1. Kota desizion wa la azo kue adoit ti mû ni?

 LASO, azo ayeke na mbeni kota desizion ti mû. Eskê ala yeke mû mbage ti Jéhovah Nzapa, so ayeke na droit ti komande dunia kue, wala ala yeke mû peko ti sioni wato ti lo, Satan Zabolo? Zo kue adoit ti soro zo so lo yeke mû mbage ti lo. Desizion so zo oko oko ayeke mû ayeke fa wala lo yeke ngbâ na fini lakue lakue wala pëpe (Mat. 25:31-33, 46). Na ngoi ti “kota ye ti vundu”, a yeke sara marque na ndö ti lê ti zo oko oko kue ti tene lo sö kuâ wala ti tene a futi lo.—Apoc. 7:14; 14:9-11; Ézéch. 9:4, 6.

2. (a) A-Hébreu 10:35-39 awa e ti sara nyen? (b) Mbeti ti Apocalypse apeut ti aidé e tongana nyen?

² Diko aHébreu 10:35-39. Tongana mo mû desizion awe ti mû mbage ti komandema ti Jéhovah, nzoni desizion la mo mû so. Fadeso, mo ye mingi ti aidé azo ti mû nzoni desizion. Mo peut ti sara kua na atënë so ayeke na mbeti ti Apocalypse ti aidé ala. Pendere mbeti so afa ye so ayeke si ande na azo so ake Jéhovah, me a fa nga anzoni ye so azo so angbâ lakue ti mû mbage ti komandema ti lo ayeke wara ande. A yeke nzoni e manda ye na ndö ti akpengba tâ tënë so. Tongana e sara ni, a yeke aidé e ti leke na bê ti e ti ngbâ ti sara na Jéhovah. Na ndö ni, e peut ti sara kua na aye so e manda ti aidé azo ti mû desizion ti sara na Jéhovah nga ti ngbâ ti sara na lo.

3. Nyen la e yeke bâ na yâ ti article so?

³ Na yâ ti article so, e yeke kiri tënë na ahunda so: Nyen la azo so amû mbage ti komandema ti Nzapa ayeke wara ande? Nyen la ayeke si na azo so asoro ti mû mbage ti bengba nyama ti ngonda so a sara tënë ti lo na mbeti ti Apocalypse?

4. Groupe ti azo wa la bazengele Jean abâ ala na terê ti Jésus na yayu?

⁴ Na yâ ti mbeni vision, bazengele Jean abâ agroupe use ti azo so amû mbage ti komandema ti Jéhovah nga ala wara anzoni ye so azo so ayeke ngbâ na fini lakue lakue ayeke wara. Wungo ti azo ti yâ ti kozo groupe ni ayeke 144 000 (Apoc. 7:4). A soro ala na sese ge ti gue ti duti na yâ ti mbeni gouvernement, wala Royaume, legeoko na Jésus na yayu. Ala na lo ayeke komande ande na ndö ti sese (Apoc. 5:9, 10; 14:3, 4). Na yâ ti vision ni, Jean abâ so ala na Jésus ayeke luti na ndö ti Hoto ti Sion na yayu.—Apoc. 14:1.

5. Fafadeso, nyen la ayeke si na tanga ti azo so a soro ala ti gue na yayu so angbâ na ndö ti sese?

⁵ Ti londo na ngoi ti abazengele juska laso, a soro azo saki mingi ti duti na popo ti azo 144 000 (Luc 12:32; aRom. 8:17). Me a tene na Jean so gï kete wungo ti ala la ayeke ngbâ na sese na lâ ti nda ni. Jéhovah ayeke zia ande ndangba “nzoroko” na ndö ti lê ti “tanga ti ala” ti fa so lo yeda na ala kozo si kota ye ti vundu akomanse (Apoc. 7:2, 3; 12:17). Tongaso, na mbeni ngoi na ngoi ti kota ye ti vundu, a yeke mû ande tanga ti ala so angbâ ti gue na ala na yayu ti wara amba ti ala so akui lani be-ta-zo. Kâ, ala yeke komande legeoko na Jésus na yâ ti Royaume ti Nzapa.—Mat. 24:31; Apoc. 5:9, 10.

6-7. (a) Groupe wa la Jean abâ na pekoni? Nyen la e manda na ndö ti ala? (b) Ngbanga ti nyen la a yeke nzoni Apocalypse chapitre 7 agbu bê ti tanga ti azo so a soro ala ti gue na yayu nga na “azo mingi mingi”?

⁶ Na peko ti so Jean abâ groupe ti azo so ayeke gue na yayu, lo bâ groupe ti “azo mingi mingi”. Nde na azo 144 000, a peut ti diko wungo ti azo ti yâ ti groupe so ape (Apoc. 7:9, 10). Nyen la e manda na ndö ti ala? A tene na Jean, atene: “Azo so ayeke ala so asigi na yâ ti kota ye ti vundu si aga so, ala sukula yongoro bongo ti ala na ala sara si avuru na yâ ti mênë ti Molenge ti taba ni.” (Apoc. 7:14). Na peko ti so “azo mingi mingi” asigi na yâ ti kota ye ti vundu, ala yeke vivre ande na ndö ti sese ge nga ala yeke wara aye ti nzoni so ahon gbungo li ti zo.—Ps. 37:9-11, 27-29; aProv. 2:21, 22; Apoc. 7:16, 17.

⁷ Atâa a soro e ti gue na yayu wala ti ngbâ na ndö ti sese, eskê e bâ terê ti e na yâ ti atënë so a tene na Apocalypse chapitre 7 so? A yeke nzoni e bâ terê ti e na yâ ni. A yeke duti ande mbeni pendere ngoi mingi ndali ti agroupe use ti awakua ti Nzapa so. E yeke duti ande na ngia mingi so e soro ti mû mbage ti komandema ti Jéhovah. Mbeni ye nde wa la mbeti ti Apocalypse afa na e na ndö ti kota ye ti vundu?—Mat. 24:21.

8. Kota ye ti vundu ayeke komanse ande tongana nyen? Azo mingi ayeke sara ye ande tongana nyen?

⁸ Na yâ ti article so ahon, e manda lani so fafadeso agouvernement ti dunia so ayeke ga na bira na terê ti Babylone, Ngangu gbata, so ti tene abungbi ti vorongo nzapa ti wataka kue (Apoc. 17:16, 17). A yeke duti ande tongo nda ti kota ye ti vundu. Eskê ye so ayeke sara ande si gbâ ti afini zo amû desizion ti voro Jéhovah? Ên-ën. Apocalypse chapitre 6 afa so na ngoi ni so, azo so ayeke sara na Jéhovah ape ayeke gi ande ti tene azo ti poroso nga na azo ti dengo buze ti dunia so, so a haka ala na ahoto, abata ala. So ala mû mbage ti Royaume ti Nzapa ape, Jéhovah ayeke bâ ala tongana awato ti lo.—Luc 11:23; Apoc. 6:15-17.

9. Tongana nyen la, na ngoi ti kota ye ti vundu, azo ayeke bâ ande so awakua ti Jéhovah ayeke ti ala nde? Nyen la ayeke si ande na awakua ti Jéhovah?

 ⁹ Biani, awakua ti Jéhovah so ayeke be-ta-zo ayeke duti ti ala ande nde na tanga ti azo na yâ ti ngangu ngoi ti kota ye ti vundu so. Ala yeke duti ande lakue oko groupe ti azo na ndö ti sese so ayeke voro Jéhovah Nzapa nga so ayeke ke ti mû mbage ti “nyama ti ngonda ni”. (Apoc. 13:14-17). So ala ngbâ be-ta-zo na Jéhovah ayeke son ande bê ti awato ti Jéhovah mingi. Ye so asara si mbeni bungbi ti amara ayeke ga ande na bira na terê ti awakua ti Nzapa na ndö ti sese kue. Bible airi bira so bira ti Gog ti Magog.—Ézéch. 38:14-16.

10. Tongana ti so Apocalypse 19:19-21 afa, Jéhovah ayeke sara ande ye tongana nyen na ngoi so azo aga na bira na terê ti azo ti lo?

¹⁰ Jéhovah ayeke sara ande ye tongana nyen na ngoi ti bira ti Gog ti Magog? Lo tene na e, lo tene: “Ngonzo ti mbi ayeke londo tâ ngangu.” (Ézéch. 38:18, 21-23). Apocalypse chapitre 19 afa ye so ayeke si na pekoni. Jéhovah atokua Molenge ti lo ti bata azo ti lo nga ti futi awato ti ala. Jésus nga na “aturugu so ayeke na yayu”, so ti tene a-ange nga na azo 144 000, ayeke sara bira na awato so (Apoc. 17:14; 19:11-15). Ye ti peko ti bira so ayeke nyen? A yeke futi biaku biaku azo nga na abungbi kue so ake Jéhovah.—Diko Apocalypse 19:19-21.

11. Kota ye wa la mbeti ti Apocalypse asara tënë ni?

¹¹ Tara ti imaginé tënë ti bê ti azo so ayeke be-ta-zo so asö kuâ na ngoi so a futi awato ti Nzapa biani biani. A yeke duti ande mbeni ngoi ti kota ngia. Atâa so acréature ti yingo so ayeke na yayu ayeke dekongo na ngia na ngoi so a futi ande Babylone, Ngangu gbata, mbeni ye nde ayeke dä so aga na ngia mingi ahon ti so (Apoc. 19:1-3). A yeke mbeni ye so ayeke kota mingi so mbeti ti Apocalypse asara tënë ni: “mariage ti Molenge ti taba ni”.—Apoc. 19:6-9.

12. Tongana ti so Apocalypse 21:1, 2 afa, Molenge ti taba ni ayeke sara mariage lawa?

¹² Mariage ni ayeke duti ande lawa? Azo 144 000 kue ayeke duti ande na yayu kozo si bira ti Harmaguédon akomanse. Ye oko, a yeke duti ande ngoi ti mariage ti Molenge ti taba ni la ape. (Diko Apocalypse 21:1, 2.) Molenge ti taba ni ayeke sara mariage na peko ti bira ti Harmaguédon nga na peko ti so a futi awato ti Nzapa kue.—Ps. 45:3, 4, 13-17.

13. Nyen la ayeke si ande na ngoi ti mariage ti Molenge ti taba ni?

¹³ Nyen la ayeke si ande na ngoi ti mariage ti Molenge ti taba ni? Tongana ti so mariage ayeke bungbi mbeni koli na wali, mariage na lege ti fä so ayeke bungbi Jésus Christ, so ayeke Gbia, na azo 144 000 so ayeke “wali” ti lo so lo ye ti mû lo. Kota ye so ayeke zi ande yanga ti fini gouvernement so ayeke komande ande na ndö ti sese teti ngu 1 000.—Apoc. 20:6.

14-15. Apocalypse chapitre 21 ahaka azo 144 000 na nyen? (Bâ foto ti couverture ni.)

¹⁴ Na pekoni, Apocalypse chapitre 21 ahaka azo 144 000 na mbeni gbata so ayeke pendere mingi, so a iri ni “Fini Jérusalem”. (Apoc. 21:2, 9). Fondation ti gbata ni ayeke na ndö ti atênë 12 so a sû “iri 12 na ndö ni, iri ti abazengele 12 ti Molenge ti taba ni”. Ngbanga ti nyen la tënë so agbu bê ti Jean? Ngbanga ti so lo bâ a sû iri ti lo na ndö ti mbeni tênë ni. So tâ kota pasa!—Apoc. 21:10-14; aÉph. 2:20.

 ¹⁵ Mbeni gbata so ayeke tongana gbata so ayeke dä ape. Kota lege ti gbata ni ayeke na lor ti nzoni ni, a sara ayanga ti gbagba 12 ti gbata ni na aperle, amur nga na afondation ni ayeke na atênë ti ngangu ngere nga amesure ni kue alingbi terê (Apoc. 21:15-21). Me Jean abâ so mbeni ye ayeke dä ape. Mä tënë so lo tene na pekoni: “Mbi bâ mbeni temple na yâ ti gbata ni pëpe, ndali ti so Jéhovah Nzapa, Lo so ngangu ti lo ahon angangu kue, si ayeke temple ti gbata ni, Molenge ti taba ni nga. Na gbata ni ayeke na bezoin ti lâ pëpe wala ti nze pëpe ti su na ndö ni, ngbanga ti so gloire ti Nzapa asu na yâ ni, nga lampe ti gbata ni ayeke Molenge ti taba ni.” (Apoc. 21:22, 23). Azo so abungbi aga Fini Jérusalem ayeke duti ande na terê ti Jéhovah (aHéb. 7:27; Apoc. 22:3, 4). Tongaso, Jéhovah na Jésus la ayeke temple ti gbata ni.

16. Anzoni ye wa la azo ayeke wara ande na ngoi ti Komandema ti ngu saki oko ti Royaume ti Nzapa?

¹⁶ A nzere mingi na azo so a soro ala ti gue na yayu ti gbu li na ndö ti gbata ni. Me tënë ni adoit nga ti gbu bê ti azo so ayeke na beku ti wara fini na ndö ti sese. Na ngoi ti Komandema ti ngu saki oko ti Royaume ti Nzapa, Fini Jérusalem ayeke ga ande na gbâ ti atufa na ndö ti sese. Jean abâ atufa ni so ayeke sua tongana “mbeni kota ngu so amû fini na zo”. “Akeke ti fini” ayeke na terê ti ngu ni mbage na mbage, akugbe ti akeke ni ayeke “ti sava na kobela ti amara.” (Apoc. 22:1, 2). Azo kue so ayeke na fini na ngoi ni so ayeke wara ande lege ti bâ nzoni na lege ti anzoni ye so. Yeke yeke, azo kue so amä yanga ti Nzapa ayeke ga mbilimbili-kue. Kobela, pasi nga na toto ayeke duti dä encore ape.—Apoc. 21:3-5.

17. Tongana ti so Apocalypse 20:11-13 afa, azo wa la ayeke bâ nzoni na lege ti Komandema ti ngu saki oko ti Christ?

¹⁷ Azo wa la ayeke bâ nzoni na lege ti apendere ye so? Akozo zo so ayeke wara apendere ye so ayeke azo so asö kuâ na Harmaguédon, ala na amolenge ti ala so peut-être ala yeke dû ala ande na yâ ti fini dunia. Me Apocalypse chapitre 20 atene nga so a yeke zingo ande akuâ. (Diko Apocalypse 20:11-13.) “Azo ti mbilimbili” so ayeke be-ta-zo so akui ândö nga na “azo so ayeke mbilimbili pëpe”, so awara lege pëpe ti manda ye na ndö ti Jéhovah, ala kue ayeke kiri ande na fini na ndö ti sese ge (Kus. 24:15; Jean 5:28, 29).  Eskê a ye ti fa so a yeke zingo ande azo kue na kuâ ti wara fini na ndö ti sese na ngoi ti Komandema ti ngu saki oko ti Christ? Ên-ën. Azo so lege azi lani na ala ti voro Jéhovah me, na sioni bê, ala ke kozo ti kui, a yeke zingo ande ala ape. Lege azi lani na ala ti sara na Nzapa, me ala fa so ala lingbi na fini na yâ ti Paradis na ndö ti sese ape.—Mat. 25:46; 2 aThes. 1:9; Apoc. 17:8; 20:15.

18. Aye ayeke duti ande tongana nyen na ndö ti sese na hunzingo ti ngu 1 000?

¹⁸ Na hunzingo ti ngu 1 000, azo kue so ayeke na fini na ndö ti sese ayeke ga ande mbilimbili-kue. Zo oko ayeke wara ande ape mbeni ye ti peko ti siokpari so lo wara na lege ti Adam (aRom. 5:12). A yeke zi ande biani biani deba ti peko ti siokpari ti Adam. So aye ti tene so azo so ayeke na ndö ti sese ayeke ‘kiri na fini’ ndali ti so ala yeke ga mbilimbili-kue na hunzingo ti ngu 1 000.—Apoc. 20:5.

19. Ngbanga ti nyen la a bezoin ti tara azo ti ndangba ni?

¹⁹ E hinga so Jésus adö sese lani na a-effort so Satan asara ti pusu lo ti duti be-ta-zo ape. Lo ngbâ lani be-ta-zo na yâ ti tara. Me eskê azo kue so ayeke mbilimbili-kue ayeke duti ande nduru ti sara tongaso na ngoi so a zi lege na Satan ti tara ala? Zo oko oko ayeke kiri tënë na hunda so na ngoi so a yeke zi ande Satan na yâ ti kota dû so alï mingi na hunzingo ti ngu 1 000 (Apoc. 20:7). Azo so aduti be-ta-zo na ngoi ti ndangba tara ayeke wara ande fini ti lakue lakue nga na nda ni, ala yeke wara tâ liberté (aRom. 8:21). Azo so asara kpengbango-li na Jéhovah, a yeke futi ala ande legeoko na Zabolo nga na asioni yingo ti lo biani biani.—Apoc. 20:8-10.

20. Mo pensé nyen na ndö ti apendere prophétie so ayeke na yâ ti mbeti ti Apocalypse?

²⁰ Na peko ti so e bâ na nduru tënë akota tënë ti mbeti ti Apocalypse, mo pensé nyen? Eskê a nzere na mo ti imaginé so mo yeke dä ti bâ gango tâ tënë ti apendere prophétie so? Kite ayeke dä ape so a pusu mo ti tisa azo ti tene ala ga e na ala e voro Nzapa ti e na lege ni (Apoc. 22:17). Na peko ti so e sara lisoro na ndö ti aye so ayeke si ande na yâ ti angoi so ayeke ga, terê ti e anzere mingi nga e ye ti tene mara tënë so bazengele Jean atene, so lo tene: “Amen! Ga, Seigneur Jésus.”—Apoc. 22:20.