AITA mingi, so azia kodro ti ala ândö ague na akodro so mosoro ayeke dä mingi, akiri na kodro ti ala. So ala ye Jéhovah nga na amba ti ala apusu ala ti gue na ando so a bezoin awafango tënë ti Royaume dä mingi (Mat. 22:37-39). Asacrifice wa la ala sara? Atufa wa la ala wara? Ti hinga ni, zia e bâ ye so asi na Cameroun.

Na ngu 1998, mbeni ita-koli so iri ti lo ayeke Onésime aquitté Cameroun, kodro ti lo. Teti ngu 14, lo vivre na kodro-wande. Mbeni lâ, na ngoi ti mbeni bungbi, lo mä mbeni tapande so mbeni wamungo diskur amû na ndö ti fango tënë. Wamungo diskur ni atene: “Tongana akamarade use ayeke gi susu na ando nde nde si mbeni oko agbu gbâ ti asusu ahon mba ti lo, eskê mba ti lo ni ayeke gue na terê ti lo kâ ti gbu asusu na ndo so asusu ayeke mingi dä so ape?”

Tapande so asara si Onésime apensé ti kiri na Cameroun, ndo so azo mingi aye ti manda Bible, ti mû maboko na awafango tënë kâ. Me lo yeke gi bê ti lo. Eskê lo peut ti sara achangement so lo doit ti sara ti duti nzoni na yâ ti kodro ti lo na peko ti angu mingi so lo sara na kodro-wande? Ti bâ wala lo peut ti sara ni, Onésime akiri na Cameroun teti nze omene. Na pekoni, na ngu 2012, lo kiri kâ biani biani.

Onésime atene: “Mbi doit ti habitué na ndowa nga na fason so azo avivre na ni. Na Da ti Royaume, mbi doit ti habitué encore na dutingo na ndö ti abanc.” Lo he ngia kete, lo tene: “Me na ngoi so mbi zia li ti mbi mingi na ndö ti kapa ni, mbi komanse ti girisa na ndö ti apendere ye ti duti so ayeke na ndo so mbi yeke dä kozo.”

Na ngu 2013, Onésime asara mariage na Géraldine, so akiri na Cameroun na peko ti so lo sara ngu gumbaya na France. So couple so azia ye so Jéhovah aye kozo na yâ ti fini ti ala, atufa wa la ala wara? Onésime atene: “E gue na Ekole ti awafango nzoni tënë ti Royaume nga e yeke sara kua na Béthel. Na yâ ti ngu so ahon, a-étude 20 na yâ ti congrégation ti e awara batême. Mbi bâ so mbi yeke fadeso na vrai ndo ti ‘gingo azo.’” (Marc 1:17, 18). Géraldine atene: “Atufa so mbi wara ahon ti so mbi pensé na ni.”

Judith ague lani na États-Unis me lo ye ti sara aye mingi na yâ ti kua ti Jéhovah. Lo tene: “Lakue tongana mbi sara vizite na afami ti mbi na Cameroun na mbi ye ti kiri, mbi yeke toto ndali ti so mbi dö gbâ ti azo so mbi komanse ti manda Bible na ala mbi zia.” Ye oko, Judith asara mbeto ti kiri na Cameroun ndali ti so lo yeke sara lani mbeni kua so a futa lo dä nzoni so amû lege na lo ti bâ lege ti seni ti babâ ti lo na Cameroun.  Me so Judith azia bê ti lo na Jéhovah lo kiri na Cameroun. Lo tene so ambeni ye so asara si lo duti nzoni na États-Unis amanke lo. Lo sambela Jéhovah ti mû maboko na lo ti sara achangement so lo doit ti sara, nga wango so mbeni surveillant ti circonscription na wali ti lo amû na lo a-aidé lo.

Tongana Judith adabe ti lo na ye so asi, lo tene: “Na yâ ti ngu ota mbi yeke na ngia ti aidé azo osio, ala wara batême.” Judith akomanse lani ti sara kua ti pionnier spécial. Laso, lo na koli ti lo Sam-Castel ayeke na yâ ti kua ti circonscription. Me ka ti babâ ti Judith? Judith na azo ti sewa ti lo awara mbeni hôpital na kodro-wande so ayeda ti bâ lege ti opération ti babâ ni. Ye ti nzoni ni ayeke so opération ni atambela nzoni.

Mbeni ita-koli so iri ti lo ayeke Victor ague lani na Canada. Na peko ti so lo diko mbeni article ti Tour ti Ba Ndo so asara tënë na ndö ti mandango mbeti ayo, lo gbu li na ndö ti mandango mbeti ti lo. Lo zia lege ti mandango mbeti na dasendagi na lo sara mbeni nduru formation. Victor atene: “Formation so amû lege na mbi ti wara mbeni kua hio, nga ti sara kua ti pionnier so mbi ye mingi ti sara lani.” Na pekoni, Victor asara mariage na Caroline, na ala sara visite na Cameroun. Kâ, na ngoi so ala yeke sara visite ti Béthel, ambeni ita-koli awa ala ti gbu li ti ala na ndö ti lege so ala peut ti sara na Jéhovah na Cameroun. Victor atene: “E yeke na mbeni raison ti ke ape, nga ndali ti so e yeke na aye mingi na yâ ti fini ti e ape e lingbi ti yeda ti sara na Jéhovah na Cameroun.” Atâa so Caroline ayeke na ambeni kpale ti seni, ala mû desizion ti gue na Cameroun.

Victor na Caroline akomanse lani kua ti pionnier permanent ti mû maboko na azo kue so ala tingbi na ala so asara nzara ti tâ tënë. Teti ambeni ngoi ala vivre na nginza so ala bata lani. Na pekoni, ala sara kua teti ambeni nze na Canada, a mû lege na ala ti wara nginza so alingbi ti mû maboko na ala ti kiri na Cameroun na ti ngbâ ti sara kua ti pionnier. Anzoni ye wa la ala wara? Ala gue lani na Ekole ti awafango nzoni tënë ti Royaume, ala sara kua ti pionnier spécial, na fadeso ala yeke sara kua na construction. Victor atene: “So e zia ndo so e yeke lani dä nzoni, a mû lege na e ti bâ mungo maboko ti Jéhovah.”

Na ngu 2002, Alain, so ayeke manda mbeti na mbeni dasendagi na Allemagne, adiko tract Jeunes gens, qu’allez-vous faire de votre vie ? Aye so lo diko so apusu lo ti zia ambeni fini ye na gbele lo ti sara. Na ngu 2006, lo gue na Ekole ti formation ministérielle, na pekoni a tokua lo na Cameroun, kodro so a dü lo dä.

Na Cameroun, Alain awara mbeni kua so amû ngoi ti lo mingi ape. Na pekoni, lo wara mbeni kua so a futa lo nzoni, me lo gi bê ti lo so kua ni ayeke sara si lo yeke na ngoi mingi ape ti fa tënë. Tongaso, tongana a hunda lo ti ga pionnier spécial, hio lo yeda. Patron ti lo aye ti kono nginza so lo yeke futa lo na ni, me Alain ake ti changé desizion ti lo. Na pekoni, Alain asara mariage na Stéphanie, so avivre na France aninga. Akpale wa la lo wara na peko ti so lo gue na Cameroun?

Stéphanie atene: “Mbi wara akete kete kpale ti seni, me a soigné ni a kaï.” So couple ni agbu ngangu, ala wara aye ti nzoni. Alain atene: “Na ngoi so e gue ti fa tënë na Katé, mbeni kete  kodro so ayo, e wara azo so aye ti manda Bible. Na pekoni, e sara étude na ala na téléphone. Azo use awara batême, nga a zia na sese mbeni groupe ti awafango tënë.” Stéphanie akiri atene: “Mbeni ngia ti hon ngia so zo ayeke wara tongana lo mû maboko na azo ti mû terê ti ala na Jéhovah ayeke dä ape. Kua so e sara ge amû lege na e ti wara ngia so fani mingi.” Laso, Alain na Stéphanie ayeke sara kua ti circonscription.

Gisèle awara lani batême na ngoi so lo yeke manda mbeti na Italie ti ga docteur. Couple so ayeke apionnier so amanda lani Bible na lo ayeke na aye mingi ape na yâ ti fini ti ala, na a pika bê ti lo mingi, ni la lo ye ti fa tënë mingi. Tongaso, Gisèle amû kua ti pionnier na ngoi so lo yeke gue ti hunzi mandango mbeti ti lo.

Gisèle ayeke lani na nzara ti kiri na Cameroun ti sara kua ti Jéhovah mingi, me lo gi bê ti lo. Lo tene: “Mbi yeke lani na droit ti sara kodro na Italie, me mbi doit ti dö ni ti zia, nga a lingbi mbi zia afami nga na akamarade ti mbi so ayeke na Italie.” Atâa so kue, na mai ngu 2016, Gisèle akiri na Cameroun. Na pekoni, lo na Léonce asara mariage, na komite ti filiale ti Cameroun awa ala ti gue na Ayos, mbeni kete gbata so a bezoin awafango tënë ti Royaume dä mingi.

Gigi ti ala na Ayos ayeke lani tongana nyen? Gisèle atene: “Fani mingi, teti ambeni yenga, courant ayeke dä ape, na e peut ti chargé atéléphone ti e ape. Mingi ni atéléphone ti e akanga. Mbi manda ti tö kobe na keke ti wâ, nga e yeke mû abrouette na atorche e gue ti tö ngu na bï na ngoi so azo ayeke mingi ape.” Nyen la a-aidé ala ti gbu ngangu? Gisèle atene: “Yingo ti Jéhovah a-aidé e. Nga, mbi na koli ti mbi e aidé mba. Afami nga na akamarade ti e akpengba e nga na ambeni ngoi ala mû na e nginza.”

Eskê Gisèle ayeke na ngia so lo kiri na kodro ti lo? Lo tene: “En, mbi yeke na ngia mingi. Na tongo nda ni, mbi na koli ti mbi e wara akpale nga e découragé, me tongana e hon ndö ni awe, e bâ so e sara tâ gï ye so a lingbi e sara. E zia bê ti e na Jéhovah nga e bâ so e yeke nduru mingi na lo.” Léonce na Gisèle ague na Ekole ti awafango nzoni tënë ti Royaume, na ala yeke fadeso apionnier spécial temporaire.

Legeoko tongana azo ti gingo susu so asara ye na mbeto ape atâa akpale so ala wara, na bê ti ala wani, azo so akiri na kodro ti ala asara asacrifice ti mû maboko na azo so ayeda na tënë ti Royaume. Kite ayeke dä ape so Jéhovah ayeke dabe ti lo na awafango tënë so asara kua ngangu so, na lo yeke sara nzoni bê na ala ndali ti ndoye so ala fa ndali ti iri ti lo (Néh. 5:19; aHéb. 6:10). Tongana mo vivre na kodro-wande nga mo bâ so bezoin ti awafango tënë ti Royaume ayeke na kodro so a dü mo dä, eskê mo peut ti kiri kâ? Tongana mo sara ni, gbâ ti atufa ayeke ku mo.​—aProv. 10:22.