1. Ti gue oko na Matthieu 28:18-20, nyen la Jésus amû yanga na adisciple ti lo ti sara?

NA PEKO ti so a zingo Jésus na kuâ, lo si na adisciple ti lo so abungbi na Galilée. Lo yeke lani na mbeni kpengba tënë ti tene na ala. A yeke tënë wa? E wara tënë ni na Matthieu 28:18-20.—Diko ni.

2. Ahundango tënë wa la e yeke bâ ni?

² Commandement so Jésus amû ti sara si azo aga adisciple abâ nga awakua ti Nzapa kue laso. Tongaso, zia e bâ ahundango tënë ota so andu kua so Jésus amû lani na e. Kozo ni, na ndö ti fango na afini disciple ti sara aye so Nzapa ahunda, a lingbi e sara nyen? Use ni, tongana nyen la awafango tënë kue ti congrégation apeut ti mû maboko na azo so ayeke manda Bible ti gue na li ni? Ota ni, tongana nyen la e peut ti mû maboko na aita so afa tënë encore ape ti kiri ti mû mbage na kua ti sarango adisciple?

3. Tënë wa la asigi na yâ ti commandement so Jésus amû?

³ Aye so Jésus afa na e ti sara ayeke polele. E doit ti fa na azo aye so Jésus ahunda na e ti sara. Ye oko, a lingbi e girisa ape mbeni kpengba ye. Jésus atene pëpe: ‘Ala fa na ala aye kue so mbi mû yanga na ala ti sara.’ Me lo tene: Ala fa na ala “ti bata aye kue so mbi mû yanga na ala ti sara.” Ti sara ye alingbi na tënë so na ngoi so e yeke fa ye na mbeni étude, a  lingbi e duti wafango ye nga wafango lege (Kus. 8:31). Ngbanga ti nyen?

4. Ti bata mbeni commandement aye ti tene nyen? Fa ni na lege ti mbeni tapande.

⁴ Ti “bata” mbeni commandement aye ti tene ti sara ye alingbi na ni. Zia e bâ mbeni tapande ti fa tongana nyen la e lingbi ti fa na mbeni zo ti bata, wala ti sara ye alingbi na aye so Christ amû yanga na e ti sara. Tongana nyen la mbeni zo so ayeke fa kpengo na oto na mbeni zo ayeke fa na lo ti bata andia ti kpengo na oto? Peut-être kozoni lo yeke fa na lo andia ti kpengo na oto na yâ ti klase. Me ti fa na lo tongana nyen ti sara ye alingbi na andia so, lo yeke sara mbeni ye nde. Na ngoi so zo so ayeke manda kpengo na oto ayeke kpe na oto ni, zo so ayeke fa na lo ti kpe na oto ayeke duti na terê ti lo ti fa na lo tongana nyen la lo peut ti sara ye alingbi na aye so ala manda na klase. Tapande so afa na e nyen?

5. (a) Ti gue oko na Jean 14:15 nga na 1 Jean 2:3, nyen la a lingbi e fa na a-étude ti e ti sara? (b) Tongana nyen la e lingbi ti mû maboko na a-étude ti e ti sara ye alingbi na amama-ndia ti Bible?

⁵ Na ngoi so e yeke sara étude na azo, e yeke fa na ala aye so Nzapa ahunda na e ti sara. Me a ngbâ gï ge ape. A lingbi e fa na ala ti sara ye alingbi na ye so ala manda na yâ ti fini ti ala ti lâ oko oko. (Diko Jean 14:15; 1 Jean 2:3.) Na tapande, e lingbi ti fa na ala tongana nyen ti sara ye alingbi na amama-ndia ti Bible na ekole, na place ti kua wala na ngoi so ala yeke sara ngia. E lingbi ti fa na ala mbeni ye so asi na e ti fa na ala so tongana e sara ye alingbi na amama-ndia ti Bible, a yeke bata e wala a yeke mû maboko na e ti mû mbeni nzoni desizion. Na ngoi so e yeke na terê ti ala, e lingbi ti hunda Jéhovah na yâ ti sambela ti mû na ala yingo vulu ti fa lege na ala.—Jean 16:13.

6. Ti fa na azo ti bata acommandement ti Jésus andu nyen?

⁶ Ti fa na azo ti bata acommandement ti Jésus andu nyen? Mbeni ye ni ayeke ti mû maboko na a-étude ti e ti wara nzara ti sara adisciple. Peut-être ambeni étude ayeke na mbeto ti fa tënë. Tongaso, a lingbi e kanga bê na ngoi so e yeke gue na ala yeke yeke ti mä yâ ti Bible nzoni, tongaso si aye so ala manda andu bê ti ala nga apusu ala ti sara ye. Nyen la e peut ti sara ti mû maboko na a-étude ti e ti sara nzara ti fa nzoni tënë?

7. Tongana nyen la e lingbi ti mû maboko na mbeni étude ti e ti sara nzara ti fa nzoni tënë na azo?

⁷ E lingbi ti hunda na étude ti e ahunda so: “So mo sara ye alingbi na aye so Bible afa, tongana nyen la gigi ti mo aga nzoni ahon ti kozo? Mo pensé ambeni zo abezoin ti hinga aye so Bible afa? Nyen la mo lingbi ti sara ti mû maboko na ala?” (aProv. 3:27; Mat. 9:37, 38). Fa na étude ni atract so ayeke na yâ ti agbakuru ti e ti fango na ye nga zia lege na lo ti soro ati so apeut ti nzere na afami ti lo, akamarade ti lo nga na amba ti lo ti place ti kua. Mû na lo mbeni wungo ti atract ni. Fa na lo tongana nyen la na kode lo peut ti mû mbeni tract na zo. Me na peko ti so a yeda ti tene lo ga wafango tënë so ade ti wara batême ape, e na lo e yeke sigi ti tene e mû maboko na lo.—Zo-ti. 4:9, 10; Luc 6:40.

8. Ngbanga ti nyen la a yeke kota ye ti tene a-étude ti e aye Nzapa nga na amba ti ala mingi? (Bâ nga encadré “ Lege ti aidé a-étude ti e ti ye Nzapa mingi.”)

⁸ A lingbi e girisa ape so Jésus atene na e ti fa na azo ti “bata aye kue” so lo mû yanga na e ti sara. Kite ayeke dä ape so akota commandement use ayeke na popo ni; acommandement so ayeke ti ndoye Nzapa nga na amba  ti e, use kue ague oko na kua ti fango tënë nga na sarango adisciple (Mat. 22:37-39). A gue oko na ni tongana nyen? Mbeni kota ye so apusu e ti fa tënë ayeke ndoye so e yeke na ni ndali ti Nzapa nga na amba ti e. E hinga so mbeto ti fango tënë alingbi ti sara ambeni étude ti e. Me e lingbi ti dë bê ti ala so na mungo maboko ti Jéhovah, yeke yeke ala yeke hon ndö ti mbeto ti zo (Ps. 18:1-3; aProv. 29:25). Encadré so ayeke na yâ ti article so afa aye so e peut ti sara ti mû maboko na mbeni étude ti e ti ye Nzapa mingi. Nyen nga la congrégation apeut ti sara ti mû maboko na afini disciple ti ye azo mingi?

9. Na yâ ti tapande ti zo so ayeke manda ti kpe na oto, na alege wa la lo yeke manda akpengba ye?

⁹ Zia e kiri na ndö ti tapande ti zo so ayeke manda ti kpe na oto so. Na ngoi so lo yeke kpe na oto si zo so ayeke fa kpengo na oto ni ayeke na terê ti lo, na alege wa la lo yeke manda ye? A yeke na lege so lo yeke mä zo so ayeke fa ye na lo nga lo yeke bâ amba ti lo so ahinga ti kpe na oto nzoni. Na tapande, zo so ayeke fa ye na lo apeut ti fa na lo mbeni zo ti kpengo na oto so na nzoni bê azia lege na mbeni mba ti lo ti hon na devant ti lo. Wala lo peut ti fa na lo mbeni so ayeke za wa ti fa so lo ye ti viré na mbeni lege nde, na lo wa lo ti sara nga tongaso. Atapande so afa na zo ni ambeni kpengba ye ti sara na ngoi so lo yeke kpe na oto.

10. Nyen la ayeke mû maboko na mbeni étude ti gue na li ni?

¹⁰ Legeoko nga, mbeni étude so akomanse ti tambela na ndö ti lege so ague na fini ti lakue lakue ayeke manda ye na lege ti zo so asara étude na lo nga na lege ti anzoni tapande ti ambeni wakua ti Jéhovah. Tongaso, nyen la ayeke mû maboko mingi na mbeni étude ti gue na li ni? A yeke guengo na abungbi ti e. Ngbanga ti nyen? Ngbanga ti so aye so lo yeke mä na ngoi ti abungbi ayeke sara si lo hinga ye mingi, ayeke sara si mabe ti lo akpengba nga lo yeke ndoye Nzapa mingi (Kus. 15:30-32). Na ndö ni, na Da ti Royaume, zo so asara étude na lo apeut ti fa na lo ambeni ita so dutingo ti ala na ti lo ayeke oko. Aye wa la aita ayeke sara so afa so ala ndoye terê, so étude ni apeut ti bâ ni? Zia e bâ ambeni tapande.

11. Aye wa la mbeni étude apeut ti bâ na Da ti Royaume? Nyen la apeut ti sara na ndö ti lo?

¹¹ Mbeni étude so ayeke bata amolenge ti lo gï lo oko abâ mbeni ita-wali so dutingo ti lo na lo ayeke oko. Tongana lo bâ ngangu so ita-wali so ayeke sara ti tene lo na akete molenge ti lo aga na Da ti Royaume, a yeke ndu bê ti lo mingi. Mbeni étude so ayeke sara ngangu ti zia manga awara terê na mbeni ita so anyon lani manga si lo zia lege ni. Ita ni afa na étude ni so, so lo komanse lani ti ye Jéhovah mingi apusu lo ti sara ye alingbi na acommandement ti Nzapa (2 aCor. 7:1; aPhil. 4:13). Na peko ti so ita ni afa na étude ni tongana nyen la lo zia ti nyon manga, ita ni atene: “Mo kue mo peut ti zia manga.” Tënë so akpengba étude ni na lo bâ so lo peut ti zia ni. Mbeni maseka-wali so ayeke sara étude abâ mbeni ita-wali so ade maseka ayeke na ngia mingi ti duti Témoin ti Jéhovah. Bango ngia ti ita-wali ni asara si lo ye ti hinga ndani so ita-wali ni ayeke lakue na ngia.

12. Ngbanga ti nyen la e tene so ita oko oko kue na yâ ti congrégation alingbi ti sara mbeni ye ti aidé a-étude?

¹² Tongana mbeni étude ahinga aita nde nde so ayeke be-ta-zo, na lege ti tapande ti ala, lo yeke manda ti bata commandement ti Christ so ayeke ti ndoye Nzapa nga na amba  ti e (Jean 13:35; 1 Tim. 4:12). Nga tongana ti so e tene fade, mbeni étude apeut ti manda ye na mbage ti aita so ayeke na mara kpale ti lo. Atapande ti ala ayeke fa na lo so lo peut ti sara achangement so lo bezoin ti sara ti ga mbeni disciple ti Christ (Deut. 30:11). Ita oko oko kue ti congrégation apeut ti sara aye nde nde ti mû maboko na étude ni ti gue na li ni (Mat. 5:16). Aye wa la mo yeke sara ti kpengba mbeni étude so ayeke ga na abungbi?

13-14. Jésus asara lani ye tongana nyen na mbage ti abazengele ti lo so adécouragé?

¹³ E ye ti mû maboko na aita ti e so azia ti fa tënë ti kiri ti fa tënë na ti sara adisciple. Fason so Jésus asara ye na mbage ti abazengele ti lo so adécouragé afa na e ye so e peut ti sara laso.

¹⁴ Na ngoi so fango tënë ti Jésus na ndö ti sese ahunzi na lo ga nduru ti kui, abazengele ti lo “kue azia lo, ala kpe.” (Marc 14:50; Jean 16:32). Jésus asara lani ye tongana nyen na mbage ti abazengele ti lo so adécouragé so? Kete na peko ti so a zingo Jésus na kuâ, lo tene na ambeni disciple ti lo, lo tene: “Ala sara mbeto oko pëpe! Ala gue, ala sara tënë ni na aita ti mbi [ala tene so a zingo mbi awe].” (Mat. 28:10a). Jésus adö lani abazengele ti lo azia ape. Atâa so ala zia lo ala kpe lani, lo ngbâ ti iri ala “aita ti mbi”. Tongana ti Jéhovah, Jésus asara lani nzoni bê na ala nga lo pardonné ala.—2 aGbia 13:23.

15. Tënë ti bê ti e na ndö ti aita so azia ti fa tënë ayeke so wa?

¹⁵ Legeoko nga, e yeke pensé mingi na aita so azia ti fa tënë. Ala yeke aita ti e na e ye ala. E ngbâ ti dabe ti e na ngangu kua so ala sara na ndoye. Ambeni asara ni teti angu mingi (aHéb. 6:10). Ala manke tâ e mingi! (Luc 15:4-7). Tongana ti Jésus, na alege wa la e lingbi ti fa so e pensé na ala?

16. Tongana nyen la e lingbi ti fa so e bi bê na aita so azia ti fa tënë?

¹⁶ Na ngia, tisa ala na abungbi. Mbeni lege so Jésus akpengba abazengele ti lo so adécouragé ayeke so lo tisa ala na mbeni bungbi (Mat. 28:10b; 1 aCor. 15:6). Laso nga kue, e lingbi ti wa aita so azia ti fa tënë ti ga na abungbi tongana ala yeke ga ape. E hinga so peut-être a lingbi e tisa ala fani mingi kozoni si ala ga. Kite ayeke dä ape so a nzere na Jésus mingi so adisciple ti lo ayeda na tisango ndo ni.—Bâ Matthieu 28:16 nga na Luc 15:6.

17. A lingbi e sara ye tongana nyen tongana mbeni ita so azia ti fa tënë aga na bungbi?

¹⁷ Yamba ala na bê kue. Adisciple abâ lani so a nzere na Jésus so ala wara terê; lo komanse ti sara tënë na ala kozo (Mat. 28:18). E yeke sara ye tongana nyen tongana mbeni ita so azia ti fa tënë aga na Da ti Royaume? E doit ti gue na mbage ti lo ti yamba lo na ngia. Na tongo nda ni, peut-être e yeke gi bê ti e na tënë so e peut ti tene. Me sân ti zia kamene na lê ti lo, e lingbi ti tene na lo so a nzere na e ti bâ lo.

18. Tongana nyen la e peut ti dë bê ti aita so azia ti fa tënë?

¹⁸ Dë bê ti ala. Peut-être adisciple ti Jésus apensé lani so ala peut ti fa tënë na yâ ti dunia kue ape. Me Jésus adë bê ti ala tongana lo tene: “Mbi yeke na terê ti ala lango oko oko kue.” (Mat. 28:20). Eskê atënë ti lo so a-aidé ala? En. Kete na pekoni, ala mû terê ti ala kue ti “fa ye na ti fa nzoni tënë”. (Kus. 5:42). Aita so azia ti fa tënë nga kue a bezoin ti tene a dë bê ti ala. Peut-être ti kiri ti fa tënë asara ala  mbeto. E peut ti mû maboko na ala ti zia mbeto tongana e tene na ala so ala yeke fa tënë gï ala oko ape. Tongana ala ye ti fa tënë, e na ala e lingbi ti sigi. Kite ayeke dä ape so ala yeke kiri singila ndali ti so e mû maboko na ala ti kiri ti fa nzoni tënë. Tongana e fa na aita so azia ti fa tënë so e bâ ala tongana aita ti e, ala lingbi ti kiri ti fa tënë, na aita kue ti congrégation ayeke duti na ngia.

19. Nyen la e leke na bê ti e ti ngbâ ti sara? Ngbanga ti nyen la e ye ti sara ni?

¹⁹ Juska lawa la e yeke ngbâ ti sara si azo aga adisciple? Juska na lâ ni so aye ti ngoi so ayeke gue ti hunzi. (Mat. 28:20; bâ tënë “Aye ti ngoi so ayeke gue ti hunzi” na kete bakari.) Eskê e lingbi ti fa tënë na ti sara si azo aga adisciple juska na ngoi ni so? E leke na bê ti e ti ngbâ ti sara ni. Ni la, na ngia, e yeke mû ngoi ti e, ngangu ti e nga na nginza ti e ti gi ti wara azo so “ayeke nduru ti yeda na tënë ni ti wara fini ti lakue lakue”. (Kus. 13:48). Tongana e sara ni, andâ e mû tapande ti Jésus so atene: “Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.” (Jean 4:34; 17:4). Ye so e kue e ye la. E ye ti hunzi kua so a mû na e (Jean 20:21). Na e ye nga si e na amba ti e, so aita so azia ti fa tënë ayeke na popo ni, e gbu ngangu na yâ ti kua so.—Mat. 24:13.

20. Ti gue oko na aPhilippien 4:13, ngbanga ti nyen la e peut ti sara kua so Jésus ahunda na e ti sara?

²⁰ Ti tâ tënë ni, a yeke kete ye ape ti sara ye so Jésus ahunda na e ti sara. Me e yeke sara kua ni gï e oko ape. Jésus atene lani so lo yeke na terê ti e. Na ngoi so e yeke sara si azo aga adisciple, “e na Nzapa e sara kua oko” nga e sara kua “na terê ti Christ.” (1 aCor. 3:9; 2 aCor. 2:17). Tongaso, e peut ti sara ni. E yeke na pasa nga na ngia ti sara kua so nga ti mû maboko na ambeni zo ti sara ni!—Diko aPhilippien 4:13.