1. Ti gue oko na 1 Pierre 5:2, pendere kua wa la a mû na a-ancien ti sara?

 A MÛ na a-ancien kua ti bâ lege ti ataba ti Jéhovah, so ayeke kota ye na lê ti lo. Akoli so, so ayeke be-ta-zo, abâ na nene ni pendere kua so Jéhovah amû na ala so ayeke ti sara kua ndali ti aita ti ala, nga ala sara ngangu ti duti ‘aberger so ayeke bâ lege ti [aita ti ala] biani.’ (Jér. 23:4; diko 1 Pierre 5:2.) E kiri singila mingi na Jéhovah so akoli so ayeke na yâ ti acongrégation ti e.

2. Akpale wa la ambeni ancien apeut ti wara?

² Na ngoi so a-ancien ayeke sara akua ti ala, ala yeke wara akpale mingi. Na tapande, bango lege ti congrégation ayeke kota kua mingi. Tony, so ayeke ancien na États-Unis, amanda ti bâ terê ti lo kete na ngoi so lo yeke gi ti bâ akua wa la lo peut ti yeda ti sara ni. Lo tene: “Na ngoi so kobela ti COVID-19 akomanse ti mû ndo, mbi gi lani ti sara akua mingi ti leke abungbi nga na abungbi ti fango tënë. Me atâa gbâ ti akua so mbi sara, gbâ ti akua angbâ encore. Mbi yeke lani na aye mingi ti sara asara si mbi yeke na ngoi mingi ape ti diko Bible, ti manda ye nga ti sambela.” Ilir, mbeni ancien na Kosovo, awara ti lo mbeni kpale nde. Na ngoi so lo yeke lani na ndo so bira ayeke dä, lo bâ so a yeke ngangu na lo ti sara ye alingbi na aye so bungbi ti Jéhovah afa. Lo tene: “A yeke lani ngangu na mbi ti sara ye na mbeto ape na ngoi so filiale ahunda na mbi ti aidé aita so ayeke na ndo so kpale ayeke dä. Mbeto asara lani mbi, nga mbi bâ so ye so filiale ahunda ti tene mbi sara so ayeke na lege ti ndara ape.” Tim, so ayeke mbeni missionnaire na Asie, abâ lani so a yeke ngangu ti sara aye kue so lo doit ti sara lâ oko oko. Lo tene: “Na ambeni ngoi, mbi fatigué kue asara si mbi peut ti bâ lege ti aita ape.” Nyen la apeut ti aidé a-ancien so awara mara ti akpale so?

3. Tongana nyen la e kue e peut ti bâ nzoni tongana e gbu li na ndö ti tapande ti Juge Gédéon?

 ³ A-ancien apeut ti manda ye na lege ti tapande ti Juge Gédéon (aHéb. 6:12; 11:32). Lo bata lani awakua ti Nzapa nga lo fa lege na ala (aJu. 2:16; 1 Chron. 17:6). Legeoko tongana ti Gédéon, a soro a-ancien ti bâ lege ti awakua ti Nzapa na mbeni ngoi so ayeke ngangu mingi (Kus. 20:28; 2 Tim. 3:1). E peut ti manda ye na lege ti tapande ti Gédéon, so a bâ terê ti lo kete, lo sara terê ti lo kete nga lo mä yanga. Lo gbu lani ngangu na yâ ti akpale so lo wara na ngoi so lo yeke sara kua ti lo. Atâa e yeke ancien wala pëpe, e peut ti manda ti kiri singila mingi na Nzapa ndali ti a-ancien ti e. E peut ti aidé aita-koli so, so ayeke sara kua ngangu ti bâ lege ti e.—aHéb. 13:17.

4. Tongana nyen la Gédéon afa so lo bâ terê ti lo kete nga lo sara terê ti lo kete?

⁴ Gédéon abâ lani terê ti lo kete nga lo sara terê ti lo kete. b Na ngoi so ange ti Jéhovah atene na Gédéon so Jéhovah asoro lo ti zi azo ti Israël na maboko ti azo ti Madian so ayeke ngangu mingi, lo sara terê ti lo kete, lo tene: “Na yâ ti mara ti Manassé, mara ti mbi la ayeke kete mingi, nga na yâ ti da ti babâ ti mbi, mbi la mbi yeke kete mingi.” (aJu. 6:15). Lo bâ lani so lo lingbi ape ti sara kua ni, me Jéhovah abâ so lo peut ti sara ni. Na mungo maboko ti Jéhovah, Gédéon asara kua ti lo ni nzoni.

5. Na ngoi wa la a peut ti duti ngangu na a-ancien ti bâ terê ti ala kete nga ti sara terê ti ala kete?

⁵ A-ancien ayeke sara kue ti bâ terê ti ala kete nga ti sara terê ti ala kete na yâ ti aye kue (Mi. 6:8; Kus. 20:18, 19). Ala yeke pika kate ti ala ape na ndö ti aye so ala peut ti sara wala aye so ala sara awe. Ala yeke pensé nga ape so ala yeke ye oko ape ndali ti so ala sara ambeni faute. Me na ambeni ngoi, a peut ti duti ngangu na mbeni ancien ti sara terê ti lo kete nga ti bâ terê ti lo kete. Na tapande, mbeni ancien apeut ti yeda ti sara gbâ ti akua, me na pekoni a yeke ngangu na lo ti sara ni kue. Wala a peut ti gonda lo ndali ti fason so lo sara na mbeni kua, wala a peut ti kasa lo ndali ti fason so lo sara na mbeni kua nde. Nyen la a-ancien apeut ti manda na lege ti tapande ti Gédéon so ayeke aidé ala na yâ ti mara ti aye tongaso?

6. Nyen la tapande ti Gédéon apeut ti fa na a-ancien na ndö ti bango terê kete? (Bâ nga foto.)

 ⁶ Hunda mungo maboko. Zo so abâ terê ti lo kete ahinga so ambeni ye ayeke dä so lo peut ti sara ni ape. Gédéon abâ lani terê ti lo kete na lege so lo hunda ambeni zo ti aidé lo (aJu. 6:27, 35; 7:24). A-ancien so asara ye na ndara ayeke sara nga tongaso. Tony, so e sara tënë ti lo fade, atene: “Fason so a fa ye na mbi na ngoi so mbi de kete asara si mbi yeke yeda ti sara gbâ ti akua ahon ti so mbi peut ti sara. Tongaso, mbi mû desizion ti tene na ngoi ti vorongo Nzapa na yâ ti sewa e sara tënë na ndö ti bango terê kete nga mbi hunda na wali ti mbi ti fa na mbi bango ndo ti lo na ndö ni. Mbi kiri mbi bâ nga vidéo Fa ye na amba ti mo, duti na confiance na ala tongana ti Jésus, so ayeke na ndö ti jw.org.” Tony akomanse ti hunda azo ti aidé lo na akua so lo yeke sara. Ye ti peko ni ayeke nyen? Tony atene: “A yeke bâ lege ti kua ti congrégation, nga mbi wara ngoi ti kpengba songo ti mbi ti kamarade na Jéhovah.”

7. Tongana nyen la a-ancien apeut ti sara ye tongana Gédéon tongana a diko tënë na terê ti ala? (Jacques 3:13).

⁷ Sara ngonzo ape tongana mbeni zo adiko tënë na terê ti mo. Mbeni kpale so a-ancien apeut ti wara ayeke tongana a diko tënë na terê ti ala. Ge nga kue, tapande ti Gédéon apeut ti aidé ala. Lo hinga lani so lo yeke mbilimbili-kue ape, tongaso lo duti kpô na ngoi so azo ti Éphraïm adiko tënë na terê ti lo (aJu. 8:1-3). Gédéon asara lani ngonzo ape. Lo fa lani so lo sara terê ti lo kete na lege so lo mä ala na ngoi so ala yeke fa atënë so ason ala nga lo sara tënë na ala na nzoni bê. A sara si bê ti ala adë. A-ancien so asara ye na ndara ayeke sara ye tongana Gédéon na lege so ala yeke mä ndo nzoni nga ala yeke sara ngonzo ape tongana a diko tënë na terê ti ala. (Diko Jacques 3:13.) Tongana ala sara tongaso, ala yeke sara si siriri aduti na yâ ti congrégation.

8. Tongana a gonda a-ancien, a yeke nzoni ala sara ye tongana nyen? Fa mbeni tapande ni.

⁸ Mû gonda ni kue na Jéhovah. Na ngoi so a gonda lani Gédéon ndali ti so lo sö benda na ndö ti azo ti Madian, lo mû gonda ni kue na Jéhovah (aJu. 8:22, 23). Tongana nyen la a-ancien apeut ti sara ye tongana Gédéon? A yeke nzoni ala gonda Jéhovah ndali ti aye so ala sara (1 aCor. 4:6, 7). Na tapande, tongana a gonda mbeni ancien ndali ti kode ti fango ye ti lo, lo peut ti tene so fango ye ni alondo na Bible, nga bungbi ti Jéhovah la ayeke fa ye na e. Na ambeni ngoi, a-ancien apeut ti gbu li ti bâ wala ala gboto lê mingi na ndö ti ala. Bâ tapande ti mbeni ancien, so iri ti lo Timothée. Na ngoi so a soro lani Timothée ancien fini fini, a nzere na lo ti mû adiskur. Lo tene: “Mbi yeke tene ayongoro tënë ti tongo nda ni nga mbi yeke mû angangu tapande. Mingi ni, azo ayeke gonda mbi ndali ni. Mawa ni ayeke so a gboto lê gï na ndö ti mbi me na ndö ti Bible wala Jéhovah ape.” A si na mbeni ngoi, Timothée abâ so lo doit ti changé fason ti fango ye ti lo, tongaso si a gboto lê mingi na ndö ti lo ape (aProv. 27:21). Ye ti peko ni ayeke nyen? Lo tene: “Aita nde nde afa na mbi tongana nyen la diskur ti mbi a-aidé ala ti hon ndö ti mbeni kpale, ti gbu ngangu na yâ ti mbeni kpale wala ti ga nduru mingi na Jéhovah. Atënë ti ala ni asara si mbi yeke na ngia mingi ahon agonda so lani mbi wara.”

9. Nyen la asara si a yeke lani ngangu na Gédéon ti mä yanga ti Jéhovah nga ti sara ye na mbeto ape? (Bâ foto ti couverture ni.)

⁹ Na peko ti so a zia Gédéon juge, lo bezoin lani ti mä yanga ti Jéhovah nga ti sara ye na mbeto ape. A mû lani na lo mbeni kua so apeut ti ga na lo kpale, so ayeke ti futi gbalaka ti Baal so babâ ti lo asara (aJu. 6:25, 26). Ambeni  ngoi na pekoni, na ngoi so Gédéon abungbi aturugu ti gue na ala na bira, fani use Jéhovah ahunda na lo ti kiri na wungo ti ala na gbe ni (aJu. 7:2-7). Na nda ni, a tene na lo ti gue ti sara bira na awato ni na bê ti bï.—aJu. 7:9-11.

10. Nyen la apeut ti sara si a yeke ngangu na mbeni ancien ti mä yanga ti Jéhovah?

¹⁰ A yeke nzoni a-ancien aduti azo so ayeke “nduru ti mä tënë”. (Jacq. 3:17). Mbeni ancien so amä yanga ayeke nduru ti sara ye so Bible nga na bungbi ti Jéhovah afa. Tongana lo sara tongaso, lo yeke zia nzoni tapande na aita. Me a peut ti duti ngangu na lo ti mä yanga. Na tapande, a peut ti duti ngangu na lo ti sara ye alingbi na afango lege kue so lo wara. Na yâ ti ambeni ye, lo peut ti hunda terê ti lo wala mbeni ye so a hunda ti sara ayeke biani na lege ni wala ayeke biani na lege ti ndara. Wala a peut ti hunda na lo ti sara mbeni kua so apeut ti sara si a gbu lo. Na yâ ti mara ti aye tongaso, tongana nyen la a-ancien apeut ti mû tapande ti Gédéon, so amä yanga?

11. Nyen la apeut ti aidé a-ancien ti mä yanga?

¹¹ Mä nzoni ye so a fa na mo ti sara na sara ye alingbi na ni. Nzapa afa lani na Gédéon tongana nyen ti futi gbalaka ti babâ ti lo, ndo wa la lo yeke leke fini gbalaka ti Jéhovah dä nga nyama wa la lo yeke mû na sandaga. Gédéon akasa lani ape ye so Jéhovah afa na lo ti sara, lo sara tâ gï ni. Laso, a-ancien ayeke wara afango lege na mbage ti bungbi ti Jéhovah na lege ti alettre, atokua nga ala yeke wara ambeni fango lege so ayeke aidé e ti bata terê ti e nga ti ngbâ nduru na Jéhovah. E ye a-ancien ndali ti so ala yeke sara ye tongana ti so Jéhovah afa. Congrégation kue ayeke bâ nzoni dä.—Ps. 119:112.

12. Tongana nyen la a-ancien apeut ti sara ye alingbi na aHébreu 13:17 tongana bungbi ti Jéhovah ahunda na ala ti changé fason so ala yeke sara na aye?

¹² Duti nduru ti sara achangement. Girisa ape so Jéhovah ahunda lani na Gédéon ti tene na mingi ti aturugu ti lo ti kiri na kodro (aJu. 7:8). Peut-être lo pensé lani, lo tene: ‘Eskê mbi bezoin biani ti tene na ala ti kiri? Eskê e peut ti sö benda sân ala?’ Me Gédéon asara ye so Jéhovah ahunda. Laso, a-ancien ayeke sara ye tongana Gédéon na lege so ala mä yanga na ngoi so bungbi ti Jéhovah ahunda na ala ti sara mbeni ye na mbeni fason nde. (Diko aHébreu 13:17.) Na tapande, na ngu 2014 Bebungbi achangé fason so a yeke wara na nginza ti leke na aDa ti Royaume nga na aDa ti Assemblée (2 aCor. 8:12-14). Ândö, bungbi ti Jéhovah ayeke mû nginza na acongrégation ti leke na aDa ti Royaume nga na aDa ti Assemblée, na pekoni ala yeke kiri na nginza ni. Me fadeso, bungbi ti Jéhovah ayeke sara kua na nginza so acongrégation na yâ ti dunia ayeke tokua ti leke na ada so na ndo kue so a bezoin ni dä, même tongana a-offrande so congrégation ti ndo ni ayeke mû ayeke kete mingi. Na ngoi so José amä tënë ti changement so, lo pensé so a yeke ga na nzoni ye ape, lo tene: ‘A yeke wara ande lege ti leke même Da ti Royaume oko ape. Aye ayeke tambela ge tongaso ape.’ Nyen la aidé lani José ti mû maboko na changement  so? Lo tene: “Atënë so ayeke na aProverbe 3:5, 6 adabe ti mbi ti sara confiance na Jéhovah. Ye ti peko ni ayeke tâ pendere mingi. E wara lege ti leke gbâ ti aDa ti Royaume me e manda nga ti mû a-offrande tongaso si aye so a mû alingbi terê.”

13. (a) Nyen la Gédéon ahinga lani na bê ti lo kue? (b) Tongana nyen la a-ancien apeut ti sara ye tongana lo? (Bâ nga foto.)

¹³ Na mbeto ape, sara ye so Jéhovah aye. Gédéon amä lani yanga ti Jéhovah même na ngoi so mbeto asara lo wala kua ti lo apeut ti ga na lo kpale (aJu. 9:17). Na peko ti so Jéhovah adë bê ti Gédéon, lo hinga na bê ti lo kue so Nzapa ayeke aidé lo ti bata awakua ti Lo. A-ancien so ayeke na ando so a kanga lege na akua ti e ayeke sara ye tongana Gédéon. Na mbeto ape, ala yeke mû li ni na abungbi nga na fango tënë atâa so a peut ti gbu ala, ti hunda na ala gbâ ti atënë, ti sara aye ti ngangu na ala wala ala peut ti perdre kua ti ala. c Na ngoi ti kota ye ti vundu, a-ancien adoit ti sara ande ye na mbeto ape ti sara ye alingbi na afango lege so ala wara, atâa so a peut ti ga na ala akpale. Na tapande, e peut ti wara afango lege na ndö ti fason so e yeke fa na mbeni ngangu tënë ti ngbanga nga na ndö ti ye so e doit ti sara ti sö kuâ na ngoi ti bira so Gog ti Magog ayeke ga na ni.—Ézéch. 38:18; Apoc. 16:21.

14. Ngbanga ti nyen la a yeke lani ngangu na Gédéon ti gbu ngangu?

¹⁴ Gédéon adoit lani ti sara kua ngangu ti sara kua ti lo ti juge. Na ngoi so azo ti Madian akpe bira na bï, Gédéon atomba lani peko ti ala ti londo na Popo-hoto ti Jizréel juska na Ngu ti Jourdain, peut-être apere ayeke lani mingi na ndo ni so (aJu. 7:22). Eskê Gédéon angbâ lani na Ngu ti Jourdain? Ên-ën. Atâa so lo na azo ti lo 300 afatigué, ala fâ ngu ni na ala ngbâ ti tomba peko ti azo ni. Na nda ni, ala wara azo ti Madian, na ala sö benda na ndö ti ala.—aJu. 8:4-12.

15. Na ngoi wa la a peut ti duti ngangu na mbeni ancien ti gbu ngangu?

¹⁵ Na ambeni ngoi, mbeni ancien apeut ti fatigué mingi na peko ti akua so lo sara ti bâ lege  ti congrégation nga na sewa ti lo. Tongana nyen la a-ancien apeut ti sara ye tongana Gédéon na yâ ti mara ti aye tongaso?

16-17. Nyen la a-aidé lani Gédéon ti gbu ngangu? Nyen la a-ancien apeut ti duti sûr na ni? (Ésaïe 40:28-31). (Bâ nga foto.)

¹⁶ Duti na confiance so Jéhovah ayeke mû na mo ngangu. Gédéon ayeke lani na confiance so Jéhovah ayeke mû na lo ngangu, na Jéhovah asara ni (aJu. 6:14, 34). Mbeni lâ, Gédéon na azo ti lo ayeke tomba peko ti agbia use ti Madian; ala yeke tomba peko ti agbia ni na gere, peut-être agbia ni ayeke kpe ti ala na achameau (aJu. 8:12, 21). Me Nzapa a-aidé azo ti Israël ti gbu ala nga ti sö benda na yâ ti bira ni. Legeoko nga, a-ancien apeut ti zia bê ti ala na Jéhovah, so lo yeke “woko wala lo yeke fatigué lâ oko pëpe.” Lo yeke mû na ala ngangu so ala bezoin ni.—Diko Ésaïe 40:28-31.

¹⁷ Bâ tapande ti Matthew, so ayeke mbeni membre ti Komite so abâ lege ti songo na ada-nganga. Nyen la a-aidé lo ti gbu ngangu? Matthew atene: “Mbi bâ so atënë so ayeke na aPhilippien 4:13 ayeke tâ tënë. Fani mingi, tongana mbi fatigué mingi nga mbi bâ so mbi peut ti sara mbeni ye ape, mbi yeke sambela, mbi voro yanga na Nzapa ti mû na mbi ngangu so mbi bezoin ni ti aidé aita ti mbi. Na angoi tongaso, mbi bâ so yingo ti Jéhovah amû na mbi ngangu ti gbu ngangu.” Legeoko tongana Gédéon, a-ancien ayeke sara kua ngangu ti bâ lege ti awakua ti Jéhovah, atâa so a yeke lakue kete ye ape. A yeke nzoni ala bâ terê ti ala kete nga ala hinga so ala lingbi pëpe ti sara lakue ye kue so ala ye ti sara. Me ala peut ti duti sûr so Jéhovah ayeke mä sambela so ala tene na lo ti aidé ala nga lo yeke mû ngangu na ala ti gbu ngangu.—Ps. 116:1; aPhil. 2:13.

18. Na nduru tënë, tongana nyen la a-ancien apeut ti sara ye tongana Gédéon?

¹⁸ A-ancien apeut ti manda ye mingi na lege ti tapande ti Gédéon. Ala doit ti bâ terê ti ala kete nga ti sara terê ti ala kete na lege so ala hinga akua wa la ala peut ti yeda ti sara ni nga na ngoi so a gonda ala wala a diko tënë na terê ti ala. Ala doit nga ti mä yanga nga ti sara ye na mbeto ape, mbilimbili na ngoi so aye ti ngoi so ayeke gue ti hunzi. Ala doit nga ti duti na confiance so atâa akpale wa la ala wara, Nzapa apeut ti mû na ala ngangu. Biani, e kiri singila mingi na Nzapa ndali ti aberger so, so ayeke sara kua ngangu, nga e “ngbâ ti bâ mara ti azo tongana [ala] so na nene ni mingi”.—aPhil. 2:29.