NA PEKO ti so pupu asara nga ngu apika ngangu na yâ ti alango so ahon kozo, ndo achauffé lani nga lâ asû ngangu na lundi lango 1 ti septembre ngu 1919. Na peko ti midi ti lango ni so, azo nduru na 1 000 so aga abungbi oko na yâ ti kota dä ti place 2 500 ndali ti kozo lango ti kota bungbi so a sara na Cedar Point, Ohio, États-Unis. A ga ti si na lakui, azo 2 000 akiri aga, ambeni aga na bateau, oto nga na atrain so ayô gi ala. Na mardi, gbâ ti azo akiri aga na a zia tanga ti azo ni na gigi na gbe ti akeke si ala sara bungbi ni.

Lâ asû na ndo ti akugbe ti akeke ni, a sara si image ti akugbe ni asigigi na ndo ti bongo ti azo ni tongana dentelle. Pendere pupu so alondo na yâ ti lac Érié ahon na yâ ti achapeau ti awali so a zia aye tongana kuä ti tere ti andeke dä. Mbeni ita-koli atene: “Na yâ ti apendere ndo so akpa parc so, bruit oko ayeke dä ape ndo ni akpa paradis.”

Pendere ti ndo ni ayeke ye oko ape tongana a haka ni na pendere ngia so ayeke na lê ti azo so aga na bungbi ni. Mbeni mbeti-sango ti ndo ni atene: “Ala kue akpa azo so aye tënë ti Nzapa mingi, ala kue ayeke na ngia.” Ti aWamandango Bible ni, a nzere na ala mingi ti wara tere na aita ti ala mbilimbili na peko ti angangu tara so ala wara na yâ ti angu so ahon: kangango lege na ngoi ti bira, kengo tere na yâ ti congrégation, kangango Béthel ti Brooklyn, kangango mingi ti aita ndali ti tënë ti Royaume. A kanga nga aita-koli miombe so ayeke mû li ni, a tene so ala yeke sara kanga ndali ti ngu 20 tongaso. *

Bê ti ambeni Wamandango Bible anze nga li ti ala aga kirikiri na yâ ti angu so ala wara aye ti ngangu so na ala zia lege ti fango tënë. Me mingi ti ala asara kue ti gbu ngangu na yâ ti aye so akota zo ti kodoro asara ti kanga lege na ala. Na mbeni ngoi, mbeni zo ti enquête atene atâa so a kanga lege na aWamandango Bible so ngangu, ala so mbi hunda tënë na ala atene ala yeke “ngbâ lakue ti fa tënë ti Nzapa juska na nda ni.”

Na yâ ti angoi ti tara so, aWamandango Bible so ayeke be-ta-zo abâ so “Seigneur ayeke fa lege na ala, . . . ala sambela lakue ti wara fango lege ti Babâ.” Ala kiri fadeso abungbi oko ge na Cedar Point. Mbeni ita-wali ahunda tere ti lo wala tongana nyen la ala yeke kiri ti fa tënë mingi, nga ti sara kua ni nzoni. Aita mingi ayeke lani na oko gingo bê so. Ala ye lani kua ti fango tënë ahon tanga ti aye kue.

Na yâ ti yenga ni kue, azo so aga so ahinga li ti ala pëpe na ndo ti mbeti “GA” so a sû na ndo ti programme ti kota bungbi ni, acarte ti yambango zo, nga na apanneau so a zia na ndo ti kota bungbi ni. Na vendredi, na ngoi so ita Joseph Franklin Rutherford amû diskur so mama-tene ni ayeke: “Amba ti e awakua,” lo fa nda ti mbeti ni na azo 6 000 so aga na kota bungbi ni. “GA” ni aye ti tene Golden Age, (L’Âge d’Or na français,) mbeni fini mbeti so a sigigi na ni lani ti fa na tënë. *

Ita Rutherford asara tënë ti amba ti lo aChrétien so a soro ala ti gue na yayu, lo tene: “Na yâ ti angoi ti tara so na lege ti mabe ala bâ pendere ngoi so Messie ayeke komande na yâ ti gloire ti lo. . . . Ala bâ so a yeke mbeni pendere kua nga kota pasa ti fa na azo ti dunia kue tënë ti pendere ngoi ti komandema so ayeke ga. So ayeke kua so Nzapa amû na ala ti sara la.”

A yeke sara kua lani na L’Âge d’Or, “mbeti so ayeke fa tâ tënë, amû beku na zo nga akpengba mabe ti zo”, ti komanse mbeni fini kode ti fango tënë: kapa so a sara ti gue da na da ti hunda na azo ti sara abonema. Na ngoi so a hunda ti hinga wala azo oke la aye ti sara kua ni, azo kue so aga alondo na nduzu hio. Na pekoni, “tongana azo so ayeke mû peko ti Jésus, na nzerengo tere nga na yapungo tere,” ala he bia so li ni ayeke: “To lumière ti Mo na tene-biani ti Mo”, (na anglais). Juge Milton Norris atene so aita ahe bia ni ngangu mo bâ mo tene même akeke kue ayeke yengi.

Na hunzingo ti bungbi ni, azo so aga so akpo molongo teti al’heure mingi ti duti na popo ti akozo zo so asara abonema ti mbeti ni. Tënë ti bê ti azo mingi ague oko na ti Mabel Philbrick so atene: “Anzere lani mingi ti hinga so mbeni kua ti sarango ni angbâ encore.”

A-Wamandango Bible 7 000 tongaso aleke tere ti ala ndali ti kua ni. Tract Méthode d’organisation (na Anglais) nga na brochure À qui l’œuvre est confiée (na Anglais) afa ambeni nzene nzene tënë na ndo ni: Mbeni fini ndokua so ayeke na Kota ndokua ti e la ayeke bâ lege ti kua ni. A lingbi a sigigi na mbeni Comité ti service na yâ ti congrégation nga a soro mbeni wayinda ti fa peko ti awango so a mû. A lingbi a fâ yâ ti aterritoire kete kete alingbi na wungo ti ada 150 ti si na 200. A yeke sara Bungbi ti Kusala na ajeudi na lakui ti tene aita asara lisoro na popo ti ala na ndo ti aye so asi na ala nga ti mû arapport ti ala.

Ita Herman Philbrick atene: “Na kiringo ti e na yanga-da, e yeke na gbâ ti ambeti ti abonema.” Ala wara na ndo kue azo so ayeda ti mä ala. Ita Beulah Covey atene: “Mo bâ mo tene na peko ti bira nga kota vundu so azo awara, anzere na azo kue ti mä so mbeni ngoi ayeke ga so kpale ti azo kue ayeke hunzi nga gigi ti ala yeke ga nzoni ahon ti kozo.”Arthur Claus atene: “Li ti aita na yâ ti congrégation kue akpe na wungo ti ambeti ti abonema so ala wara.” Na yâ ti anze use so a sigigi na kozo article ti L’Âge d’Or, a kangbi ni nduru na 500 000, nga azo 50 000 la asara abonema ti mbeti ni lani.

A. H. Macmillan atene mbeni la so article “Nzoni tënë ti Royaume” so a yeke na yâ ti Tour ti Ba Ndo ti lango 1 ti juillet ngu 1920 ayeke kozo article so awa aita na yâ ti dunia kue ti fa tënë na ndo ti Royaume ti Nzapa. Article ni awa aChrétien kue so a soro ala ti gue na yayu ti “fa tënë ti témoin na azo kue so royaume ti yayu aga nduru awe.” Laso, azo million mingi, legeoko na aita ti Christ so “a mû kua ni na ala”, ayeke fa tënë na yapungo tere na ngoi so ala yeke ku pendere ngoi ti komandema ti Messie.