E OKO oko kue e ye ti tene azo atene so e yeke anzoni zo. Ye oko, na yâ ti dunia ti laso, a yeke ngangu ti sara ye na nzoni bê. Azo mingi “andoye nzoni ye pëpe”. (2 Tim. 3:3). Ala ke afango ye ti Jéhovah. Ye so lo tene ayeke nzoni ala tene “ayeke sioni” nga ye so lo tene ayeke sioni ala tene “ayeke nzoni”. (És. 5:20). A yeke nga ngangu ti duti nzoni zo ndali ti so peut-être mbeni sioni ye asi na e ândö nga ndali ti so e yeke mbilimbili-kue ape. Tongaso, e lingbi ti duti na oko pensé ti Anne, * so atâa so lo sara na Jéhovah teti angu mingi, lo tene: “A yeke ngangu na mbi ti tene so mbi lingbi ti duti mbeni nzoni zo.”

Merci so, e kue e lingbi ti gi ti duti na nzoni bê. A yeke yingo vulu ti Nzapa la ayeke sara si zo aduti na nzoni bê, nga yingo ti lo ayeke ngangu mingi ahon aye kue so alingbi ti kanga lege na e ti duti na nzoni bê. Zia e bâ nzoni bê aye ti sara tënë ti nyen mbilimbili? Nga e bâ tongana nyen la e lingbi ti fa so e sara ye na nzoni bê mingi.

Nzoni bê aye ti sara tënë ti sarango nzoni na zo. A ndu nzoni sarango ye so sioni ye oko ayeke na yâ ni ape. A yeke hinga so a sara nzoni bê na mbeni zo na lege ti anzoni ye so asi na lo na pekoni. Mbeni nzoni zo ayeke gi lakue alege ti mû maboko na azo nga ti sara anzoni ye ndali ti ala.

Peut-être mo bâ awe so ambeni zo ayeke nduru ti sara anzoni ye ndali ti sewa ti ala nga na akamarade ti ala, me eskê sarango nzoni bê adoit ti ngbâ gï ge awe? Biani e kue e lingbi pëpe ti sara ye na nzoni bê tâ na lege ni na ngoi kue, ndali ti so Bible atene: “Na ndö ti sese so, mbeni zo ti mbilimbili so asara ye lakue gï nzoni si lo sara siokpari lâ oko pëpe ayeke dä pëpe.” (Zo-ti. 7:20). Bazengele Paul atene polele atene: “Mbi hinga so na yâ ti mbi, so ti tene na yâ ti mitele ti mbi, mbeni ye ti nzoni oko ayeke dä pëpe.” (aRom. 7:18). Tongaso, a yeke polele so tongana e ye ti sara ye na nzoni bê, e bezoin ti manda ni na mbage ti Jéhovah, Lo so nzoni bê alondo na lo.

Jéhovah Nzapa alu ndia na ndö ti ye so ayeke nzoni. Bible atene na ndö ti lo, atene: “Mo yeke nzoni nga akusala ti mo ayeke nzoni. Fa na mbi andia ti mo so afa lege na zo.” (Ps. 119:68). Zia e bâ ambeni ye use so a sara tënë ni na yâ ti versê so na ndö ti sarango ye na nzoni bê ti Jéhovah.

Jéhovah ayeke nzoni. Jéhovah ayeke nzoni mingi, tongaso lo lingbi pëpe ti zia lege ti sarango nzoni ye. A bâ nzoni bê na yâ ti atanga ti sarango ye ti lo kue. Bâ ye so asi na ngoi so Jéhovah atene na Moïse, atene: “Mbi yeke sara si mo bâ nzoni bê ti mbi kue.” Na ngoi so Jéhovah afa na Moïse gloire ti lo nga na nzoni bê ti lo, Moïse amä atënë so: “Jéhovah, Jéhovah, Nzapa so asara nzoni bê na zo nga so abâ mawa ti zo, lo sara ngonzo hio hio pëpe, lo si singo na tâ ndoye nga na tâ tënë, lo yeke fa nzoni bê na azo saki na saki, lo yeke pardonné faute, kengo ndia nga na siokpari; me zo so asara sioni lo yeke zia lo ngbâ senge pëpe.” (Ex. 33:19; 34:6, 7). Ye so afa polele so Jéhovah ayeke nzoni kue kue kue na alege kue. Atâa so Jésus ayeke nzoni mingi ahon azo kue, lo tene: “Nzoni zo oko ayeke dä pëpe, gï Nzapa oko awe.”​—Luc 18:19.

Akusala ti Jéhovah ayeke nzoni. Aye kue so Jéhovah asara ayeke nzoni. “Jéhovah asara nzoni na  azo kue, nga a yeke bâ nzoni bê ti lo na yâ ti akusala ti lo kue.” (Ps. 145:9). Jéhovah abâ yâ ti azo bango si lo sara nzoni bê na ala ape, lo mû fini na azo kue nga lo mû na ala ye so ala bezoin ni ti ngbâ na fini (Kus. 14:17). Lo fa nga so lo yeke nzoni na lege so lo pardonné e. Mbeni zo ti sungo psaume atene: “Jéhovah, mo yeke nzoni nga mo yeke nduru ti pardonné zo.” (Ps. 86:5). E lingbi ti duti na kite ape so “Jéhovah ayeke gbanzi nzoni ye oko pëpe na azo so ayeke sara ye lakue mbilimbili.”​—Ps. 84:11.

Nzapa acréé e na image ti lo, tongaso e lingbi ti duti anzoni zo nga ti sara aye ti nzoni (Gen. 1:27). Ye oko, Mbeti ti Nzapa awa awakua ti Nzapa ti “manda ti sara ye ti nzoni”. (És. 1:17). Me tongana nyen la e lingbi ti manda ti sara ye ti nzoni? Bâ alege ota so e lingbi ti sara ni.

Kozoni, yingo vulu alingbi ti mû maboko na aChrétien ti duti anzoni zo na lê ti Nzapa (aGal. 5:22). Yingo ti Nzapa alingbi ti mû maboko na e ti ndoye ye so ayeke nzoni nga ti ke ye so ayeke sioni (aRom. 12:9). Biani, Bible atene so Jéhovah alingbi ti sara si e “luti ngangu na yâ ti nzoni kusala nga na nzoni tënë kue.”​—2 aThes. 2:16, 17.

Use ni, a lingbi e diko Bible. Tongana e sara ni, Jéhovah ayeke fa na e “ye kue so andu sarango ye ti nzoni” nga lo yeke mû na e “aye kue so [e] yeke na bezoin ni ti sara na nzoni kusala kue.” (aProv. 2:9; 2 Tim. 3:17). Tongana e diko Bible nga e gbu li na ndö ti ye so e diko, e yeke sara si bê ti e asi singo na anzoni ye na ndö ti Nzapa nga na ye so lo ye. Bê ti e ayeke tongana mbeni sanduku. Tongana e diko Bible nga e gbu li na ndö ni, e yeke zia anzoni ye na yâ ti bê ti e, na a yeke mo bâ mo tene e yeke zia gbâ ti aye ti ngangu ngere na yâ ti sanduku ni, so ayeke mû maboko na e mbeni lâ.​—Luc 6:45; aÉph. 5:9.

Ota ni, e sara kue ti “mû peko ti ye so ayeke nzoni.” (3 Jean 11). Na yâ ti Bible e yeke wara atapande so e lingbi ti mû peko ni. Nzoni tapande ni ayeke ti Jéhovah na Jésus. Me e lingbi nga ti gbu li ti e na ndö ti tapande ti ambeni zo so a hinga ala ndali ti nzoni bê ti ala. Azo use so e lingbi ti pensé na ala ayeke Tabitha nga na Barnabas (Kus. 9:36; 11:22-24). Mo lingbi ti wara ye ti nzoni na lege ti nzoni tapande ti ala tongana mo manda ye so Bible atene na ndö ti ala. Na ngoi ti mandango ye ti mo bâ aye so ala sara lani ti mû maboko na amba ti ala. Gbu li na ndö ti aye so mo lingbi ti sara ti mû maboko na ambeni zo na yâ ti sewa ti mo wala na yâ ti congrégation ti mo. Bâ nga anzoni ye so Tabitha nga na Barnabas awara ndali ti so ala sara lani anzoni ye na amba ti ala. Mo nga mo lingbi ti wara anzoni ye.

E lingbi nga ti gbu li na ndö ti azo so asara nzoni ye laso. Na tapande, gbu li na ndö ti a-ancien so  ayeke azo so “andoye nzoni ye” so ayeke sara kua ngangu na yâ ti congrégation. Gbu nga li na ndö ti aita-wali be-ta-zo so na lege ti tënë nga na tapande ti ala, ala yeke “awafango na azo ye so ayeke nzoni”. (Tite 1:8; 2:3). Mbeni ita-wali so iri ti lo ayeke Roslyn, atene: “Kamarade ti mbi ayeke sara ngangu effort ti mû maboko na azo na yâ ti congrégation nga ti kpengba ala. Lo yeke gbu li na ndö ti dutingo ti ala nga fani mingi lo mû na ala ambeni kete cadeau wala lo sara mbeni ye ti mû maboko na ala. Mbi pensé so lo yeke biani nzoni zo.”

Jéhovah awa awakua ti lo ti “gi peko ti ye so ayeke nzoni”. (Amos 5:14). Tongana e sara ni, a yeke mû maboko na e ti ye ye so Jéhovah atene ayeke nzoni nga ayeke mû maboko na e biani ti sara ye so ayeke nzoni.

Ti duti nzoni zo, e bezoin ape ti sara akota ye ndali ti amba ti e wala ti mû na ala acadeau ti ngangu ngere. Na tapande, ti tene mbeni keke akono e yeke tuku ngu gbani na terê ni gï fani oko ape, me e yeke tuku ngu dä kete kete fani mingi. Legeoko nga, tongana e sara gbâ ti akete kete ye ti mû maboko na amba ti e, a yeke fa so e yeke anzoni zo.

Bible awa e ti “leke” terê ti e nga ti duti “nduru” ti sara nzoni ye (2 Tim. 2:21; Tite 3:1). Tongana e yeke gi ti hinga ye so ayeke si na azo, e lingbi ti gi alege ti mû maboko na mbeni zo “na yâ ti ye so ayeke nzoni ti kpengba” lo (aRom. 15:2). Ye so alingbi ti ndu mungo na lo mbeni ye so e yeke na ni (aProv. 3:27). Na tapande, e lingbi ti tisa mbeni zo ti te mbeni kete ye wala ti sara alisoro so akpengba zo. Tongana e hinga mbeni zo so terê ti lo ason, e peut ti tokua mbeti na lo, e gue e bâ lo wala e iri lo na téléphone. Biani e lingbi ti wara alege mingi ti tene “atënë so ayeke nzoni ti kpengba zo, tongana a yeke ngoi ni, si a sara ye ti nzoni na azo so ayeke mä ni.”​—aÉph. 4:29.

Legeoko tongana Jéhovah, e yeke gi ti sara nzoni na azo kue. Tongaso, e yeke sara kangbi na popo ti azo ape. Mbeni nzoni lege ti sara ni ayeke ti fa nzoni tënë ti Royaume na azo kue. Tongana ti so Jésus ahunda na e, e yeke gi ti sara nzoni ye même na azo so ake e (Luc 6:27). A yeke sioni lâ oko ape ti duti nzoni zo nga ti sara nzoni ye na azo, ndali ti so “mbeni ndia ti ke aye so ayeke dä pëpe.” (aGal. 5:22, 23). Tongana e sara nzoni ye même tongana azo ake e wala e wara akpale, e lingbi ti pusu azo ti hinga tâ tënë nga ti mû gloire na Nzapa.​—1 Pi. 3:16, 17.

Bible atene: “Nzoni zo awara futa ti aye so lo sara.” (aProv. 14:14). Ambeni futa ni ayeke so wa? Tongana e sara nzoni na azo, kite ayeke dä ape so ala yeke sara nzoni na e nga (aProv. 14:22). Même tongana azo asara nzoni na e ape, a lingbi e ngbâ ti sara nzoni na ala. Tongana e sara tongaso, ala lingbi ti changé bango ndo ti ala na ala sara nzoni na e.​—aRom. 12:20, kete tënë na gbe ni.

Tongana e sara nzoni ye na e zia lege ti sarango sioni ye, e wani e yeke wara aye ti nzoni. Aita mingi atene so a si na ala tongaso. Bâ tapande ti Nancy. Lo tene: “Na ngoi so mbi yeke kono lani, mbi yeke bi bê lani na azo ape, mbi yeke sara ye ti kirikiri nga mbi yeke ne azo ape.” Lo kiri lo tene: “Me na ngoi so mbi manda amama-ndia ti Nzapa na ndö ti ye so ayeke nzoni nga mbi sara ye alingbi na ni, mbi komanse ti bâ so mbi yeke na ngia mingi. Fadeso mbi bâ so mbi ne na lê ti azo.”

Kota raison so ndali ni e yeke gi ti duti na nzoni bê ayeke so, sarango nzoni bê na azo ayeke zia ngia na bê ti Jéhovah. Même tongana azo mingi abâ pëpe ye so e sara, Jéhovah abâ ni. Lo hinga aye ti nzoni kue so e sara nga na anzoni pensé kue so e yeke na ni (aÉph. 6:7, 8). Lo yeke futa e tongana nyen? Bible atene: “Zo ti nzoni anzere na lê ti Jéhovah.” (aProv. 12:2). Tongaso, zia e ngbâ ti gi lakue ti duti na nzoni bê. Jéhovah atene so “azo kue so asara ye ti nzoni, a yeke wara ande gloire, yango-iri nga na siriri”.—aRom. 2:10.