1. Ngbanga ti nyen la Jéhovah alingbi ti tene e voro gï lo oko?

JÉHOVAH alingbi ti tene e voro gï lo oko ndali ti so lo la lo créé e nga lo la lo mû na e fini (Apoc. 4:11). Me mbeni kpale ayeke dä. Atâa so e ye Jéhovah nga e ne lo, ambeni ye alingbi ti sara si e voro gï lo oko ape atâa so lo lingbi na ni. A lingbi e hinga tongana nyen la ye so alingbi ti si. Me kozoni, zia e bâ ambeni ye so zo ayeke sara ti voro gï Jéhovah oko.

2. Ti gue oko na Exode 20:5, nyen la e yeke sara tongana e yeke voro gï Jéhovah oko?

² Na yâ ti Bible, ti ye Jéhovah mingi ague tâ oko na vorongo gï lo oko. E yeke zia lege pëpe na mbeni zo wala mbeni ye ti mû place ti lo na yâ ti bê ti e.​—Diko Exode 20:5.

3. Ngbanga ti nyen la e yeke na anzoni raison ti voro gï Jéhovah oko awe?

³ E yeke na anzoni raison ti voro gï Jéhovah awe. Ngbanga ti nyen? Aye so e hinga na ndö ti lo la apusu e ti voro gï lo. E ye apendere sarango ye ti lo. E hinga aye so Jéhovah aye nga na aye so lo ke nga apensé ti e ague oko na ti lo. E hinga ye so lo leke na bê ti lo ti sara ndali ti azo nga e yeke mû maboko na ni. E bâ so Jéhovah ane e mingi la lo mû lege na e ti duti akamarade ti lo (Ps. 25:14). Anzene nzene ye kue so e hinga na ndö ti Lo so acréé e asara si e ga nduru mingi na lo.—Jacq. 4:8.

4. (a) Aye wa la Zabolo ayeke sara kua na ni ti sara si e voro gï Jéhovah oko ape? (b) Nyen la e yeke bâ na yâ ti article so?

 ⁴ Zabolo la akomande dunia so, nga lo yeke sara kua na ni ti gi ti pusu e ti sara ye alingbi na anzara so a dü e na ni nga na asioni nzara ti bê ti e (aÉph. 2:1-3; 1 Jean 5:19). Lo ye ti tene e ye nga ambeni ye tongaso si e ye gï Jéhovah oko ape. Zia e bâ alege use so lo lingbi ti sara na ni. Kozoni, lo yeke handa e ti tomba peko ti amosoro nga use ni lo yeke gi ti pusu e ti soro angia so ayeke nzoni ape.

5. Ngbanga ti nyen la a lingbi e sara hange si ndoye ti nginza amaï pëpe na yâ ti bê ti e?

⁵ E kue e ye ti te ye alingbi na nzara ti e, e ye ti yü nzoni bongo nga e ye mbeni nzoni ndo ti lango. Ye oko, a lingbi e sara hange si ndoye ti nginza amaï na yâ ti bê ti e ape. Azo mingi so ayeke ti dunia ti Satan ayeke “azo so andoye nginza” nga na aye ti sese (2 Tim. 3:2). Jésus ahinga lani so bê ti adisciple ti lo alingbi ti pusu ala ti duti na mara ti ndoye so. Jésus atene: “Zo alingbi pëpe ti sara kua ti ngbâa na azo use, ndali ti so lo yeke ke mbeni oko na lo yeke ye mbeni. Wala lo yeke ngbâ na mbeni oko na lo ke mbeni. Ala lingbi pëpe ti sara kua ti ngbâa na Nzapa nga na Mosoro.” (Mat. 6:24). Zo so ayeke voro Jéhovah nga na mbage lo yeke mû ngoi mingi nga lo yeke sara ngangu kue ti ga zo ti mosoro ayeke gi ti sara kua na amaître use. Lo yeke voro pëpe gï Jéhovah oko.

6. Nyen la e lingbi ti manda na lege ti atënë so Jésus atene na congrégation ti Laodicée?

⁶ Nduru na hunzingo ti ngoi ti akozo Chrétien, amembre ti congrégation ti gbata ti Laodicée apika kate atene: “Mbi yeke zo ti mosoro, mbi wara amosoro na mbi yeke na bezoin ti mbeni ye oko pëpe.” Me na lê ti  Jéhovah na Jésus ‘pasi ti ala ahon ndö ni, mawa ti ala ayeke mingi, ala yeke awayere, ala yeke awaziba nga terê ti ala ayeke senge’. Jésus amû lani wango na ala pëpe ndali ti so ala yeke azo ti mosoro, me ndali ti so ala ndoye lani nginza mingi na abuba lani songo ti ala na Jéhovah (Apoc. 3:14-17). Tongana e bâ so e komanse ti ndoye nginza, a lingbi e sara ye hio ti leke pensé ti e (1 Tim. 6:7, 8). Tongana e sara ni ape, e yeke komanse ti ye mingi ambeni ye, na Jéhovah ayeke yeda pëpe na vorongo so e yeke voro na lo. Lo “ye ti tene azo avoro gï lo oko awe.” (Deut. 4:24). Tongana nyen la nginza alingbi ti ga kota ye mingi na yâ ti fini ti e?

7-9. Nyen la mo manda na lege ti ye so asi na David so ayeke mbeni ancien?

⁷ Bâ tapande ti David, mbeni ancien so asara kua ngangu so ayeke na États-Unis. Lo tene lo yeke zo so asara kua ngangu. A mû na lo kota kua na ndokua so lo sara kua dä nga na yâ ti kodro ni a bâ même kua so lo sara na nene ni mingi. David atene: “Na mbeni ngoi, mbi pensé lani so anzoni ye so mbi wara afa so Jéhovah asara tufa na ndö ti mbi.” Me eskê a yeke biani tufa ti Jéhovah la?

⁸ David akomanse lani ti bâ ambeni ye so afa na lo so kua ti lo ayeke buba lani songo ti kamarade so lo yeke na ni na Jéhovah. Lo tene: “Na ngoi ti abungbi nga même na fango tënë, mbi yeke pensé na ndö ti akpale ti place ti kua. Mbi yeke wara lani gbâ ti nginza, me mbi komanse lani ti gi bê ti mbi ahon ndö ni nga mbi na wali ti mbi e komanse ti wara akpale na yâ ti mariage ti e.

⁹ David aga ti bâ so a lingbi lo kiri lo bâ aye so ayeke akota ye na yâ ti fini ti lo. Lo tene: “Mbi mû lani mbeni kpengba desizion ti leke  dutingo ti mbi.” David aye lani ti changé kapa ti kua ti lo, na lo fa kapa so lo leke na patron ti lo. Ye ti peko ni ayeke lani nyen? David aperdre kua ti lo. Lo sara ye lani tongana nyen? Lo tene: “Gï na ndade ni, mbi sû demande ti sara kua ti pionnier auxiliaire sân ti fâ yâ ni.” Ti tene David na wali ti lo awara aye so ala bezoin ni, ala komanse ti sara kua ti sukulango yâ ti da. Ambeni ngoi na pekoni, lo komanse kua ti pionnier permanent na pekoni wali ti lo nga aga pionnier permanent. Couple so asoro ti sara mbeni kua ti nginza so azo mingi aye ti sara ni ape, me mara ti kua so ala yeke sara la ayeke kota ye na ala ape. Atâa so nginza so ala yeke wara ayeke kete mingi na ti so ala yeke wara lani kozo, nze oko oko ala yeke na nginza so ala bezoin ni. Ala ye ti zia Jéhovah kozo, na ala bâ so lo yeke bâ lege ti azo so azia aye ti Royaume kozo.—Mat. 6:31-33.

10. E lingbi ti bata bê ti e tongana nyen?

¹⁰ Atâa e yeke na aye ti sese mingi wala pëpe, e doit ti bata bê ti e. E yeke bata ni tongana nyen? Gi pëpe ti ndoye nginza. Na ndö ni, zia pëpe si kua ti nginza ti mo aga ye so ayeke kota mingi na mo ahon kua ti Jéhovah. Tongana nyen la mo lingbi ti hinga ni? Bâ ambeni hunda so mo lingbi ti hunda na terê ti mo: ‘Mbi yeke pensé ka fani mingi na kua ti nginza ti mbi na ngoi so mbi yeke na bungbi wala na fango tënë? Mbi yeke gi bê ti mbi lakue na ndö ti warango gbâ ti nginza na yâ ti angoi so ayeke ga? Nginza nga na aye ti sese ayeke ga na akpale na popo ti mbi na wali wala koli ti mbi? Mbi yeke duti nduru ti sara mbeni kua ti nginza so azo aye ti sara ni ape si mbi mû ngoi mingi ndali ti kua ti Jéhovah?’ (1 Tim. 6:9-12). Na ngoi so e yeke gbu li na ndö ti ahunda so, zia e girisa ape so Jéhovah aye e mingi nga lo mû zendo so na azo so ayeke voro gï lo oko: “Mbi yeke zia ande mo lâ oko pëpe nga mbi yeke girisa mo lâ oko pëpe.” Ndani la bazengele Paul atene: “Ala zia si ndoye ti nginza aduti na yâ ti sarango ye ti ala pëpe.”—aHéb. 13:5, 6.

11. Nyen la angia alingbi ti sara na zo?

¹¹ Jéhovah aye ti tene gigi anzere na e, na angia alingbi ti sara si gigi anzere na e. Bible atene so “tongana zo ate ye, lo nyon ye nga lo bâ nzoni na peko ti angangu kua ti lo, mbeni ye ti nzoni ti hon ni ayeke dä pëpe.” (Zo-ti. 2:24). Ye oko, mingi ti angia ti dunia so alingbi ti sara sioni na e. A buba nzoni  sarango ye ti azo, a pusu azo ti kanga lê na ndö ti aye so Bible ake wala même ti ye ni.

12. Ti gue oko na 1 aCorinthien 10:21, 22, ngbanga ti nyen la a lingbi e soro angia ti e nzoni?

¹² E ye ti voro gï Jéhovah oko, tongaso e lingbi pëpe ti te kobe na “table ti Jéhovah” nga na “table ti asioni yingo”. (Diko 1 aCorinthien 10:21, 22.) Mingi ni, tengo kobe na mbeni zo aye ti fa so mo na zo ni ayeke na songo ti kamarade. Tongana e soro angia so amaï sarango ye ti ngangu na zo, sarango yorö, lango-sioni wala ambeni sioni nzara nga na bango ndo, andâ e na awato ti Nzapa e yeke te kobe so ala tö ni. Ye so asara si e yeke sara sioni na e wani nga e yeke buba songo ti e na Jéhovah.

13-14. Ti gue oko na Jacques 1:14, 15, ngbanga ti nyen la a lingbi e sara hange na angia so e yeke soro? Mû mbeni tapande ti fa ni.

¹³ Na lege wa la e lingbi ti haka ngia na vrai kobe? Tongana e yeke te ye, e la e yeke soro ye so e yeke zia na yanga ti e. Me tongana e mene kobe ni awe e lingbi pëpe ti soro ye so kobe ni ayeke sara na yâ ti terê ti e. Nzoni kobe ayeke sara nzoni mingi na seni ti e; sioni kobe ayeke sara sioni na seni ti e. E yeke bâ ye ti peko ni na lê ni lê ni ape me ambeni ngoi na pekoni e yeke bâ ni polele.

¹⁴ Legeoko nga, na ngoi so e yeke soro angia ti e, e lingbi ti soro aye so e yeke yôro na yâ ti li ti e. Me na pekoni, angia so e soro ayeke sara ye na ndö ti fason so e yeke pensé na ni nga na atënë ti bê ti e. Nzoni ngia ayeke sara nzoni na e; sioni ngia ayeke sara sioni na e. (Diko Jacques 1:14, 15.) E yeke bâ aye ti peko ti asioni ngia na lê ni lê ni ape me ambeni ngoi na pekoni e yeke bâ ni polele. Ndani la Bible awa e, atene: “Zia ala handa terê ti ala pëpe: A yeke he ka Nzapa pëpe. Ndali ti so ye so mbeni zo ayeke lu, gï ni la lo yeke ko ni ande. Zo so ayeke lu ye ndali ti mitele, lo yeke ko ande ye so abuba awe so alondo na mitele ti lo.” (aGal. 6:7, 8). A yeke tâ kota ye mingi ti ke angia kue so amaï aye so Jéhovah ake.​—Ps. 97:10.

15. Cadeau wa la Jéhovah amû na e ti sara kua na ni?

¹⁵ A nzere na awakua ti Jéhovah mingi ti bâ JW Télédiffusion, pendere télévision ti e so ayeke na ndö ti Internet. Marilyn, mbeni ita-wali, atene: “JW Télédiffusion amû maboko na mbi ti duti zo so ayeke na ngia mingi, mbi lingbi ti bâ aye kue so ayeke na ndö ni ndali ti aye ni kue ayeke nzoni. Tongana mbi bâ so mbi yeke gï mbi oko wala mbi découragé, mbi yeke gi mbeni diskur wala mbeni kapa ti Vorongo Nzapa na ndapre so akpengba zo ti bâ ni. A sara si mbi bâ so mbi ga nduru mingi na Jéhovah nga na bungbi ti lo. Akobe ti yingo so ayeke na ndö ti JW Télédiffusion achangé gigi ti mbi kue.” Mo yeke bâ nzoni na lege ti cadeau so alondo na Jéhovah so? Na ndö ti so fini kapa ti JW Télédiffusion ayeke sigi nze na nze, gbâ ti aye ti mango ni, avidéo nga na abia so anzere mingi ayeke na ndö ti JW Télédiffusion na zo alingbi ti mä ni nga ti bâ ni na ngoi kue.

16-17. Ngbanga ti nyen la a lingbi e hinga nzoni ngoi oke la e mû ti sara na angia? E lingbi ti sara tongana nyen ti hinga ni?

¹⁶ A lingbi e sara hange na mara ti angia so e yeke sara nga na ngoi so e mû ti sara na ni. Tongana e sara hange ape, ngoi so e yeke mû ti sara na angia alingbi ti duti mingi ahon ngoi so e yeke mû ti sara na Jéhovah. A yeke ngangu na azo mingi ti hinga ngoi oke la ala doit ti mû ti sara na ngia. Abigaïl, mbeni ita-wali so ayeke na ngu 18, atene: “Tongana mbi bâ télé na peko ti so mbi hunzi kua na mbeni lango so mbi yeke na akua mingi ayeke mû maboko na mbi ti yapu. Me tongana  mbi sara hange ape, mbi lingbi ti mû ngoi mingi ti bâ télé.” Samuel, mbeni ita-koli so ayeke maseka, atene: “Na ambeni ngoi mbi yeke bâ gbâ ti anduru vidéo na ndö ti Internet. Mbi komanse gï na nduru vidéo oko, na sân ti hinga, mbi sara l’heure ota wala osio na bango avidéo ni.”

¹⁷ Nyen la mo lingbi ti sara si ngoi so mo mû ti sara na angia ahon ndö ni ape? Kozo ye ni ayeke ti gi ti hinga ngoi oke la mo yeke mû ka ti sara na angia. Gi ti hinga na yâ ti yenga oko ngoi oke la mo mû ti sara na angia. Sû na lê ti mbeni ye tongana calendrier ngbonga oke la mo mû ti bâ na télé, ti gue na ndö ti Internet nga ti sara na ajeu so ayeke na yâ ti téléphone wala tablette ti mo. Tongana mo bâ so mo mû ngoi mingi ndali ti angia, leke mbeni kapa ndali ti aye so mo yeke sara. Soro ngoi oke la mo yeke mû ti sara na aye so ayeke akota ye mingi kozo awe si mo soro ngoi so mo yeke sara na angia. Na pekoni, hunda Jéhovah ti mû maboko na mo ti sara ye alingbi na kapa so mo leke. Tongana mo sara tongaso, mo yeke wara ngoi nga na ngangu so mo bezoin ni ndali ti mandango Bible mo wani, vorongo Nzapa na yâ ti sewa, abungbi nga ndali ti kua ti fango tënë nga na fango ye. Peut-être mo yeke gi nga bê ti mo ape ndali ti ngoi so mo mû ndali ti angia.

18-19. Tongana nyen la e lingbi ti fa so e voro gï Jéhovah oko?

¹⁸ Na peko ti so bazengele Pierre asû mbeti na ndö ti hunzingo ti dunia ti Satan nga na fini dunia so ayeke ga, lo tene: “Tongaso, aita so mbi ndoye ala mingi, so ala yeke ku aye so, ala sara ngangu kue ti tene na nda ni lo wara ala na saleté na terê ti ala pëpe, na sioni ye na terê ti ala pëpe nga na yâ ti siriri.” (2 Pi. 3:14). Tongana e sara ye alingbi na wango so nga e sara kue ti sara ye na yâ ti fini ti e nga ti voro Jéhovah tongana ti so lo ye, e yeke fa so e voro gï lo oko.

¹⁹ Satan nga na dunia ti lo ayeke ngbâ ti handa e ti changé aye so ayeke akota ye na lê ti e (Luc 4:13). Me atâa akpale wa la e wara, e yeke zia pëpe si mbeni zo wala mbeni ye amû place ti Jéhovah na yâ ti bê ti e. E leke na bê ti e ti ngbâ ti mû na Jéhovah ye so gï lo oko la lo lingbi na ni so ayeke ti voro gï lo oko awe.