Ambeni Chrétien ayeke sara kua na aye ti kode so a sigi na ni laso ti tokua amessage na azo ti sewa ti ala nga na amba ti ala aTémoin. Me, Chrétien so ayeke biazo ayeke girisa wango so ape: “Zo so lê ti lo ahan abâ kpale, na lo honde terê ti lo, me azo so ahinga ndo mingi pëpe ague gï guengo na lê ni, na ala wara ye ti peko ni.”—aProv. 27:12.

E hinga so Jéhovah aye ti bata e. Tongaso, e yeke sara songo pëpe na azo so aga na kangbi, azo so a bi ala na gigi ti bungbi wala azo so aba yâ ti afango ye ti Bible (aRom. 16:17; 1 aCor. 5:11; 2 Jean 10, 11). Peut-être ambeni ita nga na ambeni zo so ayeke ga na abungbi ayeke sara ye alingbi na aye so Bible afa ape (2 Tim. 2:20, 21). Na ngoi so e yeke soro akamarade ti e, e girisa ye so ape. Ti soro anzoni kamarade alingbi ti duti ngangu tongana e soro ala na lege ti mbeni ye so a sigi na ni ti tokua na message.

A yeke kota ye ti soro akamarade ti e nzoni, mbilimbili tongana gbâ ti azo ayeke tokua message na mba na yâ ti mbeni groupe. Ambeni Chrétien alinda na yâ ti akota groupe tongaso, na a ga na ala kpale. A yeke duti ngangu ti tene mbeni ita asara hange tongana azo ngbangbo mingi wala saki mingi ayeke na yâ ti groupe ni. Lo peut ti hinga ape azo ni kue ayeke azo wa nga songo ti ala na Jéhovah ayeke tongana nyen. Psaume 26:4 atene: “Mbi sara kamarade pëpe na azo ti handa; mbi kpe azo so ahonde vrai sarango ye ti ala.” Ye so afa so a lingbi e tokua message gï na azo so e hinga ala.

Même tongana azo ayeke mingi ape na yâ ti mbeni groupe, a yeke nzoni mbeni Chrétien abâ ngoi oke la lo yeke mû ti tokua na message nga tënë wa la azo ni ayeke sara lisoro na ndö ni. A yeke nzoni e bâ ape so e doit ti kiri tënë na amessage kue so e wara, atâa tënë ni ayeke so wa wala a mû ngoi oke. Paul atene na Timothée ti sara hange na azo so ayeke “diko kpere-kpere na ala yeke yôro yanga ti ala na yâ ti atënë ti azo”. (1 Tim. 5:13). Laso, e lingbi ti sara mara ti ye tongaso na lege ti téléphone wala tablette.

Mbeni Chrétien so ayeke biazo ayeke sara commentaire ape wala ayeke mä pëpe asioni tënë so a tene na ndö ti aita wala atënë so abâ gï ala (Ps. 15:3; aProv. 20:19). Lo yeke mä nga pëpe wala lo yeke tene pëpe peko ti atënë so ason bê ti zo wala atënë so a hinga ape wala a yeke tâ tënë (aÉph. 4:25). Na lege ti site ti e jw.org nga na Télé JW, so ayeke sigi nze oko oko, e wara gbâ ti akobe ti yingo nga na afini sango so e peut ti sara confiance na ni.

Ambeni Témoin ayeke sara kua na aye so a sigi na ni ti tokua na message ti vo ye, ti kä ye nga ti sara tënë ti aye so ala ye ti kä wala ti gi ti mû azo na kua. So dengo buze la, a yeke vorongo Jéhovah ape. A-Chrétien so aye ti tene “ndoye ti nginza aduti na yâ ti sarango ye ti ala pëpe” ayeke gï pëpe ti wara go na ndö ti aita ti ala.—aHéb. 13:5.

Eskê a yeke nzoni ti sara kua na aye so a sigi na ni ti tokua na message ti hunda nginza ndali ti aita so ye amanke ala wala aita so mbeni ye ti ngangu asi na ala? E ye aita ti e nga e yeke pensé na ala, tongaso fani mingi, e yeke mû maboko na ala so abezoin ni nga e yeke kpengba ala (Jacq. 2:15, 16). Me ti gi ti sara ni na lege ti tokuango message na mbeni groupe so gbâ ti azo ayeke na yâ ni ayeke sara si a yeke duti ngangu na filiale wala congrégation ti mû maboko na ala (1 Tim. 5:3, 4, 9, 10, 16). Zo oko na popo ti e aye pëpe ti sara si azo abâ so lo la a soro lo ti bâ lege ti aita.

E ye ti sara ye so amû gloire na Nzapa (1 aCor. 10:31). Ni la, tongana mo yeke sara kua na aye so a sigi na ni ti tokua na message wala mbeni ye nde, gbu li ti mo na ndö ti akpale so mo lingbi ti wara nga sara hange.