1-2. Azo wa la alingbi ti mû maboko na mbeni étude ti gue na li ni juska na batême?

AMY, so ayeke na Fidji, atene: “Mbi ye lani mingi aye so mbi yeke manda na yâ ti Bible. Mbi hinga lani so a yeke tâ tënë. Me a yeke gï na ngoi so mbi komanse ti duti na terê ti aita la mbi sara achangement so mbi doit ti sara ti gue na li ni juska na batême.” Ye so afa na e mbeni kpengba ye: Mbeni étude apeut ti ngbâ ti gue na li ni juska na batême tongana aita ti congrégation amû maboko na lo.

² Wafango tënë oko oko kue alingbi ti mû maboko na afini zo ti ga na yâ ti congrégation (aÉph. 4:16). Leilani, mbeni pionnier so ayeke na Vanuatu, atene: “Mbeni mato atene so ti bata mbeni molenge, a bezoin mungo maboko ti azo kue ti mbeni kete kodro. Mbi pensé so sarango adisciple ayeke nga tongaso; mingi ni, aita kue la ayeke sara si mbeni zo aga na yâ ti tâ tënë.” Afami ti mbeni molenge, akamarade ti lo nga na azo so ayeke fa mbeti na lo kue la ayeke mû maboko na lo ti kpengba. Ala yeke sara ni na lege so ala yeke mû wango na lo nga ala yeke fa na lo akpengba ye ti manda. Legeoko nga, awafango tënë alingbi ti mû maboko na a-étude ti gue na li ni juska na batême na lege so ala mû na ala wango, ala kpengba ala nga ala zia na ala anzoni tapande.—aProv. 15:22.

3. Atënë ti Ana, Dorin na Leilani afa na mo nyen?

³ Ngbanga ti nyen la mbeni wafango tënë adoit ti duti na ngia tongana ambeni ita amû maboko na étude ti lo? Ana, mbeni pionnier spécial na Moldavie, atene: “Mbeni zo so ayeke manda Bible abezoin mungo maboko mingi, na a yeke ngangu ti  tene gï zo so ayeke fa ye na lo la asara ni.” Dorin, mbeni pionnier spécial so ayeke nga na Moldavie, atene: “Fani mingi, ambeni wafango tënë atene mbeni tënë so mbi pensé na ni lâ oko ape so andu bê ti étude ti mbi.” Leilani afa mbeni raison nde so ndali ni e doit ti duti na ngia tongana aita amû maboko na étude ti e, lo tene: “Tongana étude ni abâ so aita aye lo nga apensé na lo, a yeke mû maboko na lo ti hinga biani so e yeke azo ti Jéhovah.”—Jean 13:35.

4. Nyen la e yeke bâ na yâ ti article so?

⁴ Ye oko, mo lingbi ti hunda terê ti mo, mo tene: ‘So étude ni ayeke ti mbi ape so, nyen la mbi peut ti sara ti mû maboko na lo?’ Zia e bâ aye so e lingbi ti sara tongana mbeni ita atisa e ti tene e na lo e gue e sara étude ti lo nga na aye so e lingbi ti sara tongana étude ni akomanse ti ga na abungbi. E yeke bâ nga aye so a-ancien alingbi ti sara ti mû maboko na azo so ayeke manda Bible ti gue na li ni juska na batême.

5. Nyen la mo doit ti sara tongana mbeni ita atisa mo ti tene mo na lo ague asara étude ti lo?

⁵ Na ngoi ti mbeni étude, a yeke mbilimbili wa ti étude ni la ayeke mû maboko na zo ni ti mä yâ ti Bible. Tongana ita ni atisa mo ti tene mo na lo ague, hinga so mo ga ti mû maboko na lo (Zo-ti. 4:9, 10). Me ambilimbili ye wa la mo lingbi ti sara ti mû maboko nzoni na ngoi ti étude ni?

6. Tongana mo na mbeni ita aleke ti gue ti sara étude ti lo, tongana nyen la mo lingbi ti sara ye alingbi na mama-ndia so ayeke na aProverbe 20:18?

⁶ Leke terê ti mo ndali ti étude ni. Kozoni, hunda na ita ni ti fa na mo ambeni ye na ndö ti étude ni. (Diko aProverbe 20:18.) Mo lingbi ti hunda ita ni: “Nyen la mo hinga na ndö ti zo ni? Tënë wa la ala yeke bâ ni ande? Nyen la mo ye ti tene zo ni abata na peko ti étude ni? Na ngoi ti étude ni, mbeni ye ayeke dä so a yeke nzoni mbi sara wala mbi tene? Wala mbeni ye ayeke dä so a yeke nzoni mbi sara ape wala mbi tene ape? Tongana nyen la mbi peut ti wa étude ni ti gue na li ni?” A yeke polele so ita ni ayeke tene na mo ape atënë so abâ gï zo ni, me atënë so lo tene na mo alingbi ti mû maboko na mo. Joy, so ayeke mbeni missionnaire, ayeke sara mara ti lisoro so na aita so lo na ala ague ti sara étude ti lo. Lo tene: “Mara ti lisoro so amû maboko na ita so mbi na lo e yeke gue ti bi bê na étude ni nga ti bâ tongana nyen la lo lingbi ti mû maboko na lo.”

7. Ngbanga ti nyen la mo bezoin ti leke terê ti mo tongana mo na mbeni ita ayeke gue ti sara étude ti lo?

⁷ Tongana mbeni ita atisa mo ti tene mo na lo ague asara étude ti lo, a yeke nzoni mo leke mbage so ala yeke sara ande (Esdras 7:10). Dorin, ita-koli so e sara tënë ti lo fade,  atene: “Tongana ita so mbi na lo e yeke gue ti sara étude ti mbi aleke terê ti lo, a yeke nzere na mbi mingi. Ndali ti so lo lingbi ti mû mbage nzoni na étude ni.” Na ndö ni, étude ni alingbi ti bâ so ala use kue aleke terê ti ala nzoni, nga ala yeke zia na lo nzoni tapande. Même tongana mo wara ngoi ti leke terê ti mo nzoni ape, mû ngoi kete ti bâ akota tënë ti ye ti manda ni.

8. Tongana nyen la mo lingbi ti hinga mbilimbili atënë so mo yeke tene na yâ ti sambela na ngoi ti mbeni étude?

⁸ So sambela ayeke kota mbage ti étude ni, pensé na tënë so mo yeke tene ande tongana a hunda na mo ti sambela. Tongaso si sambela ti mo alingbi ti ndu bê ti zo ni (Ps. 141:2). Hanae, so ayeke na Japon, angbâ ti dabe ti lo na asambela so mbeni ita-wali asara. Ita-wali ni na zo so ayeke sara étude ti Hanae la aga. Hanae atene: “Mbi bâ so lo yeke na kpengba songo na Jéhovah, na mbi ye ti duti tongana lo. Nga, na ngoi so lo di iri ti mbi na yâ ti asambela ni, mbi bâ so lo ye mbi.

9. Ti gue oko na Jacques 1:19, nyen la mo lingbi ti sara ti mû maboko nzoni na ngoi ti mbeni étude?

⁹ Mû maboko na ita so ayeke mû li ni na étude ni. Omamuyovbi, mbeni pionnier spécial na Nigéria, atene: “Nzoni zo ti mungo maboko ayeke dengi mê nzoni na ngoi ti étude ni. Lo yeke tene apendere tënë me lo yeke diko tënë ahon ndö ni ape, lo hinga so wa ti étude ni la ayeke mû li ni.” Na ngoi wa la a yeke nzoni mo sara tënë? Tënë ti nyen la a yeke nzoni mo tene? (aProv. 25:11). Dengi mê nzoni na ngoi so ita so ayeke mû li ni nga na étude ni ayeke sara tënë. (Diko Jacques 1:19.) Tongaso, mo yeke duti nduru ti sara tënë na ngoi so alingbi. Me, mo doit ti gbu li ti mo kozo si mo sara tënë. Na tapande, diko tënë ahon ndö ni ape, fâ tënë pëpe na yanga ti ita so ayeke mû li ni na ngoi so lo ngbâ ti fa nda ti mbeni ye wala komanse pëpe ti sara tënë na ndö ti mbeni tënë nde. Me na lege ti mbeni nduru commentaire, mbeni tapande wala mbeni hunda, mo lingbi ti sara si nda ti mbeni tënë asigi polele. Na ambeni ngoi, peut-être mo bâ so mo yeke na gbâ ti tënë ti tene ape na ndö ti ye so a yeke manda ni. Me tongana mo gonda étude ni nga mo fa so mo bi bê na lo, mo yeke mû maboko na lo mingi ti gue na li ni.

10. Tongana nyen la aye so asi na mo alingbi ti mû maboko na mbeni étude?

¹⁰ Fa aye so asi na mo. Tongana mo bâ so a peut ti mû maboko na étude ni, fa na lo na nduru tënë tongana nyen la mo ga na yâ ti tâ tënë, tongana nyen la mo hon ndö ti mbeni kpale wala tongana nyen la Jéhovah amû maboko na mo na yâ ti gigi ti mo (Ps. 78:4, 7). Ye so alingbi ti duti tâ ye so étude ni abezoin ti mä ni. A lingbi ti kpengba mabe ti lo wala ti mû na lo ngangu ti ngbâ ti gue na li ni juska na batême. A lingbi nga ti fa na lo tongana nyen ti hon ndö ti mbeni kpale so lo wara (1 Pi. 5:9).  Gabriel, so ayeke na Brésil nga so ayeke laso pionnier, adabe ti lo na ye so amû maboko na lo na ngoi so lo yeke manda lani Bible. Lo tene: “Na ngoi so mbi yeke mä aye so asi na aita, mbi manda so Jéhovah ayeke bâ akpale so e wara. Nga so ala hon ndö ti akpale ti ala, mbi nga kue mbi lingbi ti hon ndö ti akpale ti mbi.”

11-12. Ngbanga ti nyen la a yeke nzoni ti yamba na ngia mbeni étude so aga na bungbi?

¹¹ Ti tene mbeni étude ague na li ni juska na batême, a lingbi lo ga lakue na abungbi nga lo wara nzoni dä (aHéb. 10:24, 25). Peut-être ita so ayeke fa ye na lo la ayeke tisa ande lo ti ga na bungbi ti kozoni. Tongana lo ga, e kue e lingbi ti wa lo ti ngbâ ti ga na Da ti Royaume. E lingbi ti sara ni mbilimbili tongana nyen?

¹² Yamba étude ni na ngia. (aRom. 15:7). Tongana e yamba étude ni na ngia na abungbi, a lingbi ti pusu lo ti ngbâ ti ga na Da ti Royaume. Sân ti sara ye ahon ndö ni, bara lo na ngia nga fa lo na ambeni zo. Sara lisoro na lo ndali ti so peut-être ita so ayeke fa ye na lo ade ti ga ape wala peut-être lo ngbâ ti sara akua na Da ti Royaume. Mä tënë so lo yeke tene nzoni nga fa na lo so mo bi bê na lo. So mo yamba lo na ngia so alingbi ti sara lo tongana nyen? Bâ ye so asi na Dimitri, so awara batême ade ti ninga ape nga so ayeke laso wakua ti mungo maboko. Lo dabe ti lo na kozo gango ti lo na bungbi, lo tene: “Mbeni ita-koli abâ mbi so mbi yeke luti na gigi na mbeto asara mbi, na nzoni bê lo ga lo mû mbi e linda na Da ti Royaume. Gbâ ti azo aga abara mbi. Li ti mbi akpe kue. A nzere na mbi mingi ni la mbi ye ti tene bungbi aduti dä lâ oko oko na yâ ti yenga. Mbi bâ mbeni ye tongaso lâ oko na mbeni ndo nde ape.”

13. Tongana nyen la nzoni tapande ti mo alingbi ti mû maboko na mbeni étude?

¹³ Zia na lo nzoni tapande. Nzoni sarango ye ti mo alingbi ti mû maboko na mbeni étude ti bâ so lo wara tâ tënë awe (Mat. 5:16). Vitalii, so ayeke fadeso pionnier na Moldavie, atene: “Mbi bâ lani tongana nyen la azo ti congrégation ayeke vivre, ala yeke pensé nga ala yeke sara ye. A sara si mbi hinga so ala yeke tambela biani na Nzapa.”

14. Tongana nyen la tapande ti mo alingbi ti mû maboko na mbeni zo ti ngbâ ti gue na li ni?

¹⁴ Kozo ti tene mbeni étude awara batême, lo bezoin ti sara ye alingbi na aye so lo yeke manda. A yeke lakue kete ye ape. Me, tongana lo bâ tongana nyen la sarango ye alingbi na amama-ndia ti Bible amû maboko na mo, a lingbi ti pusu lo ti sara ye tongana mo (1 aCor. 11:1). Bâ ye so asi na Hanae, so e sara tënë ti lo fade. Lo tene: “Aita ayeke sara lani ye alingbi na aye so mbi yeke manda. Mbi bâ lani tongana nyen la mbi lingbi ti kpengba azo, ti pardonné azo nga ti ye azo. Ala yeke  sara lakue nzoni tënë ti amba ti ala. Mbi ye lani ti sara ye tongana ala.”

15. Tongana nyen la aProverbe 27:17 amû maboko na e ti hinga ndani so a yeke nzoni e sara kamarade na mbeni étude so angbâ ti ga na abungbi?

¹⁵ Sara kamarade na étude ni. So étude ni ayeke ga na abungbi, ngbâ ti fa so mo pensé na lo (aPhil. 2:4). Mû ngoi ti sara lisoro na lo. Sân ti yôro yanga ti mo na yâ ti atënë so abâ gï lo, mo lingbi ti gonda lo ndali ti achangement so lo sara nga sara lisoro na lo na ndö ti étude ti lo, sewa ti lo nga na kua ti lo. Alisoro tongaso apeut ti sara si mo ga nduru mingi na lo. Tongana mo ga kamarade ti étude ni, mo yeke mû maboko na lo ti gue na li ni juska na batême. (Diko aProverbe 27:17.) Hanae ayeke laso pionnier permanent. Lo dabe ti lo na ngoi so lo komanse lani ti gue na bungbi, lo tene: “So mbi sara kamarade na ambeni ita ti congrégation, guengo na abungbi akomanse ti nzere na mbi mingi, na mbi gue même atâa mbi fatigué. A nzere na mbi mingi ti duti na terê ti afini kamarade ti mbi na amû maboko na mbi ti fâ yâ ti songo na ala so avoro Jéhovah ape. Mbi ye lani ti ga nduru mingi na Jéhovah nga na aita. Tongaso, mbi mû desizion ti wara batême.”

16. Ambeni ye nde wa la mo lingbi ti sara ti mû maboko na mbeni étude ti bâ so lo yeke na ngia na yâ ti congrégation?

¹⁶ So étude ni angbâ ti gue na li ni nga ti sara achangement, mû maboko na lo ti bâ so lo yeke na place na yâ ti congrégation. Mo lingbi ti sara ni tongana mo tisa étude ni na ndo ti mo (aHéb. 13:2). Denis, so ayeke na Moldavie, adabe ti lo na ngoi so lo ngbâ lani ti manda Bible, lo tene: “Fani mingi, aita atisa mbi na wali ti mbi. Ala fa na e tongana nyen la Jéhovah amû maboko na ala. Ye so akpengba e. Angoi so amû maboko na e ti yeda na bê ti e kue ti sara na Jéhovah nga ti bâ so mbeni pendere gigi ayeke ku e.” Tongana étude ni aga wafango tënë awe, mo lingbi nga ti tisa lo ti tene mo na lo afa tënë. Diego, mbeni wafango tënë na Brésil, atene: “Aita-koli mingi atisa mbi ti sigi na fango tënë na ala. So tâ pendere lege ti hinga ala nzoni la. So mbi na ala e yeke sigi lani, mbi manda aye mingi nga mbi bâ so mbi yeke nduru mingi na Jéhovah nga na Jésus.”

17. Tongana nyen la a-ancien alingbi ti mû maboko na a-étude?

¹⁷ Mû ngoi ndali ti a-étude. A-ancien, tongana ala fa so ala ye a-étude ni nga ala bi bê na ala, ala lingbi ti mû maboko na ala ti gue na li ni juska na batême. Mo lingbi ti sara lisoro na ala lakue na abungbi? Ala yeke bâ so mo bi bê na ala tongana mo di iri ti ala, mbilimbili na ngoi so ala komanse ti mû acommentaire. Eskê mo lingbi ti leke yâ ti kapa ti mo ngoi na ngoi  ti sigi na mbeni wafango tënë na ngoi so lo gue ti manda Bible na mbeni zo? Mo lingbi ti mû maboko mingi na mbeni étude ahon ti so mo pensé na ni. Jackie, mbeni ita-wali pionnier so ayeke na Nigéria, atene: “Tongana a-étude ti mbi aga ti hinga so ita-koli so mbi na lo e ga ayeke ancien, li ti ala akpe. Mbeni étude atene: “Pasteur ti mbi ayeke sara tongaso lâ oko ape. Lo yeke gue ti sara vizite gï na azo ti mosoro nga na azo so ayeke futa lo.” Laso, étude so ayeke ga na abungbi.

18. Tongana nyen la a-ancien alingbi ti sara ye alingbi na tënë so ayeke na Kusala 20:28?

¹⁸ Fa ye na aita so ayeke manda Bible na azo nga kpengba ala. A-ancien, ala yeke na kota kua ti mû maboko na aita ti fa tënë nzoni nga ti manda Bible nzoni na azo. (Diko Kusala 20:28.) Tongana mbeto asara mbeni ita ti sara étude ti lo na devant ti mo, hunda na lo ti zia mo ti sara ni. Jackie, so e sara tënë ti lo fade, atene: “A-ancien ayeke hunda mbi lakue na ndö ti a-étude ti mbi. Tongana mbeni ye akara mbi na ngoi so mbi yeke sara étude, a-ancien ayeke mû na mbi anzoni wango.” A-ancien alingbi ti sara aye mingi ti wa aita so ayeke sara étude na azo ti ngbâ ti sara ni (1 aThes. 5:11). Jackie akiri atene: “Tongana a-ancien akpengba mbi nga ala tene na mbi so ala bâ na nene ni ngangu kua so mbi sara, a nzere na mbi. Mara ti atënë tongaso adë bê ti mbi tongana dede ngu na ngoi so ndo achauffé mingi. Atënë so ala tene ti gonda mbi asara si mbi bâ so mbi yeke fa ye nzoni na a-étude ti mbi nga asara si mbi yeke na ngia mingi.”—aProv. 25:25.

19. Ngbanga ti nyen la e kue e lingbi ti duti na kota ngia?

¹⁹ Atâa tongana e yeke na étude ape, e lingbi ti mû maboko na mbeni zo ti gue na li ni juska na batême. E lingbi ti mû maboko na ita so ayeke mû li ni na étude ni sân ti diko gbâ ti tënë tongana e leke acommentaire so e ye ti mû ni nzoni. E lingbi ti sara kamarade na a-étude ni na ngoi so ala ga na Da ti Royaume, nga e lingbi ti zia na ala nzoni tapande. A-ancien nga alingbi ti kpengba a-étude tongana ala mû ngoi ndali ti ala nga ala lingbi ti kpengba aita so ayeke sara a-étude tongana ala fa ye na ala nga ala gonda ala. E yeke duti na ngia mingi tongana e sara mbeni ye, même tongana a yeke kete ye, ti mû maboko na mbeni zo ti ye Jéhovah nga ti sara na lo.