. Tongana lo bâ lani lege ti ala ape nga lo fa lege na ala ape, ala lingbi lani ti sö kuâ pëpe. Laso, e ngbâ ti kpengba na lege ti yingo grâce na fango lege ti Jéhovah. Ti tâ tënë ni, e kpengba mingi. Tongaso, e ye ti sara kue ti mä yanga legeoko tongana ti azo ti Israël so ayeke lani be-ta-zo na ngoi so ala mä totongo ti atrompette so afa na ala ambilimbili ye ti sara.