1. E lingbi ti tene nyen na ndö ti aita-koli so ade maseka?

AITA-KOLI so ade maseka, ala lingbi ti mû maboko mingi na congrégation. Ala mingi ayeke na ngangu mingi (aProv. 20:29). Ala sara aye mingi ti mû maboko na aita ti congrégation. Peut-être ala yeke ku kungo ngoi so ala yeke ga ande awakua ti mungo maboko. Ye oko, peut-être ala pensé so azo abâ so ala de maseka mingi wala ala yeke na kode mingi ape ti tene a mû na ala mbeni kota kua. Atâa so ala de maseka, aye ayeke dä so ala lingbi ti sara fadeso ti tene aita ti congrégation asara confiance na ala nga ane ala.

2. Nyen la e yeke bâ na yâ ti article so?

² Na yâ ti article so, e yeke sara tënë mingi na ndö ti gigi ti Gbia David. E yeke bâ nga kete aye so asi na yâ ti fini ti agbia use ti Juda: Asa na Josaphat. E yeke sara tënë na ndö ti akpale so akoli ota so awara, aye so ala sara ti hon ndö ni nga na aye so aita-koli so ade maseka apeut ti manda na lege ti tapande ti ala.

3. Mbeni ye wa la amaseka alingbi ti sara ti mû maboko na ambakoro na yâ ti congrégation?

³ Na ngoi so David ade lani maseka, lo gi ti duti na akode so azo apensé so ayeke nzoni. A yeke polele so lo yeke lani na kpengba songo na Jéhovah. Lo sara lani kue ti ga nzoni zo ti pikango mozoko, na lo pika mozoko ti mû maboko na Saül,  so Nzapa azia lo gbia (1 Sam. 16:16, 23). Amaseka-koli, ala yeke na mbeni kode so alingbi ti mû maboko na aita? Ala mingi ayeke na mbeni kode. Na tapande, peut-être ala bâ so a nzere mingi na ambeni mbakoro tongana amaseka-koli amû maboko na ala ti sara kua nzoni na tablette wala téléphone ti ala ti manda ye ala wani wala ti leke abungbi. So ala hinga ye mingi na ndö ti aye so, ala peut ti aidé ambakoro so mingi.

4. Tongana David, asarango ye wa la aita-koli so ade maseka adoit ti gi ti duti na ni? (Bâ foto ti couverture ni.)

⁴ Na yâ ti gigi ti David, lâ oko oko lo fa so lo yeke zo ti confiance. Na tapande, na ngoi so lo de maseka, lo sara kue ti bâ lege ti ataba ti babâ ti lo. Kua so aga na lo ngangu kpale. Mbeni lâ, David atene na Gbia Saül, atene: “Mbi zo ti kua ti mo, mbi yeke berger ti ataba ti babâ ti mbi. Mbeni bamara (na mbeni ours nga) aga amû mbeni taba ni ahon na ni. Mbi tomba peko ti lo, mbi gbu lo na mbi zi nyama ni na yanga ti lo.” (1 Sam. 17:34, 35). David ahinga lani so lo doit ti bâ lege ti ataba ni, ni la na mbeto ape lo tiri ti bata ala. Aita-koli so ade maseka apeut ti sara ye tongana David na lege so ala sara kua kue so a mû na ala nzoni.

5. Ti gue oko na Psaume 25:14, nyen la ayeke kota ye mingi so aita-koli so ade maseka alingbi ti sara?

⁵ Na ngoi so David ade lani maseka, lo yeke lani na kpengba songo na Jéhovah. Na lê ti lo, songo so ayeke lani kota ye mingi ahon courage wala kode ti pikango mozoko so lo yeke na ni. Jéhovah ayeke lani Nzapa ti David nga kota Kamarade ti lo. (Diko Psaume 25:14.) Aita-koli so ade maseka, kota ye so ala lingbi ti sara ayeke ti kpengba songo ti ala na Babâ ti ala ti yayu, na ye so alingbi ti sara si ala wara ambeni kua na yâ ti congrégation.

6. Asioni bango ndo wa la ambeni zo ayeke lani na ni na ndö ti David?

⁶ David adoit lani ti hon ndö ti asioni bango ndo so azo ayeke na ni na ndö ti lo. Na tapande, na ngoi so David ayeda na bê ti lo wani ti tiri na Goliath, Gbia Saül agi ti kanga lege na lo, lo tene: “Mo yeke gï molenge senge.” (1 Sam. 17:31-33). Kozo na ni, mbeni ita ti David ti koli atene so David asara kua ti lo nzoni ape (1 Sam. 17:26-30). Ye oko, Jéhovah atene lani ape so David ade maseka mingi wala lo sara kua ti lo nzoni ape. Lo hinga David nzoni. Nga, so David asara confiance na Kamarade ti lo, Jéhovah, ti mû na lo ngangu, lo fâ Goliath.—1 Sam. 17:45, 48-51.

7. Nyen la mo lingbi ti manda na lege ti ye so asi na David?

 ⁷ Nyen la mo lingbi ti manda na lege ti ye so asi na David? Mo bezoin ti kanga bê. Peut-être a yeke hunda ngoi ti tene azo so ahinga mo ngbene ye so mo de molenge abâ so mo ga koli awe. Ye oko, hinga na bê ti mo kue so Jéhovah abâ gï pëpe ye so lê abâ. Lo hinga mo nzoni nga lo hinga ye so mo peut ti sara (1 Sam. 16:7). Kpengba songo ti mo na Nzapa. David asara ni lani na lege so lo bâ aye so Jéhovah acréé. Tongana David abâ aye so, lo gbu li lani mingi na ndö ti aye so lo lingbi ti manda na ndö ti Lo so acréé aye (Ps. 8:3, 4; 139:14; aRom. 1:20). Mbeni ye so mo lingbi ti sara ayeke ti hunda Jéhovah ti mû na mo ngangu. Na tapande, eskê ambeni mba ti mo ti ekole ayeke he mo ndali ti so mo yeke Témoin ti Jéhovah? Tongana a yeke tongaso, sambela Jéhovah ti mû maboko na mo ti hon ndö ni. Sara nga ye alingbi na anzoni wango so ayeke na yâ ti Bible, ambeti ti e nga na avidéo ti e. Lakue tongana mo bâ so Jéhovah amû maboko na mo ti hon ndö ti mbeni kpale, mo yeke sara confiance na lo mingi. Na ndö ni, tongana aita abâ so mo sara confiance na Jéhovah, ala yeke sara confiance na mo.

8-9. Nyen la amû lani maboko na David ti kanga bê ti ku juska na ngoi so lo ga gbia? Nyen la aita-koli so ade maseka alingbi ti manda na lege ti tapande ti lo?

⁸ Bâ mbeni kpale nde so David awara lani. Na peko ti so a soro David ti duti gbia, lo doit lani ti ku angu mingi kozo si lo komanse ti komande tongana gbia ti Juda (1 Sam. 16:13; 2 Sam. 2:3, 4). Na ngoi so David ayeke ku lani, nyen la amû maboko na lo ti kanga bê? Ahon ti tene lo découragé kue, lo zia li ti lo gï na ndö ti ye so lo peut ti sara. Na tapande, na ngoi so lo kpe lo gue na kodro ti aPhilistin, lo mû ngoi ni so ti tiri na awato ti azo ti Israël. So lo sara tongaso, lo bata ayanga ti territoire ti Juda.—1 Sam. 27:1-12.

⁹ Nyen la aita-koli so ade maseka alingbi ti manda na lege ti tapande ti David? Ala sara aye so ala peut ti sara ndali ti aita. Gbu li na ndö ti ye so asi na Ita-koli Ricardo. * Na ngoi so lo yeke lani na ngu bale-oko tongaso, lo ye ti ga pionnier permanent. Me a-ancien atene so ade lo leke terê ti lo ape. Ricardo adécouragé ape wala bê ti lo ason ape, me lo fa tënë mingi ahon ti kozo. Lo tene: “Tongana mbi pensé na ndö ti ngoi ni so, mbi bâ so mbi bezoin lani ti sara ambeni ye ti gue na li ni. Mbi sara lani kue ti kiri ti bâ azo kue so aye ti hinga tâ tënë, nga mbi leke terê ti mbi ndali ti vizite oko oko kue. Mbi manda même Bible na mbeni zo; kozo ti tene mbi sara ni la. So mbi fa tënë mingi, mbeto asara mbi mingi encore ape.” Ricardo ayeke fadeso mbeni nzoni pionnier permanent nga lo yeke wakua ti mungo maboko.

10. Mbeni lâ, nyen la David asara kozo ti mû mbeni kota desizion?

¹⁰ Gbu li na ndö ti mbeni ye nde so asi na David. Na ngoi so David na azo ti lo akpe lani ague na kodro ti aPhilistin, kâ ala zia azo ti sewa ti ala, ala gue ti sara bira. Na ngoi so akoli ayeke dä ape, ambeni wato aga agbu aye ti ala nga na azo ti sewa ti ala ahon na ni. David alingbi lani ti tene so, so lo hinga ti sara bira mingi, lo lingbi biani ti sigi na mbeni nzoni kode ti gue ti zi azo ni. Me David ahunda Jéhovah ti fa lege na lo. Na mungo maboko ti prêtre Abiathar, David ahunda Jéhovah, atene: “A yeke nzoni mbi gue na peko ti azo ti gbungo aye ti azo na ngangu so?” Jéhovah afa na David so a lingbi lo gue nga lo tene na lo so lo yeke zi azo ni (1 Sam. 30:7-10).  Nyen la mo lingbi ti manda na lege ti ye so asi so?

11. Nyen la mo lingbi ti sara kozo ti mû adesizion?

¹¹ Gi wango kozo ti mû adesizion. Sara lisoro na babâ na mama ti mo. Mo lingbi nga ti wara anzoni wango tongana mo sara lisoro na a-ancien so aninga na kua ni. Jéhovah asara confiance na ala, mo nga kue mo lingbi ti sara confiance na ala. Jéhovah abâ ala tongana “amatabisi” so lo mû na congrégation (aÉph. 4:8). Tongana mo mû tapande ti mabe ti ala nga mo mä awango ti ndara so ala mû na mo, mo yeke mû anzoni desizion. Fadeso, zia e bâ aye so e lingbi ti manda na lege ti tapande ti Gbia Asa.

12. Anzoni sarango ye wa la Gbia Asa ayeke lani na ni na ngoi so lo komanse ti komande?

¹² Na ngoi so Gbia Asa ade lani maseka, lo sara terê ti lo kete nga lo sara ye na mbeto ape. Na tapande, na ngoi so lo ga gbia na peko ti babâ ti lo, Abijah, lo komanse ti zi ayanda na yâ ti kodro ni. Lo “tene na azo ti Juda ti gi Jéhovah Nzapa ti akotara ti ala, nga ti sara ye alingbi na Ndia nga na acommandement ti lo.” (2 Chron. 14:1-7). Nga, na ngoi so Zérah zo ti Éthiopie na aturugu ti lo 1 000 000 alï na ngangu na Juda, Asa asara ye na ndara, lo hunda Jéhovah ti mû maboko na lo, lo tene: “Jéhovah, atâa azo so mo yeke mû maboko na ala ayeke mingi wala ala yeke na ngangu pëpe, so la ayeke kota ye na lê ti mo pëpe. Jéhovah Nzapa ti e, mû maboko na e, ndali ti so e zia bê ti e kue na mo.” Apendere tënë so afa so Asa ayeke na confiance mingi na ngangu so Jéhovah ayeke na ni ti sö lo na azo ti lo. Asa asara confiance na Babâ ti lo ti yayu, na “Jéhovah akinda azo ti Éthiopie”.—2 Chron. 14:8-12.

13. Ambeni ngoi na pekoni, nyen la asi na Asa? Ngbanga ti nyen?

¹³ Kite ayeke dä ape so mo yeda so, so aturugu 1 000 000 aga ti sara bira lani na Asa ayeke mbeni kota kpale, me Asa asö benda. Mawa ni ayeke so na ngoi so Asa awara mbeni kpale so ayeke ngangu ape, lo hunda Jéhovah ape. Na ngoi so Baasha, sioni gbia ti Israël, aye ti sara bira na Asa, Asa ahunda gbia ti Syrie ti mû maboko na lo. Desizion so aga lani na kota kpale. Na lege ti prophète Hanani, Jéhovah atene na Asa: “So mo zia bê ti mo kue na gbia ti Syrie me mo zia bê ti mo kue na  Jéhovah Nzapa ti mo pëpe, aturugu ti gbia ti Syrie akpe na maboko ti mo awe.” Ti londo na ngoi ni so ti gue na ni, azo aga lakue na bira na terê ti Asa (2 Chron. 16:7, 9; 1 aGbia 15:32). Nyen la mo lingbi ti manda dä?

14. Tongana nyen la mo lingbi ti fa so mo zia bê ti mo na Jéhovah? Ti gue oko na 1 Timothée 4:12, tongana mo sara ni, mo yeke ga nyen?

¹⁴ Ngbâ ti sara terê ti mo kete na ti zia bê ti mo na Jéhovah. Na ngoi so mo wara lani batême, mo fa so mo yeke na kota mabe na Jéhovah nga mo zia bê ti mo na lo. Jéhovah ayamba mo lani na ngia na yâ ti sewa ti lo. Kota ye ni fadeso ayeke ti ngbâ ti zia bê ti mo na Jéhovah. Peut-être mo bâ so a yeke ngangu na mo ape ti zia bê ti mo na Jéhovah na ngoi so mo doit ti mû adesizion so ayeke changé gigi ti mo, me ka ti adesizion so ayeke changé gigi ti mo ape? A yeke kota ye mingi ti tene mo zia bê ti mo na Jéhovah na ngoi so mo yeke mû adesizion kue, atâa a yeke adesizion so andu angia wala kua ti nginza nga na aye so mo leke ti sara. Zia bê ti mo na ndö ti ndara ti mo wani ape. Me, gi amama-ndia ti Bible so ayeke mû maboko na mo ti mû desizion, na sara ye alingbi na ni (aProv. 3:5, 6). Tongana mo sara ni, mo yeke zia ngia na bê ti Jéhovah nga aita ti congrégation ayeke ne mo.—Diko 1 Timothée 4:12.

15. Ti gue oko na 2 Chronique 18:1-3 nga 19:2, afaute wa la Gbia Josaphat asara lani?

¹⁵ Tongana tanga ti azo kue, mo yeke mbilimbili-kue ape, nga na ambeni ngoi mo yeke sara afaute. Ye oko, ye so adoit ti kanga lege na mo ape ti sara ye kue so mo peut ti sara na yâ ti kua ti Jéhovah. Bâ tapande ti Gbia Josaphat. Lo yeke lani na anzoni sarango ye mingi. Na ngoi so lo de maseka, “lo gi ti hinga Nzapa ti babâ ti lo, na lo bata acommandement ti lo”. Na ndö ni, lo tokua amokonzi ti hon na yâ ti agbata ti Juda ti fa ye na azo na ndö ti Jéhovah (2 Chron. 17:4, 7). Me, na ambeni ngoi, Josaphat amû asioni desizion. Na peko ti mbeni sioni desizion so lo mû, mbeni zo so asara kua na iri ti Jéhovah asuku na lo. (Diko 2 Chronique 18:1-3; 19:2.) Nyen la e lingbi ti manda na lege ti mbaï so?

16. Nyen la mo lingbi ti manda na lege ti ye so asi na Rajeev?

¹⁶ Yeda na awango nga sara ye alingbi na ni.  Peut-être, tongana ti amaseka-koli mingi, a yeke ngangu na mo ti zia aye so ayeke akota ye kozo na yâ ti gigi ti mo. Découragé ape. Bâ ye so asi na Rajeev, mbeni ita-koli so ade maseka. Lo tene na ndö ti ngoi so lo ngbâ lani maseka mingi, lo tene: “Na ambeni ngoi, mbi hinga lani ape ye so mbi ye ti sara na yâ ti gigi ti mbi. Tongana ti amaseka mingi, mbi ye lani asport nga na sarango ngia mingi ahon guengo na bungbi wala na fango tënë.” Nyen la amû lani maboko na Rajeev? Mbeni ancien so apensé na lo amû na lo wango. Rajeev atene: “Lo mû lani maboko na mbi ti gbu li na ndö ti mama-ndia so ayeke na 1 Timothée 4:8.” Rajeev asara terê ti lo kete lo yeda na wango ni, nga lo kiri lo bâ yâ ti aye so lo zia na kozo ndo na yâ ti gigi ti lo. Lo tene: “Mbi mû desizion ti zia akua ti Jéhovah kozo na yâ ti gigi ti mbi.” Ye ti peko ni ayeke nyen? Rajeev atene: “Angu mingi ape na peko ti so lo mû na mbi wango so, mbi ga wakua ti mungo maboko.”

17. Ambakoro apensé nyen na ndö ti amaseka-koli so ayeke sara na Jéhovah?

¹⁷ Ambakoro abâ na nene mingi amaseka-koli so ala na ala ayeke sara na Jéhovah “maboko na maboko.” (Soph. 3:9). Amaseka so ayapu mingi ti sara akua so a mû na ala, na a nzere na aita so mingi. Aita so ayeke na ngia mingi ndali ti ala amaseka-koli.—1 Jean 2:14.

18. Tongana ti so aProverbe 27:11 atene, so amaseka-koli ayeke sara na Jéhovah asara lo tongana nyen?

¹⁸ Aita-koli so ade maseka, ala girisa lâ oko ape so Jéhovah aye ala nga lo yeke na confiance na ala. Lo tene lani so na lâ ti nda ni, gbâ ti amaseka-koli ayeke londo na bê ti ala wani ti sara na lo (Ps. 110:1-3). Lo hinga so ala ye lo nga ala ye ti sara ye kue so ala peut ti sara na yâ ti kua ti lo. Tongaso, ala kanga bê na azo nga ala kanga bê ti ala. Tongana ala sara afaute si a kiri na ala na nzoni lege, zia ala yeda na ni. Nga ala bâ ni tongana ye so alondo na Jéhovah (aHéb. 12:6). Ala sara kue ti sara akua kue so a mû na ala nzoni. Kota ye ni, ala sara kue ti sara si Babâ ti ala ti yayu apika kate na ndö ti ala.—Diko aProverbe 27:11.