1. Nyen la Gbia Salomon afa na e na Zo-ti-fa-tene 7:20?

 GBIA Salomon atene: “Na ndö ti sese so, mbeni zo ti mbilimbili so asara ye lakue gï nzoni si lo sara siokpari lâ oko pëpe ayeke dä pëpe.” (Zo-ti. 7:20). Tënë so ayeke tâ tënë biani. E kue e yeke sara siokpari (1 Jean 1:8). Tongaso, e kue e bezoin ti tene Nzapa nga na amba ti e apardonné e.

2. Tongana mbeni kota kamarade ti e apardonné e, a yeke sara e tongana nyen?

² Eskê mo dabe ti mo na mbeni ngoi so mo son bê ti mbeni kota kamarade ti mo? So mo ye ti leke tënë ni nga ti leke songo ti mo na lo, mo hunda pardon na bê ti mo kue. Tongana kamarade ti mo ni apardonné mo, a sara mo tongana nyen? Eskê bê ti mo adë? En, nga mo yeke na ngia.

3. Nyen la e yeke bâ na yâ ti article so?

³ E ye ti tene Jéhovah aduti kota Kamarade ti e, me na ambeni ngoi, e yeke tene mbeni tënë wala e yeke sara mbeni ye so ason bê ti lo. Ngbanga ti nyen la e lingbi ti duti sûr so Jéhovah aye ti pardonné e? Kangbi wa la ayeke na popo ti pardon ti Jéhovah nga na pardon ti e? Nga na nda ni, zo wa la Nzapa apeut ti pardonné lo?

4. Ngbanga ti nyen la e lingbi ti duti sûr so Jéhovah ayeke nduru ti pardonné e?

⁴ Bible adë bê ti e so Jéhovah ayeke nduru ti pardonné e. Na ngoi so Jéhovah afa asarango ye ti lo na Moïse na ndö ti  Hoto ti Sinaï, Lo tene na lo na lege ti mbeni ange, lo tene: “Jéhovah, Jéhovah, Nzapa so asara nzoni bê na zo nga so abâ mawa ti zo, lo sara ngonzo hio hio pëpe, lo si singo na tâ ndoye nga na tâ tënë, lo yeke fa nzoni bê na azo saki na saki, lo yeke pardonné faute, kengo ndia nga na siokpari.” (Ex. 34:6, 7). Jéhovah ayeke Nzapa so asara nzoni bê na zo, so abâ mawa ti zo nga so ayeke lakue nduru ti pardonné awasiokpari so achangé bê ti ala.—Néh. 9:17; Ps. 86:15.

5. Ti gue oko na Psaume 103:13, 14, so Jéhovah ahinga ye nzoni na ndö ti azo apusu lo ti sara nyen?

⁵ So Jéhovah la acréé e, lo hinga ye kue na ndö ti e. Gbu li ti mo kete. Lo hinga anzene nzene ye kue na ndö ti zo oko oko kue so ayeke na ndö ti sese (Ps. 139:15-17). Tongaso, lo lingbi ti bâ awokongo kue so e wara na mbage ti ababâ na amama ti e. Lo hinga même aye so asi na yâ ti fini ti e so asara si e yeke zo so e yeke ni laso. So Jéhovah ahinga ye nzoni na ndö ti azo tongaso so apusu lo ti sara nyen? A pusu lo ti sara ye na e na nzoni bê.—Ps. 78:39; diko Psaume 103:13, 14.

6. Tongana nyen la Jéhovah afa so lo ye ti pardonné zo?

⁶ Jéhovah afa so lo ye ti pardonné zo. Lo comprendre so a yeke ndali ti aye so kozo koli, Adam, asara la e yeke na gbe ti deba ti siokpari na kuâ (aRom. 5:12). Lege ayeke dä ape ti tene e zi terê ti e wala mbeni zo nde na gbe ti deba so (Ps. 49:7-9). Me, Nzapa ti e so aye e abâ mawa ti e na lo sara mbeni ye ti tene a zi e. Nyen la lo sara? Tongana ti so Jean 3:16 afa, Jéhovah atokua oko Molenge ti lo ti kui ndali ti e (Mat. 20:28; aRom. 5:19). Jésus akui na place ti e ti zi zo kue so amä na bê na lo (aHéb. 2:9). A son lani Jéhovah mingi ti bâ Molenge ti lo so lo ye lo mingi abâ pasi nga akui kuâ ti kamene. Biani, Jéhovah ayeke zia pëpe si Molenge ti lo akui tongana lo ye ti pardonné e ape.

7. Ambeni zo so Bible asara tënë ti ala so Jéhovah apardonné ala na bê ti lo kue ayeke azo wa?

⁷ Bible asi singo na tapande ti azo so Jéhovah apardonné ala na bê ti lo kue (aÉph. 4:32). Zo wa la aga na li ti mo? Peut-être mo pensé na Gbia Manassé. Sioni koli so asara siokpari na terê ti Jéhovah na alege mingi. Lo mû li ni na vorongo anzapa ti wataka. Lo  fâ amolenge ti lo wani, lo mû ala na sandaga na anzapa ti wataka. Lo gue même juska ti zia statue ti mbeni nzapa ti wataka na yâ ti temple ti Jéhovah so ayeke nzoni-kue. Bible atene na ndö ti lo, atene: “Lo sara aye mingi so ayeke sioni na lê ti Jéhovah ti son bê ti lo.” (2 Chron. 33:2-7). Me tongana Manassé achangé bê ti lo biani, Jéhovah apardonné lo na bê ti lo kue. Nzapa azia même si lo kiri lo ga gbia (2 Chron. 33:12, 13). Peut-être mo pensé nga na Gbia David so asara akota siokpari na terê ti Jéhovah, na tapande lo gi mbeni wali nde nga lo fâ zo. Me na ngoi so David afa biani so lo changé bê ti lo nga lo yeda na faute ti lo, Jéhovah apardonné nga lo (2 Sam. 12:9, 10, 13, 14). Tâ tënë, e peut ti duti sûr so Jéhovah aye ti pardonné zo. Nga, tongana ti so e yeke bâ, tongana Jéhovah apardonné zo, a yeke pëpe tongana ti so mbeni zo apardonné mba ti lo.

8. So Jéhovah ayeke Juge so mara ni ayeke dä ape, a ndu pardon ti lo tongana nyen?

⁸ Jéhovah ayeke “Juge ti sese kue”. (Gen. 18:25). Mbeni nzoni juge adoit ti hinga ndia nzoni mingi. Tënë so ayeke tâ tënë na ndö ti Jéhovah ndali ti so lo yeke Juge ti e nga Zo ti lungo andia na e (És. 33:22). Mbeni zo so ahinga ye so ayeke na lege ni nga ye so ayeke na lege ni ape tongana ti Jéhovah ayeke dä ape. Mbeni ye nde wa la mbeni nzoni juge abezoin ni? Lo bezoin ti hinga aye kue na ndö ti mbeni tënë kozo si lo fâ ngbanga. Tongaso, Jéhovah la ayeke tâ nzoni Juge, ndali ti so lakue lo hinga aye kue na ndö ti mbeni tënë.

9. Aye wa la Jéhovah ahinga ni na ngoi so lo yeke mû desizion ti pardonné zo wala pëpe?

⁹ Nde na azo so ayeke ajuge, Jéhovah ahinga lakue nzoni mingi ye kue na ndö ti mbeni tënë (Gen. 18:20, 21; Ps. 90:8). Lo ngbâ pëpe gï na ndö ti aye so azo abâ wala amä. Lo hinga mbilimbili tongana nyen la asarango ye so zo awara na mbage ti babâ na mama ti lo, aye so a fa na lo, ndo so lo vivre dä, atënë ti bê ti lo nga na fason so lo yeke pensé na ni ayeke sara ngangu na ndö ti aye so lo yeke sara. Jéhovah ahinga nga ye so ayeke na yâ ti bê ti zo. Lo comprendre nzoni mingi ndani so mbeni zo asara mbeni ye. Mbeni ye so a peut ti honde ni na Jéhovah ayeke dä ape (aHéb. 4:13). Tongaso, tongana Jéhovah apardonné mbeni zo, a yeke ndali ti so lo hinga ye kue na ndö ti tënë ni.

10. Ngbanga ti nyen la e peut ti tene so Jéhovah ayeke fâ lakue ngbanga mbilimbili? (Deutéronome 32:4).

¹⁰ Jéhovah ayeke fâ lakue ngbanga mbilimbili. Lo yeke sara kangbi na popo ti azo ape. Jéhovah ayeke pardonné mbeni zo lâ oko ape ndali ti pendere ti lo, mosoro ti lo, iri ti lo so awu wala ndali ti akode ti lo (1 Sam. 16:7; Jacq. 2:1-4). Zo oko apeut ti forcé Jéhovah ti sara mbeni ye ape wala ti pete goro na lo ape (2 Chron. 19:7). Lo mû adesizion ape ndali ti so bê ti lo ason wala terê ti lo anzere (Ex. 34:7). Kite ayeke dä ape so Jéhovah ayeke nzoni Juge mingi ndali ti so lo hinga ye kue na ndö ti e.—Diko Deutéronome 32:4.

11. Tongana nyen la pardon ti Jéhovah ayeke nde?

¹¹ Azo so asû mbage ti Mbeti ti Nzapa so a sû ândö na Hébreu ahinga so pardon ti Jéhovah ayeke nde. Na yâ ti ambeni ye, ala sara kua na tënë ti Hébreu so mbeni mbeti atene na ndö ni, atene “a ye mbilimbili ti sara tënë ti pardon so Nzapa apardonné na mbeni zo so asara siokpari, na a ye lâ oko ape ti sara tënë ti fason so mbeni zo apardonné  kamême na mba ti lo.” Gï Jéhovah oko la apeut ti pardonné biani biani mbeni zo so asara siokpari na achangé bê ti lo. Tongana Jéhovah apardonné e, nyen la e yeke wara na pekoni?

12-13. (a) Tongana Jéhovah apardonné mbeni zo, nzoni ti nyen la zo ni ayeke wara? (b) Anzoni ye ti peko ti pardon ti Jéhovah ayeke ninga ngoi oke?

¹² Tongana e yeda so Jéhovah apardonné e awe, e yeke wara “angoi ti kiringo ti wara ngangu”, na tapande siriri ti bê nga na nzoni conscience. E peut ti wara aye so gï tongana “Jéhovah wani” la apardonné e (Kus. 3:19). Tongana Jéhovah apardonné e, lo yeke kiri na songo so ayeke na popo ti e na lo kue na place ni, na a yeke mo bâ mo tene e sara siokpari lâ oko ape.

¹³ Na peko ti so Jéhovah apardonné e awe, lo yeke kiri ti bi tënë na li ti e wala ti punir e ndali ti siokpari ni so ape (És. 43:25; Jér. 31:34). Jéhovah ayeke zia asiokpari ti e ayo “tongana ti so ndo so lâ asigi dä ayo mingi na ndo so lâ alinda dä”. * (Ps. 103:12). Tongana e gbu li na ndö ti pardon ti Jéhovah so ayeke kota mingi, e yeke kiri singila mingi na lo nga e yeke ne lo mingi (Ps. 130:4). Me azo wa la Jéhovah apeut ti pardonné ala?

14. Juska ti si ge, nyen la e manda na ndö ti ndani so Jéhovah ayeke pardonné mbeni zo wala pëpe?

¹⁴ Tongana ti so e bâ fade, Jéhovah ayeke mû desizion ti pardonné mbeni zo pëpe ndali ti so siokpari ti lo ayeke kota wala ayeke kete. E bâ nga fade so, so Jéhovah la acréé e, lo lu na e andia nga lo yeke Juge ti e, lo yeke sara kua na aye so lo hinga na ndö ti e na ngoi so lo yeke mû desizion ti pardonné e wala pëpe. Aye wa la Jéhovah ayeke bâ ni kozo si lo mû desizion ti pardonné mbeni zo wala pëpe?

15. Ti gue oko na Luc 12:47, 48, mbeni ye wa la Jéhovah ayeke bâ ni?

¹⁵ Mbeni ye so Jéhovah ayeke bâ ni ayeke ti hinga eskê zo ni ahinga so ye so lo sara ayeke sioni. Jésus afa ni polele, tongana ti so a fa na Luc 12:47, 48. (Diko ni.) Tongana mbeni zo aleke ti sara mbeni ye so lo hinga so Nzapa ake ni nga so ayeke sioni na lo sara ni, kota siokpari la lo sara so.  Jéhovah apeut ti mû desizion ti pardonné lo ape (Marc 3:29; Jean 9:41). Me e doit ti yeda so, na ambeni ngoi, e hinga so ye so e sara ayeke sioni. Eskê a peut ti pardonné e? En, ndali ti so mbeni ye nde ayeke dä so Jéhovah ayeke bâ ni na ngoi so lo yeke mû desizion ti pardonné e wala pëpe.

16. Changengo bê aye ti tene nyen? Ngbanga ti nyen la a yeke kota ye tongana e ye ti tene Jéhovah apardonné e?

¹⁶ Mbeni ye nde so Jéhovah ayeke bâ ayeke so eskê zo so asara siokpari so achangé bê ti lo biani. Ti changé bê aye ti tene nyen? Ti changé bê aye ti tene “zo achangé pensé ti lo, bango ndo ti lo wala ye so lo ye ti sara.” A ye nga ti tene zo aregretté nga lo sara vundu mingi ndali ti asioni ye so lo sara wala ndali ti anzoni ye so lo doit fade ti sara me lo sara ni ape. Zo so achangé bê ti lo ayeke sara nga vundu ndali ti asioni ye so lo sara me nga ndali ti so lo sara asioni ye so ngbanga ti so songo ti lo na Jéhovah akpengba ape. Girisa ape so Gbia Manassé na Gbia David asara lani akota siokpari, me Jéhovah apardonné ala ndali ti so ala changé bê ti ala biani (1 aGbia 14:8). Biani, Jéhovah ayeke pardonné e gï tongana lo bâ so e changé bê ti e. Me gï ti sara vundu ndali ti mbeni sioni ye so e sara alingbi ape. E doit ti duti nduru ti sara mbeni ye. * Zia e bâ mbeni ye nde so Jéhovah ayeke bâ ni.

17. Changengo lege aye ti tene nyen? Ngbanga ti nyen la a yeke kota ye? (Ésaïe 55:7).

¹⁷ Mbeni kota ye so Jéhovah ayeke bâ ayeke changengo lege. Changengo lege aye ti tene zo azia lege ti asioni sarango ye ti lo na lo sara aye so Jéhovah ahunda. (Diko Ésaïe 55:7.) Zo ni adoit ti changé apensé ti lo tongaso si apensé ti Jéhovah afa lege na lo (aRom. 12:2; aÉph. 4:23). Lo doit ti leke na bê ti lo ti zia lege ti asioni pensé nga na asioni sarango ye ti lo (aCol. 3:7-10). Me tâ ye so asara si Jéhovah apardonné e nga lo zi siokpari ti e ayeke mabe so e yeke na ni na sandaga ti Christ. Jéhovah ayeke pardonné e grâce na sandaga so tongana lo bâ so e yeke  sara biani effort ti changé asioni sarango ye ti e.—1 Jean 1:7.

18. Nyen la e manda na ndö ti pardon ti Jéhovah?

¹⁸ Zia e kiri kete na ndö ti ambeni kota ye so e bâ fade. Na yâ ti dunia, Jéhovah ayeke biani Zo so apardonné zo mingi. E tene tongaso ngbanga ti nyen? Kozo ni, lo yeke lakue nduru ti pardonné zo. Use ni, lo hinga ye kue na ndö ti e. Lo hinga nzoni mingi zo so e yeke ni, nga lo la lo yeke zo so lo hinga wala e changé bê ti e biani. Na ota ni, tongana Jéhovah apardonné e, lo yeke pardonné e kue kue kue, na lo, a yeke mo bâ mo tene e sara fade siokpari ape. A mû lege na e ti duti na nzoni conscience nga ti zia ngia na bê ti lo.

19. Atâa so e yeke mbilimbili-kue ape nga e yeke ngbâ ti sara siokpari, ngbanga ti nyen la e peut ti duti na ngia?

¹⁹ Me, so e yeke mbilimbili-kue ape, e yeke ngbâ ti sara siokpari. Ye oko, atënë so ayeke na yâ ti buku Étude perspicace des Écritures, volume  2, lembeti 765, apeut ti dë bê ti e. Buku ni atene: “Jéhovah ayeke Nzapa ti nzoni bê nga lo hinga so awakua ti lo ayeke na awokongo. Tongaso, ala bezoin ape ti duti lakue na vundu ndali ti so ala yeke mbilimbili-kue ape nga ala yeke sara afaute (Ps. 103:8-14; 130:3). Tongana ala yeke sara ye kue so ala peut ti sara ti sara ye so Nzapa aye, ala peut ti duti na ngia (aPhil. 4:4-6; 1 Jean 3:19-22).” Tënë so akpengba zo mingi.

20. Nyen la e yeke bâ na yâ ti article ti peko?

²⁰ E kiri singila na Jéhovah so lo yeke nduru ti pardonné e tongana e sara vundu biani ndali ti asiokpari so e sara. Me tongana nyen la e peut ti mû tapande ti Jéhovah? Na alege wa la pardon ti e ayeke tongana pardon ti Jéhovah? Na alege wa la a yeke tongana ti lo ape? Ngbanga ti nyen la a yeke kota ye ti hinga kangbi ni? Article ti peko ayeke kiri tënë na ahunda so.