Agbia use so ake terê na ngoi ti nda ni
Aprophétie so a sara tënë ni na yâ ti encadré so afa aye so asi na oko ngoi. Aye ni so kue afa so e yeke na “ngoi ti nda ni.”—Dan. 12:4.
Aversê: Apoc. 11:7; 12:13, 17; 13:1-8, 12
Prophétie: “Nyama ti ngonda” ni akomande na ndö ti azo na sese ahon ngu 3000. Na ngoi ti nda ni, mbasambala li ti nyama ni awara kä. Na pekoni, kä ti li ti lo ni amü na “sese kue” amû peko ti lo. Satan asara kua na nyama so ti “sara bira na tanga” ti aChrétien so a soro ala.
Gango tâ tënë ni: Na peko ti kota ngu so apika, agouvernement so ayeke awato ti Jéhovah akomande na ndö ti azo. Ahon ngu 3000 na pekoni, mbeni ngangu gouvernement ni so ayeke ti Grande-Bretagne, aperdre kota ngangu so lo yeke na ni na ngoi ti Kozo bira so amû sese kue. Lo kiri lo wara ngangu ni encore lani na ngoi so lo bungbi oko na États-Unis. Mbilimbili na ngoi ti nda ni so, Satan asara kua na agouvernement kue ti sese ti sara ngangu na azo ti Nzapa.
Aversê: Dan. 11:25-45
Prophétie: Gbia ti nord na gbia ti sud ayeke ke terê na ngoi ti nda ni.
Gango tâ tënë ni: Allemagne atiri bira na Grande-Bretagne na États-Unis. Na ngu 1945 Union Soviétique na akodro so amû maboko na lo aga gbia ti nord. Na ngu 1991 Union Soviétique atï, na pekoni, Russie na akodro so amû maboko na lo aga gbia ti nord.
Aversê: És. 61:1; Mal. 3:1; Luc 4:18
Prophétie: Jéhovah atokua “watokua” ti lo ti “leke lege” kozo si a zia na sese gere ti Royaume so Christ ayeke Gbia ni. “Watokua” ni akomanse ti “fa nzoni tënë na azo so abâ terê ti ala kete.”
Gango tâ tënë ni: Na peko ti ngu 1870, Ita Russell na amba ti lo amanda Bible mingi ti hinga ye so Bible afa biani nga ti fa na azo aye so ala manda. Na ngu 1881, ala ga ti bâ so a yeke kota ye mingi ti tene awakua ti Nzapa afa tënë. Ala sigi na a-article tongana “E yeke na bezoin ti awafango tënë 1000” nga na “Nzapa asoro ala ti fa tënë.”
Aversê: Mat. 13:24-30, 36-43
Prophétie: Mbeni koli alu ablé na yâ ti mbeni yaka. Na pekoni, mbeni sioni wato aga alu asioni pere na yâ ti yaka ni. Asioni pere ni akono na akanga ndö ti ablé ni. Na ngoi ti kongo lê ti kobe ni, a zia asioni pere ni nde, a zia ablé ni nde.
Gango tâ tënë ni: Ti londo na ngu 1870, a bâ tâ polele kangbi so ayeke na popo ti atâ Chrétien nga na aChrétien ti wataka. Na yâ ti ngoi ti nda ni so, a bungbi atâ Chrétien na yâ ti congrégation nga a zia ala nde na aChrétien ti wataka.
Aversê: Dan. 2:31-33, 41-43
Prophétie: Gere so ayeke na wen nga na popoto ayeke gere ti mbeni statue so a sara na awen nde nde.
Gango tâ tënë ni: Popoto ni aye ti sara tënë ti asenge zo so asara kpengbango-li na Grande-Bretagne nga na États-Unis so akomande na ndö ti ala. Ndali ti azo ni so, agouvernement so apeut ti sara kua na komandema ti ala ni kue ape.
Aversê: Mat. 13:30; 24:14, 45; 28:19, 20
Prophétie: A bungbi “ablé” ni na yâ ti “gogoro” nga a zia “ngbâa be-ta-zo so ayeke sara ye na ndara” na ndö ti “azo ti kua”. A komanse ti fa “nzoni tënë ti Royaume na ndö ti sese kue so azo ayeke dä”.
Gango tâ tënë ni: Na ngu 1919, a zia ngbâa be-ta-zo na ndö ti awakua ti Nzapa. Ti londo na ngoi ni so ti ga na ni, aWamandango Bible afa tënë mingi. Laso, aTémoin ti Jéhovah afa tënë na yâ ti akodro ahon 200 nga ala sigi na ambeti so asara tënë na ndö ti Bible na ayanga ti kodro ahon 1 000.
Aversê: Dan. 12:11; Apoc. 13:11, 14, 15
Prophétie: Mbeni nyama ti ngonda so ayeke na adidi use atene na azo so ayeke na ndö ti sese ti leke mbeni “statue ndali ti nyama ti ngonda ni,” nga nyama ti ngonda ni ‘atokua pupu na yâ ti statue’ ni.
Gango tâ tënë ni: Grande-Bretagne na États-Unis asara si Bungbi ti Amara abâ gigi. Ambeni mara amû maboko na lo. Ti londo na ngu 1926 ti si na ngu 1933, gbia ti nord aga nga mbeni membre ti Bungbi ti Amara. Azo apensé so Bungbi ti Amara ni alingbi ti ga na siriri na yâ ti dunia, mbeni ye so gï Royaume ti Nzapa oko la alingbi ti ga na ni. Azo abâ nga atene Bendo ti Gigi alingbi ti ga na ni.
Aversê: Dan. 8:23, 24
Prophétie: Mbeni gbia so ngonzo agbu lo mingi ‘abuba aye ngangu mingi’.
Gango tâ tënë ni: Grande-Bretagne na États-Unis afâ azo mingi nga ala buba aye mingi. Na tapande, na ngoi ti Use bira so amû sese kue, États-Unis afâ azo mingi nga lo buba aye mingi na mbeni fason so zo ade ti bâ mara ni pëpe na lege so lo bi angangu lê ti ngombe use na ndö ti amara so ayeke awato ti Grande-Bretagne na États-Unis.
Aversê: Dan. 11:31; Apoc. 17:3, 7-11
Prophétie: “Bengba nyama ti ngonda” so ayeke na didi bale-oko asigi na yâ ti dû so alï mingi nga lo yeke miombe gbia. Mbeti ti Daniel afa so gbia ni ayeke “ye ti saleté so asara si ye kue abuba.”
Gango tâ tënë ni: Bungbi ti Amara ahunzi na ngoi ti Use bira so amû sese kue. Na peko ti bira ni, ‘a zia na sese’ Bendo ti gigi. Azo amû gloire so alingbi fade na Royaume ti Nzapa na Bendo ti gigi, tongana ti so ala mû na Bungbi ti Amara so aga kozo na lo. Bendo ti gigi ayeke londo ande na bira na terê ti abungbi ti vorongo Nzapa.
Aversê: 1 aThes. 5:3; Apoc. 17:16
Prophétie: Amara ato mbela, atene: “Siriri na nzoni duti ayeke dä”. Nga, “adidi bale-oko” nga na “nyama ti ngonda” ayeke londo na bira na terê ti “wali-ndumba” na afuti lo. Na pekoni, a yeke futi amara.
Gango tâ tënë ni: Amara ayeke tene ande so ala ga na siriri na nzoni duti na yâ ti dunia awe. Na pekoni, amara so amû mbage ti Bendo ti gigi ayeke futi abungbi ti vorongo nzapa ti wataka. So ayeke tongo nda ti kota ye ti vundu la. Kota ye ti vundu ni ayeke hunzi na ngoi so Jésus ayeke futi dunia ti Satan kue na Harmaguédon.
Aversê: Ézéch. 38:11, 14-17; Mat. 24:31
Prophétie: Gog alï na ngangu na yâ ti kodro ti azo ti Nzapa. Na pekoni, a-ange abungbi ‘azo so a soro ala’.
Gango tâ tënë ni: Gbia ti nord nga na tanga ti agouvernement ti dunia so ayeke ga na bira na terê ti azo ti Nzapa. Na peko ti so bira ni ato nda ni, a yeke bungbi na yayu tanga ti aChrétien so a soro ala.
Aversê: Ézéch. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20
Prophétie: “Zo so aduti” na ndö ti mbeni “vuru mbarata” ahunzi “songo benda ti lo” na lege so lo futi Gog na aturugu ti lo. A bi “nyama ti ngonda ni” “na yâ ti lac ti wâ”, na mbeni tênë apika yongoro statue ni afuti ni.
Gango tâ tënë ni: Jésus, Gbia ti Royaume ti Nzapa, ayeke sö azo ti Nzapa. Lo na azo 144 000 so ayeke komande legeoko na lo nga na a-ange ayeke futi bungbi ti amara, so ti tene azo ti poroso kue ti dunia ti Satan.
