1. Nyen la mingi ni ayeke sara ngangu na ndö ti sarango ye ti e?

 ATÂA e wara batême fafadeso wala a sara angu mingi awe, e kue e ye ti duti na asarango ye so anzere na Jéhovah. Ti sara ni, e doit ti komande apensé ti e. Ngbanga ti nyen? Ngbanga ti so mingi ni, apensé ti e la ayeke sara ngangu na ndö ti sarango ye ti e. Tongana lakue e yeke pensé na ndö ti aye so anzere na e, e yeke tene asioni tënë nga e yeke sara asioni ye (aÉph. 4:17-19). Me tongana e yeke pensé na anzoni ye, e yeke tene atënë nga e yeke sara aye so anzere na Jéhovah, Babâ ti e.—aGal. 5:16.

2. Ahunda wa la e yeke kiri tënë na ni na yâ ti article so?

² Tongana ti so article so ahon afa, e lingbi pëpe ti kanga lege na asioni pensé kue ti lï na yâ ti li ti e. Me e peut ti soro ti sara ye pëpe alingbi na apensé ni so. Kozo si e wara batême, e bezoin ti zia ti sara atënë nga ti sara aye so Jéhovah ake. So ayeke kozo nga kota ye so e doit ti sara ti zi ngbene zo. Me ti nzere na lê ti Jéhovah mingi, e doit nga ti sara ye alingbi na commandement so: “Ala yü fini zo.” (aCol. 3:10). Na yâ ti article so, e yeke kiri tënë na ahunda so: Nyen la a iri ni “fini zo”? Tongana nyen la e peut ti yü ni nga e zia angbâ na terê ti e?

3. Nyen la a iri ni “fini zo”? Tongana nyen la zo apeut ti yü ni? (aGalate 5:22, 23).

³ Mbeni zo so ayü “fini zo” ayeke pensé nga ayeke sara ye tongana Jéhovah. A yeke hinga mbeni zo so ayü fini zo na lege  so lo yeke lë ambage nde nde ti lengo ti yingo ti Nzapa, lo yeke zia lege na yingo vulu ti fa lege na apensé ti lo, atënë ti bê ti lo nga na asarango ye ti lo. (Diko aGalate 5:22, 23.) Na tapande, lo ye Jéhovah nga na azo ti lo (Mat. 22:36-39). Zo tongaso ayeke ngbâ ti duti na ngia même tongana lo yeke na akpale (Jacq. 1:2-4). Lo yeke zo so asara si siriri amaï (Mat. 5:9). Lo yeke kanga bê na azo nga lo yeke sara nzoni bê na ala (aCol. 3:13). Lo ye ye so ayeke nzoni na lo sara ni (Luc 6:35). Lo yeke fa na lege ti asarango ye ti lo so lo yeke na kpengba mabe na Babâ ti lo ti yayu (Jacq. 2:18). Tongana a gi yanga ti lo, lo yeke sara ye na ngangu ape nga lo yeke kanga nzara ti bê ti lo tongana lo wara tara.—1 aCor. 9:25, 27; Tite 3:2.

4. Ti yü fini zo, ngbanga ti nyen la e bezoin ti duti na asarango ye kue so a sara tënë ni na aGalate 5:22, 23 nga na ambeni so ambeni versê nde asara tënë ni?

⁴ Ti yü fini zo, e bezoin ti duti na asarango ye kue so a sara tënë ni na aGalate 5:22, 23 nga na ambeni so a sara tënë ni na yâ ti ambeni versê ti Bible. * Asarango ye so ayeke pëpe tongana abongo so e yeke yü ni na angoi nde nde. Ti tâ tënë ni, mingi ti asarango ye so ague oko na ambeni. Na tapande, tongana mo ye biani zo so ayeke nduru na mo, mo yeke kanga bê na lo nga mo yeke sara nzoni bê na lo. Ti duti biani nzoni zo, mo doit ti sara ye na ngangu ape nga ti kanga nzara ti bê ti mo.

5. Ti duti na “bibe ti Christ” aye ti tene nyen? Ngbanga ti nyen la a yeke nzoni e manda ye na ndö ti fini ti Jésus? (1 aCorinthien 2:16).

⁵ Diko 1 aCorinthien 2:16. Ti yü fini zo, a lingbi e duti na “bibe ti Christ.” So ti tene, e doit ti manda ti hinga tongana nyen la Jésus ayeke pensé, na pekoni e mû tapande ti lo. Jésus afa na yâ ti sarango ye ti lo tâ nzoni mingi ambage nde nde ti lengo ti yingo ti Nzapa. Legeoko tongana ti mbeni nzoni tatara, asarango ye ti lo afa tâ pendere mingi asarango ye ti Jéhovah (aHéb. 1:3). Tongana e pensé mingi tongana Jésus, e yeke sara ye mingi tongana lo nga e yeke duti na asarango ye ti lo.—aPhil. 2:5.

6. Aye wa la a yeke nzoni e girisa ape na ngoi so e yeke gi ti yü fini zo?

⁶ Eskê e peut biani ti mû tapande ti Jésus? E peut ti pensé e tene: ‘Jésus ayeke  mbilimbili-kue. E lingbi lâ oko ape ti sara ye tâ gï tongana lo.’ Tongana mo pensé tongaso, girisa aye so ape. Kozo ni, a créé mo ti sara ye tongana Jéhovah na Jésus. Tongaso, mo peut ti soro ti mû tapande ti ala nga na yâ ti ambeni ye, mo peut ti sara ni nzoni (Gen. 1:26). Use ni, yingo vulu ti Nzapa ayeke ngangu mingi ahon aye kue na yâ ti dunia. Na lege ni, mo peut ti sara aye so mo peut ti sara ni lâ oko ape na ngangu ti mo wani. Ota ni, Jéhovah ahunda na mo ape ti lë tâ na lege ni ambage nde nde ti lengo ti yingo laso. Ti tâ tënë ni, Babâ ti e ti ndoye ayeke zia ande ngu saki oko na azo so ayeke na beku ti duti na fini na ndö ti sese ti ga mbilimbili-kue (Apoc. 20:1-3). Ye so Jéhovah ahunda na e laso ayeke ti tene e gi ti sara ye kue so e peut ti sara nga ti zia bê ti e na lo ti mû maboko na e.

7. Nyen la e yeke bâ fadeso?

⁷ Tongana nyen la e peut mbilimbili ti mû tapande ti Jésus? E yeke sara tënë kete na ndö ti ambage osio ti lengo ti yingo ti Nzapa. Na yâ ti ambage oko oko, e yeke bâ ye so e peut ti manda na lege ti fason so Jésus afa asarango ye so. E yeke bâ nga ambeni hunda so apeut ti aidé e ti bâ wala e yü fini zo nzoni awe.

8. Tongana nyen la Jésus afa so lo ye azo?

⁸ So Jésus aye Jéhovah mingi, a pusu lo ti sara asacrifice ndali ti Babâ ti lo nga ndali ti e (Jean 14:31; 15:13). Na lege ti fason so Jésus avivre na ni na ndö ti sese, lo fa lani so lo ye azo mingi. Lâ na lâ, lo ye azo nga lo bâ mawa ti ala même na ngoi so ambeni ake lo. Mbeni kota ye so Jésus asara ti fa so lo ye azo ayeke so lo fa ye na ala na ndö ti Royaume ti Nzapa (Luc 4:43, 44). Jésus afa nga tâ ndoye ti lo ndali ti Nzapa nga na azo na lege so lo yeda ti bâ pasi nga ti tene awasiokpari afâ lo. So lo sara tongaso, lo zi lege na e kue ti wara fini ti lakue lakue.

9. Tongana nyen la e peut ti mû tapande ti Jésus so andoye azo?

⁹ E mû terê ti e na Babâ ti e ti yayu, Jéhovah, nga e wara batême ndali ti so e ye lo. Tongaso, legeoko tongana Jésus, e doit ti fa so e ye Jéhovah na lege ti fason ti sarango ye ti e na mbage ti azo. Bazengele Jean atene: “Zo so andoye ita ti lo pëpe, ita ti lo so lo bâ lo, lo lingbi pëpe ti ndoye Nzapa so lo bâ lo pëpe.” (1 Jean 4:20). E peut ti hunda terê ti e: ‘Eskê mbi ye azo mingi? Eskê mbi yeke bâ mawa ti azo même tongana ala sara ye na mbi nzoni ape? Eskê ndoye ayeke pusu mbi ti mû ngoi ti mbi nga na aye so mbi yeke na ni ti mû maboko na azo ti hinga Jéhovah? Eskê mbi yeke nduru ti sara ni même tongana mingi ti azo akiri singila pëpe ndali ti effort so mbi sara wala même tongana ala ke ti mä tënë ti mbi? Eskê mbi peut ti gi alege ti wara ngoi mingi ti sara kua ti sarango adisciple?’—aÉph. 5:15, 16.

10. Tongana nyen la Jésus asara lani si siriri amaï?

¹⁰ Jésus ayeke lani zo so asara si siriri amaï. Na ngoi so azo asara ye na lo na lege ni ape, lo kiri pekoni na ala ape. Me lo ngbâ lani gï na ndö ti so ape. Lo mû lani li ni ti sara si siriri amaï nga lo wa azo ti leke tënë na popo ti ala. Na tapande, lo fa na azo so ala doit ti leke tënë na aita ti ala tongana ala ye ti tene Jéhovah ayeda na vorongo so ala yeke voro na lo (Mat. 5:9, 23, 24). Na fani mingi lo aidé abazengele ti lo ti zia ti papa ti hinga zo wa la ayeke kota na popo ti ala.—Luc 9:46-48; 22:24-27.

11. Tongana nyen la e peut ti duti zo so asara si siriri amaï?

¹¹ Ti duti zo so asara si siriri amaï, e doit ti  sara aye mingi ahon gï ti kpe ti tene e wara tënë na azo. A lingbi e sara effort ti leke tënë na popo ti e na amba ti e nga ti wa aita ti e ti leke atënë so ayeke na popo ti ala (aPhil. 4:2, 3; Jacq. 3:17, 18). E peut ti hunda terê ti e na ahunda so: ‘Nyen la mbi yeke nduru ti zia lege ni ti leke tënë na popo ti mbi na amba ti mbi? Tongana mbeni ita ason bê ti mbi, eskê mbi yeke ngbâ ti sara ngonzo na terê ti lo? Tongana mbi na mbeni zo e wara tënë, eskê mbi yeke ku ti tene lo la lo ga ti tene e leke tënë ni wala mbi yeke gi ti tene e leke tënë ni, même tongana mbi bâ so lo la lo ga na kpale ni? Tongana lege ayeke dä, eskê mbi yeke wa azo so ayeke na tënë na popo ti ala ti leke ni?’

12. Tongana nyen la Jésus asara lani nzoni na azo?

¹² Jésus asara lani nzoni na azo (Mat. 11:28-30). Lo sara ni na lege so lo sara ye na azo na ngangu ape nga lo sara ye ahon ndö ni ape même na ngoi so aye ayeke ngangu. Na tapande, na ngoi so mbeni wali ti Phénicie avoro yanga na lo ti sava molenge ti lo, lo ke kozo ti sara ye so wali ni ahunda, me na ngoi so wali ni afa so lo yeke na kota mabe, na nzoni bê lo sava molenge ti lo ni (Mat. 15:22-28). Atâa so Jésus ayeke sara lani nzoni na azo, lo kpe ti mû wango na ala ape. Na ambeni ngoi, lo sara nzoni na azo na lege so lo sara tënë polele na ala so lo ye ala. Na tapande, na ngoi so Pierre agi ti découragé Jésus ti sara ye so bê ti Jéhovah aye, lo suku na lo na lê ti tanga ti adisciple ni (Marc 8:32, 33). Lo sara ni lani ti zia kamene na lê ti Pierre ape, me ti fa ye na lo. Jésus aye nga ti fa na tanga ti adisciple ni so ala doit ti aidé lo me pëpe ti gi ti kanga lege na lo ti sara ye so bê ti Nzapa aye. Kite ayeke dä ape so kamene asara Pierre lani, me lo wara ye ti nzoni dä.

13. Tongana nyen la e peut biani ti sara nzoni na azo?

¹³ Ti sara biani nzoni na azo so e ye ala, na ambeni ngoi, peut-être e doit ti sara tënë na ala polele. Na ngoi so mo yeke sara ni, mû tapande ti Jésus na lege so wango ti mo ni ague oko na amama-ndia ti Bible. Sara ye na ngangu ape. Hinga so ala ye ti sara ye so ayeke nzoni, nga duti na confiance so azo so aye Jéhovah nga aye mo ayeke sara ye alingbi na wango so mo mû na ala na ndoye. Hunda terê ti mo na ahunda so: ‘Tongana mbi bâ so mbeni zo so mbi ye lo asara mbeni ye so ayeke sioni, eskê mbi yeke wara courage ti sara tënë na lo? Tongana mbi doit ti mû wango na mbeni zo, eskê mbi yeke sara tënë na nzoni bê wala na ngangu? Nyen la apusu mbi ti mû wango ni? Eskê mbi mû wango ni ndali ti so bê ti mbi ason na terê ti zo ni, wala mbi sara ni ti aidé lo?’

14. Tongana nyen la Jésus asara lani nzoni bê na azo?

¹⁴ Jésus ahinga ye so ayeke nzoni nga lo sara ni na azo. Jésus aye Babâ ti lo, ndani la lakue nzoni bibe apusu lo ti sara ye so ayeke na lege ni. Zo so ayeke sara nzoni bê na azo ayeke gi lakue alege ti aidé amba ti lo nga ti sara anzoni ye ndali ti ala. Gï ti hinga ye so ayeke na lege ni alingbi ape, e doit ti sara ni na nzoni bibe. Mbeni zo apeut ti hunda terê ti lo, atene: ‘Eskê sioni bibe apeut ti pusu mbeni zo ti sara ye so ayeke na lege ni?’ En. Na tapande, Jésus asara tënë ti azo so amû aye na awayere me ala sara kue ti tene azo ahinga aye so ala mû. Atâa so ala sara anzoni ye, a nzere na Jéhovah ape.—Mat. 6:1-4.

15. Tongana nyen la e peut biani ti sara nzoni bê na azo?

¹⁵ E peut biani ti sara nzoni bê na azo gï tongana e sara ye so ayeke na lege ni ti wara mbeni ye na pekoni ape. Tongaso, mo peut ti hunda terê ti mo: ‘Eskê mbi hinga ye so ayeke na lege ni nga mbi yeke sara ni biani? Nyen la ayeke pusu mbi ti sara anzoni ye?’

16. Nyen la a yeke nzoni e sara lâ na lâ? Ngbanga ti nyen?

¹⁶ A lingbi e pensé ape so tongana e wara batême awe, e yü fini zo kue awe la na e bezoin ti sara mbeni ye ndali ni encore ape. Fini zo ayeke tongana mbeni “fini bongo” so e doit ti bata ni. Mbeni lege so e peut ti sara ni ayeke ti tene lâ na lâ e gi ti lë ambage nde nde ti lengo ti yingo ti Nzapa. Ngbanga ti nyen? Ngbanga ti so Jéhovah ayeke Nzapa so ayeke sara ye nga yingo ti lo ayeke ngangu so ayeke sara ye (Gen. 1:2). Tongaso, ambage kue ti lengo ti yingo adoit ti pusu e ti sara ye. Na tapande, disciple Jacques atene: “Mabe so ayeke na akusala pëpe akui awe.” (Jacq. 2:26). A peut ti tene nga tongaso na ndö ti ambage kue ti lengo ti yingo ti Nzapa. Na ngoi kue so e lë lengo ti yingo, e fa polele so yingo ti Nzapa ayeke aidé e.

17. Tongana e lë lengo ti yingo ape, a yeke nzoni e sara ye tongana nyen?

¹⁷ Na ambeni ngoi, même aChrétien so awara batême asara ngu mingi awe ayeke lë lengo ti yingo ape. Me kota ye ni ayeke ti découragé ape. Bâ tapande so. Tongana mbeni bongo ti mo so mo ye ni mingi asuru, eskê mo yeke bi ni? Ên-ën. Peut-être mo yeke fü ni nzoni tongana lege ayeke dä. Na pekoni, mo yeke sara ye na ni na hange mingi. Legeoko nga, tongana na mbeni ngoi mo sara nzoni na zo ape, mo kanga bê ape wala mo sara ye na ndoye na mbeni zo ape, découragé ape. Hunda pardon na zo ni na bê ti mo kue tongaso si mo peut ti ngbâ ti duti na nzoni songo na lo. Leke na bê ti mo ti sara ye nzoni mingi na zo ni ti peko.

18. Nyen la e peut ti duti sûr na ni?

¹⁸ E kiri singila mingi na Jésus ndali ti tapande so lo zia na e. Tongana e pensé mingi tongana Jésus, a yeke duti ngangu na e ape ti sara ye tongana lo. Tongana e sara ye mingi tongana lo, e yeke yü fini zo nzoni mingi. Na yâ ti article so, e bâ gï ambage osio ti lengo ti yingo ti Nzapa. A yeke duti nzoni tongana mo mû ngoi ti manda ye na ndö ti tanga ti ambage ni nga ti gbu li ti mo ti bâ tongana nyen la mo yeke fa ni nzoni na yâ ti asarango ye ti mo. Mo yeke wara gbâ ti a-article na ndö ti tënë so na yâ ti Mbeti ti sarango na recherche ndali ti aTémoin ti Jéhovah na gbe ti li ti tënë “Gigi ti Chrétien” nga na pekoni “Lengo ti yingo.” Mo peut ti duti sûr so tongana mo sara part ti mo Jéhovah ayeke aidé mo ti yü fini zo nga ti zia angbâ na terê ti mo.