1. Nyen la Jéhovah asara na e oko oko kue?

JÉHOVAH agboto e oko oko kue na mbage ti lo (Jean 6:44). Gbu li na ndö ti ye so tënë so aye ti tene. Na ngoi so Jéhovah ayeke bâ nzoni azo milliard mingi na yâ ti dunia, lo bâ mbeni ye so ayeke nzoni mingi na mbage ti mo; lo bâ lani so mo ye ti hinga ye na ndö ti lo nga mo peut ti ye lo, na a nzere na lo mingi (1 Chron. 28:9). Jéhovah ahinga mo, lo comprendre mo nga lo ye mo. Tënë so adë bê ti zo mingi.

2. Tapande wa la Jésus amû ti fa so Jéhovah ayeke pensé na ataba ti Lo oko oko kue?

² Jéhovah apensé mingi na mo, nga lo pensé na aita ti mo aChrétien kue. Ti mû maboko na e ti hinga ni, Jésus ahaka Jéhovah na mbeni berger. Tongana taba oko na popo ti ataba 100 ti kundu ti mbeni berger agirisa, nyen la lo yeke sara? Lo yeke “zia atanga ni 99 so na ndö ti ahoto ti gue ti gi oko ni so agirisa so”. Tongana lo wara lo, lo yeke suku na lo ape ndali ti so lo girisa. Terê ti lo ayeke nzere. Nyen la e manda dä? Taba oko oko kue ayeke kota ye na lê ti Jéhovah. Jésus atene: “A nzere pëpe na Babâ ti mbi so ayeke na yayu tongana mbeni oko ti akete zo so agirisa.”—Mat. 18:12-14.

3. Nyen la e yeke bâ na yâ ti article so?

³ E ye lâ oko ape ti tene mbeni ita ti e adécouragé ndali ti mbeni ye so e sara. Tongana nyen la e peut ti sara si amba ti e apika gere ti ala ape? Nyen la e peut ti sara tongana mbeni ita  ason bê ti e? E yeke kiri tënë na ahunda so na yâ ti article so. Me kozoni, zia e gi ti hinga ye nzoni na ndö ti “akete zo so”, so a sara tënë ti ala na Matthieu chapitre 18.

4. “Akete zo so” ayeke azo wa?

⁴ “Akete zo so” ayeke adisciple ti Jésus so ngu ti ala ayeke nde nde. Atâa ngu ti ala ayeke oke, ala yeke “tongana akete molenge” ndali ti so ala yeda na bê ti ala wani ti tene Jésus afa ye na ala (Mat. 18:3). Atâa so ando so ala londo dä, angobo ti ala, abango ndo ti ala nga na asarango ye ti ala ayeke nde nde, ala kue amä na bê na Christ. Nga, Christ aye ala mingi.—Mat. 18:6; Jean 1:12.

5. Tongana mbeni zo asara si mbeni wakua ti Jéhovah apika gere ti lo wala asara sioni na lo, a yeke sara Lo tongana nyen?

⁵ Jéhovah abâ “akete zo so” kue na nene ni mingi. Ti hinga tënë ti bê ti lo, gbu li na ndö ti bango ndo ti e na ndö ti amolenge. E bâ ala na nene ni mingi. E ye ti bata ala ndali ti so ala yeke na ngangu, ala hinga ye nga ala yeke na ndara tongana akota zo ape. Ti vrai ni, atâa so e ye pëpe ti bâ so a sara sioni na mbeni zo, bê ti e ayeke son même mingi tongana e bâ so a sara sioni na mbeni molenge. Legeoko nga, Jéhovah aye ti bata e, na bê ti lo ayeke son même mingi tongana mbeni zo asara si mbeni wakua ti lo apika gere ti lo wala mbeni zo asara sioni na mbeni wakua ti lo.—És. 63:9; Marc 9:42.

6. Ti gue oko na 1 aCorinthien 1:26-29, dunia so abâ adisciple ti Jésus tongana nyen?

⁶ Na mbeni lege wa la adisciple ti Jésus ayeke tongana “akete zo”? Azo wa la azo ti dunia so abâ so ala yeke kota? A yeke azo ti mosoro, azo so iri ti ala awu nga azo so ayeke na komandema. Me na bango ni, adisciple ti Jésus ayeke akota zo ape, ala yeke “akete zo” so ayeke ye oko ape. (Diko 1 aCorinthien 1:26-29.) Me Jéhovah abâ ala tongaso ape.

7. Jéhovah aye ti tene e bâ aita ti e tongana nyen?

⁷ Jéhovah aye awakua ti lo kue atâa ala sara na lo angu mingi awe wala ala ga na yâ ti tâ tënë fini fini. Aita ti e kue ayeke kota na lê ti Jéhovah, tongaso a lingbi ala duti nga kota na lê ti e. E ye ti “ndoye sewa ti e ti aita kue,” me gï ambeni ape (1 Pi. 2:17). A lingbi e duti nduru ti sara ye kue so e peut ti sara ti bata ala nga ti bâ lege ti ala. Tongana e hinga so e son bê ti mbeni zo, a lingbi e bâ ni tongana senge ye ape na e tene ape so bê ti lo ayeke son ka hio mingi nga a lingbi lo gi ti hon ndö ni. Ngbanga ti nyen la bê ti ambeni ita apeut ti son hio hio? Peut-être ndali ti ndo so ambeni ita akono dä, ala peut ti bâ so ala yeke ye oko ape. Ambeni aga na yâ ti tâ tënë fini fini; ade ala hinga ape so ala doit ti pardonné aita tongana ala sara afaute. Atâa ye ni ayeke so wa, a lingbi e sara kue ti tene siriri aduti na popo ti e. Me, a lingbi zo so bê ti lo ayeke son ka hio hio na terê ti amba ti lo ahinga so a yeke mbeni nzoni sarango ye ape na lo bezoin ti gi ti hon ndö ni. Tongana lo sara ni, lo yeke duti na ngia nga lo yeke duti na nzoni songo na aita.

8. Bango ndo wa so amû ndo na ngoi ti Jésus asara ngangu na ndö ti adisciple ti lo?

⁸ Ngbanga ti nyen la Jésus asara lani tënë ti “akete zo so”? Adisciple ti lo ahunda lani mbeni tënë na lo, ala tene: “Zo wa la ayeke biani kota mingi na yâ ti Royaume ti yayu?” (Mat. 18:1). A-Juif mingi aye lani ti tene azo abâ so ala yeke kota mingi. Mbeni wandara atene: “Ye so ayeke lani kota ye mingi na yâ ti gigi ti ala ayeke ti tene azo ane ala nga iri ti ala awu.”

9. Nyen la adisciple ti Jésus adoit lani ti sara?

 ⁹ Jésus ahinga lani so adisciple ti lo adoit ti sara ngangu ti zi na yâ ti bê ti ala bibe ti sarango mandako so alï ngangu na yâ ti ngobo ti aJuif. Lo tene lani na ala, lo tene: “Zia zo so ayeke kota ahon tanga ti ala kue aga lo so ayeke ngambe ti ala kue; na lo so ayeke mû li ni na popo ti ala aga zo so ayeke sara kua na ala.” (Luc 22:26). E yeke sara ye tongana ngambe ni tongana e “bâ amba ti [e] tongana azo so ayeke kota ahon” e (aPhil. 2:3). Tongana e sara kue ti duti na bango ndo so, a yeke duti ngangu ti tene e sara si amba ti e apika gere ti ala.

10. Wango wa ti Paul a lingbi e sara ye alingbi na ni?

¹⁰ Aita ti e kue ayeke kota ahon e na yâ ti ambeni ye. A yeke ngangu ape ti bâ ni tongana e bâ gï anzoni sarango ye ti ala. A lingbi e sara ye alingbi na wango so bazengele Paul amû na aChrétien ti Corinthe. Lo tene: “Zo wa la si asara si mo yeke nde na mba ti mo? Biani, nyen la mo yeke na ni so a mû na mo mungo ape? Tongana a mû ni na mo mungo, ngbanga ti nyen mo yeke pika kate ti mo mo bâ mo tene a mû ni na mo mungo ape so?” (1 aCor. 4:7). A lingbi e sara hange si bê ti e apusu e pëpe ti gboto lê na ndö ti e wani wala ti pensé so e yeke kota ahon amba ti e. Na tapande, aita-koli so ayeke mû apendere diskur wala aita-wali so awara lege ti komanse ti manda Bible na azo mingi adoit lakue ti mû gonda na Jéhovah ndali ti aye so ala sara.

11. Nyen la e manda na lege ti toli ti Jésus na ndö ti mbeni gbia na ngbâa ti lo?

¹¹ Na peko ti so Jésus awa adisciple ti lo ti sara pëpe si amba ti ala apika gere ti ala, lo mû mbeni toli na ndö ti mbeni gbia nga na ngbâa ti lo. Gbia ni azi na li ti ngbâa ti lo mbeni kota bon so lo peut ti futa ni lâ oko ape. Na pekoni, oko ngbâa so ake ti zi kete bon ti lo so ayeke na li ti mbeni mba ti lo ngbâa. Na nda ni, gbia ni abi na da ti kanga ngbâa so ake ti sara nzoni bê na mba ti lo ngbâa so. Nyen la e manda dä? Jésus atene: “Babâ ti mbi so ayeke na yayu ayeke sara na ala tongaso nga tongana ala oko oko kue apardonné aita ti ala na bê ti ala kue pëpe.”—Mat. 18:21-35.

12. Tongana e ke ti pardonné amba ti e, tongana nyen la e yeke sara sioni na ala?

¹² Ye so ngbâa so asara so asara sioni na lo nga na amba ti lo. Kozo ni, lo sara nzoni bê oko pëpe na mba ti lo ngbâa ni na lege so “lo mû yanga si a bi mba ti lo ni na da ti kanga juska lo wara lege ti kiri na nginza ni so ayeke na li ti lo”. Use ni, lo sara sioni na ambeni ngbâa so abâ ye so lo sara so. Tongana “amba ti lo angbâa abâ ye so asi, vundu agbu ala mingi”. Legeoko nga, asarango ye ti e ayeke sara ngangu na ndö ti amba ti e. Tongana mbeni zo asara ye na e na lege ni ape na e ke ti pardonné lo, nyen la apeut ti si? Kozo ni, e sara sioni na lo ndali ti so e ke ti pardonné lo, e sara sanka ti lo nga e fa na lo ape so e ye lo. Use ni, e yeke sara si aita ti congrégation aduti nzoni ape tongana ala bâ so siriri ayeke na popo ti e na zo ni ape.

13. Nyen la ye so asi na mbeni pionnier afa na mo?

¹³ Tongana e pardonné aita ti e, e na ala kue e yeke bâ nzoni dä. A yeke ye so asi na mbeni pionnier so e iri lo Crystal. Mbeni ita-wali na yâ ti congrégation ason bê ti lo. Crystal atene: “Na ambeni ngoi, atënë so lo tene na mbi na nzoni bê ape akpo mbi tongana zembe. Mbi ye même lani ape ti tene mbi na lo e fa tënë. Mbi komanse ti dë na fango tënë nga ti perdre ngia ti mbi.” Crystal abâ lani so lo yeke na nzoni raison ti sara ngonzo. Me lo ngbâ lani ti sara ngonzo na terê ti ita-wali ni ape wala ti pensé gï na ye so atënë ti ita-wali ni asara na lo. Lo sara terê ti lo kete lo sara ye alingbi  na wango so alondo na Bible so ayeke na yâ ti article “Pardonnez de tout votre cœur” na yâ ti Tour ti Ba Ndo ti lango 15 ti octobre, ngu 1999, na Français. Lo pardonné lani ita-wali ni. Crystal atene: “Fadeso mbi bâ so e kue e yeke sara ngangu ti yü fini zo nga so lâ oko oko Jéhovah ayeke pardonné e na bê ti lo kue. Mbi bâ so pupu aya mbi ngangu. Mbi kiri mbi wara ngia so lani mbi yeke na ni.”

14. Ti gue oko Matthieu 18:21, 22, na bango ni, kpale wa la bazengele Pierre ayeke lani na ni? Nyen la e manda na lege ti tënë so Jésus atene na lo?

¹⁴ E hinga so e doit ti pardonné azo, na a yeke na lege ni ti sara tongaso. Me a lingbi ti duti ngangu na e ti sara ni. Peut-être na ambeni ngoi, bazengele Pierre abâ so a yeke tongaso. (Diko Matthieu 18:21, 22.) Nyen la apeut ti mû maboko na mo? Kozo ni, gbu li na ndö ti gbâ ti aye so Jéhovah apardonné mo ndali ni (Mat. 18:32, 33). E lingbi ti tene Jéhovah apardonné e ape, me lo yeke pardonné e na bê ti lo kue (Ps. 103:8-10). Na oko ngoi ni, “a yeke ngbanga ti e nga ti ndoye terê na popo ti e.” Tongaso, e yeke soro sorongo ti pardonné azo ape. E doit ti pardonné aita ti e (1 Jean 4:11). Use ni, gbu li na ndö ti ye so ayeke si tongana e pardonné aita ti e. Peut-être e yeke aidé zo so asara ye na e na lege ni ape, e yeke sara si congrégation aduti beoko, e yeke bata songo ti kamarade ti e na Jéhovah nga e yeke zi nengo kungba so ayeke na ndö ti go ti e (2 aCor. 2:7; aCol. 3:14). Na nda ni, sambela Lo so ahunda na e ti pardonné azo. Zia lege na Satan pëpe ti buba siriri so ayeke na popo ti mo na amba ti mo awakua ti Jéhovah (aÉph. 4:26, 27). E bezoin ti tene Jéhovah a-aidé e si e duti na siriri na yâ ti congrégation.

15. Ti gue oko na aColossien 3:13, nyen la e peut ti sara tongana mbeni ita asara mbeni ye so ason bê ti e?

¹⁵ Ka tongana mbeni mba ti mo Chrétien asara mbeni ye so ason bê ti mo mingi? Nyen  la mo doit ti sara? Sara kue ti tene siriri angbâ ti duti na popo ti mo na lo. Fa na Jéhovah tënë ti bê ti mo. Hunda na lo ti sara tufa na ndö ti zo so ason bê ti mo nga ti aidé mo ti bâ anzoni sarango ye ti zo ni, anzoni ye so Jéhovah aye na mbage ti lo (Luc 6:28). Tongana mo lingbi pëpe ti girisa ye so ita ni asara, bâ tongana nyen la mo peut ti sara lisoro na lo na ndö ni. A yeke lakue nzoni ti pensé so ita ni ason bê ti mo na mbana ape (Mat. 5:23, 24; 1 aCor. 13:7). Na ngoi so mo yeke sara lisoro na lo, pensé so lo yeke na anzoni bibe. Ka tongana lo ye ti tene mo na lo aleke tënë ni ape? “Ngbâ ti kanga bê na” lo. (Diko aColossien 3:13.) Kota ye ni ayeke ti tene mo ngbâ ti sara ngonzo na terê ti lo ape, ndali ti so a peut ti buba songo ti mo ti kamarade na Jéhovah. Zia lege na mbeni ye lâ oko ape ti sara si mo pika gere ti mo. Tongana mo sara tongaso, mo fa so mo ye Jéhovah ahon aye kue.—Ps. 119:165.

16. Kua wa la e oko oko kue e yeke na ni ti sara?

¹⁶ E bâ na nene ni mingi pasa so e yeke na ni ti sara na Jéhovah beoko tongana “kundu oko ti ataba na gbe ti berger oko.” (Jean 10:16). Buku Bungbi so a leke ni ti sara ye so Jéhovah aye, lembeti 165, atene: Fadeso, so mo nga kue mo yeke wara nzoni na lege ti beoko ni so, mo yeke na kua ti mû maboko ti bata ni.” Tongaso, e bezoin ti “sara kue ti bâ aita ti e aChrétien tongana ti so Jéhovah abâ na ala.” Na lê ti Jéhovah, e kue e yeke “akete zo” so lo bâ e na nene ni mingi. A yeke tongaso la mo yeke bâ na aita ti mo? Jéhovah abâ ye kue so mo sara ti aidé ala nga ti bâ lege ti ala, na lo bâ ni na nene ni.—Mat. 10:42.

17. Nyen la e leke na bê ti e ti ngbâ ti sara?

¹⁷ E ye amba ti e awakua ti Jéhovah. Tongaso, e “leke na bê ti [e] ti zia pëpe na gbele mbeni ita mbeni ye so lo yeke pika gere ti lo dä wala mbeni ye so ayeke sara si lo tï.” (aRom. 14:13). E bâ aita ti e tongana azo so ayeke kota ahon e, nga e ye ti pardonné ala na bê ti e kue. A lingbi e zia pëpe si amba ti e asara si e pika gere ti e. Me, zia e “tomba peko ti aye so ayeke ga na siriri nga na aye so ayeke kpengba mba na popo ti e.”—aRom. 14:19.