1. Akpale wa la awakua ti Jéhovah alingbi ti wara?

MO YEKE na yâ ti mbeni ngangu kpale? Peut-être mbeni zo na yâ ti congrégation ason bê ti mo (Jacq. 3:2). Wala peut-être mbeni mba ti mo ti place ti kua wala ti ekole ahe mo ndali ti so mo yeke sara na Jéhovah (1 Pi. 4:3, 4). Wala peut-être azo ti sewa ti mo agi ti kanga lege na mo ti gue na abungbi wala ti fa tënë (Mat. 10:35, 36). Tongana kpale ni ayeke ngangu mingi, mo peut ti bâ so a yeke nzoni mo zia ti sara na Jéhovah. Me, hinga na bê ti mo kue so atâa kpale ni ayeke so wa, Jéhovah ayeke mû na mo ndara ti mû anzoni desizion nga na ngangu ti gbu ngangu.

2. Ti gue oko na aRomain 15:4, dikongo Bible alingbi ti mû maboko na e tongana nyen?

² Jéhovah azia na yâ ti Bible anzene nzene tënë na ndö ti fason so azo so ayeke mbilimbili-kue ape agbu ngangu na yâ ti angangu kpale. Lo sara tongaso ngbanga ti nyen? Tongaso si e lingbi ti manda ye na lege ti tapande ti ala. A yeke ye so Jéhovah apusu bazengele Paul ti sû ni na aRomain 15:4. (Diko ni.) Dikongo ambaï so ayeke na yâ ti Bible alingbi ti dë bê ti e nga ti mû na e beku. Ye oko, ti wara nzoni dä, e bezoin ti sara aye mingi ahon gï dikongo Bible. E doit ti zia si Bible achangé apensé ti e nga andu bê ti e. Nyen la e lingbi ti sara tongana e bezoin mbeni wango so alingbi ti mû maboko na e ti hon ndö ti mbeni kpale? E lingbi ti sara aye osio so: (1) Sambela, (2) Imaginé aye (3) Gbu li nga (4) Sara ye alingbi na aye so mo manda. Zia e bâ tongana nyen ti sara aye so oko na oko kue. * Na pekoni, e yeke sara kua na kode so ti manda ye na lege ti aye so asi na Gbia David nga na bazengele Paul.

3. Kozo ti tene mo diko Bible, a lingbi mo sara nyen? Ngbanga ti nyen?

 ³ (1) Sambela. Kozo ti tene mo diko Bible, hunda na Jéhovah ti mû maboko na mo ti bâ tongana nyen la mo lingbi ti bâ nzoni na lege ti ye so mo yeke diko. Na tapande, tongana mo yeke gi wango so alingbi ti mû maboko na mo ti hon ndö ti mbeni kpale, hunda Jéhovah ti mû maboko na mo ti wara amama-ndia so alingbi ti fa lege na mo.—aPhil. 4:6, 7; Jacq. 1:5.

4. Nyen la alingbi ti mû maboko na mo ti tene mbeni mbaï ti Bible so mo diko aduti tâ ye na lê ti mo?

⁴ (2) Imaginé aye. Jéhovah amû na e ngangu ti imaginé aye. Tongana mo gi ti imaginé aye so asi, nga mo zia terê ti mo na place ti zo so aye ni asi na lo, a yeke sara si mbaï ti Bible so mo diko aga tâ ye na lê ti mo. Gi ti bâ aye so zo ni abâ ni lani nga ti hinga wala aye ni asara lo lani tongana nyen.

5. Nyen la a lingbi mo gbu li nzoni na ndö ni? Mo lingbi ti sara ni tongana nyen?

⁵ (3) Gbu li. A lingbi mo gbu li nzoni na ndö ti ye so mo diko nga mo gi ti bâ tongana nyen la aye so mo diko andu mo. Ti gbu li ayeke mû maboko na mo ti bâ tongana nyen la atënë nde nde so mo diko ague oko, na a yeke sara si mo mä yâ ni nzoni ahon ti kozo. Ti diko Bible sân ti gbu li ayeke tongana bango na lê senge aye so mo ye ti tö na mbeni kobe. Ti gbu li ayeke tongana ti so mo yeke bungbi aye ni so kue mo tö ni, si a ga mbeni kobe so anzere. Ti mû maboko na mo ti gbu li ti mo, mo lingbi ti kiri tënë na ahunda so: ‘Nyen la zo so mbi diko ye na ndö ti lo so asara ti hon ndö ti kpale ti lo? Tongana nyen la Jéhovah amû maboko na lo? Tongana nyen la aye so mbi manda alingbi ti mû maboko na mbi ti gbu ngangu na yâ ti akpale ti mbi?’

6. Ngbanga ti nyen la a lingbi e sara ye alingbi na aye so e manda?

⁶ (4) Sara ye alingbi na aye so mo manda. Jésus atene lani tongana e sara ye alingbi na aye so e manda ape, e yeke tongana zo so asara da ti lo na ndö ti mbutu. Lo sara kua ngangu, me senge senge. Ngbanga ti nyen? Ngbanga ti so tongana kota ngu-nzapa apika nga ngu asuku amû ndo, da ni ayeke kungbi (Mat. 7:24-27). Legeoko nga, tongana e sambela, e imaginé aye nga e gbu li me e sara ye alingbi na ye so e manda ape, a yeke gï senge senge. Tongaso, tongana e wara akpale wala a sara ye ti ngangu na e, mabe ti e ayeke tï. Me tongana e manda ye na e sara ye alingbi na ni, e yeke mû anzoni desizion ahon ti kozo, e yeke duti na siriri mingi nga mabe ti e ayeke kpengba mingi (És. 48:17, 18). Zia e sara kua na aye osio so e sara fade tënë ni na e bâ tongana nyen la e lingbi ti manda ye na ndö ti ye so asi lani na yâ ti fini ti Gbia David.

7. Mbaï wa ti Bible la e yeke gue ti bâ ni?

⁷ Eskê mbeni kamarade ti mo wala mbeni zo ti sewa ti mo ason bê ti mo awe? Tongana a si na mo awe, mbeni ye so alingbi ti mû maboko na mo ayeke ti manda ye na ndö ti ye so Gbia David asara na ngoi so molenge ti lo Absalom ason bê ti lo nga agi ti ga gbia na place ti lo.—2 Sam. 15:5-14, 31; 18:6-14.

8. Nyen la mo lingbi ti sara ti tene Jéhovah amû maboko na mo?

⁸ (1) Sambela. Pensé na mbaï ni na fa na Jéhovah tënë ti bê ti mo na ndö ti ye so a sara na mo so ayeke na lege ni ape (Ps. 6:6-9). Fa ni na lo polele. Na pekoni, hunda na Jéhovah ti mû maboko na mo ti wara amama-ndia so alingbi ti fa na mo ye so mo peut ti sara.

9. Nyen la apassé na popo ti David na Absalom?

⁹ (2) Imaginé aye. Gbu li na ndö ti aye so asi na yâ ti mbaï so na imaginé tongana nyen la a sara lani Gbia David. Teti angu mingi, Absalom  molenge ti David asara kue ti tene azo aye lo (2 Sam. 15:7). Tongana Absalom abâ so nzoni ngoi ni alingbi awe, lo tokua azo ti bembe ndo na yâ ti kodro ti Israël kue ti leke azo ni ti tene ala yeda na lo tongana gbia ti ala. Lo sara même si Ahitophel, so ayeke kota kamarade ti David nga zo ti mungo wango na lo amû mbage ti lo na yâ ti kpengbango-li ni. Absalom afa na azo ni so lo yeke gbia, nga na pekoni lo tara ti gbu David nga ti fâ lo. Peut-être terê ti David ason lani na ngoi ni so ngangu (Ps. 41:1-9). David ahinga ye so Absalom aye ti sara, na lo londo na Jérusalem lo kpe. A gue ngbii aturugu ti Absalom atiri na aturugu so angbâ be-ta-zo na David. Aturugu ti David asö benda na ndö ti aturugu-kpale ni, na a fâ Absalom molenge ti David.

10. Gbia David alingbi lani ti sara ye tongana nyen?

¹⁰ Fadeso, tara ti imaginé David, aye kue so asi lani na lo so asara lo tongana nyen? Lo ye lani Absalom nga lo sara confiance na Ahitophel. Me, ala use kue azia vundu na bê ti lo. Ala zia vundu na bê ti lo mingi na ala tara même ti fâ lo. David apeut lani ti duti na confiance na tanga ti akamarade ti lo ape, na ti pensé même so ala kue amû mbage ti Absalom awe. David apeut lani ti pensé gï na lo wani na ti gi lege ti kpe gï lo oko. Wala lo lingbi ti découragé lani kue. David asara aye so ape. Me lo hon ndö ti ngangu kpale so. Nyen la amû lani maboko na lo?

11. David asara lani ye tongana nyen na yâ ti ngangu kpale so?

¹¹ (3) Gbu li. Amama-ndia wa la mo wara na lege ti mbaï so? Kiri tënë na hunda so: “Nyen la David asara so amû lani maboko na lo?” Li ti lo aga kirikiri ape na hio lo mû asioni desizion ape. Lo zia nga pëpe si mbeto akanga lege na lo ti sara ye so lo doit ti sara. Me, lo sambela Jéhovah ti mû maboko na lo. Lo hunda nga na akamarade ti lo ti mû maboko na lo. Na hio lo sara ye alingbi na adesizion so lo mû. Atâa so bê ti David ason lani mingi, lo zia ti sara confiance na amba ti lo ape nga lo yeke gï ngonzo ngonzo ape. Lo ngbâ ti sara confiance na Jéhovah nga na akamarade ti lo.

12. Nyen la Jéhovah asara lani ti mû maboko na David?

¹² Tongana nyen la Jéhovah amû maboko lani na David? Tongana mo sara recherche, mo yeke hinga tongana nyen la Jéhovah amû lani na David ngangu so lo yeke na bezoin ni ti gbu ngangu na yâ ti kpale so (Ps. 3:1-8; kete li ti tënë ni). Jéhovah asara lani tufa na ndö ti adesizion so David amû. Nga lo mû maboko na akamarade ti David so angbâ na terê ti lo na ngoi so ala tiri lani ti bata gbia ti ala.

13. Tongana nyen la mo lingbi ti sara ye tongana David tongana mbeni zo ason bê ti mo ngangu? (Matthieu 18:15-17).

¹³ (4) Sara ye alingbi na aye so mo manda. Hunda terê ti mo: ‘Tongana nyen la mbi peut ti sara ye tongana David? Mo doit ti sara ye hio ti leke kpale ni. Peut-être mo lingbi ti sara ye alingbi na wango ti Jésus so ayeke na Matthieu chapitre 18 wala ti sara ye alingbi na mama-ndia so ayeke na yâ ti wango so, so atene mo gue mo leke tënë na mba ti mo. (Diko Matthieu 18:15-17.) Me a yeke nzoni mo dö terê ti mo ti mû desizion ape na ngoi so bê ti mo ason. A yeke nzoni mo sambela Jéhovah ti mû na mo siriri ti bê nga na ndara so mo bezoin ni ti gbu ngangu na yâ ti kpale ni. Ngbâ ti sara confiance na akamarade ti mo, nga yeda na mungo maboko ti ala. Na kota ye ni ayeke ti sara ye alingbi na wango ti Jéhovah so ayeke na yâ ti Bible.—aProv. 3:5, 6.

14. Na ngoi wa la aversê so alingbi ti kpengba mo? 2 Timothée 1:12-16; 4:6-11, 17-22.

¹⁴ Eskê azo ti sewa ti mo akanga lege na mo ti sara na Jéhovah? Wala mo yeke na yâ ti mbeni  kodro so a kanga lege na ambeni kua ti e wala a kanga lege na ni kue? Tongana a yeke tongaso, atënë so ayeke na yâ ti aversê so alingbi ti kpengba mo: 2 Timothée 1:12-16 nga 4:6-11, 17-22. * Paul asû lani aversê so na ngoi so lo yeke na kanga.

15. Nyen la mo lingbi ti hunda ni na Jéhovah?

¹⁵ (1) Sambela. Kozo ti tene mo diko aversê so, fa na Jéhovah kpale ti mo na fa na lo ye so kpale ni asara na ndö ti mo. Fa tënë ni polele. Na pekoni, hunda Jéhovah ti mû maboko na mo ti hinga amama-ndia so ayeke na yâ ti ambaï so, so asara tënë ti akpale so Paul awara so ayeke mû maboko na mo ti hinga ye ti sara.

16. Nyen la asi lani na Paul?

¹⁶ (2) Imaginé aye. Imaginé so aye so asi lani na Paul asi na mo. Lo yeke lani na kanga na Rome. Lo sara lani kanga kozo awe, me ti so ni so lo hinga so a yeke fâ lo ande. Ambeni mba ti lo adö lo azia nga lo fatigué kue.—2 Tim. 1:15.

17. Paul alingbi lani ti sara ye tongana nyen?

¹⁷ Paul alingbi lani ti zia li ti lo na ndö ti gigi ti lo ti ândö, lo lingbi ti pensé so tongana lo soro lani mbeni ye nde peut-être lo lingbi ti sara kanga ape. Bê ti lo alingbi ti son lani na terê ti aita so ayeke na yâ ti kodro-komanda ti Asie so adö lo azia na lo lingbi nga ti sara confiance encore ape na tanga ti akamarade ti lo. Me Paul asara aye so kue ape. Ngbanga ti nyen la lo lingbi ti ngbâ ti zia bê ti lo na akamarade ti lo nga ti duti na nzoni bango ndo?

18. Paul asara lani ye tongana nyen na yâ ti ngangu kpale so?

¹⁸ (3) Gbu li. Kiri tënë na hunda so: “Nyen la Paul asara lani so amû maboko na lo?” Atâa so Paul ahinga so a ngbâ na lo ngoi mingi ape ti tene lo kui, lo girisa ape so a yeke kota ye mingi ti mû gloire na Jéhovah. Na lo ngbâ ti gbu li ti lo na ndö ti ye so lo peut ti sara ti kpengba ambeni zo. Lo zia lani bê ti lo na Jéhovah na lege so lo yeke sambela lakue (2 Tim. 1:3). Ahon ti zia li ti lo na ndö ti ala so adö lo azia, lo kiri lani singila mingi ndali ti anzoni ye so akamarade ti lo asara na ndoye ti mû maboko na lo. Na ndö ni, Paul angbâ lani ti manda Mbeti ti Nzapa (2 Tim. 3:16, 17; 4:13). Kota ye ni ayeke so lo hinga na bê ti lo kue so Jéhovah na Jésus aye lo, so ala adö lo azia ape nga so ala yeke futa lo ndali ti kua so lo sara na bê ti lo kue.

19. Tongana nyen la Jéhovah amû maboko lani na Paul?

¹⁹ Jéhovah atene kozo na Paul awe so a lingbi lo gbu ngangu na yâ ti aye ti ngangu so a yeke sara na lo ndali ti so lo yeke Chrétien (Kus. 21:11-13). Tongana nyen la Jéhovah amû maboko lani na Paul? Jéhovah akiri tënë na asambela ti lo nga lo ngbâ ti mû na lo ngangu (2 Tim. 4:17). A tene na Paul so lo yeke wara futa so lo sara kua ngangu lani ti wara ni. Jéhovah asara kua nga na akamarade ti Paul so angbâ na terê ti lo ti sara ambeni ye ti mû maboko na lo.

20. Tongana nyen la e lingbi ti sara ye tongana ti Paul, tongana ti so a tene na aRomain 8:38, 39?

²⁰ (4) Sara ye alingbi na aye so mo manda. Hunda terê ti mo: ‘Tongana nyen la mbi lingbi ti sara ye tongana Paul?’ Tongana ti Paul, a lingbi e hinga so a yeke sara ande aye ti ngangu na e ndali ti so e sara na Jéhovah (Marc 10:29, 30). Ti ngbâ be-ta-zo na Jéhovah na ngoi so e wara akpale, e bezoin ti ngbâ ti sambela lo nga ti manda ye lakue. A lingbi e girisa lâ oko ape so mbeni kota ye so e lingbi nga ti sara ayeke ti mû gloire na Jéhovah. E lingbi ti hinga na bê ti e kue so Jéhovah ayeke dö e ande lâ oko ti zia ape, nga so mbeni ye so alingbi ti kangbi e na ndoye ti lo ayeke dä ape.—Diko aRomain 8:38, 39; aHéb. 13:5, 6.

21. Nyen la amû maboko na Aya nga na Hector ti hon ndö ti akpale so ala wara?

²¹ Atâa akpale wa la e wara, atapande ti azo so Bible asara tënë ti ala alingbi ti kpengba e. Na tapande, Aya, mbeni pionnier na Japon, atene so mbaï ti Jonas amû maboko na lo ti hon ndö ti mbeto so lo yeke na ni ti fa tënë na ando so azo ayeke dä mingi. Tapande ti Ruth amû maboko na Hector, mbeni maseka-koli na Indonésie, so babâ na mama ti lo avoro Jéhovah ape ti manda ye na ndö ti Jéhovah nga ti sara na lo.

22. Nyen la alingbi ti mû maboko na mo ti wara ye ti nzoni mingi na lege ti ascénette ti ambaï ti Bible wala a-article “Sara ye na mabe tongana ti ala”?

²² Na ndo wa la mo lingbi ti wara atënë na ndö ti azo so Bible asara tënë ti ala so ayeke kpengba mo? Avidéo ti e, a-audio ti ascénette ti ambaï ti Bible nga na a-article “Sara ye na mabe tongana ti ala” ayeke sara si aye so mo diko na yâ ti Bible aga tâ ye na lê ti mo. * Kozo ti bâ vidéo, ti mä audio wala ti diko ambaï so a gi ndani nzoni so, hunda na Jéhovah ti aidé mo ti wara ambilimbili ye so mo lingbi ti sara ye alingbi na ni. Imaginé so mo yeke na place ti zo ni. Gbu li na ndö ti ye so awakua be-ta-zo ti Jéhovah so asara nga bâ tongana nyen la lo mû maboko na ala ti hon ndö ti akpale. Na pekoni, sara ye alingbi na ni na yâ ti ye so asi na mo. Kiri singila na Jéhovah ndali ti mungo maboko so lo ngbâ ti mû na mo. Nga, fa so mo kiri singila ndali ni na lege so mo yeke gi ti kpengba amba ti mo nga ti mû maboko na ala.

23. Ti gue oko na Ésaïe 41:10, 13, nyen la Jéhovah amû zendo ti sara na e?

²³ Gigi alingbi ti duti ngangu na e na yâ ti dunia ti Satan so nga na ambeni ngoi e hinga ye ti sara ape (2 Tim. 3:1). Me e bezoin ti gi bê ti e wala ti sara mbeto ape. Jéhovah ahinga akpale so e yeke wara so. Lo mû zendo ti gbu e nzoni na ngangu maboko ti lo ti koli tongana e tï. (Diko Ésaïe 41:10, 13.) E hinga na bê ti e kue so Jéhovah ayeke mû maboko na e nga so Bible ayeke mû na e ngangu so e bezoin ni ti gbu ngangu na yâ ti akpale kue.