ARTICLE TI MANDANGO NI 45
Aye so Jéhovah asara ti aidé e ti fa tënë
“Ala yeke hinga biani so mbeni prophète ayeke lani na popo ti ala.”—ÉZÉCH. 2:5.
BIA 67 Gue mo “fa tënë ni”
AYE SO E YEKE BÂ NI a
1. Nyen la e peut ti ku terê ti e na ni? Nyen la e peut ti duti sûr na ni?
E PEUT ti ku ti tene azo ake ti mä atënë so e fa. Mara ti ye tongaso apeut ti gue na li ni mingi na yâ ti angoi so ayeke ga (Dan. 11:44; 2 Tim. 3:12; Apoc. 16:21). Me e peut ti duti sûr so Jéhovah ayeke mû na e maboko so e bezoin ni. Ngbanga ti nyen? Jéhovah amû lani maboko lakue na awakua ti lo ti sara akua so lo mû na ala, atâa akua ni ayeke ngangu. Na tapande, zia e bâ ambeni ye so asi lani na prophète Ézéchiel, so afa tënë na aJuif so a gue na ala na Babylone.
2. Jéhovah atene lani nyen na ndö ti azo so Ézéchiel afa tënë na ala? Nyen la e yeke manda na yâ ti article so? (Ézéchiel 2:3-6).
2 Sarango ye ti azo so Ézéchiel afa lani tënë na ala ayeke tongana nyen? Jéhovah atene lani so ala yeke “azo so aye ti mä zo pëpe” nga azo “so li ti ala akpengba”. Ala yeke sara sioni na zo tongana akî nga ala yeke sioni tongana akpalakongo. Ndani la Jéhovah atene na Ézéchiel fani mingi, atene: “Sara mbeto ti ala pëpe.” (Diko Ézéchiel 2:3-6.) Ézéchiel awara lani lege ti sara kua ti fango tënë so a mû na lo ndali ti so (1) Jéhovah la atokua lo, (2) yingo ti Nzapa amû ngangu na lo nga (3) tënë ti Nzapa akpengba mabe ti lo. Aye ota so a-aidé lani Ézéchiel tongana nyen? A yeke aidé e nga laso tongana nyen?
JÉHOVAH LA ATOKUA LANI ÉZÉCHIEL
3. Atënë wa la akpengba lani Ézéchiel? Tongana nyen la Jéhovah afa na lo so lo yeke mû maboko na lo?
3 Jéhovah atene lani na Ézéchiel, atene: “Mbi yeke tokua mo.” (Ézéch. 2:3, 4). Atënë so akpengba lani Ézéchiel. Ngbanga ti nyen? Kite ayeke dä ape so lo dabe ti lo so Jéhovah atene lani mara tënë so na Moïse nga na Esaïe, so ayeke aprophète ti Lo, na ngoi so Lo tokua ala (Ex. 3:10; És. 6:8). Ézéchiel ahinga nga lani tongana nyen la Jéhovah a-aidé aprophète use so ti hon ndö ti akpale so ala wara. Tongaso, na ngoi so Jéhovah atene na Ézéchiel fani use, atene: “Mbi yeke tokua mo”, prophète ni ayeke lani na nzoni raison ti duti na confiance so Jéhovah ayeke aidé lo. Fani mingi Ézéchiel atene nga tënë so: “Jéhovah asara tënë na mbi, lo tene.” (Ézéch. 3:16). Fani mingi lo tene nga tënë so: “Jéhovah akiri asara tënë na mbi, lo tene.” (Ézéch. 6:1). Kite ayeke dä ape so Ézéchiel ahinga lani biani so Jéhovah la atokua lo. Babâ ti Ézéchiel ayeke lani prêtre. Peut-être lo fa lani na Ézéchiel so Jéhovah ayeke tene lakue na aprophète ti Lo so Lo yeke aidé ala. Jéhovah atene lani tënë so na Isaac, Jacob nga na Jérémie, lo tene: “Mbi yeke na mo.”—Gen. 26:24; 28:15; Jér. 1:8.
4. Atënë ti dengo bê wa la akpengba lani Ézéchiel?
4 Mingi ti azo ti Israël asara ye lani tongana nyen na ngoi so Ézéchiel afa tënë na ala? Jéhovah atene: “Azo ti Israël ayeke mä mo ande pëpe, ngbanga ti so ala ye ti mä mbi pëpe.” (Ézéch. 3:7). So azo ni ake Ézéchiel afa so ala ke Jéhovah. Atënë so a sara si Ézéchiel ahinga biani so, so azo ni ake ti mä lo, a ye ti tene ape so lo sara kua ti lo ti prophète na lege ni ape. Jéhovah atene nga na Ézéchiel so tongana atënë ti ngbanga so lo fa aga tâ tënë, azo ni ayeke “hinga biani so mbeni prophète ayeke lani na popo ti ala.” (Ézéch. 2:5; 33:33). Kite ayeke dä ape so atënë ti dengo bê so asara si Ézéchiel awara ngangu so lo bezoin ni ti sara na kua ti fango tënë ti lo.
LASO, JÉHOVAH LA ATOKUA E
Tongana ti Ézéchiel, peut-être azo ayeke ke ti mä tënë so e yeke fa, me e hinga so Jéhovah ayeke na e (Bâ paragraphe 5-6)
5. Tongana ti so Ésaïe 44:8 afa, nyen la ayeke sara si e wara ngangu?
5 E nga kue e yeke wara ngangu tongana e hinga so Jéhovah la atokua e. Lo ne e na lege so lo iri e “atémoin” ti lo (És. 43:10). So kota pasa! Gï tongana ti so Jéhovah atene lani na Ézéchiel, atene: “Sara mbeto ti ala pëpe”, Jéhovah atene na e, atene: “Zia si mbeto ahon ndö ti ala pëpe.” Ngbanga ti nyen la e yeke na raison ape ti sara mbeto ti azo so ake ti mä e? Ngbanga ti so legeoko tongana Ézéchiel, Jéhovah la atokua e nga lo yeke mû maboko na e.—Diko Ésaïe 44:8.
6. (a) Atënë wa la Jéhovah atene ti sara si e hinga biani so lo yeke mû maboko na e? (b) Nyen la ayeke dë bê ti e nga ayeke kpengba e?
6 Jéhovah atene na e so lo yeke mû maboko na e. Na tapande, kozo ti tene Jéhovah atene: “Ala yeke atémoin ti mbi”, lo tene: “Na ngoi so mo hon na yâ ti ngu, mbi yeke duti ande na mo, na ngoi so mo hon na yâ ti akota ngu, ngu ni ayeke mene mo pëpe. Na ngoi so mo hon na yâ ti wâ, wâ ni ayeke zö mo pëpe, nga zango ti wâ ni ayeke zö mo kete pëpe.” (És. 43:2). Na ngoi so e yeke fa tënë, na ambeni ngoi e yeke tingbi na gbâ ti akpale so e peut ti haka ni na kota ngu nga na akpale so ayeke ngangu mingi so e peut ti haka ni na wâ. Atâa so kue, grâce na Jéhovah e yeke ngbâ ti fa tënë (És. 41:13). Tongana ti ngoi ti Ézéchiel, mingi ti azo laso ake ti mä tënë so e fa. Me a yeke pëpe ngbanga ti so e fa tënë nzoni ape. E yeke wara dengo bê nga na ngangu tongana e hinga so Jéhovah ayeke na ngia tongana e ngbâ ti fa tënë ti lo. Bazengele Paul atene: “Zo oko oko ayeke wara ande futa ti lo alingbi na kua ti lo wani.” (1 aCor. 3:8; 4:1, 2). Mbeni ita-wali so aninga na kua ti pionnier atene: “A nzere na mbi ti hinga so Jéhovah ayeke futa e ndali ti a-effort so e sara.”
YINGO TI NZAPA AMÛ LANI NGANGU NA ÉZÉCHIEL
Na yâ ti mbeni vision, Ézéchiel abâ char ti Jéhovah so ayeke na yayu, na a sara si lo yeke na confiance mingi so Jéhovah ayeke aidé lo ti sara kua so Lo mû na lo (Bâ paragraphe 7)
7. Na ngoi so Ézéchiel agbu li na ndö ti vision so lo bâ, a sara lani lo tongana nyen? (Bâ foto ti couverture ni.)
7 Ézéchiel abâ lani tongana nyen la yingo ti Nzapa ayeke ngangu mingi. Aye so Ézéchiel abâ lani na yâ ti mbeni vision a-aidé lo ti bâ so yingo vulu ayeke mû maboko na angangu ange nga ayeke sara si mbeni kota char so ayeke na yayu ayeke hon (Ézéch. 1:20, 21). Nyen la Ézéchiel asara lani? Lo fa ye so apassé, lo tene: “Na ngoi so mbi bâ ni, mbi kuku, mbi kpo li ti mbi na sese.” Li ti Ézéchiel akpe kue asara si lo kpo li ti lo na sese (Ézéch. 1:28). Na pekoni, na ngoi so Ézéchiel agbu li ti lo na ndö ti vision so apika bê mingi so, a doit ti sara si lo hinga na bê ti lo kue so grâce na yingo ti Nzapa, lo peut ti sara kua ti lo ti fango tënë.
8-9. (a) Yanga so Jéhovah amû na Ézéchiel amû na lo nyen? (b) Tongana nyen la Jéhovah akiri akpengba Ézéchiel ti fa tënë na azo so aye ti mä lo ape?
8 Jéhovah amû yanga na Ézéchiel, lo tene: “Molenge ti zo, londo mo luti na nduzu mbi sara tënë na mo.” Commandement so nga na yingo ti Nzapa amû na Ézéchiel ngangu so lo bezoin ni ti londo. Ézéchiel atene: “Yingo alï na yâ ti mbi na asara si mbi luti na nduzu.” (Ézéch. 2:1, 2). Na pekoni nga na yâ ti kua ti fango tënë ti Ézéchiel kue, “maboko” ti Nzapa, so ti tene, yingo vulu ti Nzapa, afa lege na lo (Ézéch. 3:22; 8:1; 33:22; 37:1; 40:1). Yingo ti Nzapa amû ngangu na Ézéchiel ti sara kua so lo mû na lo, so ti tene, ti fa tënë na ‘azo so li ti ala akpengba nga na azo so bê ti ala akpengba mingi’ so ayeke na yâ ti territoire ti lo (Ézéch. 3:7). Jéhovah atene na Ézéchiel: “Mbi sara si face ti mo akpengba tongana face ti ala, nga ndö ti lê ti mo akpengba tongana ti ndö ti lê ti ala. Mbi sara si ndö ti lê ti mo aga tongana diamant, nga a kpengba a hon tênë ti silex. Mo sara mbeto ti ala pëpe wala zia si lê ti ala amû mbeto na mo pëpe.” (Ézéch. 3:8, 9). Ti vrai ni, Jéhovah ayeke tene lani na Ézéchiel, atene: ‘Zia si kpengbango li ti azo ni adécouragé mo ape. Mbi yeke kpengba mo.’
9 Na pekoni, yingo ti Nzapa ahon na Ézéchiel na ando so lo yeke fa tënë dä. Ézéchiel atene: “Maboko ti Jéhovah ayeke ngangu na ndö ti mbi.” Prophète ni amû lani yenga oko ti mä yâ ti tënë so lo doit ti fa ni na azo ni, tongaso si lo fa ni na bê ti lo kue (Ézéch. 3:14, 15). Na pekoni, Jéhovah atene na lo ti gue na yâ ti mbeni popo-hoto na kâ “yingo alï na yâ ti [lo]”. (Ézéch. 3:23, 24). Ézéchiel ayeke lani nduru ti komanse kua ti lo ti fango tënë.
LASO, YINGO TI NZAPA AMÛ NA E NGANGU
Tongana ti Ézéchiel, nyen la ayeke aidé e laso ti sara kua ti e ti fango tënë? (Bâ paragraphe 10)
10. Mungo maboko wa la e bezoin ni ti fa tënë? Ngbanga ti nyen?
10 Mungo maboko wa la e bezoin ni ti fa tënë? Ti kiri tënë na hunda so, zia e gbu li na ndö ti ye so asi lani na Ézéchiel. Kozo si lo komanse ti fa tënë, yingo ti Nzapa amû na lo ngangu so lo bezoin ni. Tongana ti Ézéchiel, laso e peut ti fa tënë gï tongana yingo ti Nzapa a-aidé e. Ngbanga ti nyen? Ngbanga ti so Satan ayeke sara bira na e tongaso si e zia kua ti e ti fango tënë (Apoc. 12:17). Azo mingi apensé so Satan ayeke ngangu mingi, tongaso e lingbi pëpe ti sö benda na ndö ti lo. Me na lege ti kua ti e ti fango tënë, e ngbâ ti sö benda na ndö ti lo (Apoc. 12:9-11). Na lege wa? Na ngoi so e yeke fa tënë, e fa so e sara pëpe mbeto ti aye so Satan aye ti sara na e. Lakue tongana e fa tënë, e sö benda na ndö ti Satan. Tongana e bâ so e peut ti ngbâ ti fa tënë même tongana awato ti e akanga lege na e, a fa nyen polele? E peut ti tene so yingo vulu amû na e ngangu nga e zia ngia na bê ti Jéhovah.—Mat. 5:10-12; 1 Pi. 4:14.
11. Nyen la yingo ti Nzapa ayeke sara ndali ti e? Tongana nyen la e peut ti ngbâ ti wara ni?
11 Mbeni ye nde wa la e peut ti manda tongana e gbu li na ndö ti fason so Jéhovah amû lani na Ézéchiel ngangu so lo bezoin ni ti fa tënë? Yingo ti Nzapa apeut ti mû na e ngangu so e bezoin ni ti hon ndö ti akpale kue so e wara na fango tënë (2 aCor. 4:7-9). Tongaso, nyen la e peut ti sara ti ngbâ ti wara yingo ti Nzapa? E doit ti ngbâ lakue ti sambela ndali ni nga e duti na confiance so Jéhovah ayeke mä asambela ti e. Jésus afa lani na adisciple ti sambela, lo tene: “Ala ngbâ ti hunda ye, . . . ala ngbâ ti gi ye, . . . ala ngbâ ti pika yanga-da.” Jéhovah ayeke “mû yingo vulu na ala so ahunda ni na lo”.—Luc 11:9, 13; Kus. 1:14; 2:4.
ATËNË TI NZAPA AKPENGBA LANI MABE TI ÉZÉCHIEL
12. Tongana ti so a fa na Ézéchiel 2:9–3:3, rouleau ni alondo na ndo wa? Nyen la a sû na lê ni?
12 Yingo ti Nzapa amû na Ézéchiel ngangu so lo bezoin ni ti fa tënë nga akpengba mabe ti lo. Na yâ ti mbeni vision, Ézéchiel abâ mbeni maboko so agbu mbeni rouleau. (Diko Ézéchiel 2:9–3:3.) Rouleau ni alondo na ndo wa? Nyen la a sû na lê ni? A kpengba mabe ti Ézéchiel tongana nyen? Zia e bâ ni. Rouleau ni alondo na trône ti Nzapa. Peut-être Jéhovah asara kua na mbeni oko ti a-ange osio so Ézéchiel abâ ala fade ti mû na lo rouleau ni (Ézéch. 1:8; 10:7, 20). A sû atënë ti Nzapa na lê ti rouleau ni, so ti tene, mbeni yongoro tënë ti fango ngbanga so Ézéchiel adoit lani ti fa na azo ti kpengba-li so a gue na ala na ngbâa (Ézéch. 2:7). A sû atënë ni na lê ni nga na peko ni kue.
13. Jéhovah atene na Ézéchiel ti sara nyen na rouleau ni? Ngbanga ti nyen la a nzere na yanga ti lo?
13 Jéhovah atene na prophète ti lo ti te rouleau ni na ti “zia si asi yâ ti [lo].” Ézéchiel amä yanga na lo te ni kue. Mbage ti vision so aye ti tene nyen? Ézéchiel abezoin ti mä yâ ti tënë so lo yeke gue ti fa so nzoni. Lo doit ti mä na bê na tënë ni si apusu lo ti fa ni. Na pekoni, mbeni ye ti dongo bê asi. Ézéchiel abâ so rouleau ni ‘anzere na yanga ti lo tongana mafuta ti otoro.’ (Ézéch. 3:3). Ngbanga ti nyen? Ézéchiel abâ lani pasa so lo yeke na ni ti sara kua na iri ti Jéhovah tongana mbeni ye so anzere na lo (Ps. 19:8-11). Lo kiri singila so Jéhovah ayeda ti tene lo sara kua tongana prophète ti lo.
14. Nyen la a-aidé Ézéchiel ti duti nduru ti sara kua ti lo?
14 Na pekoni, Jéhovah atene na Ézéchiel, atene: “Atënë kue so mbi tene na mo so, mo mä ni nga mo bata ni na bê ti mo.” (Ézéch. 3:10). Na lege ti atënë so, Jéhovah atene na Ézéchiel ti bata na li atënë so a sû na lê ti rouleau ni nga ti gbu li na ndö ni. Tongana Ézéchiel asara ni, mabe ti lo ayeke kpengba mingi. A yeke sara nga si lo yeke na mbeni ngangu tënë ti tene na azo ni (Ézéch. 3:11). Na ngoi so Ézéchiel amä yâ ti atënë ti Nzapa nzoni nga lo mä na bê na ni, lo yeke nduru ti komanse ti fa ni na ti ngbâ ti fa ni juska kua ni ahunzi.—Bâ Psaume 19:14.
LASO, TËNË TI NZAPA AYEKE KPENGBA MABE TI E
15. Ti gbu ngangu, nyen la e bezoin ti ‘bata ni na bê ti e’?
15 Ti gbu ngangu na yâ ti kua ti e ti fango tënë, e nga kue e bezoin ti zia si tënë ti Nzapa angbâ ti kpengba mabe ti e. E bezoin nga ti ‘bata na bê ti e’ atënë kue so Jéhovah atene na e. Laso, Jéhovah ayeke sara tënë na e na lege ti Bible. Tongana nyen la e peut ti sara kue ti tene Bible angbâ ti fa lege na apensé ti e, atënë ti bê ti e nga na aye so apusu e ti sara ye?
16. Nyen la e doit ti sara na Bible? Tongana nyen la e peut ti mä yâ ni nzoni?
16 Tongana e te kobe na e zia si ague na yâ ti terê ti e, e yeke wara ngangu. Legeoko nga, tongana e manda Bible nga e gbu li na ndö ni, mabe ti e ayeke kpengba mingi. E bata na li ti e ye so e manda na lege ti rouleau ni. Tongana a ndu tënë ti Bible, Jéhovah aye ti tene ‘a si yâ ti e’, so ti tene, e mä yâ ni nzoni. E peut ti mä yâ ni tongana e sambela, e diko ni nga e gbu li na ndö ni. Kozoni, e yeke sambela ti leke bê ti e ti tene apensé ti Nzapa alï dä. Na pekoni, e yeke diko mbeni mbage ti Bible. Na nda ni, e yeke luti ti gbu li nzoni na ndö ti ye so e diko. Nyen la ayeke si na pekoni? Tongana e gbu li mingi na ndö ti Bible, e yeke mä yâ ni nzoni nga mabe ti e ayeke kpengba.
17. Ngbanga ti nyen la a yeke kota ye ti gbu li na ndö ti ye so e diko na yâ ti Bible?
17 Ngbanga ti nyen la a yeke kota ye ti diko Bible nga ti gbu li na ndö ni? Tongana e sara ni, e yeke wara ngangu so e bezoin ni ti fa tënë ti Royaume laso nga ti fa ngangu tënë ti ngbanga so peut-être e yeke fa ni na yâ ti ngoi so aga nduru awe. Nga, tongana e gbu li na ndö ti apendere sarango ye ti Jéhovah, songo ti e na lo ayeke kpengba mingi. A yeke sara si e wara mbeni ye so anzere mingi, so ti tene, siriri ti bê nga na ngia.—Ps. 119:103.
TËNË TI NZAPA APUSU E TI GBU NGANGU
18. Nyen la azo ti territoire ti e adoit ande ti hinga ni? Ngbanga ti nyen?
18 Ézéchiel ayeke lani prophète, me e yeke aprophète ape. Ye oko, e leke na bê ti e ti ngbâ ti fa tënë ti Jéhovah so ayeke na yâ ti Bible juska lo tene a lingbi awe. Tongana ngoi ti fango ngbanga asi, azo ti territoire ti e ayeke duti ande na raison oko ape ti tene so a gboto lani mê ti ala ape wala Nzapa asara sanka ti ala (Ézéch. 3:19; 18:23). Me ala doit ande ti hinga so tënë so e fa alondo na Nzapa.
19. Nyen la ayeke mû na e ngangu ti sara kua ti e ti fango tënë?
19 Nyen la ayeke mû na e ngangu ti sara kua ti e ti fango tënë? A yeke aye ota so amû lani ngangu na Ézéchiel. E yeke ngbâ ti fa tënë ndali ti so e hinga so Jéhovah la atokua e, yingo vulu ti lo amû ngangu na e nga tënë ti Nzapa akpengba mabe ti e. So Jéhovah ayeke aidé e, a pusu e ti sara kua ti e ti fango tënë nga ti gbu ngangu “juska na nda ni”.—Mat. 24:13.
BIA 65 Gue lakue na li ni!
a Na yâ ti article so, e yeke bâ aye ota so a-aidé lani prophète Ézéchiel ti sara kua ti lo ti fango tënë. Na ngoi so e yeke bâ tongana nyen la Jéhovah a-aidé lani prophète ti lo, e yeke duti na confiance mingi so Jéhovah ayeke aidé e ti sara kua ti e ti fango tënë.