1-2. Tongana ade mo duti nduru ti wara batême ape ngbanga ti nyen la a yeke nzoni mo découragé ape? (Bâ foto ti couverture ni.)

 TONGANA mo ye ti wara batême, a yeke mbeni pendere ye la mo zia na gbele mo so. Mo yeke nduru awe ti wara batême? Tongana mo bâ so mo yeke nduru ti wara ni nga a-ancien ayeda, sara mbeto ape ti wara ni na ngoi ti kota bungbi ti peko. Tongana mo sara ni, anzoni ye ti sara na yâ ti kua ti Jéhovah ayeke ku mo.

² Me eskê mbeni zo atene na mo awe so mo bezoin ti sara ambeni changement encore kozo ti wara batême? Wala mo wani la mo bâ ni tongaso? Tongana a yeke tongaso, découragé ape. Mo peut ti gue na li ni na mo si na kpengba ye so, so mo zia na gbele mo so, atâa mo yeke maseka wala ngu ti mo ague na li ni awe.

3. Hunda wa la mbeni kota zo ti Éthiopie ahunda lani? A sara si hunda wa la alondo? (Kusala 8:36, 38).

³ Diko Kusala 8:36, 38. Mbeni kota zo ti Éthiopie ahunda lani Philippe so ayeke wafango nzoni tënë, atene: “Nyen la akanga lege na mbi ti wara batême?” Zo ti Éthiopie so aye lani ti wara batême, me eskê lo yeke lani biani nduru ti wara ni?

4. Tongana nyen la zo ti Éthiopie so afa so lo leke na bê ti lo ti ngbâ ti manda ye?

⁴ Zo ti Éthiopie so ‘ague lani na Jérusalem ti voro Nzapa.’ (Kus. 8:27). Amanke lo yeke voro lani Nzapa ti aJuif. Kite ayeke dä pëpe so lo manda ye lani na ndö ti Jéhovah na yâ ti Mbeti ti Nzapa so a sû ândö na Hébreu. Me, lo ye mingi ti  manda ambeni ye encore. Nyen la kota zo so ayeke sara na ngoi so Philippe awara lo na ndö ti lege? Lo yeke diko lani mbeni rouleau ti mbeti ti prophète Esaïe (Kus. 8:28). So ayeke lani kpengba kobe ti yingo. Kota zo so amanda lani ambeni kota fango ye ti Bible, me lo ye ti ngbâ ti manda ye.

5. Nyen la zo ti Éthiopie so asara na aye so lo manda?

⁵ Koli so ayeke lani mbeni kota zo so ayeke sara kua na gbe ti Candace, Gbia-wali ti Éthiopie; “Lo yeke na ndö ti amosoro kue ti gbia-wali ni.” (Kus. 8:27). Tongaso, lo doit lani ti duti na gbâ ti akua ti sara. Me, lo mû ngoi ti voro Jéhovah. Lo manda tâ tënë nga lo sara ye alingbi na aye so lo manda. Tongaso, lo londo na Éthiopie lo gue juska na temple na Jérusalem ti voro Jéhovah. Voyage so adoit lani ti mû ngoi mingi nga ahunda nginza, me koli so aye ti voro Jéhovah atâa nyen la lo doit ti sara.

6-7. Tongana nyen la zo ti Éthiopie so angbâ ti ye Jéhovah mingi?

⁶ Philippe afa na zo ti Éthiopie so ambeni kpengba tâ tënë, na tapande lo fa na lo so Jésus la ayeke Messie (Kus. 8:34, 35). Kota zo so ayeke sara kua na yangbo ti gbia so ayeke lani na ngia ti hinga ye so Jésus asara ndali ti lo. Nyen la lo sara na peko ti so lo manda aye so? Lo peut lani ti ngbâ gï zo so ayeke voro Nzapa ti aJuif so azo ane lo. Me, lo ye Jéhovah nga na Molenge ti lo mingi. Bê ti lo apusu lani lo ti mû kota desizion ti wara batême ti ga mbeni disciple ti Jésus Christ. So Philippe abâ so koli ni ayeke lani nduru ti wara batême, lo batize lo.

⁷ Tongana mo mû tapande ti zo ti Éthiopie so, mo peut ti leke terê ti mo ti wara batême. Mo nga kue mo peut ti tene na bê ti mo kue mo tene:“Nyen la akanga lege na mbi ti wara batême?” Zia e bâ tongana nyen la mo peut ti sara a-oko ye so zo ti Éthiopie so asara lani: Lo ngbâ ti manda ye, lo sara ye alingbi na aye so lo manda nga lo ngbâ ti ye Nzapa mingi.

8. Jean 17:3 atene mo doit ti sara nyen?

⁸ Diko Jean 17:3. Eskê atënë ti Jésus so a-aidé mo ti mû desizion ti manda Bible? Ti mingi ti e ayeke tongaso. Me eskê a-oko tënë so ahunda nga na e ti ngbâ ti manda ye? EN. E yeke zia lâ oko ape “ti gi ti hinga. . . oko tâ Nzapa”. (Zo-ti. 3:11). E yeke ngbâ ti manda ye teti lakue lakue. Tongana e manda ye mingi, e yeke ga nduru mingi na Jéhovah.—Ps. 73:28.

9. Na peko ti so e hinga akota fango ye ti Bible nyen la e doit ti sara?

⁹ Na ngoi so e komanse ti manda ye na ndö  ti Jéhovah, e manda gï akota fango ye ti Bible. Na yâ ti lettre so bazengele Paul atokua na aHébreu, lo tene so akota fango ye ti Bible ayeke “akozo tënë”. Lo tene lani ape so “akozo fango ye” ayeke kota ye ape. Me, lo fa so a yeke tongana lait so a yeke bata na mbeni bébé (aHéb. 5:12; 6:1). Lo wa nga aChrétien kue ti ngbâ gï na ndö ti akota fango ye ti Bible ape me ti manda atâ tënë ti Bible so nda ni alï mingi. Eskê mo yeke na nzara ti hinga afango ye ti Bible so nda ni alï mingi? Eskê mo ye ti ngbâ ti gue na li ni, ti manda ye na ndö ti Jéhovah nga na aye so lo leke na bê ti lo ti sara?

10. Ngbanga ti nyen la apeut ti duti ngangu na ambeni zo ti manda ye?

¹⁰ Me, a yeke ngangu na mingi ti e ti manda ye. Mo bâ mandango ye tongana nyen? Na ekole, eskê mo yeke gi ti diko ye nga ti manda ye nzoni? Eskê anzere na mo ti manda ye nga mo bâ so ma bâ nzoni mingi dä? Wala mo bâ so mo hinga nzoni ape ti manda ye na lege ti abuku? Tongana a yeke tongaso mo oko la mo bâ tongaso ape. Me Jéhovah apeut ti aidé mo. Lo yeke mbilimbili-kue nga lo yeke nzoni Wafango ye ahon atanga ni kue.

11. Tongana nyen la Jéhovah afa so lo yeke “Kota maître”?

¹¹ Jéhovah atene lo yeke “Kota maître ti [mo]”. (És. 30:20, 21). Lo yeke Maître so akanga bê, asara ye na nzoni bê nga acomprendre zo. Lo yeke bâ anzoni ye so a-élève ti lo asara (Ps. 130:3). Lo hunda lâ oko na e ape ti sara ye so ahon ngangu ti e. Girisa ape so fason so lo sara na cerveau ti mo, so ayeke mbeni cadeau, ayeke pendere mingi (Ps. 139:14). A dü e dungo na nzara ti manda ye. Lo so acréé e aye ti tene e ngbâ lakue ti manda ye nga anzere na e. Tongaso, a yeke na lege ni ti “duti na kota nzara” ti hinga atâ tënë ti Bible laso (1 Pi. 2:2). Zia na gbele mo aye so mo peut ti si dä, diko Bible nga manda ni lakue (Jos. 1:8). Grâce na mungo maboko ti Jéhovah, mo yeke ye mingi ti diko ye nga ti manda ye na ndö ti lo.

12. Ngbanga ti nyen la a yeke na lege ti ndara ti manda ye na ndö ti gigi ti Jésus nga na kua ti fango tënë ti lo?

¹² Mû lakue ngoi ti gbu li na ndö ti fini ti Jésus nga na kua ti fango tënë ti lo. Ti sara na Jéhovah, a yeke kota ye ti mû tâ gï peko ti gere ti Jésus, mbilimbili na yâ ti angoi so ayeke ngangu so (1 Pi. 2:21). Jésus atene lani polele na adisciple ti lo so ala yeke wara akpale (Luc 14:27, 28). Me lo yeke lani na confiance so atâ disciple ti lo ayeke ngbâ be-ta-zo na Nzapa tongana ti so lo sara (Jean 16:33). Manda anzene nzene ye na ndö ti fini ti Jésus nga zia na gbele mo aye so mo peut ti sara ti mû tapande ti lo na yâ ti gigi ti mo lâ na lâ.

13. Nyen la a yeke nzoni mo ngbâ ti hunda ni na Jéhovah? Ngbanga ti nyen?

¹³ Gï ti wara hingango ye alingbi ape. Raison so mo bezoin hingango ye ayeke so apeut ti mû lege na mo ti manda ye mingi na ndö ti Jéhovah, ti ye lo nga ti mä na bê na lo (1 aCor. 8:1-3). So mo ngbâ ti manda ye, ngbâ ti hunda Jéhovah ti aidé mo ti duti na kpengba mabe (Luc 17:5). Na bê ti lo wani, lo yeke kiri ka tënë na mara ti asambela tongaso. Tâ mabe so hingango ye na ndö ti Nzapa ayeke na gunda ni ayeke mû maboko na mo ti gue na li ni.—Jacq. 2:26.

14. Tongana nyen la bazengele Pierre afa so a yeke kota ye ti sara ye alingbi na aye so e manda? (Bâ foto.)

¹⁴ Bazengele Pierre afa so a yeke kota ye mingi ti tene adisciple ti Christ angbâ ti sara  ye alingbi na aye so ala manda. Lo sara tënë ti mbaï ti Noé. Jéhovah atene lani na Noé so Lo yeke futi asioni zo ti ngoi ti lo na lege ti kota ngu. Gï ti hinga so mbeni kota ngu ayeke pika ande alingbi lani ape ti sö Noé nga na azo ti sewa ti lo. Bâ so Pierre asara tënë ti ngoi so aga kozo na Kota ngu ni na ngoi so “a yeke leke lani arche”. (1 Pi. 3:20). Biani, Noé na azo ti sewa ti lo asara lani ye alingbi na ye so Nzapa afa na ala na lege so ala leke mbeni arche, so ti tene mbeni kota bateau (aHéb. 11:7). Na pekoni, Pierre ahaka ye so Noé asara na batême, lo tene: “Batême, so ague oko na ye so, ayeke sö ala fadeso nga.” (1 Pi. 3:21). Tongaso, e peut ti haka aye so mo yeke sara fadeso ti leke terê ti mo ti wara batême na kua so Noé na azo ti sewa ti la asara ti leke arche ni. Nyen la mo peut ti sara ti leke terê ti mo ndali ti batême?

15. Tongana nyen la e yeke fa so e changé bê ti e biani?

¹⁵ Mbeni kozo ye so e doit ti sara ayeke ti fa so e changé bê ti e biani (Kus. 2:37, 38). Tâ changé bê ayeke pusu e ti sara changement. Eskê mo zia lege ti sarango aye so Jéhovah ake ni awe, na tapande lango-sioni, manga wala sioni yanga? (1 aCor. 6:9, 10; 2 aCor. 7:1; aÉph. 4:29). Tongana ade mo sara ni ape, ngbâ ti gi ti sara achangement. Hunda zo so ayeke manda Bible na mo wala a-ancien ti aidé mo nga ti fa lege na mo. Tongana mo de maseka nga mo ngbâ ti lango na gbe ti babâ na mama ti mo, ngbâ ti hunda ala ti aidé mo ti zia lege ti asioni sarango ye so apeut ti kanga lege na mo ti wara batême.

16. Tongana e ye ti voro Jéhovah lakue nyen la e doit ti sara?

¹⁶ A yeke nga kota ye ti sara aye so e yeke sara ka ti voro Nzapa. Na tapande, mo doit ti gue na abungbi nga ti mû mbage dä (aHéb. 10:24, 25). Tongana a yeda na mo awe ti gue ti fa tënë, sara kue ti sara ni lakue. Tongana mo fa tënë mingi, mo yeke ye ni mingi (2 Tim. 4:5). Tongana mo de maseka nga mo ngbâ ti lango na gbe ti babâ na mama ti mo hunda terê ti mo: ‘Eskê babâ na mama ti mbi abezoin ti dabe ti mbi na tënë ti guengo na abungbi wala fango tënë? Wala mbi yeke sara ka ni mbi wani?’ Tongana mo sara aye so mo wani, mo yeke fa so mo yeke na mabe, mo ye Jéhovah Nzapa nga mo kiri singila na  lo ndali ti aye so lo mû na mo. So ayeke “akusala so afa so [mo] voro Nzapa na bê ti [mo] kue”, so ti tene acadeau so mo yeke mû na Jéhovah (2 Pi. 3:11; aHéb. 13:15). Acadeau kue so e mû na Nzapa na bê ti e wani anzere na lo (Bâ 2 aCorinthien 9:7.) E yeke mû acadeau na Jéhovah ndali ti so tongana e mû na lo anzoni ye ti e, e yeke na ngia.

17-18. Kpengba sarango ye wa la ayeke aidé mo ti gue na li ni ti wara batême? A yeke aidé mo tongana nyen? (aProverbe 3:3-6).

¹⁷ Tongana mo ngbâ ti gue na li ni ti wara batême, mo yeke wara ande akpale. Ambeni zo apeut ti he mo ndali ti afini ye so mä na bê na ni; ala peut même ti kanga lege na mo wala ti sara aye ti ngangu na mo (2 Tim. 3:12). Peut-être mo yeke sara effort ti zia lege ti mbeni sioni sarango ye, me ngoi na ngoi mo peut ti kiri ti sara ni. Wala peut-être mo bâ so mo kanga bê gbä nga bê ti mo ason ndali ti so mo bâ so aye so mo zia na gbele mo ti si dä angbâ ayo. Nyen la ayeke aidé mo ti gbu ngangu? A yeke mbeni kpengba sarango ye: ndoye ndali ti Jéhovah.

¹⁸ Ndoye ti mo ndali ti Jéhovah ayeke mbeni pendere sarango ye so ayeke nzoni mingi ahon atanga ni. (Diko aProverbe 3:3-6.) Tongana mo ye Nzapa mingi apeut ti aidé mo ti gbu ngangu na yâ ti akpale. Fani mingi Bible asara tënë ti tâ ndoye ti Jéhovah na mbage ti awakua ti lo. Tâ ndoye aye ti tene so lo yeke dö awakua ti lo, lo zia ape wala lo yeke zia ti ye ala ape (Ps. 100:5). Nzapa asara mo na image ti lo (Gen. 1:26). Tongana nyen la mo peut ti duti na mara ti ndoye ti lo so?

19. Tongana nyen la mo peut ti kiri singila mingi na Jéhovah ndali ti aye kue so lo sara ndali ti mo? (aGalate 2:20).

¹⁹ Komanse na kiringo singila (1 aThes. 5:18). Lâ na lâ, hunda terê ti mo: ‘Tongana nyen la Jéhovah afa so lo ye mbi?’ Na pekoni, sara kue ti kiri singila na Jéhovah na yâ ti asambela ti mo na lege so mo fa ambilimbili ye so lo sara ndali ti mo. Hinga so Jéhovah asara anzoni ye ndali ti mo ndali ti so lo ye mo, gï tongana ti so bazengele Paul ahinga lani. (Diko aGalate 2:20.) Hunda terê ti mo: ‘Eskê mbi ye ti fa so mbi ye lo ndali ni?’ Ndoye ti mo ndali ti Jéhovah ayeke aidé mo ti ngbâ ti dö sese na atara nga ti gbu ngangu atâa mo wara akpale. A yeke pusu mo ti ngbâ ti voro Jéhovah lakue nga ti fa na Babâ ti mo so mo ye lo mingi.

20. Nyen la mo doit ti sara ti mû terê ti mo na Jéhovah ? Ngbanga ti nyen la a yeke kete desizion ape?

 ²⁰ Tongana ngoi ayeke hon, ndoye ti mo ndali ti Jéhovah ayeke pusu mo ti tene na lo mbeni sambela so ayeke nde. Mo yeke mû terê ti mo na Nzapa. Girisa ape so tongana mo mû terê ti mo na Nzapa, mo yeke na pendere beku so: Mo peut ti ga ye ti lo teti lakue lakue. Tongana mo mû terê ti mo na Jéhovah, mo mû zendo ti sara na lo na yâ ti angoi so ayeke nzoni nga na yâ ti angoi so ayeke sioni. Mo yeke mû zendo so gï fani oko awe. Ti vrai ni, tongana e mû terê ti e na Nzapa, e mû mbeni kota desizion. Me gbu li na ndö ti ye so: Mo yeke mû ande gbâ ti adesizion na yâ ti gigi ti mo, ambeni ayeke nzoni mingi, me mbeni desizion so ayeke nzoni ahon desizion so mo mû ti mû terê ti mo na Jéhovah ayeke dä ape (Ps. 50:14). Satan ayeke gi ti sara si mo ye Babâ ti mo mingi ape, lo pensé so mo yeke ngbâ be-ta-zo na lo ape. Zia lâ oko ape si lo sö benda (Job 27:5). Tongana mo ye Jéhovah mingi ayeke aidé mo ti ngbâ ti sara na lo lakue nga ti ga nduru mingi na Babâ ti mo ti yayu.

21. Ngbanga ti nyen la e peut ti tene so batême ayeke kongo nda ti ye ape me tongo nda ti ye?

²¹ Na peko ti so mo mû terê ti mo na Jéhovah awe sara tënë na a-ancien ti congrégation ti mo na ndö ti kpengba ye so, so mo ye ti sara na pekoni. Me, girisa lâ oko ape so, batême ayeke kongo nda ti ye ape me tongo nda ti ye. A yeke tongo nda ti kua so mo yeke sara na Jéhovah lakue lakue. Tongaso gi ti ye Jéhovah mingi laso. Zia na gbele mo aye ti si dä, tongaso si lâ oko oko mo peut ti ye lo mingi. Sarango tongaso ayeke pusu mo ti wara batême. A yeke duti ande mbeni pendere lango. Me so ayeke gï tongo nda ni la. Zia si mo ngbâ ti ye Jéhovah mingi nga na Molenge ti lo teti lakue lakue!