1. Nyen la Adam na Ève aperdre ni? Ye ti peko ni ayeke so wa?

ZO WA la mo pensé adoit ti lu amama-ndia so afa ye so ayeke nzoni nga na ye so ayeke sioni? Na ngoi so Adam na Ève ate lani lê ti keke ti hingango ye ti nzoni na ye ti sioni, ala fa ye so ayeke na bê ti ala polele: Ala yeke lani na confiance ape na Jéhovah nga na amama-ndia ti lo. Ala soro ti lu amama-ndia ti ala wani na ndö ti ye ti nzoni na ye ti sioni (Gen. 3:22). Me gbu li na ndö ti ye so ala perdre ni. Ala perdre songo ti ala na Jéhovah. Ye ti peko ni ayeke so ala perdre pasa ti fini ti lakue lakue, na ndö ni ala ga na siokpari nga na kuâ na ndö ti amolenge ti ala (aRom. 5:12). Ye so Adam na Ève asoro aga na aye ti vundu.

2-3. (a) Mbeni kota zo ti Éthiopie asara ye lani tongana nyen na ngoi so Philippe afa tënë na lo? (b) Tongana e wara batême aye ti nzoni wa la e yeke wara? Ahundango ndo wa la e yeke kiri tënë na ni?

² Haka sarango ye ti Adam na Ève na ti kota zo ti Éthiopie na ngoi so Philippe afa tënë na lo. Kota zo so akiri singila mingi na Jéhovah na Jésus ndali ti ye so ala sara ndali ti lo tongaso hio lo wara batême (Kus. 8:34-38). Na ngoi so e mû terê ti e na Nzapa nga, tongana ti kota zo so, e wara batême, e fa polele ye so ayeke na bê ti e. E fa so e kiri singila na Jéhovah na Jésus ndali ti ye so ala sara ndali ti e. E fa nga so e zia confiance ti e na Jéhovah nga e hinga so gï lo oko la lo yeke na droit ti lu mama-ndia na ndö ti ye ti nzoni na ye ti sioni.

³ Gbu li na ndö ti aye ti nzoni so e yeke wara tongana e sara na Jéhovah. Mbeni nzoni ye ni ayeke so Jéhovah ayeke mû ande na e aye kue so Adam na Ève aperdre ni, même pasa ti ngbâ na fini lakue lakue. Ndali ti so e yeke na mabe na Jésus  Christ, Jéhovah apardonné afaute ti e nga lo mû na e nzoni conscience (Mat. 20:28; Kus. 10:43). E yeke nga na yâ ti sewa ti Jéhovah ti awakua ti lo so bê ti lo anzere na ala nga apendere ye ayeke ku e na devant (Jean 10:14-16; aRom. 8:20, 21). Ye oko, atâa apendere ye so tongana zo asara na Jéhovah lo yeke wara ni, ambeni zo so ahinga Jéhovah ayeke sara mbeto ti mû tapande ti kota zo ti Éthiopie so. Nyen la alingbi ti kanga lege na ala ti wara batême? Tongana nyen la ala lingbi ti hon ndö ti akpale so?

4-5. Akpale wa la Avery, mbeni maseka-koli, nga na Hannah, mbeni maseka-wali atingbi na ni?

⁴ Zo ayeke na confiance na lo wani ape. Babâ na mama ti Avery ayeke aTémoin ti Jéhovah. A hinga babâ ti lo tongana mbeni babâ so ayeke na nzoni bê nga mbeni nzoni ancien. Me, Avery ayeke kiri na batême ti lo na peko. Ngbanga ti nyen? Lo tene: “Mbi pensé ape so mbi lingbi ti duti nzoni zo tongana babâ ti mbi.” Avery apensé nga lani ape so lo lingbi ande ti sara akua so a yeke mû ande na lo ti sara. Lo tene: “Mbi yeke gi lani bê ti mbi na ndö ti sambelango na devant ti gbâ ti azo, ti mungo adiskur wala ti mungo li ni na bungbi ti fango tënë.”

⁵ Hannah, so ayeke lani na ngu 18, ayeke lani na confiance na lo wani oko ape. Babâ na mama ti lo so abata lo lani ayeke aTémoin ti Jéhovah. Atâa so kue, lo yeke gi bê ti lo wala lo lingbi ti sara ye alingbi na amama-ndia ti Jéhovah. Ngbanga ti nyen? Hannah akiri na terê ti lo na gbe ni mingi. Na ambeni ngoi, lo bâ so lo yeke nzoni ape tongaso na bê ti lo wani lo fâ terê ti lo na kä, ye so asara si aye ni aga sioni mingi. Lo tene: “Mbi tene lâ oko ape na mbeni zo ye so mbi sara so, même na babâ na mama ti mbi, na mbi pensé mbi tene Jéhovah ayeke ye mbi lâ oko ape ndali ti ye so mbi yeke sara lani na terê ti mbi.”

6. Nyen la akanga lege na Vanessa ti wara batême?

⁶ Akamarade. Vanessa, so ayeke lani na ngu 22, atene: “Mbi yeke lani biani na mbeni nzoni kamarade so mbi hinga lo asara angu mingi.” Ye oko, kamarade ti Vanessa amû maboko na lo ape ti si na batême so lo zia na gbele lo ti wara. Ye so ason bê ti Vanessa, na lo tene: “Mbi bâ so a yeke ngangu ti wara akamarade nga mbeto asara mbi so tongana mbi fâ yâ ti songo ti kamarade na lo, mbi yeke wara lâ oko ape mbeni kota kamarade.”

7. Mbeto ti nyen la asara Makayla, mbeni maseka-wali? Ngbanga ti nyen?

⁷ Mbeto ti sarango kota faute. Makayla ayeke lani na ngu oku na ngoi so a bi ita ti lo ti koli na gigi. Na ngoi so lo kono, lo bâ tongana nyen la aye so ita ti lo asara asara babâ na  mama ti lo vundu. Makayla atene: “Mbeto asara mbi so tongana mbi wara batême, mbi lingbi ti sara mbeni faute, a bi mbi na gigi nga ayeke kiri ti sara babâ na mama ti mbi vundu mingi.”

8. Nyen la asara lani Miles, mbeni maseka-koli, mbeto?

⁸ Mbeto ti tene azo ake mo. Babâ ti Miles nga na wali ti babâ ti lo ayeke awakua ti Jéhovah, me mama ti lo ayeke Témoin ape. Miles atene: “Mbi na mama ti mbi e yeke ndo oko ngu 18, na mbeto asara mbi lani ti tene na lo so mbi ye ti wara batême. Mbi bâ lani awe tongana nyen la lo sara ye lani na ngoi so babâ ti mbi aga Témoin. Mbi sara mbeto so lo yeke ga na kpale na mbi.”

9. Tongana mo manda ye na ndö ti kangango bê ti Jéhovah nga na ndoye so lo yeke na ni, kite ayeke dä ape so nyen la ayeke passé?

⁹ Adam na Ève asoro lani ti sara na Jéhovah ape ndali ti so ala gi lani ti ye lo ngangu mingi ape. Atâa so kue, Jéhovah azia ala ti ngbâ na fini aninga ti dü amolenge nga ti mû desizion na ndö ti fason so ala yeke bata na amolenge ti ala. Aye so aga kete na peko ti desizion so Adam na Ève amû ti duti yamba na Jéhovah afa polele tongana nyen la ala yeke buba mingi. Kozo molenge ti ala afâ ita ti lo ti koli so asara ye oko ape, nga a si na mbeni ngoi sarango ngangu na zo ahon ndö ni nga azo ayeke pensé gï na ala wani (Gen. 4:8; 6:11-13). Ye oko, Jéhovah awara lani mbeni lege ti sö amolenge ti Adam na Ève kue so aye ti sara na lo (Jean 6:38-40, 57, 58). Tongana mo manda ye mingi na ndö ti kangango bê ti Jéhovah nga na ndoye so lo yeke na ni, kite ayeke dä ape so mo yeke ye lo mingi. Mo yeke ke ti sara ye so Adam na Ève asara lani nga mo yeke mû terê ti mo na Jéhovah.

10. Ngbanga ti nyen la gbungo li na ndö ti Psaume 19:7 alingbi ti mû maboko na mo ti sara na Jéhovah?

¹⁰ Ngbâ ti manda ye na ndö ti Jéhovah. Tongana mo manda ye mingi na ndö ti Jéhovah, mo yeke duti na confiance mingi so mo lingbi ti sara na lo nzoni. Avery, so e sara tënë ti lo fade, atene: “Ye so amû lege na mbi ti duti na confiance ayeke sarango recherche na ndö ti Psaume 19:7 (diko ni) nga na gbungo li na ndö ti zendo so ayeke na yâ ni.” Tongana  Avery abâ tongana nyen la Jéhovah asara si zendo so aga tâ tënë, lo kiri lo ndoye Nzapa mingi. Ndoye ayeke kpengba gï confiance ape me ayeke mû nga maboko na e ti zia li ti e gï na ndö ti Jéhovah nga na ndö ti aye so lo ye. Hannah, so e sara tënë ti lo fade, atene: “Na lege ti dikongo Bible ti mbi nga na mandango ye, mbi ga ti hinga so tongana mbi sara sioni na terê ti mbi, mbi sara sioni na Jéhovah nga.” (1 Pi. 5:7). Hannah ‘aga mbeni zo so ayeke sara ye alingbi na tënë ti Nzapa.’ (Jacq. 1:22). Ye ti peko ni ayeke nyen? Lo tene: “Tongana mbi bâ tongana nyen la mango yanga ti Jéhovah aga na mbi anzoni ye, a sara si mbi kiri mbi ye lo mingi. Fadeso, kite ayeke dä ape so Jéhovah ayeke fa lege na mbi lakue na ngoi so mbi bezoin mungo maboko ti lo.” Hannah ahon ndö ti kpale ti lo ti sarango sioni na terê ti lo. Lo mû terê ti lo na Jéhovah nga lo wara batême.

11. Nyen la Vanessa asara ti wara anzoni kamarade? Nyen la e lingbi ti manda dä?

¹¹ Soro akamarade ti mo na lege ti ndara. Vanessa, so e sara tënë ti lo fade, aga ti hinga na nda ni so kamarade ti lo so ayeke na yâ ti congrégation ape la ayeke kanga lani lege na lo ti sara na Jéhovah. Tongaso, lo zia lege ti sarango kamarade na lo. Me Vanessa asara ambeni ye nga. Lo sara ngangu ti wara akamarade na yâ ti congrégation. Lo tene so tapande ti Noé nga na ti sewa ti lo amû maboko na lo. Lo tene: “Ala yeke lani na popo ti azo so aye Jéhovah lani ape, me ala yeke na nzoni songo na popo ti ala.” Na peko ti so Vanessa awara batême, lo ga pionnier. Fadeso lo tene: “Ye so amû maboko na mbi ti wara anzoni kamarade gï na yâ ti congrégation ti mbi ape me nga na yâ ti ambeni congrégation.” Mo kue mo lingbi ti wara anzoni kamarade tongana mo sara akua so Jéhovah amû na e ti sara mingi.​—Mat. 24:14.

12. Mara ti mbeto wa la asara lani Adam na Ève ape? Ye ti peko ni ayeke so wa?

¹² Gi ti duti na nzoni mbeto. Ambeni mbeto ayeke nzoni ndali ti e. Na tapande, e bezoin ti duti na mbeto ti sara ye so Jéhovah ake (Ps. 111:10). Tongana Adam na Ève agi ti duti lani na mara ti mbeto so, ala yeke sara kpengbango-li lani na Jéhovah ape. Me ala sara lani kpengbango-li na lo. Na peko ti so ala  sara ni, lê ti ala azi na ala hinga nzoni so ala sara siokpari. Gï ye so ala ga na ni na ndö ti amolenge ti ala ayeke siokpari nga na kuâ. Ndali ti so ala hinga so ala ke yanga ti Nzapa kamene asara ala so terê ti ala ayeke senge nga ala kanga mbeni ye na terê ti ala.​—Gen. 3:7, 21.

13-14. (a) Ti gue oko na 1 Pierre 3:21, ngbanga ti nyen la e bezoin ti sara mbeto ti kuâ ahon ndö ni ape? (b) Araison wa la e yeke na ni ti ndoye Jéhovah?

¹³ Atâa so e bezoin ti duti na mbeto ti sara ye so Jéhovah ake, e bezoin ti sara mbeto ti kuâ ahon ndö ni ape. Jéhovah aleke lege na e ti wara fini ti lakue lakue. Tongana e sara siokpari me e changé bê ti e biani, Jéhovah ayeke pardonné afaute ti e. Lo yeke pardonné e ndali ti so e yeke na mabe na ye so Molenge ti lo afuta ti zi e. Mbeni kota ye so e yeke sara ti fa so e yeke na mabe ayeke ti mû fini ti e na Nzapa nga ti wara batême.​—Diko 1 Pierre 3:21.

¹⁴ E yeke na araison mingi ti ye Jéhovah. Lo yeke mû na e anzoni ye lâ na lâ nga lo yeke fa na e tâ tënë na ndö ti lo nga na ndö ti aye so lo leke na bê ti lo ti sara (Jean 8:31, 32). Lo mû na e congrégation ti aChrétien ti fa lege na e nga ti mû maboko na e. Lo mû maboko na e ti gbu ngangu na yâ ti akpale ti e laso, na lo zia na gbele e beku ti wara fini ti lakue lakue na yâ ti dutingo so ayeke mbilimbili-kue na yâ ti ngoi so ayeke ga (Ps. 68:19; Apoc. 21:3, 4). Tongana e gbu li ti e na ndö ti aye kue so Jéhovah asara awe ti fa ndoye ti lo ndali ti e, e yeke ye lo mingi. Tongana e ye Jéhovah, e yeke duti na nzoni mbeto. E yeke sara mbeto ti son bê ti Zo so e ye lo mingi so.

15. Tongana nyen la Makayla ahon ndö ti mbeto ti lo ti sarango mbeni faute?

¹⁵ Makayla, so e sara tënë ti lo fade, ahon ndö ti mbeto ti lo ti sarango mbeni faute na ngoi so lo hinga so Jéhovah ayeke pardonné zo mingi. Lo tene: “Mbi ga ti hinga so e kue e yeke mbilimbili-kue ape nga e yeke sara afaute. Me mbi ga ti hinga nga so Jéhovah aye e nga lo yeke pardonné e na lege ti ye so a futa ti zi azo.” Ndoye so lo yeke na ni ndali ti Jéhovah apusu lo ti mû terê ti lo na lo na ti wara batême.

16. Tongana nyen la Miles ahon ndö ti mbeto ti tene a ke lo?

¹⁶ Miles, so asara mbeto so mama ti lo ayeke ke desizion ti lo ti warango batême, agi mungo maboko na mbage ti mbeni surveillant ti circonscription. Miles atene: “Lo nga kue mama ti lo ayeke Témoin ape. Lo mû maboko na mbi ti gbu li ti mbi na ndö ti ye so mbi yeke tene ti mû maboko na mama ti mbi ti comprendre so a yeke mbi la mbi mû desizion ti wara batême me a yeke babâ ti mbi la apusu mbi ti sara ni ape.” Desizion ti Miles ni anzere lani na mama ti lo ape. Na nda ni, lo doit ti quitté da ti mama ti lo, me Miles angbâ na ndö ti desizion ti lo. Lo tene: “Mandango ye na ndö ti anzoni ye so Jéhovah asara awe ndali ti mbi andu bê ti mbi mingi. Na ngoi so mbi gbu li ti mbi ngangu na ndö ti ye so Jésus afuta ti  zi azo, mbi ga ti hinga so Jéhovah aye mbi mingi. Ye so apusu mbi ti mû terê ti mbi na Jéhovah na ti wara batême.”

17. Nyen la e kue e lingbi ti fa?

¹⁷ Na ngoi so Ève ate lani lê ti keke na Éden, lo sara kpengbango-li na Babâ ti lo. Na ngoi so Adam amû peko ti lo, Adam afa so lo kiri singila ape ndali ti anzoni ye kue so Jéhovah asara ndali ti lo. E kue e lingbi ti fa so e yeke tongana Adam na Ève ape. E yeke kiri singila ndali ti aye kue so Jéhovah asara ndali ti e. Na lege ti warango batême, e yeke fa na Jéhovah so e yeke na mabe so lo yeke na droit ti lu mama-ndia ti fa ye so ayeke nzoni nga na ye so ayeke sioni ndali ti e. E yeke fa so e ye Babâ ti e nga e zia bê ti e na lo.

18. Tongana nyen la mo lingbi ti sara na Jéhovah nzoni?

¹⁸ Na peko ti batême ti e a lingbi e ngbâ ti sara ye so Jéhovah aye, me pëpe ye so e ye. Awakua ti Jéhovah kutu mingi ayeke sara tongaso. Mo lingbi ti sara ye tongana ala tongana mo ngbâ ti gi ti duti na hingango ye ti Bible mingi; mo bungbi lakue na aita ti mo; nga mo fa na azo aye so mo manda na ndö ti Babâ ti mo so asara ye na ndoye (aHéb. 10:24, 25). Mä awango so Jéhovah amû na mo na lege ti Bible nga na bungbi ti lo na ngoi so mo yeke mû adesizion (És. 30:21). Tongaso aye kue so mo yeke sara ayeke ga ande nzoni.​—aProv. 16:3, 20.

19. Nyen la a lingbi mo ngbâ ti pensé na ndö ni? Ngbanga ti nyen?

¹⁹ Tongana mo ngbâ ti pensé na ndö ti aye ti nzoni kue so mo wara na peko ti afango lege ti Jéhovah, mo yeke kiri ti ye lo nga na amama-ndia ti lo mingi. Na pekoni, ye kue so Satan ayeke zia na gbele mo alingbi ti kanga lege na mo ape ti sara na Jéhovah. Tara ti bâ terê ti mo ngu saki oko ande. Mo yeke bâ ande so desizion so mo mû lani ti wara batême ayeke nzoni desizion mingi ahon tanga ti adesizion kue so mo mû.