1-2. (a) Amara aga nduru awe ti tö mbela na tënë wa? (b) Ahundango ndo wa la a lingbi e wara akiringo tënë ni?

TARA ti bâ so amara alondo ti tö mbela na tënë so Bible asara tënë ni ândö so, so atene “siriri na nzoni duti ayeke dä”. Peut-être ala yeke pika kate ti ala so azo awara siriri so ade ala wara mara ni lâ oko ape. Amara ayeke ye ande ti tene e pensé so ala lingbi ti leke akpale ti dunia kue. Me ala lingbi pëpe ti kanga lege na ye so ayeke si na pekoni. Ngbanga ti nyen? Ti gue oko na prophétie ti Bible, “mo ye ti bâ, futingo ayeke ga gï hio tongaso na ndö ti ala . . . na ala yeke kpe ande oko pëpe.”—1 aThes. 5:3.

² A lingbi e wara akiringo tënë na ambeni kota hundango ndo: Nyen la ayeke si ande na ngoi ti “kota ye ti vundu”? Nyen la Jéhovah ayeke hunda ande na e ti sara na ngoi ni so? Tongana nyen la e lingbi ti leke terê ti e laso ti ngbâ ti duti be-ta-zo na ngoi ti kota ye ti vundu?—Mat. 24:21.

3. Ti gue oko na Apocalypse 17:5, 15-18, Nzapa ayeke futi ande “Babylone, Ngangu gbata” tongana nyen?

³ Diko Apocalypse 17:5, 15-18. A yeke futi ande “Babylone, Ngangu gbata”. Tongana ti so e tene fade, amara alingbi ande pëpe ti kanga lege na aye so ayeke si na ngoi ni so. Ngbanga ti nyen? Ngbanga ti so “Nzapa [ayeke zia ande] na yâ ti bê ti ala ti  sara ye so ayeke na bê ti lo”. Ye so ayeke na bê ti lo ayeke nyen? A yeke ti futi abungbi ti vorongo nzapa ti wataka kue, so na popo ni a yeke wara abungbi ti vorongo nzapa so atene ala yeke aChrétien me so ala fa na azo ape ti voro Jéhovah tongana ti so lo fa. Nzapa ayeke zia ande ye so ayeke na bê ti lo na bê ti “adidi bale-oko” ti “mbeni bengba nyama ti ngonda”. Adidi bale-oko aye ti sara tënë ti agouvernement kue so amû maboko na “nyama ti ngonda” ni, so ti tene Bendo ti gigi (Apoc. 17:3, 11-13; 18:8). Na ngoi so agouvernement so ayeke londo na terê ti abungbi ti vorongo nzapa ti wataka, a yeke duti ande tongo nda ti kota ye ti vundu. A yeke duti ande biani mbeni kota ye so andu azo kue.

4. (a) Araison wa la peut-être amara ayeke mû ti fa ndani so ala londo na terê ti abungbi ti vorongo nzapa ti wataka? (b) Peut-être angbene membre ti abungbi so ayeke sara ande nyen?

⁴ E hinga pëpe araison so peut-être amara ayeke mû ti fa nda ni so ala londo na terê ti Babylone, Ngangu gbata. Peut-être ala yeke tene so abungbi ti vorongo nzapa akanga lege na amara ti duti na siriri nga ala yôro terê ti ala lakue na yâ ti aye ti poroso. Wala peut-être ala yeke tene so abungbi ti vorongo nzapa la awara amosoro nga na ando ahon ndö ni (Apoc. 18:3, 7). Na bango ni, a yeke na lege ni so na ngoi so amara ayeke londo na terê ti abungbi ti vorongo nzapa ti wataka peut-être ala yeke futi ande amembre ni kue ape. Me na bango ni amara ayeke futi abungbi ti vorongo nzapa. Tongana a futi abungbi ni awe, angbene membre ni ayeke bâ so akota zo ti ala ahanda ala lani na peut-être ala yeke gi ti ngbâ ayo na abungbi ni.

5. Zendo wa la Jéhovah amû na ndö ti kota ye ti vundu? Ngbanga ti nyen?

⁵ Bible afa pëpe ngoi oke la a yeke mû ti futi Babylone, Ngangu gbata, me e hinga so a yeke mû ngoi mingi ape (Apoc. 18:10, 21). Jéhovah amû zendo so lo yeke ‘fâ yâ ti ngoi’ ti kota ye ti vundu tongaso si “azo so lo soro ala” nga na tâ bungbi ti vorongo Nzapa asö kuâ ande (Marc 13:19, 20). Me nyen la Jéhovah ayeke hunda ande na e ti sara na ngoi so kota ye ti vundu ayeke komanse juska ti si na bira ti Harmaguédon?

6. Ti zi terê ti e na abungbi ti vorongo nzapa ti wataka, a lingbi e sara nyen nga?

⁶ Tongana ti so a fa na yâ ti article so ahon, Jéhovah ahunda na awakua ti lo ti zi terê ti ala na Babylone, Ngangu gbata. Ye oko, gï ti zi terê ti e dä alingbi ape. A lingbi e leke na bê ti e ti ngbâ ti mû mbage ti tâ bungbi ti vorongo Nzapa: vorongo Jéhovah na lege ni. Zia e bâ alege use so e lingbi ti sara na ni.

7. (a) Tongana nyen la e lingbi ti ngbâ ti sara ye alingbi na andia ti Jéhovah na ndö ti anzoni sarango ye? (b) Ngbanga ti nyen la aHébreu 10:24, 25 afa so a lingbi e bungbi oko ti voro Jéhovah? Ngbanga ti nyen la a yeke kota ye mingi laso?

⁷ Kozoni, a lingbi e ngbâ ti sara ye alingbi na andia ti Jéhovah na ndö ti anzoni sarango ye. A lingbi e yeda lâ oko ape na asioni sarango ye ti azo ti dunia so. Na tapande, e yeke yeda pëpe na alege nde nde kue ti sarango lango-sioni, a ndu sarango mariage na popo ti koli na koli wala na popo ti wali na wali nga na asarango ye ti azo so abungbi koli na koli wala wali na wali (Mat. 19:4, 5; aRom. 1:26, 27). Use ni, a lingbi e ngbâ ti voro Jéhovah legeoko na amba ti e aChrétien. E yeke sara ni atâa ndo wa la e yeke dä, na yâ ti aDa ti Royaume, wala na yâ ti da ti aTémoin tongana a hunda ti sara tongaso wala même na hondengo ni. Atâa nyen la asi, e lingbi lâ oko ape ti zia ti bungbi ti voro Jéhovah. Ti tâ tënë ni, e bezoin ti bungbi oko na amba ti e “mingi ahon ti kozo, so [e] bâ lango ni ayeke pusu nduru.”—Diko aHébreu 10:24, 25.

8. Tongana nyen la peut-être tënë so e yeke fa ayeke changé ande?

⁸ Na ngoi ti kota ye ti vundu, peut-être tënë so e yeke fa ayeke changé ande. Laso, e yeke fa nzoni tënë ti Royaume nga e yeke gi ti sara si azo aga adisciple. Me na ngoi ti kota ye ti vundu, peut-être e yeke woko ande pëpe yâ ti tënë so e yeke fa. Bible ahaka ni na akota glason (Apoc. 16:21). Peut-être e yeke fa so a ga nduru ti futi dunia ti Satan awe. Tongana ngoi ni alingbi, e yeke hinga ande mbilimbili tënë so e yeke fa nga na fason so e yeke fa na ni. Eskê e yeke sara ande kua na amême kode so e yeke sara kua na ni asara angu ngbangbo mingi awe so? Wala e yeke sara kua ande na ambeni kode nde? A lingbi e ku e bâ. Atâa tënë ti nyen la e yeke fa, na bango ni e yeke duti ande na pasa ti fa tënë ti ngbanga ti Jéhovah na mbeto ape.—Ézéch. 2:3-5.

9. Tënë so e yeke fa ayeke sara peut-être amara ande tongana nyen? Nyen la e lingbi ti hinga ni biani?

⁹ Peut-être tënë so e yeke fa ayeke pusu ande amara ti gi ti kanga lege na e ti zia ti fa tënë biani biani. Gï tongana ti so laso e yeke zia bê ti e na Jéhovah ti mû maboko na e na yâ ti kua ti fango tënë, e yeke duti ande nga na bezoin ti mungo maboko ti lo na ngoi ni so. E lingbi ti hinga biani so Nzapa ti e ayeke mû ande na e ngangu ti sara ye so bê ti lo aye.—Mi. 3:8.

10. Tongana ti so a fa na Luc 21:25-28, mingi ti azo ayeke sara ye ande tongana nyen tongana ala bâ aye so ayeke si na ngoi ti kota ye ti vundu?

¹⁰ Diko Luc 21:25-28. Na ngoi ti kota ye ti vundu, bê ti azo ayeke son tongana ala bâ aye kue so ala pensé lani atene ayeke ngbâ lakue lakue so akomanse ti buba. Ala yeke ande na yâ ti “pasi” nga ala yeke sara mbeto so peut-être a yeke fâ ala na ngoi ti ye ti ngangu so ade ti si lâ oko ape na yâ ti dunia so (Soph. 1:14, 15). Na ngoi ni so, peut-être gigi ayeke ga ande même ngangu mingi na awakua ti Jéhovah. Ndali ti so e ngbâ ti duti nde na dunia so, peut-être e yeke wara akpale. Peut-être e yeke wara ande pëpe aye so e bezoin ni.

11. (a) Ngbanga ti nyen la amara ayeke zia ande lê ti ala kue na ndö ti aTémoin ti Jéhovah? (b) Ngbanga ti nyen la e bezoin ti sara mbeto ti kota ye ti vundu ape?

 ¹¹ A si na mbeni ngoi, peut-être ngonzo ayeke gbu ande azo so a futi bungbi ti vorongo nzapa ti ala awe ndali ti so bungbi ti vorongo Nzapa ti aTémoin ti Jéhovah angbâ. Na lege ti aye tongana Internet, ala yeke fa ande so ngonzo asara ala mingi. Amara nga na mokonzi ti ala, Satan, ayeke ke ande e ndali ti so gï bungbi ti vorongo Nzapa ti e la asö kuâ. Ala yeke wara ande lege pëpe ti sara ye so ala leke ti sara, so ayeke ti futi abungbi ti vorongo Nzapa kue na ndö ti sese. Tongaso, ala yeke zia ande lê ti ala kue na ndö ti e. Na ngoi ni so, amara ayeke ga ande Gog ti Magog. * Ala yeke bungbi ande oko ti ga na bira na terê ti awakua ti Jéhovah na ngangu ti ala kue (Ézéch. 38:2, 14-16). E lingbi ti gi bê ti e na ndö ti aye so ayeke si ande na ngoi ti kota ye ti vundu, ndali ti so e hinga mbilimbili pëpe anzene nzene tënë na ndö ti aye so ayeke si ande. Ye oko, e hinga biani so e bezoin ti sara mbeto ti kota ye ti vundu ape. Jéhovah ayeke fa ande na e aye so e lingbi ti sara ti sö fini ti e (Ps. 34:19). E yeke wara ande lege ti ‘luti droit na ti yô li ti e na nduzu’ ndali ti so e hinga so ‘ngoi ti zingo e aga nduru awe.’ *

12. Tongana nyen la “ngbâa be-ta-zo so ayeke sara ye na ndara” ayeke leke e ndali ti ye so ayeke si ande?

¹² A ninga awe la “ngbâa be-ta-zo so ayeke sara ye na ndara” ayeke leke e ti ngbâ ti duti be-ta-zo na ngoi ti kota ye ti vundu (Mat. 24:45). Lo sara ni na alege mingi, me bâ mbeni tapande ni oko: akapa ti akota bungbi ti e ti lango ota ti ngu 2016 ti si na ngu 2018. Na lege ti akapa so a wa e ti sara kue ti gi ti duti mingi na asarango ye so e bezoin ni na ngoi so lâ ti Jéhovah ayeke pusu nduru nduru so. Zia e sara tënë kete na ndö ti asarango ye so.

13. Tongana nyen la e lingbi ti sara kue ti duti be-ta-zo na Jéhovah? Ngbanga ti nyen la a lingbi e sara ni laso?

¹³ Duti be-ta-zo: Mama-tene ti kota bungbi ti lango ota ti ngu 2016 lani ayeke “Ngbâ ti duti be-ta-zo na Jéhovah”. Kota bungbi so afa lani na e so tongana e yeke na kpengba songo na Jéhovah, e yeke ngbâ be-ta-zo na lo. A dabe ti e lani so e lingbi ti ga nduru na Jéhovah tongana e yeke sambela lo na bê ti e kue nga e yeke manda Bible nzoni. Tongana e sara tongaso ayeke mû ngangu na e ti hon ndö ti akpale so ayeke même ngangu mingi. Na ngoi so kota ye ti vundu aga nduru ti si, e lingbi ti ku ti wara angangu kpale so na yâ ni a lingbi e fa wala e yeke be-ta-zo na Nzapa nga na Royaume ti lo. Peut-être azo ayeke ngbâ ti he e (2 Pi. 3:3, 4). Mbeni kota raison so ndali ni azo ayeke he e ayeke so e mû mbage ti dunia ti Satan oko ape. A lingbi e sara kue ti duti be-ta-zo laso tongaso si e duti be-ta-zo na ngoi ti kota ye ti vundu.

14. (a) Changement wa la ayeke ndu ande aita-koli so ayeke mû li ni na ndö ti sese? (b) Ngbanga ti nyen la e bezoin ande ti duti be-ta-zo na ngoi ni so?

¹⁴ Na ngoi ti kota ye ti vundu, mbeni changement ayeke ndu ande aita-koli so ayeke mû li ni na ndö ti sese. A si na mbeni ngoi, a yeke bungbi aita kue so a soro ala na lege ti yingo so angbâ na sese ti gue na yayu ti tiri bira ti Harmaguédon (Mat. 24:31; Apoc. 2:26, 27). Ye so aye ti fa so Bebungbi ayeke duti ande na e na ndö ti sese ape. Ye oko, azo mingi mingi ayeke ngbâ ti sara ye na yâ ti wusuwusu pëpe. Aita-koli so alingbi so ayeke na popo ti ambeni taba  la ayeke mû ande li ni. E bezoin ande ti fa so e yeke be-ta-zo na Jéhovah na lege so e mû maboko na aita-koli so nga na lege so e sara ye alingbi na fango lege so Nzapa afa na ala. Tongana e ye ti sö kuâ ande, a lingbi e sara ye alingbi na fango lege ti ala.

15. Tongana nyen la e lingbi ti sara kue ti gbu ngangu? Ngbanga ti nyen la a yeke kota ye ti sara ni laso?

¹⁵ Gbu ngangu: Mama-tene ti kota bungbi ti lango ota ti ngu 2017 lani ayeke “Kiri na peko ape!” Kota bungbi so amû lani maboko na e ti sara kue ti gbu ngangu na yâ ti atara. A fa lani so e yeke gbu ngangu gï pëpe na ngoi so aye atambela nzoni. E lingbi ti sara kue ti gbu ngangu tongana e zia bê ti e na Jéhovah (aRom. 12:12). Zia e girisa zendo ti Jésus so lâ oko ape: “Zo so agbu ngangu juska na nda ni, a yeke sö lo ande.” (Mat. 24:13). Zendo so aye ti fa so a lingbi e ngbâ be-ta-zo atâa akpale wa la e wara. Tongana e gbu ngangu na yâ ti atara oko oko kue laso, mabe ti e ayeke kpengba mingi kozo si kota ye ti vundu akomanse.

16. Nyen la ayeke sara si e sara ye na mbeto ape? Tongana nyen la e lingbi ti sara kue ti sara ye na mbeto ape laso?

¹⁶ Sara ye na mbeto ape: Mama-tene ti kota bungbi ti lango ota ti ngu 2018 lani ayeke “Sara ye na mbeto pëpe”! Kota bungbi so adabe ti e lani so a yeke pëpe akode ti e wani la ayeke sara si e sara ye na mbeto ape. Legeoko tongana ti gbungo ngangu, a lingbi e zia bê ti e na Jéhovah si e sara ye na mbeto ape. Tongana nyen la e lingbi ti sara kue ti zia bê ti e na lo? Tongana e diko Bible lâ na lâ nga e gbu li na ndö ti fason so Jéhovah asö awakua ti lo ândö (Ps. 68:20; 2 Pi. 2:9). Na ngoi so amara ayeke ga ande na bira na terê ti e na ngoi ti kota ye ti vundu, e yeke duti ande na bezoin mingi ti sara ye na mbeto ape nga ti zia bê ti e na Jéhovah ahon ti kozo (Ps. 112:7, 8; aHéb. 13:6). Tongana e zia bê ti e kue na Jéhovah laso, e yeke duti ande na courage so e bezoin ni ti gbu lê ni na ngoi so Gog ayeke ga ti sara bira na e. *

17. Ngbanga ti nyen la e bezoin ti sara mbeto ti Harmaguédon ape? (Bâ foto ti couverture ni.)

¹⁷ Tongana ti so a fa na yâ ti article so ahon, mingi ti e, e passé gigi ti e kue na lâ ti nda ni.  Me e yeke nga na beku ti sö kuâ na ngoi ti kota ye ti vundu. Na bira ti Harmaguédon, a yeke futi ande biaku biaku aye ti ngoi so. Ye oko, e bezoin ti sara mbeto ti ye oko ape. Ngbanga ti nyen? Ngbanga ti so bira ni ayeke ande ti Nzapa (aProv. 1:33; Ézéch. 38:18-20; Zach. 14:3). Na ngoi so Jéhovah ayeke mû yanga, Jésus Christ ayeke mû li ni na ndö ti aturugu ti Nzapa na yâ ti bira ni. Na terê ti lo a yeke wara azo so a soro ala ti gue na yayu so a zingo na kuâ awe nga na gbâ ti a-ange. Ala yeke tiri ande na Satan, na asioni yingo ti lo nga na aturugu ti ala so ayeke na sese.—Dan. 12:1; Apoc. 6:2; 17:14.

18. (a) Zendo wa la Jéhovah amû? (b) Tongana nyen la Apocalypse 7:9, 13-17 amû maboko na e ti duti na kite oko ape na ndö ti beku ti e ti kekereke?

¹⁸ Jéhovah amû zendo so: “Aye ti bira kue so a leke ti sara na bira na mo ayeke sara ye oko na mo pëpe.” (És. 54:17). “Azo mingi mingi” so ayeke sara na Jéhovah be-ta-zo ayeke ‘sigi ande na yâ ti kota ye ti vundu’. Na pekoni, ala yeke ngbâ ande ti sara na Jéhovah. (Diko Apocalypse 7:9, 13-17.) Bible afa na e gbâ ti araison so asara si e yeke na confiance so e yeke sö kuâ ande. E hinga so “Jéhovah ayeke bata azo so ayeke be-ta-zo”. (Ps. 31:23). Azo kue so aye Jéhovah nga asepela lo ayeke duti na ngia ti bâ lo na ngoi so lo yeke zi azonga kue so a bi na ndö ti iri ti lo so ayeke nzoni-kue.—Ézéch. 38:23.

19. Pendere beku wa la e yeke nduru ti wara ni?

¹⁹ Gbu li na ndö ti fason so a lingbi fade ti sû na atënë so ayeke na 2 Timothée 3:2-5 tongana a yeke sara fade tënë ti azo so ayeke na yâ ti fini dunia, so Satan ayeke na komandema na ndö ti ala ape. (Bâ encadré “ Sarango ye ti azo ande na yâ ti fini dunia.”) Ita George Gangas, * so ayeke lani mbeni membre ti Bebungbi, atene ni tongaso: “Dunia ayeke duti tâ mbeni pendere ndo mingi tongana azo kue avoro Jéhovah! Fafadeso mo yeke wara pasa ti duti na yâ ti fini dunia. Mo yeke duti na fini aninga tongana ti Jéhovah. E yeke duti ande na fini ti lakue lakue.” So tâ pendere beku!