1-2. Fa tongana nyen la amama-ndia ti Bible apeut ti ndu e mingi tongana dutingo ti e achangé.

 NA NGOI so mbeni couple asara mariage, mingi ni mbeni ancien ayeke mû mbeni diskur ti mariage ndali ti ala. Amama-ndia so lo sara tënë ni na yâ ti diskur ni ayeke fini ye na ala ape. Me na lango ni so ti gue na ni, amama-ndia ni so andu ala mingi. Ngbanga ti nyen? Ngbanga ti so ala yeke sara kua na ni na yâ ti couple ti ala.

² A yeke nga tongaso tongana mbeni couple so ayeke aChrétien aga babâ na mama. Na yâ ti angu mingi, peut-être ala mä gbâ ti adiskur na ndö ti batango amolenge. Me fadeso, awango so ayeke na yâ ti adiskur so aga ye so ayeke kota ye mingi na ala. Ala yeke wara molenge ti ala wani so ala yeke bata lo. So mbeni kota kua! Tongana aye achangé na yâ ti gigi ti e, ambeni versê ayeke ga kota ye mingi na e. So ayeke mbeni raison so ndali ni awakua ti Jéhovah ayeke diko Bible nga, tongana ti so a hunda lani na agbia ti Israël, ala yeke gbu li na ndö ni “na yâ ti gigi ti [ala] kue”.—Deut. 17:19.

3. Nyen la e yeke bâ na yâ ti article so?

³ Ababâ na amama, ala yeke na mbeni kota pasa so mbeni Chrétien apeut ti wara, so ayeke ti fa ye na amolenge ti ala na ndö ti Jéhovah. Me ala ye pëpe ti tene amolenge ni ahinga gï ye na ndö ti Nzapa ti e. Ala ye ti aidé amolenge ti ala ti ye lo mingi. Nyen la ala peut ti sara ti tene amolenge ti ala aye Jéhovah? Na yâ ti article so, e yeke bâ amama-ndia osio  ti Bible so apeut ti aidé ala ababâ na amama (2 Tim. 3:16). E yeke bâ nga tongana nyen la sarango ye alingbi na awango ti Bible a-aidé ambeni babâ na mama so ayeke aChrétien.

4. Mbeni mama-ndia wa la apeut ti aidé ababâ na amama ti yôro ndoye ti Jéhovah na yâ ti bê ti amolenge ti ala? (Jacques 1:5).

⁴ Kozo mama-ndia ni: Gi fango lege ti Jéhovah. Hunda Jéhovah ti mû na mo ndara so mo bezoin ni ti tene mo aidé amolenge ti mo ti ye lo. (Diko Jacques 1:5.) Lo la lo yeke nzoni Zo ti mungo wango na zo. Araison ni ayeke mingi. Zia e bâ ambeni use. Kozo ni, Jéhovah ayeke Babâ kozo ti azo kue (Ps. 36:9). Use ni, awango ti lo ti ndara aga lakue na aye ti nzoni.—És. 48:17.

5. (a) Nyen la bungbi ti Jéhovah asigi na ni ti aidé ababâ na amama? (b) Tongana ti so a fa na yâ ti vidéo ni, nyen la mo manda na lege ti fason so Ita Amorim na wali ti lo abata na amolenge ti ala?

⁵ Na lege ti Bible nga na bungbi ti lo, Jéhovah amû na ababâ na amama gbâ ti awango so apeut ti aidé ala ti fa na amolenge ti ala ti ye lo (Mat. 24:45). Na tapande, mo peut ti wara gbâ ti anzoni wango na yâ ti molongo ti a-article “Ti mû maboko na asewa,” so teti angu mingi asigi na yâ ti Zingo na lango! na fadeso ayeke na ndö ti site ti e. Na ndö ni, gbâ ti avidéo so ayeke na ndö ti jw.org apeut ti aidé ababâ na amama ti sara ye alingbi na awango ti Jéhovah na ngoi so ala yeke bata amolenge ti ala. *—aProv. 2:4-6.

6. Mbeni babâ apensé nyen na ndö ti fango lege so lo na wali ti lo awara na mbage ti bungbi ti Jéhovah?

⁶ Ababâ na amama mingi akiri singila na Jéhovah ndali ti mungo maboko so lo mû na ala na lege ti bungbi ti lo. Joe,so ayeke mbeni babâ, atene: “Ti bata amolenge ota na yâ ti tâ tënë ayeke kete kua ape. Mbi na wali ti mbi e yeke sambela Jéhovah lakue ti aidé e. Fani mingi, e bâ so mbeni article wala mbeni vidéo asi tâ na ngoi ni ti aidé e ti leke mbeni kpale so e wara. E zia bê ti e lakue na ndö ti awango ti Jéhovah.” Joe na wali ti lo abâ so a-article nga na avidéo so a-aidé amolenge ti ala ti ga nduru na Jéhovah.

7. Ngbanga ti nyen la a yeke kota ye ti tene ababâ na amama asara kue ti zia nzoni tapande na amolenge ti ala? (aRomain 2:21).

 ⁷ Use mama-ndia ni: Fa ye na lege ti tapande ti mo. Amolenge ayeke bâ ababâ na amama ti ala nzoni, na mingi ni ala yeke sara ye tongana ala. Ti tâ tënë ni, mbeni babâ wala mama so ayeke mbilimbili-kue ayeke dä ape (aRom. 3:23). Atâa so kue, ababâ na amama so asara ye na ndara ayeke sara kue ti zia nzoni tapande na amolenge ti ala. (Diko aRomain 2:21.) Mbeni babâ atene na ndö ti amolenge, atene: “Ala yeke tongana mousse so ayeke gboto aye kue.” Lo kiri lo tene: “Tongana e sara ye nde na aye so e yeke gi ti fa na ala, ala yeke tene na e.” Tongaso, tongana e ye ti tene amolenge ti e aye Jéhovah, a yeke nzoni e ye lo mingi nga ala bâ ni.

8-9. Nyen la mo manda na lege ti atënë so Andrew na Emma atene?

⁸ Alege so ababâ na amama apeut ti fa na amolenge ti ala ti ye Jéhovah ayeke mingi. Mä tënë so Andrew, mbeni ita-koli so ayeke na ngu 17, atene. Lo tene: “Babâ na mama ti mbi afa na mbi lakue so a yeke kota ye mingi ti sambela. Lakue na bï, Papa ayeke sambela na mbi, même tongana mbi wani mbi sambela awe. Babâ na mama ti e ayeke dabe ti e lakue atene: ‘Ala peut ti sara tënë na Jéhovah fani mingi tongana ti so ala ye.’ So ala sara tongaso, sambela aga ye so ayeke kota mingi na mbi. Fadeso, a yeke ngangu na mbi ape ti sambela nga ti bâ so Jéhovah ayeke Babâ so aye mbi.” Ababâ na amama, ala girisa ape so tongana ala ye Jéhovah, a peut ti aidé amolenge ti ala ti ye nga lo.

⁹ Bâ nga tapande ti Ita-wali Emma. Na ngoi so babâ ti lo adö sewa ni azia, lo yeke lani na kota bon na li ti lo, na mama ti lo la adoit ti payé ni. Emma atene: “Fani mingi, Mama ayeke na nginza mingi ape, me lakue lo yeke sara tënë na ndö ti fason so Jéhovah ayeke bâ lege ti awakua ti lo. Mbi bâ so fason so lo yeke vivre na ni afa so lo yeke biani na confiance na ni. Mama asara ye alingbi na aye so lo fa na mbi.” Nyen la e manda dä? Ababâ na amama apeut ti fa ye na amolenge ti ala na lege ti tapande ti ala, même na angoi so aye ayeke ngangu.—aGal. 6:9.

10. Na angoi wa la ababâ na amama so ayeke azo ti Israël apeut lani ti sara lisoro na amolenge ti ala na ndö ti Jéhovah? (Deutéronome 6:6, 7).

¹⁰ Ota mama-ndia ni: Sara lisoro lakue na amolenge ti mo. Jéhovah ahunda na azo ti Israël ti ândö ti fa ye lakue na amolenge ti ala na ndö ti lo. (Diko Deutéronome 6:6, 7.) Lango oko oko, lege azi lani mingi na ababâ na amama so ti sara lisoro na amolenge ti ala nga ti fa na ala ti ye Jéhovah. Na tapande, mbeni molenge-koli ti Israël apeut ti mû al’heure mingi ti mû maboko na babâ ti lo ti lu alê ti kobe wala ti ro ni. Ita ti lo ti wali apeut ti mû ngoi mingi na yâ ti lango ni ti mû maboko na mama ti lo ti fü bongo nga ti sara ambeni kua ti da. Tongana ababâ na amama nga na amolenge ti ala asara kua ndo oko, ala peut ti sara lisoro na ndö ti gbâ ti akota tënë. Na tapande, ala peut ti sara tënë na ndö ti nzoni bê ti Jéhovah nga tongana nyen la lo aidé sewa ti ala.

11. Laso, na ngoi wa la ababâ na amama apeut ti sara lisoro na amolenge ti ala?

¹¹ Laso, aye ayeke tongana ti ândö ape. Na yâ ti akodro mingi, ababâ na amama na amolenge ti ala apeut ti mû ngoi ti duti ndo oko na yâ ti lango ni ape. Ababâ na amama apeut ti gue na kua, na amolenge apeut ti gue na ekole. Tongaso, ababâ na amama adoit ti gi ti wara ngoi so ala peut ti sara  lisoro na amolenge ti ala (aÉph. 5:15, 16; aPhil. 1:10). Mbeni ngoi ni ayeke ngoi ti vorongo Nzapa na yâ ti sewa. Alexander, mbeni ita-koli so ade maseka, atene: “Babâ ti mbi aleke lakue ti tene e voro Nzapa na yâ ti sewa, na lo zia lege na mbeni ye ti kanga lege na ni ape. Na peko ti mandango ye ni, e yeke sara gï lisoro.”

12. Nyen la a yeke nzoni mokonzi ti sewa agirisa ape na ngoi ti vorongo Nzapa na yâ ti sewa?

¹² Tongana mo yeke mokonzi ti sewa, nyen la mo peut ti sara ti tene vorongo Nzapa na yâ ti sewa anzere na amolenge ti mo? Mo peut ti manda fini mbeti ti e Ngbâ na fini lakue lakue! na amolenge ti mo. Mbeti so asara si a yeke ngangu ape ti sara apendere lisoro. Mo ye ti tene amolenge ti mo afa na mo atënë ti bê ti ala nga na agingo bê ti ala, tongaso mû pëpe ngoi ti vorongo Nzapa na yâ ti sewa ti diko tënë na terê ti ala wala ti suku na ala. Nga gi ti tene bê ti mo ason ape tongana na ambeni ngoi amolenge ti mo atene mbeni tënë so ague nde na amama-ndia ti Bible. Me kiri singila na ala ndali ti so ala fa na mo atënë ti bê ti ala polele, nga wa ala ti ngbâ ti sara ni. Mo peut ti aidé amolenge ti mo nzoni gï tongana mo hinga tënë ti bê ti ala nzoni.

13. Ambeni lege wa la azi na ababâ na amama ti aidé amolenge ti ala ti ga nduru na Jéhovah?

¹³ Ababâ na amama, ala gi alege na yâ ti lango ni ti aidé amolenge ti ala ti ga nduru na Jéhovah. Ala doit ti ku pëpe ngoi ti mandango Bible na ala si ala fa ye na ala na ndö ti Nzapa ti e so aye e. Bâ ye so Lisa, mbeni mama, atene: “E sara lani kua na aye kue so angoro e ti fa ye na amolenge ti e na ndö ti Jéhovah. Na tapande, tongana mbo ti e asara mbeni ye so asara si amolenge ti e ahe ngia, e yeke tene na ala so ye so afa so Jéhovah ayeke Nzapa so ayeke na ngia nga lo sara si e duti na ngia nga aye anzere na e.”

14. Ngbanga ti nyen la a yeke kota ye ti tene ababâ na amama a-aidé amolenge ti ala ti soro akamarade ti ala nzoni? (aProverbe 13:20).

¹⁴ Osio mama-ndia ni: Aidé amolenge ti mo ti soro anzoni kamarade. Bible atene polele so akamarade ti e apeut ti pusu e ti sara nzoni ye wala sioni ye. (Diko  aProverbe 13:20.) Ababâ na amama, eskê ala hinga akamarade ti amolenge ti ala? Eskê ala wara terê na ala nga ala mû ngoi ti duti na ala? Nyen la ala peut ti sara ti aidé amolenge ti ala ti soro akamarade so aye Jéhovah? (1 aCor. 15:33). Ala peut ti aidé amolenge ti ala ti soro anzoni kamarade tongana ala tisa ambeni zo so ayeke na nzoni songo na Jéhovah ti tene ala na ala asara ambeni ye na sewa.—Ps. 119:63.

15. Nyen la ababâ na amama apeut ti sara ti aidé amolenge ti ala ti duti na anzoni kamarade?

¹⁵ Bâ ye so asi na Tony so ayeke mbeni babâ. Lo fa ye so lo na wali ti lo asara ti aidé amolenge ti ala ti duti na anzoni kamarade. Lo tene: “Teti angu mingi, mbi na wali ti mbi e tisa aita so ngu ti ala ayeke nde nde na ndo ti e. E na ala e te ye nga e voro Nzapa na yâ ti sewa. So ayeke mbeni pendere lege ti hinga azo so aye Jéhovah nga asara na lo na ngia. So asurveillant ti circonscription, amissionnaire nga na ambeni ita alango na ndo ti e, a ga na e anzoni ye. Aye so asi na ala, yapungo so ala yapu na yâ ti kua ti Jéhovah nga asacrifice so ala sara a-aidé amolenge ti e mingi nga asara si ala ga nduru na Jéhovah.” Ababâ na amama, ala leke na bê ti ala ti ngbâ ti aidé amolenge ti ala ti wara anzoni kamarade.

16. Ka tongana mbeni molenge ti mo atene so lo ye ti sara na Jéhovah ape?

¹⁶ Ka tongana, atâa angangu kue so mo sara, mbeni molenge ti mo atene so lo ye ti sara na Jéhovah ape? Tene ape so mo sara kua ti mo ti babâ wala ti mama na lege ni ape. Jéhovah amû na e kue, na molenge ti mo nga kue, liberté ti soro ye, so ti tene ti soro ti sara na Nzapa wala pëpe. Tongana molenge ti mo amû desizion ti zia Jéhovah, duti na beku so mbeni lâ lo yeke kiri. Girisa ape toli ti molenge so agirisa (Luc 15:11-19, 22-24). Maseka-koli so asara asioni ye mingi, me na nda ni, lo kiri. Ambeni zo apeut ti tene: “So ayeke gï mbeni toli. Eskê a peut ti si?” En, a peut ti si. Ti tâ tënë ni, a yeke ye so asi na Elie, mbeni maseka-koli.

17. Ye so asi na Elie akpengba mo tongana nyen?

 ¹⁷ Elie atene na ndö ti babâ na mama ti lo, atene: “Ala sara kue ti aidé mbi ti ye Jéhovah nga na tënë ti lo, Bible. Me na ngoi so mbi wara ngu 15 tongaso, mbi komanse ti sara kpengba-li.” Elie akomanse ti sara asioni ye na hondengo ni. Babâ na mama ti lo agi ti aidé lo ti ngbâ nduru na Jéhovah, me lo mä ala ape. Na peko ti so lo quitté yanga-da, lo komanse ti sara asioni ye. Atâa so kue, na ambeni ngoi, lo na mbeni kamarade ti lo ayeke sara lisoro na ndö ti Bible. Elie atene: “So mbi na kamarade ti mbi e sara lisoro mingi na ndö ti Jéhovah, mbi bâ so mbi wani mbi pensé mingi na Jéhovah. Yeke yeke, angongoa ti tâ tënë so babâ na mama ti mbi asara ngangu lani ti lu na yâ ti bê ti mbi akomanse ti kono.” A si na mbeni ngoi, Elie akiri na yâ ti tâ tënë. * Imaginé ngia so babâ na mama ti lo ayeke na ni so ala gi lani ti fa na lo ti ye Jéhovah na kete ti lo.—2 Tim. 3:14, 15.

18. Mo pensé nyen na ndö ti ababâ na amama so asara ngangu ti fa na amolenge ti ala ti ye Jéhovah?

¹⁸ Ababâ na amama, a mû na ala mbeni pendere kua, so ayeke ti bata amolenge so ayeke voro ande Jéhovah (Ps. 78:4-6). So ayeke kete kua ape, nga e gonda ala na bê ti e kue ndali ti a-effort so ala yeke sara ti mû maboko na amolenge ti ala. Tongana ala ngbâ ti sara ye kue so ala peut ti sara ti aidé amolenge ti ala ti ye Jéhovah nga ti fa na ala ti mä yanga ti lo, ala peut ti hinga na bê ti ala kue so a yeke nzere na Babâ ti e ti yayu so aye e mingi.—aÉph. 6:4.