1. Nyen la Jésus atene na ndö ti amosoro so ayeke na yayu?

A YEKE anzoni ye kue so a mû na e la e peut ti bâ ni ape. Ti tâ tënë ni, e lingbi pëpe ti bâ anzoni ye so ayeke kota mingi. Na ngoi so Jésus ayeke fa tënë na ndö ti hoto, lo sara tënë ti amosoro so ayeke na yayu so ayeke kota mingi ahon amosoro so ayeke na sese. Na pekoni, lo tene tâ tënë so, lo tene: “Ndo so mosoro ti mo ayeke dä, bê ti mo ayeke nga dä.” (Mat. 6:19-21). Bê ti e ayeke pusu e ti tomba peko ti aye so ayeke kota mingi na lê ti e. E yeke bungbi ‘amosoro na yayu’ tongana e yeke na nzoni iri na gbele Nzapa. Jésus atene so zo alingbi lâ oko pëpe ti futi mara ti amosoro so wala ti nzi ni.

2. (a) Ti gue oko na 2 aCorinthien 4:17, 18, nyen la Paul awa e ti zia lê ti e na ndö ni? (b) Nyen la e yeke bâ ni na yâ ti article so?

² Bazengele Paul awa e ti “zia lê ti e . . . na ndö ti aye so lê ayeke bâ pëpe.” (Diko 2 aCorinthien 4:17, 18.) Aye so lê ayeke bâ pëpe ayeke tongana amosoro so na popo ni a yeke wara aye ti nzoni so e yeke wara ande na yâ ti fini dunia ti Nzapa. Na yâ ti article so, e yeke bâ aye osio so ayeke tongana amosoro so e lingbi ti bâ nzoni dä laso: songo ti kamarade so e yeke na ni na Nzapa, pasa so e yeke na ni ti sambela Nzapa, mungo maboko ti yingo vulu ti Nzapa nga na mungo maboko ti Jéhovah, Jésus nga na a-ange na fango tënë. E yeke bâ nga tongana nyen la e lingbi ti fa so e kiri singila ndali ti amosoro so e lingbi ti bâ ni ape so.

3. Kota mosoro so ahon atanga ni kue so lê ayeke bâ pëpe ayeke nyen? Nyen la amû lege na Nzapa ti ga kamarade ti e?

³ Songo ti kamarade so e yeke na ni na Jéhovah Nzapa ayeke kota mosoro so ahon atanga ni kue so lê ayeke bâ pëpe (Ps. 25:14). Nyen la amû lege na Nzapa ti ga kamarade ti azo so siokpari ayeke na terê ti ala na ti ngbâ nzoni-kue? Lo lingbi ti sara ni ndali ti so sandaga ti Jésus “azi siokpari ti [azo ti] dunia so”. (Jean 1:29). Même kozo ti tene Jésus akui, Jéhovah ahinga awe so Jésus ayeke ngbâ be-ta-zo juska na kuâ tongaso si lo lingbi ti sö azo. Ndani la Nzapa alingbi ti sara kamarade na azo so ayeke na fini kozo si Christ akui.—aRom. 3:25.

4. Fa ambeni tapande ti akoli so ayeke na fini kozo na Christ so ayeke lani akamarade ti Nzapa.

⁴ Gbu li na ndö ti tapande ti ambeni koli so ayeke na fini kozo na Christ so ayeke lani akamarade ti Nzapa. Abraham ayeke lani mbeni koli so ayeke na kpengba mabe. Ahon ngu 1000 na peko ti kuâ ti Abraham, Jéhovah airi lo “kamarade ti mbi”. (És. 41:8). Tongaso, même kuâ alingbi pëpe ti kangbi Jéhovah na akota kamarade ti lo. Na lê ti Jéhovah, Abraham ayeke na fini ndali ti so Jéhovah angbâ ti dabe ti lo na lo (Luc 20:37, 38). Mbeni tapande ni ayeke ti Job. Na ngoi so a-ange kue abungbi ndo oko na yayu, atënë so Jéhovah atene afa so lo yeke na confiance na Job. Jéhovah airi lo “mbeni koli so ayeke sara ye lakue mbilimbili, lo kpe mbeto ti Nzapa nga lo kpe ye ti sioni.” (Job 1:6-8). Nga, Jéhovah apensé nyen na ndö ti Daniel so, teti ngu 80, asara na lo be-ta-zo na ndo so azo avoro Jéhovah dä ape? Fani ota, a-ange adë bê ti Daniel so aga mbakoro awe so lo yeke lani “mbeni zo so [Nzapa abâ lo] na nene ni mingi.” (Dan. 9:23; 10:11, 19). E hinga biani so Jéhovah aku kungo lango so lo yeke zingo ande akamarade ti lo, so lo ye ala mingi, so akui.—Job 14:15.

5. Nyen la a lingbi zo asara ti ga kota kamarade ti Jéhovah?

⁵ Azo oke la so ayeke mbilimbili-kue ape ayeke laso na kpengba songo ti kamarade na Jéhovah? Ala yeke kutu mingi. E hinga ni ndali ti so gbâ ti akoli, awali nga na amolenge na ndö ti sese kue ayeke fa na lege ti sarango ye ti ala so ala ye ti duti akamarade ti Nzapa. “Akota kamarade ti [Jéhovah] ayeke azo ti mbilimbili.” (aProv. 3:32). Ala wara lege ti sara kamarade na Nzapa ndali ti so ala yeke na mabe na ye so Jésus afuta ti zi azo. Grâce na ye so Jésus afuta so, na nzoni bê, Jéhovah amû lege na e ti mu terê ti e na lo nga ti wara batême. Tongana e sara akpengba ye so, e yeke duti na popo ti aChrétien kutu mingi so amû terê ti ala na Jéhovah nga ala wara batême; ala yeke “akota kamarade” ti Lo so ayeke kota mingi na yâ ti dunia kue.

6. E lingbi ti sara nyen ti fa so e bâ na nene ni mingi songo ti kamarade so e yeke na ni na Nzapa?

⁶ E lingbi ti sara nyen ti fa so e bâ na nene ni mingi songo ti kamarade so e yeke na ni na Nzapa? Tongana ti Abraham na Job, so angbâ lani be-ta-zo na Nzapa ahon ngu ngbango oko, a lingbi e ngbâ be-ta-zo na lo, atâa ngoi oke la e yeke sara na Jéhovah na yâ ti dunia so. Tongana ti Daniel, a lingbi e bâ songo ti kamarade so e yeke na ni na Nzapa tongana mbeni ye so ayeke kota mingi ahon fini ti e (Dan. 6:7, 10, 16, 22). Grâce na mungo maboko ti Jéhovah, e lingbi ti gbu ngangu na yâ ti atara kue so e wara tongaso si e lingbi ti duti lakue akota kamarade ti lo.—aPhil. 4:13.

7. (a) Ti gue oko na aProverbe 15:8, na ngoi so Jéhovah ayeke mä asambela ti e, bê ti lo ayeke tongana nyen? (b) Jéhovah ayeke kiri tënë na asambela ti e tongana nyen?

⁷ Mbeni mosoro so lê ayeke bâ pëpe ayeke sambela. A nzere na akota kamarade ti fa apensé ti ala na mba nga ti sara lisoro na mba. Eskê ti e na Jéhovah ayeke nga tongaso? En. Jéhovah  ayeke sara tënë na e na lege ti Bible, nga na yâ ni lo yeke fa na e apensé ti lo nga na atënë ti bê ti lo. E yeke sara tënë na lo na lege ti sambela, nga e lingbi ti fa na lo apensé ti e kue nga na atënë ti gbe ti bê ti e. A nzere na Jéhovah ti mä asambela ti e. (Diko aProverbe 15:8.) Jéhovah, so ayeke mbeni Kamarade so ayeke na ndoye, ayeke mä asambela ti e nga lo yeke kiri tënë na ni. Na ambeni ngoi, lo yeke kiri tënë na ni hio. Me na ambeni ngoi nde, peut-être a lingbi e ngbâ ti sambela na ndö ti mbeni tënë. Ye oko, e hinga biani so lo yeke kiri tënë na ni na ngoi so alingbi nga na tâ nzoni lege ni. Tâ tënë, a lingbi ti si so kiringo tënë ti Nzapa apeut ti duti nde na ti so e ku terê ti e na ni. Na tapande, ahon ti tene lo zi mbeni kpale, lo lingbi ti mû na e ndara nga na ngangu “ti gbu ngangu dä.”—1 aCor. 10:13.

8. E lingbi ti sara nyen ti fa so e bâ na nene ni mingi pasa so e yeke na ni ti sambela Nzapa?

⁸ E lingbi ti sara nyen ti fa so e bâ na nene ni mingi kota pasa so e yeke na ni ti sambela Nzapa? Mbeni ye so e lingbi ti sara ayeke ti sara ye alingbi na wango ti Jéhovah so ayeke ti “ngbâ ti sambela lakue.” (1 aThes. 5:17). Jéhovah agbu e na ngangu ti sambela ape. Me lo bâ na nene ni liberté ti e nga lo wa e ti “ngbâ lakue ti sambela.” (aRom. 12:12). Tongaso e lingbi ti fa singila ti bê ti e tongana e sambela lo fani mingi lâ oko oko. Tâ tënë, a yeke nzoni e zia na yâ ti asambela ti e atënë ti kiringo singila na Jéhovah nga na ti gondango lo.—Ps. 145:2, 3.

9. Tënë ti bê ti mbeni ita-koli na ndö ti sambela ayeke so wa? Tënë ti bê ti mo na ndö ni ayeke so wa?

⁹ Tongana ngoi ayeke hon si e yeke sara na Jéhovah nga e bâ lege so lo yeke kiri tënë na asambela ti e, e yeke bâ sambela na nene ni mingi ahon ti kozo. Zia e bâ tapande ti Chris, mbeni ita-koli so ayeke na yâ ti kua ti ngoi kue ahon ngu 47. Lo tene: “A nzere na mbi ti zingo hio na ndapre tongaso si mbi lingbi ti sambela Jéhovah. A dë bê ti mbi mingi ti sara tënë na Jéhovah na ngoi so lâ ayeke sigi nga lumière ni ayeke su na ndö ti angu ti pere. Ye so apusu mbi ti kiri singila na lo ndali ti acadeau kue so lo mû na e, so na popo ni a yeke wara pasa so e yeke na ni ti sambela lo. Na ngoi so mbi sambela kozo ti tene mbi lango, a nzere na mbi ti lango na mbeni nzoni conscience.”

10. Ngbanga ti nyen la a lingbi e bâ yingo vulu ti Nzapa tongana mbeni mosoro?

¹⁰ Mbeni mosoro so lê ayeke bâ ni pëpe ayeke yingo vulu ti Nzapa. Jésus awa e ti ngbâ ti sambela ti wara yingo vulu (Luc 11:9, 13). Jéhovah ayeke sara kua na yingo vulu ti lo ti mû na e ngangu, même “ngangu so ahon ti so zo ayeke na ni”. (2 aCor. 4:7; Kus. 1:8). Grâce na mungo maboko ti yingo ti Nzapa, e lingbi ti gbu ngangu na yâ ti atara kue so e tingbi na ni.

11. Na lege wa la yingo vulu alingbi ti mû maboko na e?

¹¹ Yingo vulu alingbi ti mû maboko na e ti sara akua ti Nzapa so a mû na e. Yingo ti Nzapa alingbi ti sara si akode ti e amaï. Yingo vulu amû lege na e ti sara akua ti e ti Chrétien. E hinga biani so anzoni ye kue so e sara na yâ ti kua ti Nzapa ayeke grâce na mungo maboko ti yingo vulu ti Nzapa, me pëpe na ngangu ti e wani.

12. Ti gue oko na Psaume 139:23, 24, nyen la e lingbi ti sambela ti tene yingo vulu amû maboko na e ti sara?

¹² Mbeni lege ti fa so e bâ yingo vulu ti Nzapa na nene ni ayeke ti sambela ti tene amû maboko na e ti hinga asioni pensé wala asioni nzara so ayeke na yâ ti bê ti e. (Diko Psaume 139:23, 24.) Tongana e sara tongaso, Jéhovah, na lege ti yingo ti lo, alingbi ti sara si e hinga asioni pensé wala asioni nzara ti bê ti e. Tongana e hinga mbeni sioni pensé wala mbeni sioni nzara ni so, a lingbi e sambela ti wara yingo ti Nzapa ti tene amû na e ngangu ti hon ndö ti pensé wala nzara ni so. Tongana e sara ni, e yeke fa so e leke na bê ti e ti ke ti sara ye kue so alingbi ti sara si Jéhovah azia ti mû na e yingo vulu ti lo ti mû maboko na e.—aÉph. 4:30.

13. Tongana nyen la e lingbi ti kiri ti bâ yingo vulu na nene ni mingi?

¹³ E lingbi ti kiri ti bâ yingo vulu na nene ni mingi tongana e gbu li na ndö ti aye so yingo vulu ayeke sara na ngoi ti e. Kozo si Jésus ague na yayu, lo tene na adisciple ti lo, lo tene: “Ala yeke wara ande ngangu tongana yingo vulu aga na ndö ti ala, ala yeke duti atémoin ti mbi . . . juska na ambage ti sese so ayeke tâ yongoro.” (Kus. 1:8). Atënë so ayeke ga tâ tënë na mbeni lege so apika bê mingi. Grâce na mungo maboko ti yingo vulu, azo so wungo ti ala ahon kutu miombe na ndambo na ndö ti sese kue aga  awakua ti Jéhovah. Nga, e yeke na yâ ti mbeni paradis ti yingo ndali ti so yingo ti Nzapa amû maboko na e ti duti na apendere sarango ye tongana ndoye, ngia, siriri, kangango bê ti ku, sarango nzoni na zo, nzoni bê, mabe, sarango ye na ngangu pëpe nga na kangango nzara ti bê. Asarango ye so abungbi aga “lengo ti yingo”. (aGal. 5:22, 23). Yingo vulu ayeke biani mbeni pendere cadeau mingi.

14. Mungo maboko wa la e yeke wara ni so lê ayeke bâ pëpe na ngoi so e yeke fa tënë?

¹⁴ Mbeni mosoro so e yeke na ni so lê ayeke bâ pëpe ayeke ti “sara kusala legeoko” na Jéhovah, Jésus, nga na a-ange (2 aCor. 6:1). E yeke sara ni tongana e mû mbage na yâ ti kua ti sarango adisciple. Paul atene na ndö ti lo wani nga na ndö ti azo so ayeke sara kua so, lo tene: “E na Nzapa e sara kua oko.” (1 aCor. 3:9). Tongana e mû mbage na fango tënë, a fa so e na Jésus nga e yeke sara kua legeoko. Na peko ti so Jésus amû lani yanga na adisciple ti lo ti “sara si azo na popo ti amara kue aga adisciple”, lo tene: “Mbi yeke na terê ti ala.” (Mat. 28:19, 20). Ka ti a-ange? E kiri singila mingi so a-ange ayeke fa lege na e na ngoi so e yeke fa “nzoni tënë ti lakue lakue . . . na azo so asara kodro na ndö ti sese”.—Apoc. 14:6.

15. Mû mbeni tapande ti Bible so afa kota kua so Jéhovah ayeke na ni na yâ ti kua ti e ti fango tënë.

¹⁵ Grâce na mungo maboko so e wara so alondo na yayu, nyen la e lingbi ti sara? Na ngoi so e yeke gue na tënë ti Royaume so ayeke tongana lungo alê ti kobe, ambeni lê ni atï na ndö ti pendere sese na amaï, so ti tene azo so bê ti ala ayeke nzoni amä tënë ni na ayeda na ni (Mat. 13:18, 23). Zo wa la asara si tâ tënë so ayeke tongana lê ti kobe amaï na alë? Jésus atene so zo alingbi ti ga disciple ti lo gï tongana “Babâ . . . agboto lo aga na lo na mbage ti mbi”. (Jean 6:44). E wara mbeni mbilimbili tapande ni na yâ ti Bible. Pensé na ngoi so Paul afa tënë lani na mbeni groupe ti awali na gigi ti gbata ti Philippe. Bâ ye so Bible atene na ndö ti Lydie, mbeni oko ti awali so; a tene: “Jéhovah azi bê ti lo kota ti dengi mê na aye so Paul ayeke tene.” (Kus. 16:13-15). Legeoko tongana ti Lydie, Jéhovah agboto azo kutu mingi ti ga na mbage ti Jésus.

16. Zo wa la a lingbi a gonda lo ndali ti anzoni ye so e wara na fango tënë?

¹⁶ Zo wa la a lingbi a gonda lo ndali ti anzoni ye so e wara na fango tënë? Paul akiri tënë na hunda so na ngoi so lo sû atënë so na ndö ti congrégation ti Corinthe: “Mbi lu ye lani, Apollos atuku ngu dä, me Nzapa asara si a kono. Ni la, zo so alu ye ni ayeke ye oko pëpe, nga zo so atuku ngu dä ayeke ye oko pëpe, me kota ye ni ayeke Nzapa so asara si ye ni akono.” (1 aCor. 3:6, 7). Legeoko tongana ti Paul, a lingbi e mû lakue gonda na Jéhovah ndali ti anzoni ye kue so e wara na fango tënë.

17. Tongana nyen la e lingbi ti fa so e bâ na nene ni pasa so e yeke na ni ti “sara kusala legeoko” na Nzapa, Christ nga na a-ange?

¹⁷ Tongana nyen la e lingbi ti fa so e bâ na nene ni pasa so e yeke na ni ti “sara kusala legeoko” na Nzapa, Christ nga na a-ange? E lingbi ti sara ni tongana, na bê ti e kue, e gi alege kue ti fa nzoni tënë na azo. Alege ti sarango ni ayeke mingi, na tapande tongana e fa tënë “na lê ti azo dandara nga da na da.” (Kus. 20:20). Aita mingi aye nga ti fa tënë na alege kue so azi na ala. Na ngoi so ala wara mbeni zo so ala hinga lo ape, ala yeke bara lo na ngia nga ala yeke tara ti to nda ti lisoro na lo. Tongana zo ni aye ti sara lisoro, na kode ala yeke gue na lisoro ni na ndö ti tënë ti Royaume.

18-19. (a) Tongana nyen la e yeke tuku ngu na ndö ti angongoa ti tâ tënë? (b) Fa mbeni ye so asi so afa tongana nyen la Jéhovah amû maboko na mbeni zo so amanda lani Bible.

¹⁸ So “e na Nzapa e sara kua oko”, a lingbi e lu  pëpe gï angongoa ti tâ tënë, me a lingbi e tuku nga ngu dä. Tongana mbeni zo asara nzara ti tënë ni, e yeke sara ye kue so e lingbi ti sara ti kiri ti bâ zo ni, wala e yeke leke ti tene mbeni zo nde ague abâ lo ti komanse ti manda Bible na lo. Tongana e bâ so Jéhovah ayeke mû maboko na zo ni ti changé fason so lo yeke pensé na ni, e yeke na ngia.

¹⁹ Bâ tapande ti Raphalalani, mbeni zo ti nganga na Afrique du Sud. Aye so lo manda na yâ ti Bible anzere na lo mingi. Me tongana lo diko ye so Bible atene na ndö ti sarango lisoro na akotara so akui, a yeke ngangu na lo ti yeda na ni (Deut. 18:10-12). Yeke yeke, lo zia si Nzapa aleke fason so lo yeke pensé na ni. A si na mbeni ngoi, lo zia kua ti lo ti nganga ni, atâa so a yeke gï oko ye so lo sara ti vivre na ni la. Raphalalani, so ayeke laso na ngu 60, atene: “Mbi kiri singila mingi na aTémoin ti Jéhovah so amû maboko na mbi na alege mingi, na tapande ala mû maboko na mbi ti wara kua ti nginza. Kota ye ni ayeke so mbi kiri singila na Jéhovah so amû maboko na mbi ti sara achangement na yâ ti fini ti mbi, tongaso si mbi lingbi ti fa tënë tongana mbeni Témoin so awara batême.”

20. Nyen la mo leke na bê ti mo ti ngbâ ti sara?

²⁰ Na yâ ti article so, e bâ fade aye osio so ayeke tongana amosoro so lê ayeke bâ pëpe. Mosoro so ayeke kota ahon atanga ni ayeke pasa so e yeke na ni ti tene Jéhovah aduti kota Kamarade ti e. Ye so azi lege na e ti wara aye ti nzoni na lege ti ambeni mosoro so lê ayeke bâ pëpe, so ayeke ti sambela Jéhovah, ti wara mungo maboko ti yingo vulu, ti Jéhovah, ti Jésus nga na ti a-ange na yâ ti kua ti fango tënë. Zia e leke na bê ti e ti kiri ti bâ na nene ni mingi amosoro so lê abâ ape so. Nga, zia e ngbâ lakue ti kiri singila na Jéhovah ndali ti so lo yeke mbeni nzoni Kamarade mingi.