1-2. Tongana a ndu tënë ti asambela ti e, nyen la e peut ti gi bê ti e na ndö ni?

 ESKÊ mo yeke gi bê ti mo wala Jéhovah ayeke kiri tënë na asambela ti mo? Tongana a yeke tongaso, a yeke gï mo oko ape. Aita mingi ayeke hunda nga terê ti ala tongaso, mbilimbili tongana ala yeke na yâ ti mbeni kpale. Tongana e yeke bâ pasi, e nga kue a peut ti duti ngangu na e ti bâ fason so Jéhovah ayeke kiri tënë na asambela ti e.

² E yeke bâ ndani so e peut ti duti sûr so Jéhovah ayeke kiri tënë na asambela ti awakua ti lo (1 Jean 5:15). E yeke kiri nga tënë na ahunda so: Ngbanga ti nyen la na ambeni ngoi e peut ti bâ so Jéhovah akiri tënë na asambela ti e ape? Jéhovah ayeke kiri tënë na asambela ti e laso tongana nyen?

3. Ngbanga ti nyen la Jéhovah aye ti tene e sambela lo?

³ Bible atene Jéhovah aye e mingi nga lo bâ e na nene ni (Ag. 2:7; 1 Jean 4:10). Ndani la lo hunda na e ti sambela lo ti aidé e (1 Pi. 5:6, 7). Lo ye ti aidé e ti ngbâ nduru na lo nga ti gbu ngangu na yâ ti akpale so e wara.

4. E hinga tongana nyen so Jéhovah ayeke kiri tënë na sambela ti awakua ti lo? (Bâ nga foto.)

⁴ Fani mingi, Bible atene so Jéhovah akiri tënë na sambela ti awakua ti lo. Mo pensé na mbeni tapande? Mbeni tapande ni ayeke ti Gbia David. Na yâ ti gigi ti lo, lo yeke lani na gbâ ti awato so ayeke sioni na fani mingi lo sambela Jéhovah ti aidé lo. Mbeni lâ, lo voro yanga na Jéhovah, lo tene: “Jéhovah, mä sambela ti mbi; mä toto so mbi toto na mo ti mû maboko na mbi. So mo yeke be-ta-zo nga mo yeke mbilimbili,  kiri tënë na mbi.” (Ps. 143:1). Jéhovah akiri lani tënë na asambela ti David so na yâ ni lo hunda ti tene lo sö lo (1 Sam. 19:10, 18-20; 2 Sam. 5:17-25). David atene na bê ti lo kue, atene: “Jéhovah ayeke nduru na azo kue so ayeke iri lo”. E nga kue e peut ti tene tongaso.—Ps. 145:18.

5. Ândö, eskê lakue la Jéhovah ayeke kiri tënë na sambela ti awakua ti lo tongana ti so ala ku terê ti ala na ni? Mû mbeni tapande ti fa ni. (Bâ nga foto.)

⁵ Jéhovah apeut ti kiri tënë na asambela ti e tongana ti so e ku terê ti e na ni ape. A yeke ye so asi lani na bazengele Paul. Lo hunda lani na Nzapa ti zi “mbeni kî na yâ ti terê” ti lo. Fani ota, Paul asambela mbilimbili ndali ti ngangu kpale so. Eskê Jéhovah akiri tënë lani na asambela ti lo ni? En, me na fason so Paul aku terê ti lo na ni ape. Jéhovah azi kpale ni ape, me lo mû na lo ngangu so lo bezoin ni ti ngbâ ti sara na lo be-ta-zo.—2 aCor. 12:7-10.

6. Na ambeni ngoi, ngbanga ti nyen la e peut ti bâ so Jéhovah akiri tënë na asambela ti e ape?

⁶ Na ambeni ngoi, e nga kue Jéhovah apeut ti kiri tënë na asambela ti e na fason so e ku terê ti e na ni ape. E peut ti hinga biani so Jéhovah ahinga tâ nzoni fason ti aidé e. Lo peut même ti “sara ye mingi ahon ndö ti aye kue so e hunda wala so e bi bê ti e dä.” (aÉph. 3:20). Ndani la, lo peut ti kiri tënë na asambela ti e na mbeni ngoi wala na fason so e ku terê ti e na ni ape.

7. Ngbanga ti nyen la peut-être e bezoin ti changé ye so e sambela ndali ni? Mû mbeni tapande ti fa ni.

⁷ Tongana e hinga polele ye so bê ti Jéhovah aye, peut-être e bezoin ti changé ye so e sambela ndali ni. Bâ tapande ti Ita Martin Poetzinger. Kete na peko ti so Ita Martin Poetzinger asara mariage, a kanga lani lo na yâ ti mbeni camp so aNazi ayeke sara pasi na azo dä. Na tongo nda ni, lo hunda lani Jéhovah ti aidé lo ti sigi na yâ ti camp ni tongaso si lo bâ lege ti wali lo nga ti kiri ti komanse kua ti fango tënë. Ye oko, yenga use na pekoni, lo bâ ye oko ape so afa so Jéhovah ayeke aidé lo ti sigi na yâ ti camp ni. Lo komanse ti sambela, lo tene: “Pardon Jéhovah, fa na mbi ye so mo ye ti tene mbi sara.” Na pekoni, lo komanse ti gbu li na ndö ti kpale so ambeni ita ayeke wara na yâ ti camp ni. Ala mingi agi bê ti ala ngangu na ndö ti awali ti ala nga na amolenge ti ala. Tongaso, Ita Poetzinger asambela, atene: “Jéhovah, merci ndali ti fini kua so mbi wara so. Aidé mbi ti kpengba aita ti mbi.” Na yâ ti ngu  gumbaya so lo sara na yâ ti camp ni, tâ gï ye so lo sara la.

8. Na ngoi so e yeke sambela, kota ye wa la a yeke nzoni e girisa ape?

⁸ E doit ti girisa ape so mbeni ye ayeke dä so Jéhovah aleke na bê ti lo ti sara na lo yeke sara ni na ngoi so lo fa awe. Ye so lo leke na bê ti lo ti sara ayeke ti zi biani biani akpale kue so asara si azo ayeke bâ pasi laso, akpale tongana ngu so asuku amû ndo, wala sese so ayengi, kobela nga na kuâ. Jéhovah ayeke sara ni na lege ti Royaume ti lo (Dan. 2:44; Apoc. 21:3, 4). Me ti si na ngoi ni so, Jéhovah azia lege na Satan ti komande dunia (Jean 12:31; Apoc. 12:9). b Tongana laso Jéhovah aleke akpale kue so azo ayeke wara, a yeke mo bâ mo tene Satan ayeke komande dunia nzoni. Atâa so e doit ti ku ti tene Jéhovah asara ye alingbi na ambeni zendo ti lo, aye ti tene ape so lo yeke aidé e ape. Zia e bâ ambeni ye so Jéhovah ayeke sara ti aidé e.

9. Na ngoi so e bezoin ti mû adesizion, Jéhovah ayeke aidé e tongana nyen? Mû mbeni tapande ti fa ni.

⁹ Lo yeke mû na e ndara. Jéhovah amû zendo ti mû na e ndara so e bezoin ni ti mû anzoni desizion. E yeke tâ na bezoin ti ndara ti Nzapa na ngoi so e yeke mû adesizion so ayeke ndu tanga ti gigi ti e kue, na tapande ti ngbâ kumbamba wala ti sara mariage (Jacq. 1:5). Bâ tapande ti mbeni ita-wali kumbamba so iri ti lo ayeke Maria. c Lo yeke sara lani kua ti pionnier permanent na ngia juska na ngoi so lo wara terê na mbeni ita-koli. Lo tene: “Na ngoi so songo ti kamarade ti e ayeke kpengba, e komanse ti tï mba. Mbi hinga lani so mbi doit ti mû mbeni desizion. Mbi sambela mingi ndali ni. Mbi bezoin lani fango lege ti Jéhovah, me mbi hinga nga lani so Jéhovah ayeke mû desizion na place ti mbi ape.” Lo bâ so Jéhovah akiri tënë na asambela so lo sara ti wara ndara. Lo kiri tënë na ni tongana nyen? Lo sara recherche na yâ ti ambeti ti e, na lo wara a-article so a-aidé lo ti wara kiringo tënë na ahunda ti lo. Lo mä nga awango ti ndara so mama ti lo so ayeke be-ta-zo amû na lo. Awango so a-aidé Maria ti gbu li ti lo nzoni. Na nda ni, lo mû mbeni nzoni desizion.

10. Ti gue oko na aPhilippien 4:13, nyen la Jéhovah ayeke sara ti aidé awakua ti lo? Mû mbeni tapande ti fa ni. (Bâ nga foto.)

¹⁰ Lo yeke mû na e ngangu ti gbu ngangu. Jéhovah ayeke mû na e ngangu so e bezoin ni ti gbu ngangu na yâ ti akpale gï tongana ti so lo sara lani na bazengele Paul. (Diko aPhilippien 4:13.) Bâ tongana nyen la Jéhovah a-aidé mbeni ita-koli so iri ti lo Benjamin ti gbu ngangu na yâ ti angangu kpale. Na yâ ti  mingi ti ngoi so Benjamin ayeke lani maseka, lo na azo ti sewa ti lo avivre na yâ ti acamp ti réfugié na Afrika. Benjamin atene: “Mbi yeke sambela lani Jéhovah lakue ti hunda lo ti mû na mbi ngangu ti sara ye so anzere na lo. Jéhovah akiri tënë na asambela ti mbi na lege so lo mû na mbi siriri ti bê, lo mû na mbi courage ti ngbâ ti fa tënë nga na ambeti ti aidé mbi ti ngbâ nduru na lo.” Lo kiri lo tene: “ So mbi diko aye so asi na amba ti mbi aTémoin nga mbi bâ tongana nyen la Jéhovah a-aidé ala ti gbu ngangu, a sara si mbi leke na bê ti mbi ti ngbâ ti sara na lo be-ta-zo.”

11-12. Jéhovah apeut ti soro ti sara kua na aita ti e ti kiri tënë na asambela ti e tongana nyen? (Bâ nga foto.)

¹¹ Lo yeke sara kua na aita ti e. Na bï so na ndade ni Jésus amû fini ti lo na sandaga, lo sambela mingi. Lo voro yanga na Jéhovah ti zia pëpe si azo apensé so lo yeke zo so azonga Nzapa nga ti fâ ngbanga na li ti lo ndali ni. Jéhovah asara ni ape me lo aidé Jésus na lege so lo tokua mbeni ange ti ga ti kpengba lo (Luc 22:42, 43). Jéhovah apeut nga ti aidé e na lege so mbeni ita airi e na téléphone wala lo sara vizite na e ti kpengba e. E kue e peut ti gi alege ti tene mbeni “nzoni tënë” ti kpengba amba ti e aChrétien.—aProv. 12:25.

¹² Bâ ye so asi na mbeni ita-wali so iri ti lo ayeke Miriam. Ambeni yenga na peko ti so koli ti Miriam akui, lo yeke lani na yanga-da gï lo oko, lo bâ so zo ti aidé lo ayeke dä ape nga lo yeke na vundu. Lo yeke toto lani ngangu nga lo bezoin ti sara tënë na mbeni zo. Lo tene: “Mbi yeke lani na ngangu ti iri mbeni zo ape, tongaso mbi sambela Jéhovah. Na ngoi so mbi yeke toto nga mbi yeke sambela, téléphone ti mbi asonné. A yeke lani mbeni ancien so ayeke kamarade ti e la airi mbi.” Ancien ni na wali ti lo adë lani bê ti Miriam. Lo hinga lani biani so Jéhovah la apusu ita-koli so ti iri lo.

13. Fa mbeni tapande so afa tongana nyen la Jéhovah apeut ti sara kua na azo so avoro lo ape ti kiri tënë na asambela ti e.

¹³ Lo peut ti sara kua na azo so avoro lo ape (aProv. 21:1). Na ambeni ngoi,  Jéhovah ayeke kiri tënë na asambela ti awakua ti lo na lege so lo pusu azo so avoro lo ape ti aidé ala. Na tapande, lo pusu lani Gbia Artaxerxès ti mû lege na Néhémie ti kiri na Jérusalem, tongaso si lo peut ti mû maboko na kua ti lekengo gbata ni so abuba (Néh. 2:3-6). Laso nga kue, Jéhovah apeut ti pusu même azo so avoro lo ape ti mû maboko na awakua ti lo na ngoi so ala bezoin ni.

14. Ye so asi na Soo Hing akpengba mo tongana nyen? (Bâ nga foto.)

¹⁴ Ita-wali Soo Hing abâ so Jéhovah a-aidé lo na lege ti docteur ti lo. Molenge ti lo ti koli ayeke bâ pasi na akpale nde nde ti kobela ti li. Na ngoi so molenge ni asara mbeni sioni accident, lo na koli ti lo ake kua ti ala ti bâ lege ti lo. A sara si ala wara kpale ti nginza. Soo Hing atene so lo bâ so lo peut ti gbu ngangu encore ape. Lo zi bê ti lo na Jéhovah, lo hunda lo ti aidé lo. Lo bâ mbeni docteur na docteur ni ayeda ti sara mbeni ye ti aidé lo na sewa ti lo. Ye so asara si gouvernement a-aidé ala nga ala wara mbeni ndo ti lango dä. Na pekoni, Soo Hing atene: “E bâ tongana nyen la Jéhovah a-aidé e. Lo yeke biani lo so ‘amä sambela.’”—Ps. 65:2.

15. Nyen la a-aidé mbeni ita-wali ti bâ so Jéhovah ayeke kiri tënë na asambela ti lo?

¹⁵ Jéhovah ayeke kiri ka tënë na asambela ti e na mbeni lege so ahon gbungo li ti zo ape. Me akiringo tënë so e yeke wara ayeke tâ gï ye so e bezoin ni ti ngbâ ti duti be-ta-zo na Babâ ti e ti yayu. Tongaso, gi ti hinga tongana nyen la Jéhovah akiri tënë na asambela ti mo. Mbeni ita-wali so iri ti lo Yoko abâ lani so Jéhovah akiri tënë na asambela ti lo ape, me na pekoni lo komanse ti sû na mbeti aye so lo hunda na Jéhovah. Ambeni ngoi na pekoni, lo kiri lo bâ aye so lo sû na mbeti na lo ga ti bâ so Jéhovah akiri tënë na mingi ti asambela ti lo même ambeni so lo girisa na ndö ni awe. Ngoi na ngoi, e doit ti gbu li na ndö ti fason so Jéhovah akiri tënë na asambela ti e.—Ps. 66:19, 20.

16. Na ndö ti tënë ti sambela, tongana nyen la e peut ti fa so e yeke na mabe? (aHébreu 11:6).

¹⁶ E yeke fa so e yeke na mabe na lege so e yeke sambela Jéhovah nga e yeda na fason so lo yeke kiri tënë na asambela ti e atâa fason ni ayeke so wa. (Diko aHébreu 11:6.) Bâ tapande ti Mike na wali ti lo Chrissy. Ala leke  lani na bê ti ala ti sara kua na Béthel. Mike atene: “Fani mingi, mbi na wali ti mbi e sû demande ti gue na Béthel nga e sambela Jéhovah mingi ndali ni, me a iri e lâ oko ape.” Mike na Chrissy ahinga na bê ti ala kue so Jéhovah ahinga nzoni fason ti sara kua na ala na yâ ti kua ti lo. Ala ngbâ lani ti sara ye so ala peut ti sara, ala sara kua ti pionnier permanent na ndo so a bezoin awafango tënë dä mingi nga ala mû maboko na lekengo ada so a yeke sara kua ti Jéhovah dä. Laso, ala yeke sara kua ti guengo na ando nde nde. Mike atene: “Jéhovah akiri tënë na asambela ti e lakue na fason so e ku terê ti e na ni ape, me lo kiri tënë na ni na mbeni fason so ayeke nzoni mingi ahon ti so e peut ti imaginé.”

17-18. Ti gue oko na Psaume 86:6, 7, nyen la e peut ti hinga na bê ti e kue?

¹⁷ Diko Psaume 86:6, 7. David so asû psaume so ahinga lani so Jéhovah ayeke mä asambela ti lo nga lo yeke kiri tënë na ni. Mo nga kue mo peut ti duti na mara ti confiance so. Atapande so e sara tënë ni na yâ ti article so afa so Jéhovah apeut ti mû na e ndara nga na ngangu so e bezoin ni ti gbu ngangu. Laso, lo peut ti sara kua na aita ti e wala même azo so ayeke voro lo ape ti aidé e na yâ ti ambeni ye.

¹⁸ Atâa so Jéhovah apeut ti kiri tënë na asambela ti e lakue tongana ti so e ye ape, e hinga so lo yeke kiri tënë na ni. Lo yeke mû na e aye so e yeke tâ na bezoin ni na ngoi so e bezoin ni. Tongaso, ngbâ ti sambela nga mä na bê so lo yeke kiri tënë na ni, duti na confiance so Jéhovah ayeke bâ lege ti mo laso nga lo yeke “mû na aye kue so ayeke na fini ye so ala sara nzara ni” na yâ ti fini dunia so ayeke ga.—Ps. 145:16.