1. Nyen la Jéhovah amû lege na e ti sara?

JÉHOVAH amû lege na e ti soro aye so e ye ti sara na yâ ti gigi ti e. Lo fa na e tongana nyen ti soro aye nzoni nga lo yeke mû maboko na e ti sara ye alingbi na adesizion so e mû so anzere na lo (Ps. 119:173). Tongana atënë ti ndara so ayeke na yâ ti Bible la afa lege na e, e yeke mû anzoni desizion mingi.—aHéb. 5:14.

2. Na peko ti so e mû mbeni desizion, kpale wa la e lingbi ti wara?

² Ye oko, même tongana e mû mbeni nzoni desizion, a lingbi ti duti ngangu na e ti hunzi ye so e mû desizion ti sara ni. Bâ ambeni tapande ni: Mbeni ita-koli so ayeke maseka amû desizion ti diko Bible ahunzi kue. Lo sara ni nzoni teti ambeni yenga, me na pekoni lo zia lege ni. Mbeni ita-wali amû desizion ti sara kua ti pionnier permanent me lo ngbâ ti pusu lango so lo ye ti komanse na ni na peko. Mbeni bungbi ti a-ancien amû desizion legeoko ti sara vizite mingi na aita ahon ti kozo ti kpengba ala, me anze mingi na pekoni ala sara ni ape. Aye so asi so ayeke nde nde, me mbeni ye ayeke na yâ ni so ague oko. Azo so amû adesizion me ala sara ye alingbi na ni ape. Akozo Chrétien so ayeke na Corinthe awara nga lani mara ti kpale so. Bâ aye so e lingbi ti manda na lege ti ala.

3. Desizion wa la aita ti Corinthe amû lani? Nyen la apassé?

³ Na ngu 55 tongaso, aita ti Corinthe amû mbeni kpengba desizion. Ala mä a tene aita ti ala na Jérusalem nga na Judée ayeke na yâ ti angangu kpale nga na yere nga ala mä so ambeni congrégation ayeke bungbi nginza ti mû maboko na ala. Nzoni bê nga nzara so ala yeke na ni ti mû ye mingi na azo apusu ala ti leke na bê ti ala ti tene ala nga amû maboko na aita so, ni la ala hunda bazengele Paul tongana nyen la ala lingbi ti sara ni. Lo tokua ndo na congrégation ti fa na ala aye so ala lingbi ti sara nga lo zia Tite ti mû maboko na ala ti bungbi nginza ni (1 aCor. 16:1; 2 aCor. 8:6). Me ambeni nze na pekoni, Paul amä so ade aita ti Corinthe asara ye  so ala mû desizion ti sara so ape. Ye so asara si na ngoi so a leke ti tokua nginza ni na Jérusalem, peut-être ade ala bungbi nginza ni kue ape ti tene a tokua ni legeoko na nginza so ambeni congrégation amû.—2 aCor. 9:4, 5.

4. Tongana ti so a fa na 2 aCorinthien 8:7, 10, 11, nyen la Paul awa lani aita ti Corinthe ti sara?

⁴ Aita ti Corinthe amû lani nzoni desizion, na Paul agonda ala ndali ti kpengba mabe ti ala nga nzara so ala yeke na ni ti mû ye mingi na azo. Me lo doit nga lani ti wa ala ti hunzi ye so ala komanse ti sara. (Diko 2 aCorinthien 8:7, 10, 11.) Ye so asi na ala afa na e so a lingbi ti duti ngangu même na aChrétien so ayeke be-ta-zo ti sara ye alingbi na mbeni nzoni desizion so ala mû.

5. Ahundango ndo wa la e yeke kiri tënë na ni?

⁵ Legeoko tongana ti aita ti Corinthe, a lingbi ti duti ngangu na e ti sara ye alingbi na adesizion so e mû. Ndali ti nyen? Ndali ti so e yeke mbilimbili-kue ape, e lingbi gï ti kiri na peko ye so e ye ti sara. Wala aye so zo aku terê ti lo na ni ape alingbi ti sara si e lingbi pëpe ti sara ye alingbi na desizion so e mû (Zo-ti. 9:11; aRom. 7:18). Aye wa la e lingbi ti sara kozo ti mû mbeni desizion wala ti kiri ti bâ yâ ti mbeni desizion so e mû ti bâ wala a lingbi e changé ni? Tongana nyen la e lingbi ti sara kue ti sara biani ye so e mû desizion ti sara?

6. Ngbanga ti nyen la peut-être e bezoin ti changé mbeni desizion so e mû?

⁶ Ambeni kpengba desizion ayeke dä so e yeke changé ni lâ oko ape. Na tapande, e yeke ngbâ na ndö ti desizion so e mû ti sara na Jéhovah, nga e leke na bê ti e ti ngbâ be-ta-zo na wali wala koli ti e (Mat. 16:24; 19:6). Me ambeni desizion ayeke dä so peut-être e bezoin ti changé ni. Ngbanga ti nyen? Ngbanga ti so aye alingbi ti changé. Aye wa la alingbi ti mû maboko na e ti mû adesizion so ayeke nzoni mingi?

7. Nyen la a lingbi e sambela ndali ni? Ngbanga ti nyen?

⁷ Sambela ti wara ndara. Na gbe ti yingo ti Jéhovah, Jacques atene: “Tongana ndara amanke mbeni zo na popo ti ala, zia lo ngbâ ti hunda ni na Nzapa, ngbanga ti so Nzapa ayeke mû ye mingi na azo kue.” (Jacq. 1:5) Na yâ ti ambeni ye, “ndara amanke” e. Tongaso, hunda Jéhovah ti mû maboko na mo na ngoi so mo yeke mû mbeni desizion nga na ngoi so mo doit ti changé mbeni desizion so mo mû. Tongana mo sara ni, Jéhovah ayeke mû maboko na mo ti mû anzoni desizion.

8. Recherche wa la a lingbi e sara kozo ti mû mbeni desizion?

⁸ Sara recherche nzoni. Gi ti hinga ye so Bible atene, diko ambeti so bungbi ti Jéhovah asigi na ni nga sara lisoro na azo so mo yeke na confiance na ala (aProv. 20:18). A yeke kota ye ti sara recherche kozo ti mû desizion ti changé kua ti mo, ti gue na mbeni ndo nde wala, na ngoi so mo ye ti sara mbeni formation, ti soro nzoni aye so mo ye ti manda ti mû maboko na mo ti wara aye so mo bezoin ni nga ti ngbâ ti sara kua ti Jéhovah.

9. Tongana e hinga vrai ye so apusu e ti mû mbeni desizion, a yeke mû maboko na e tongana nyen?

⁹ Bâ nzoni aye so apusu mo ti mû desizion. Aye so apusu e ti sara ye ayeke kota ye na lê ti Jéhovah (aProv. 16:2). Lo ye ti tene e sara ye mbilimbili na yâ ti aye kue. Tongaso, na ngoi so e yeke mû adesizion, a yeke nzoni e hinga vrai ye so apusu e ti mû desizion ni nga e sara ye ndali ti lê ti zo ape. Tongana e sara tongaso ape, a lingbi ti duti ngangu na e ti sara ye alingbi na desizion ti e. Na tapande, mbeni ita-koli so ayeke maseka alingbi ti mû desizion ti ga pionnier permanent. Ye oko, na peko ti ambeni ngoi, a yeke ngangu na lo ti wara angbonga so lo doit ti wara nga lo yeke na ngia mingi encore ape na fango tënë. Peut-être lo pensé so kozo ye so apusu lo ti sara kua ti pionnier ayeke nzara so lo yeke na ni ti zia ngia na bê ti Jéhovah. Me peut-être vrai ye so apusu lo ti sara ni ayeke so lo ye ti zia ngia na bê ti babâ na mama ti lo wala na bê ti mbeni zo nde.

10. Nyen la ayeke mû maboko na e ti sara achangement?

 ¹⁰ Gbu li na ndö ti mbeni zo so ayeke manda Bible so amû desizion ti zia nyongo manga. Yenga oko wala use lo nyon manga ape atâa so a yeke ngangu na lo. Na pekoni, lo kiri lo nyon manga. Me na nda ni, lo zia ti nyon manga biani biani. Yengo so lo ye na Jéhovah nga na nzara so lo yeke na ni ti zia ngia na bê ti lo amû maboko na lo ti zia nyongo manga.—aCol. 1:10; 3:23.

11. Ngbanga ti nyen la a lingbi mo hinga mbilimbili aye so mo ye ti sara?

¹¹ Hinga mbilimbili aye so mo ye ti sara. Tongana mo hinga mbilimbili aye so mo ye ti sara, a yeke duti ngangu na mo ape ti sara ni. Na tapande, peut-être mo mû desizion ti diko Bible mingi ahon ti kozo. Me tongana mo yeke na mbeni kapa ti sara ni ape, peut-être mo yeke sara ni ape. * Wala peut-être a-ancien ti mbeni congrégation amû desizion ti sara vizite na aita mingi ahon ti kozo ti kpengba ala, me ambeni ngoi na pekoni, ade ala sara ye alingbi na desizion ti ala ni ape. Ti tene ala sara ni, ala lingbi ti hunda terê ti ala na ahundango ndo so: “Aita wa la mbilimbili e lingbi ti sara vizite na ala ti kpengba ala? Eskê e leke mbeni mbilimbili ngoi ti sara vizite na ala awe?”

12. Nyen la e bezoin peut-être ti sara ni? Ngbanga ti nyen?

¹² Sara ye ahon ndö ni ape. Zo oko na popo ti e ayeke pëpe na ngoi, moyen wala ngangu ti sara aye kue so lo ye ti sara. Tongaso, sara ye ahon ndö ni ape. Tongana mo bâ so a lingbi mo sara ni, mo bezoin peut-être ti changé desizion so mo bâ so mo lingbi pëpe ti sara ye alingbi na ni (Zo-ti. 3:6). Peut-être mo kiri mo bâ yâ ti desizion ti mo, mo changé ni ndali ti so a yeke kota ye ti sara ni na mo bâ so mo lingbi ti sara ye alingbi na ni. Bâ aye oku so alingbi ti mû maboko na mo ti sara ye alingbi na desizion so mo mû.

13. Tongana nyen la mo lingbi ti wara ngangu so mo bezoin ni ti sara ye alingbi na desizion ti mo?

¹³ Sambela ti wara ngangu ti sara ye. Nzapa alingbi ti mû na mo “ngangu ti sara ye” alingbi na desizion ti mo (aPhil. 2:13). Tongaso, hunda Jéhovah ti mû na mo yingo vulu ti lo si mo wara ngangu so mo bezoin ni. Ngbâ ti sambela même tongana mo bâ so a kiri tënë na sambela ti mo hio ape. Tongana ti so Jésus atene: “Ala ngbâ ti hunda ye, na a yeke mû ni [yingo vulu] na ala.”—Luc 11:9, 13.

14. Tongana nyen la mama-ndia so ayeke na aProverbe 21:5 alingbi ti mû maboko na mo ti sara ye alingbi na desizion ti mo?

¹⁴ Leke mbeni kapa. (Diko aProverbe 21:5.) Ti tene mo hunzi mbeni kua so mo komanse ni awe, mo bezoin mbeni kapa. Na pekoni, a lingbi mo sara ye alingbi na ni. Legeoko nga, na ngoi so mo mû mbeni desizion, sû na mbeti aye so mo doit ti sara ti sara ye alingbi na desizion so mo mû. Tongana mo yeke na mbeni kota kua ti sara ni, kangbi yâ ni kete kete. Lakue tongana mo hunzi mbeni mbage ti kua ni, mo yeke hinga ti so mo sara awe. Paul awa lani aita ti Corinthe ti zia mbeni nginza nde “na kozo lango ti yenga oko oko” ahon ti ku ti gi ti bungbi nginza ni na ngoi so lo si kâ (1 aCor. 16:2). Ti kangbi yâ ti akota kua so mo yeke na ni kete kete alingbi ti sara si mo bâ pëpe so kua ni ahon ndö ti mo.

15. Tongana mo leke mbeni kapa, a lingbi ti mû maboko na mo ti sara nyen?

¹⁵ Tongana mo leke kapa ti mo nzoni si mo sû ni na mbeti, a lingbi ti mû maboko na mo ti sara ye alingbi na adesizion so mo mû (1 aCor. 14:40). Na tapande, a hunda na a-ancien ti fa mbeni ancien ti sû na mbeti adesizion oko oko kue so ala mû, nga ti fa a-ancien so ayeke sara ye alingbi na desizion ni nga na lango so ala doit ti sara ni. A-ancien so asara ye alingbi na fango lege so ayeke sara ye mingi alingbi na adesizion ti ala (1 aCor. 9:26). Mo lingbi ti gi ti sara  nga tongaso na aye so mo yeke sara lâ na lâ. Na tapande, mo lingbi ti sara molongo ti aye so mo ye ti sara lâ na lâ nga zia aye so mo ye ti sara ni kozo na li ni. Ye so alingbi ti mû maboko na mo ti hunzi aye so mo komanse ti sara awe nga ti sara gbâ ti aye na yâ ti kete ngoi.

16. Nyen la a lingbi mo sara ti sara ye alingbi na desizion so mo mû? Tongana nyen la aRomain 12:11 amû maboko na e ti hinga ye so a lingbi e sara?

¹⁶ Sara ngangu. Ti tene mo sara ye alingbi na kapa so mo leke nga mo hunzi ye so mo komanse ti sara awe, a lingbi mo sara ngangu. (Diko aRomain 12:11.) Paul awa Timothée ti ga mbeni zo so afa ye nzoni mingi; ti sara ye alingbi na wango so, a lingbi lo “ngbâ ti mû bê ti [lo] kue” dä nga ti “ngbâ gï dä”. E lingbi ti sara kua na wango ti Paul so na yâ ti akua kue so e ye ti sara na Jéhovah.—1 Tim. 4:13, 16.

17. Tongana nyen la e lingbi ti sara ye alingbi na aÉphésien 5:15, 16 na ngoi so e yeke sara ye so e mû desizion ti sara?

¹⁷ Sara kua na ngoi ti mo na ndara. (Diko aÉphésien 5:15, 16.) Soro mbeni ngoi ti sara na ye so mo mû desizion ti sara, na changé ni ape. Ku pëpe ti tene mo wara mbeni ngoi so aye kue atambela nzoni awe si mo sara ni. Peut-être mo yeke wara ni ape (Zo-ti. 11:4). Sara hange si aye so ayeke akota ye ape amû ngoi ti mo mingi nga asara si mo yeke pëpe na ngangu so mo bezoin ni ti sara na aye so ayeke akota ye mingi (aPhil. 1:10). Tongana lege ayeke dä, soro mbeni ngoi so peut-être mbeni ye alingbi ti kanga lege na mo ape ti sara ye so mo ye ti sara. Tene na azo so mo bezoin ngoi ti zia li ti mo na ndö ti ye so mo yeke sara. Peut-être a yeke nzoni ti kanga téléphone ti mo nga tongana mo hunzi kua ti mo awe si mo bâ amessage ti mo. *

18-19. Nyen la alingbi ti mû maboko na mo ti zia pëpe ti sara ye alingbi na mbeni nzoni desizion même tongana mo wara akpale?

¹⁸ Zia li ti mo na ndö ti anzoni ye ti peko ni. Legeoko tongana mbeni voyage so mo sara, so na nda ni mo si nzoni na ndo so mo ye ti gue dä, tongana mo sara ye alingbi na desizion ti mo, na nda ni mo yeke bâ anzoni ye ti peko ni. Tongana mo ye ti si na ndo so mo ye ti gue dä, mo yeke ngbâ ti gue même tongana a kanga lege ni na a lingbi mo mû mbeni lege nde. Legeoko nga, tongana e zia li ti e na ndö ti anzoni ye ti peko ti adesizion ti e, e yeke zia lege ni ape na ngoi so e wara akpale wala e doit ti changé lege so e leke ti sara ye alingbi na adesizion ti e.—aGal. 6:9.

¹⁹ A yeke ngangu ti mû anzoni desizion, nga ti sara ye alingbi na ni alingbi ti duti mbeni kpale. Me grâce na mungo maboko ti Jéhovah, mo lingbi ti wara ndara nga na ngangu so mo bezoin ni ti hunzi ye so mo komanse ti sara.