1-2. Mingi ni, nyen la ayeke passé na ngoi so azo ayeke wara batême? Nyen la ayeke nzoni mo gbu li na ndö ni?

 ESKÊ mo bâ awe mbeni groupe ti azo so aye ti wara batême? Na ngoi so ala yeke kiri tënë na ahunda use so a hunda na ala kozo ti wara batême, mo yeke bâ so ala yeda na bê ti ala kue. Mo yeke bâ so afami ti ala nga na akamarade ti ala ayeke na ngia ndali ti ala. Tongana ala sigi na yâ ti ngu ni, a yeke pika maboko n nga mo yeke bâ so lê ti ala ayeke na ngia. Yenga oko oko, azo saki mingi ayeke mû terê ti ala na Jéhovah Nzapa nga ala yeke wara batême.

² Ka mo? Tongana mo yeke pensé ti wara batême mo yeke mbeni zo so ayeke nde mingi so “ayeke gi Jéhovah” na yâ ti sioni dunia so (Ps. 14:1, 2). A leke article so ndali ti mo atâa mo yeke maseka wala ngu ti mo ague na li ni awe. Me azo so awara batême awe aye nga ti leke na bê ti ala ti ngbâ ti sara na Jéhovah lakue lakue. Tongaso, zia e bâ araison ota na popo ti gbâ ti araison so e yeke na ni ti sara na Jéhovah.

3. Ngbanga ti nyen la awakua ti Jéhovah andoye tâ tënë nga na ye so ayeke na lege ni? (Ps. 119:128, 163).

³ Jéhovah ahunda na awakua ti lo ti “ndoye tâ tënë”. (Zach. 8:19). Jésus awa lani adisciple ti lo ti tomba peko ti mbilimbili (Mat. 5:6). So aye ti tene zo oko oko adoit ti duti na kota nzara ti sara ye so ayeke na lege ni so ayeke nzoni nga so ayeke sioni ape na lê ti Nzapa. Eskê mo ndoye tâ tënë nga na ye ayeke na lege ni? E yeke sûr so mo ndoye ni. Mo ke amvene nga na aye kue so ayeke na lege ni ape nga so ayeke sioni. (Diko Ps. 119:128, 163.) Zo so atene mvene ayeke sara ye tongana Satan so ayeke mokonzi ti dunia so (Jean 8:44; 12:31). Mbeni  ye so Satan aleke ti sara ayeke ti buba iri ti Jéhovah Nzapa so ayeke nzoni-kue. Satan ayeke tene amvene na ndö ti Nzapa ngbene ye na ngoi so a sara kpengbango li na Nzapa na Éden. Lo gi ti sara si azo apensé so Jéhovah ayeke Mokonzi so ayeke zo ti kion nga so ayeke sara ye na lege ni ape so agbanzi nzoni ye na azo (Gen. 3:1, 4, 5). Amvene so Satan atene angbâ ti sara si azo aduti na sioni bango ndo na ndö ti Jéhovah. Tongana azo asoro ti “ndoye tâ tënë” ape, Satan apeut ti gue na ala ti sara aye kue so ayeke na lege ni ape nga so ayeke sioni.—aRom. 1:25-31.

4. Tongana nyen la Jéhovah afa so lo yeke “Nzapa ti tâ tënë”? (Bâ nga foto.)

⁴ Jéhovah ayeke “Nzapa ti tâ tënë”, nga na nzoni bê lo fa tâ tënë na azo so aye lo (Ps. 31:5). So lo sara tongaso lo aidé ala ti tene amvene ti Satan ahanda ala ape. Jéhovah afa nga na awakua ti lo ti sara ye na lege ni. A aidé ala ti ne terê ti ala nga ti duti na siriri ti bê (aProv. 13:5, 6). Eskê lo sara tongaso na mo awe na ngoi so mo yeke manda Bible? Mo manda so alege ti Jéhovah ayeke nzoni ndali ti azo kue nga ndali ti mo (Ps. 77:13). Ni la mo ye ti sara ye so Nzapa atene ayeke na lege ni (Mat. 6:33). Mo ye ti sara si azo ahinga tâ tënë nga mo ye ti fa so atënë so Satan atene na ndö ti Jéhovah Nzapa ti e ayeke mvene. Mo peut ti sara ni tongana nyen?

5. Tongana nyen la mo peut ti sara si azo ahinga tâ tënë nga na ye so ayeke na lege ni?

⁵ Mo peut ti vivre na mbeni fason so afa polele na azo kue so mo ke amvene ti Satan nga mo mû mbage ti tâ tënë. Mo peut ti fa so mo ye ti tene Jéhovah la akomande mo nga so mo ye ti sara ye so lo tene ayeke na lege ni. Mo peut ti sara ni tongana nyen? Ga nduru na Jéhovah na lege ti sambela nga mû terê ti mo na lo na pekoni fa ni na lê ti azo na lege so mo wara batême. Yengo so zo aye na tâ tënë nga na ye so ayeke na lege ni ayeke kota ye so ayeke pusu lo ti soro ti wara batême.

6. Araison wa la Psaume 45:4 afa na mo ti ndoye Jésus Christ?

⁶ Mo ndoye Jésus Christ ngbanga ti nyen? Ambeni nzoni raison ti ndoye lo ayeke na Psaume 45:4. (Diko ni.) Jésus andoye tâ tënë, lo sara terê ti lo kete nga lo ndoye mbilimbili. Tongana mo ndoye tâ tënë nga na mbilimbili a yeke na lege ni so mo yeke ndoye Jésus Christ nga. Gbu li na ndö ti fason so Jésus agbu koko ti tâ tënë nga na ye so ayeke na lege  ni sân mbeto (Jean 18:37). Me tongana nyen la Jésus afa so lo sara terê ti lo kete?

7. So Jésus asara terê ti lo kete nyen la anzere na mo dä?

⁷ Jésus afa so lo sara terê ti lo kete na lege ti sarango ye ti lo. Na tapande, lo sara si azo amû gloire na Babâ ti lo ndali ti aye kue so lo sara me na lo wani ape (Marc 10:17, 18; Jean 5:19). So Jésus asara terê ti lo kete asara mo tongana nyen? Kite ayeke dä ape so a pusu mo ti ye Molenge ti Nzapa nga ti ga disciple ti lo. Ngbanga ti nyen la Jésus asara terê ti lo kete? Ngbanga ti so lo ye Babâ ti lo so asara terê ti lo kete nga lo mû tapande ti lo (Ps. 18:35; aHéb. 1:3). So Jésus amû tâ gï tapande ti apendere sarango ye ti Jéhovah asara si mo ga nduru mingi na lo.

8. Ngbanga ti nyen la e yeke na ngia so Jésus ayeke Gbia ti e?

⁸ E yeke na ngia so Jésus ayeke Gbia ti e ndali ti so lo yeke nzoni Gbia ahon atanga ni kue. Jéhovah wani afa ye na Molenge ti lo nga lo zia lo ti komande (És. 50:4, 5). Gbu nga li na ndö ti ndoye so agi ye gï ndali ti nzoni ti lo wani ape so Jésus afa ni (Jean 13:1). So Jésus ayeke Gbia ti mo, lo lingbi ti tene mo ndoye lo. Lo fa so azo so aye lo biani, so ti tene, azo so lo iri ala akamarade ti lo afa so ala ndoye lo na lege so ala sara ye alingbi na acommandement ti lo (Jean 14:15; 15:14, 15). A yeke mbeni kota pasa ti duti kamarade ti Molenge ti Jéhovah.

9. Tongana nyen la batême ti aChrétien ayeke tongana ti Christ?

⁹ Mbeni commandement ti Jésus ayeke ti tene adisciple ti lo awara batême (Mat. 28:19, 20). Lo wani lo zia tapande ni. Na yâ ti ambeni ye, batême ti lo ayeke nde na ti adisciple ti lo. (Bâ encadré “ Aye so asara si batême ti Jésus ayeke nde na ti adisciple ti lo.”) Me na yâ ti ambeni ye, a yeke oko. Na ngoi so Jésus awara batême, lo mû terê ti lo ti sara ye so Babâ ti lo aye (aHéb. 10:7). Adisciple ti Christ ayeke wara batême ti fa so ala mû terê ti ala na Jéhovah Nzapa awe. Na pekoni, ye so ayeke kota ye mingi na yâ ti gigi ti ala ayeke ti sara ye so bê ti Nzapa aye, me so bê ti ala wani aye ape. Tongaso ala yeke mû tapande ti Maître ti ala.

10. Araison wa la mo yeke na ni ti ndoye Jésus? A yeke nzoni ndoye so apusu mo ti sara nyen?

¹⁰ Mo mä na bê so Jésus ayeke oko Molenge ti Jéhovah nga mo yeke na ngia so lo yeke Gbia so Nzapa azia lo ti komande e. Mo hinga so Jésus asara terê ti lo kete nga lo sara ye tâ gï tongana Babâ ti lo. Mo manda so Jésus amû lani kobe na azo so nzara asara ala, lo dë bê ti ala so adécouragé nga lo sava même azo so terê ti ala ason (Mat. 14:14-21). Mo bâ tongana nyen la lo yeke fa lege na congrégation laso (Mat. 23:10). Mo hinga so, so lo yeke Gbia ti Royaume ti Nzapa, lo yeke sara ande apendere ye ndali ti e na yâ ti angoi so ayeke ga. Tongana nyen la mo peut ti fa so mo ndoye lo? Mo peut ti sara ni tongana mo mû tapande ti lo (Jean 14:21). Mbeni kozo ye so mo peut ti sara ti mû tapande ti lo ayeke ti mû terê ti mo na Jéhovah nga ti wara batême.

11. Raison so ayeke kota mingi so ndali ni zo adoit ti wara batême ayeke so wa? Ngbanga ti nyen la a yeke kota mingi?

¹¹ Raison so ayeke kota mingi so ndali ni zo adoit ti wara batême ayeke so wa? Jésus afa commandement ti Nzapa so ayeke kota ahon atanga ni kue, lo tene: “Mo doit ti ndoye Jéhovah Nzapa ti mo na bê ti mo kue, na âme ti mo kue, na bibe ti mo kue nga na ngangu ti mo kue.” (Marc 12:30). Eskê atënë so afa tongana nyen la mo ndoye Nzapa mingi?

12. Mo ndoye Jéhovah ngbanga ti nyen? (Bâ nga foto.)

¹² Araison ti ndoye Jéhovah ayeke mingi. Na tapande, mo comprendre so lo “la [lo] mû fini  na aye kue” nga “nzoni matabisi kue nga na matabisi kue so ayeke mbilimbili-kue” alondo na lo (Ps. 36:9; Jacq. 1:17). Anzoni ye kue so mo yeke na ni alondo na Nzapa ti e ti ndoye so amû ye mingi na zo.

13. Nyen la asara si ye so a futa ti zi azo ayeke mbeni cadeau so ayeke pendere mingi?

¹³ Ye so a futa ti zi azo ayeke mbeni pendere cadeau so Jéhovah amû na e. E tene tongaso ngbanga ti nyen? Gbu li na ndö ti kpengba songo so ayeke na popo ti Jéhovah na Molenge ti lo. Jésus atene: “Babâ andoye mbi” nga “mbi ndoye Babâ”. (Jean 10:17; 14:31). So ala sara ngu milliard mingi na terê ti mba asara si songo ti ala akpengba mingi (aProv. 8:22, 23, 30). Gbu li na bâ tongana nyen la a sara Nzapa vundu mingi ti zia Molenge ti lo abâ pasi nga akui. Jéhovah aye azo na mo nga kue mingi ni la lo yeda ti mû Molenge ti lo so lo ye lo mingi na sandaga ti mû lege na mo nga na azo ti ngbâ na fini lakue lakue (Jean 3:16; aGal. 2:20). So ayeke kota raison so ndali ni e doit ti ye Nzapa.

14. Nyen la ayeke nzoni ahon atanga ni kue so mo peut ti zia na gbele mo ti sara na yâ gigi ti mo?

¹⁴ So mo manda ye mingi na ndö ti Jéhovah asara si mo ye lo mingi. Kite ayeke dä ape so mo ye ti ga nduru mingi na lo laso nga teti lakue lakue. Mo peut ti sara ni. Na nzoni bê, lo wa e ti zia ngia na bê ti lo (aProv. 23:15, 16). Mo peut ti sara ni na lege ti atënë ti yanga ti mo nga na asarango ye ti mo. Fason so mo  yeke vivre na ni la ayeke fa so mo ye biani Jéhovah (1 Jean 5:3). So ayeke ye so ayeke nzoni mingi so mo peut ti soro ti sara na yâ ti gigi ti mo.

15. Tongana nyen la mo peut ti fa so mo ndoye Jéhovah?

¹⁵ Tongana nyen la mo peut ti fa so mo ndoye Jéhovah? Kozoni, mo yeke sara mbeni sambela so ayeke nde so na yâ ni mo fa so mo mû terê ti mo na oko tâ Nzapa (Ps. 40:8). Na pekoni, mo yeke fa ni na lê ti azo kue na lege so mo wara batême. Tongana ti so e bâ fade na yâ ti article so, lango ti batême ti mo ayeke mbeni lango ti ngia nga mbeni lango so ayeke kota mingi na yâ ti gigi ti mo. Mo komanse ti vivre ndali ti mo wani ape me ndali ti Jéhovah (aRom. 14:8; 1 Pi. 4:1, 2). Na bango ni a yeke mbeni kota desizion so mû doit ti mû. Me a yeke mû lege na mo ti duti na mbeni fini so ayeke pendere mingi. Na lege wa?

16. Tongana ti so Psaume 41:12 afa, tongana nyen la Jéhovah ayeke sara tufa na ndö ti azo so amû fini ti ala ti sara na lo?

¹⁶ Jéhovah ayeke Zo so amû ye mingi na zo. Atâa nyen la mo mû na lo, lakue aye so lo yeke mû na mo ayeke mingi (Marc 10:29, 30). Lo yeke sara si gigi anzere na mo, lo yeke futa mo nga lo yeke aidé mo ti sara ye so mo leke na bê ti mo ti sara même laso na yâ ti sioni dunia so. So ayeke gï tongo nda ni la. Fini gigi so mo komanse na lango ti batême ti mo adoit ti ngbâ ti gue. Mo peut ti ngbâ ti sara na Babâ ti mo so aye mo teti lakue lakue. Songo ti ndoye so ayeke na popo ti mo na Babâ ti mo ayeke ngbâ lakue ti kpengba na mo yeke duti biani na fini lakue lakue tongana lo.—Diko Psaume 41:12.

17. Nyen la mo peut ti mû na Jéhovah so lo yeke na ni ape?

¹⁷ Tongana mo mû terê ti mo na Nzapa nga mo wara batême, mo yeke na pasa ti mû na Babâ ti mo mbeni ye so ayeke ye ti ngangu ngere na lê ti lo. Lo mû na mo anzoni ye kue nga lo sara si mo yeke na ngia mingi ahon ti kozo. Ti part ti mo, mo peut ti mû na Lo so asara yayu na sese mbeni ye so lo yeke na ni ape, so ti tene, na bê ti mo wani mo sara na lo be-ta-zo (Job 1:8; 41:11; aProv. 27:11). So ayeke nzoni fason ti vivre ahon atanga ni kue.  Kite ayeke dä ape so yengo so mo ye na Jéhovah ayeke pusu mo ti wara batême.

18. Ahunda wa la mo peut ti hunda terê ti mo na ni?

¹⁸ Tongaso, mo yeke kiri tënë na hunda so tongana nyen: Mo yeke wara batême? Gï mo la mo peut ti kiri tënë na ni. Me mbeni ye so apeut ti aidé mo ayeke ti tene mo hunda terê ti mo, mo tene: ‘Ngbanga ti nyen la mbi yeke kiri na lango ti batême ti mbi na peko?’ (Kus. 8:36). Dabe ti mo na araison ota so e bâ fade. Kozo ni, mo ndoye tâ tënë nga na ye so ayeke na lege ni. Hunda terê ti mo: ‘Eskê mbi ye ti duti dä na ngoi so azo kue ayeke tene ande tâ tënë nga ayeke sara ye so ayeke na lege ni?’ Use ni, mo ndoye Jésus Christ. Hunda terê ti mo: ‘Eskê mbi ye ti tene Molenge ti Nzapa aduti Gbia ti mbi nga mbi ye ti mû tapande ti lo?’ Ota ni, so ayeke kota mingi ayeke so mo ndoye Jéhovah. Hunda terê ti mo: ‘Eskê mbi ye ti zia ngia na bê ti Jéhovah na lege so mbi sara na lo?’ Tongana mo kiri tënë en na ahunda so, ngbanga ti la mo wara batême ape? Ngbanga ti nyen la mo yeke ku?—Kus. 16:33.

19. Ngbanga ti nyen la a yeke nzoni mo sara mbeto ape ti wara batême? Mû mbeni tapande ti fa ni (Jean 4:34).

¹⁹ Tongana mbeto ti wara batême asara mo, gbu li na ndö ti mbeni tapande so Jésus amû lani. (Diko Jean 4:34.) Bâ so Jésus ahaka sarango ye so bê ti Babâ ti lo aye na kobe. Ngbanga ti nyen? Kobe ayeke ndali ti nzoni ti e. Jésus ahinga lani so ye kue so Jéhovah ahunda na e ti sara ayeke ndali ti nzoni ti e. Jéhovah aye pëpe ti tene e sara mbeni ye so ayeke sara sioni na e. Eskê Jéhovah aye ti tene mo wara batême? EN (Kus. 2:38). Tongaso, mo peut ti duti sûr so tongana mo sara ye alingbi na commandement so ahunda ti wara batême, mo yeke bâ nzoni dä. Tongana mbeto ti te kobe so ayeke nzoni mingi asara mo ape, ngbanga ti nyen la mo yeke sara mbeto ti wara batême?

20. Nyen la e yeke bâ na yâ ti article ti peko?

²⁰ Ngbanga ti nyen la ambeni zo ayeke kiri na lango ti batême ti ala na peko? Ala mingi apeut ti tene: “Ade mbi leke terê ti mbi ape.” Ti vrai ni, desizion ti mû terê ti mo na Jéhovah nga ti wara batême ayeke desizion so ayeke kota mingi so mo yeke mû ni. Tongaso, ti mû ni, mo doit ti gbu li ti mo nzoni, mo mû ngoi nga mo sara effort. Me tongana mo ye biani ti wara batême, nyen la mo peut ti sara laso ti leke terê ti mo ndali ni? E yeke kiri tënë na hunda so na yâ ti article ti peko.