1. Tongana nyen la 2 aCorinthien 3:1-3 amû maboko na e ti bâ na nene ni pasa so e yeke na ni ti manda Bible na azo juska na batême? Bâ foto ti couverture ni.

TONGANA mo bâ mbeni zo so ayeke manda Bible so ayeke na yâ ti congrégation ti mo awara batême, a yeke sara mo tongana nyen? Kite ayeke da ape so terê ti mo ayeke nzere mingi (Mat. 28:19). Nga tongana mo la mo manda Bible na zo ni so, terê ti mo ayeke nzere mingi na bango lo na warango batême ni (1 aThes. 2:19, 20). Adisciple so awara batême fini fini ayeke tongana mbeni mbeti so na yâ ni a sara nzoni tënë ti azo so amanda Bible na ala nga na ti congrégation ni kue.—Diko 2 aCorinthien 3:1-3.

2. (a) Kota hundango tënë wa la a lingbi e bâ ni? Ngbanga ti nyen la a lingbi e bâ ni? (b) Ti manda Bible na mbeni zo aye ti tene nyen? (Bâ kete tënë na gbe ni.)

² A nzere na e mingi ti bâ so na yâ ti angu osio so ahon, e yeke manda Bible na azo * ahon kutu bale-oko tongaso nze oko oko na yâ ti dunia kue. Gi na yâ ti a-oko ngu ni so, azo ahon 280 000 ayeke wara batême ngu oko oko na ala ga a-Témoin ti Jéhovah nga afini disciple ti Jésus Christ. Aye wa la e peut ti sara ti aidé mingi ti azo kutu mingi so ayeke manda Bible so ti wara batême? Na ngoi kue so Jéhovah angbâ ti kanga bê ti mû lege na azo ti wara ngoi ti ga adisciple ti Christ, e ye ti sara ye  kue so e peut ti sara ti mû maboko na azo so e manda Bible na ala ti gue na li ni hio nga ti wara batême ndali ti so ngoi ni angbâ mingi ape.—1 aCor. 7:29a; 1 Pi. 4:7.

3. Nyen la e yeke bâ ande na yâ ti article so na ndö ti mandango Bible na azo?

³ Ndali ti so a yeke kota ye mingi ti sara si azo aga adisciple laso, Bebungbi ahunda na afiliale ti bâ tongana nyen la a lingbi ti mû maboko na azo mingi so ayeke manda Bible ti gue na li ni juska na batême. Na yâ ti article so nga na ti peko, e yeke bâ ye so e lingbi ti manda na lege ti apionnier, amissionnaire nga na asurveillant ti circonscription so aninga na yâ ti kua ti ala * (aProv. 11:14; 15:22). Ala fa ye so e so e yeke manda Bible na azo nga na azo so ayeke manda Bible ni alingbi ti sara tongaso si zo so ayeke manda Bible ni alingbi ti wara aye ti nzoni dä mingi. Na yâ ti article so, e yeke bâ ande aye oku so azo kue so ayeke manda Bible adoit ti sara tongaso si ala ngbâ ti gue na li ni juska na batême.

4. Nyen la a lingbi e hinga na ndö ti mandango Bible na zo gï na yâ ti kete ngoi?

⁴ Aita ti e mingi ayeke manda Bible na azo gï na yâ ti kete ngoi. Atâa so a yeke nzoni kode ti zia nzara ti mandango Bible na yâ ti zo, mingi ni lisoro ni ayeke ninga ape nga peut-être ayeke sara ni yenga oko oko ape. Ti kiri ti maï nzara ti zo ni ambeni ita ayeke mû sango na ndö ti zo ni, nga na pekoni ala yeke iri lo na téléphone wala ala yeke tokua na lo message ti fa na lo ambeni pensé ti Bible. Peut-être mara ti lisoro tongaso ayeke ngbâ ti gue teti ambeni nze, sân ti tene aga mbeni étude so ayeke gue na li ni. Eskê mbeni étude alingbi biani ti gue na li ni ti mû terê ti lo na Nzapa nga ti wara batême, tongana lo mû ngoi nga na ngangu ti lo mingi ape ti manda na Bible? A lingbi ti duti ngangu.

5. Jésus atene nyen na Luc 14:27-33 so e lingbi ti sara kua na ni ti mû maboko na azo so e yeke manda Bible na ala?

⁵ Jésus asara kua lani na mbeni tapande ti fa ye so mbeni zo adoit ti sara tongana lo ye ti ga disciple ti lo. Lo sara tënë ti mbeni zo so aye ti leke mbeni tour nga na ti mbeni gbia so aye ti gue na bira. Lo tene so zo so aye ti sara mbeni tour adoit ti ‘duti kozoni ti diko ngere ni’ ti bâ wala lo lingbi ti hunzi tour ni nga gbia ni adoit ti ‘duti kozoni ti mä terê na azo ti lo’ ti bâ wala aturugu ti lo alingbi ti sö benda na yâ ti bira ni. (Diko Luc 14:27-33.) Jésus aye ti fa so a lingbi zo so aye ti ga disciple ti lo agbu li ti lo nzoni kozoni na ndö ti ye so lo doit ti  sara ti mû peko ti lo. Ndani la, a lingbi e wa azo so e yeke manda Bible na ala ti sara étude ni yenga oko oko. E lingbi ti sara ni tongana nyen?

6. Nyen la e lingbi ti sara ti sara a-étude so ayeke gue na li ni?

⁶ Kozo ye so e lingbi ti sara ayeke ti zia mbeni ngoi na ndö ti kete ngoi so e mû kozo ti sara na étude ni. Lakue na ngoi so mo gue ti bâ zo ni mo lingbi peut-être ti sara lisoro na lo na ndö ti aversê use ahon ti sara lisoro na lo na ndö ti versê oko. Tongana a nzere na zo ni ti tene mo ninga ahon ti kozo nga tongana kozo ala yeke sara étude ni gï na lutingo ni, mo lingbi ti hunda lo wala mbeni place ayeke dä ti tene ala duti si ala ngbâ ti sara lisoro ni. Kiringo tënë ti zo ni ayeke fa wala lo bâ mandango Bible ni na nene ni. Ti mû maboko na lo ti gue na li ni hio, mo lingbi même ti hunda lo wala lo ye ti sara étude ni fani use yenga oko oko. Ye oko, mo bezoin ti sara ambeni ye encore na ndö ti so mo yeke sara étude ni fani oko wala use yenga oko oko so.

7. Tongana nyen la mbeni wafango ye alingbi ti leke terê ti lo nzoni kozo ti gue ti sara étude na zo?

⁷ So mo yeke mbeni wafango ye, a lingbi mo leke terê ti mo nzoni kozo ti gue ti sara étude na zo. Kozoni, diko mbeti so mo yeke sara étude na zo ni na yâ ni nga bâ aversê so ayeke dä na yâ ti Bible. Gi ti hinga akota tënë ni polele na yâ ti li ti mo. Gbu li na ndö ti kota li ti tënë ni, akete li ti tënë ni, ahundango tënë ti mandango ye ni, aversê so a zia dä diko, afoto nga na avidéo so peut-être afa ye na ndö ti tënë ni. Na pekoni, pensé na ndö ti zo so mo yeke sara étude ni na lo nga tongana nyen la mo lingbi ti fa nda ti ye ni na mbeni lege so akpengba ape nga polele, tongaso si lo lingbi ti mä yâ ni hio nga ti sara ye alingbi na ni.—Néh. 8:8; aProv. 15:28a.

8. Atënë ti bazengele Paul na aColossien 1:9, 10 afa na e nyen na ndö ti aye so e lingbi ti tene na yâ ti sambela so e yeke sara ndali ti a-étude ti e?

⁸ Na ngoi so mo yeke leke terê ti mo, sambela Jéhovah ndali ti wamandango ye ni nga na abezoin ti lo. Hunda Jéhovah ti mû maboko na mo ti sara kua na Bible ti fa ye na mbeni lege so alingbi ande ti ndu bê ti zo ni. (Diko aColossien 1:9, 10.) Gi ti bâ kozo aye so alingbi ti duti ngangu na wamandango ye ni ti mä yâ ni wala ti yeda na ni. Girisa ape so ye so mo yeke gi ayeke ti mû maboko na lo ti gue na li ni ti wara batême.

9. Tongana nyen la mbeni wafango ye alingbi ti mû maboko na étude ti lo ti leke terê ti lo?

 ⁹ E yeke na beku so tongana a sara étude na mbeni zo lakue lakue ayeke mû maboko na lo ti kiri singila ndali ti aye kue so Jéhovah na Jésus asara nga lo yeke ye ti manda ye mingi ahon ti kozo (Mat. 5:3, 6). Ti tene mbeni wamandango Bible awara aye ti nzoni mingi na lege ti étude ti lo, a lingbi lo zia li ti lo kue na ndö ti ye so lo yeke manda. Ti mû maboko na lo ti sara ni, fa na lo so a yeke kota ye ti leke terê ti lo kozo ndali ti étude ti lo oko oko. Ti leke terê ti lo, lo bezoin ti diko ye ti manda ni kozo nga ti gbu li ti lo ti bâ tongana nyen la lo lingbi ti sara ye alingbi na ye so lo manda. Tongana nyen la mo lingbi ti mû maboko na lo ti leke terê ti lo? Mo na lo alingbi ti leke mbeni ye ti manda ni ti fa na lo tongana nyen ti sara ni. * Fa na lo tongana nyen ti wara akiringo tënë ti ahunda ni nga fa na lo so tongana lo sû kamba na gbe ti akota tënë ni ayeke mû maboko na lo ti dabe ti lo na ni. Na pekoni hunda na lo ti kiri tënë na lege ti atënë ti lo wani. Tongana lo sara ni, mo yeke hinga wala lo mä yâ ti ye so lo manda so nzoni. Ye oko, mbeni ye nde ayeke nga dä so mo lingbi ti wa lo ti sara.

10. Ngbanga ti nyen la a yeke kota ye ti diko Bible lâ na lâ? Nyen la a lingbi mbeni étude asara ti wara aye ti nzoni mingi na lege ti dikongo Bible?

¹⁰ Mbeni étude ayeke wara ye ti nzoni tongana lo sara nga ambeni ye lâ na lâ. A lingbi lo sara nga lisoro na Jéhovah. Na lege wa? Na lege so lo yeke mä Jéhovah nga lo yeke sara tënë na Lo. Lo lingbi ti mä Nzapa na lege ti dikongo Bible lâ na lâ (Jos. 1:8; Ps. 1:1-3). Fa na lo tongana nyen ti sara kua na “Programme ti dikongo Bible” so a peut ti imprimé ni so ayeke na ndö ti site jw.org. * Ti mû maboko na lo ti wara ye ti nzoni mingi na lege ti dikongo Bible ti lo, wa lo ti gbu li na ndö ti ye so Bible afa na lo na ndö ti Jéhovah nga tongana nyen la lo lingbi ti sara ye alingbi na ni na yâ ti fini ti lo.—Kus. 17:11; Jacq. 1:25.

11. Tongana nyen la mbeni étude alingbi ti manda ti sambela nzoni? Ngbanga ti nyen la a yeke kota ye ti tene lo sambela Jéhovah lakue?

¹¹ Fa na étude ti mo ti sara tënë na Jéhovah na lege so lo sambela lo lâ na lâ. Sambela Jéhovah na bê ti mo kue na tongo nda ti étude ni nga na nda ni, nga di iri ti étude ni na yâ ti asambela ni. Tongana lo mä tongana nyen la mo yeke sambela, lo yeke manda tongana nyen ti sambela Jéhovah na bê ti lo kue na iri ti Jésus  Christ (Mat. 6:9; Jean 15:16). Imaginé tongana nyen la ti diko Bible lâ na lâ (mango Jéhovah) nga ti sambela (sarango tënë na Jéhovah) ayeke mû maboko ande na étude ti mo ti ga nduru mingi na Nzapa (Jacq. 4:8). Tongana lo sara ni lâ na lâ, a yeke mû maboko na lo ti gue na li ni ti mû terê ti lo na Nzapa na ti wara batême. Mbeni ye nde wa la alingbi ti mû maboko na lo?

12. Tongana nyen la mbeni wafango ye alingbi ti mû maboko na mbeni étude ti lë songo na Jéhovah?

¹² A lingbi ye so mbeni étude amanda angbâ gï na yâ ti li ti lo ape me a lingbi andu nga bê ti lo. Ngbanga ti nyen? Ngbanga ti so bê ti e, so ti tene anzara ti e, atënë ti bê ti e nga na apensé ti e, ayeke pusu e ti sara ye. Jésus afa lani aye mingi na azo na ala ye ti manda aye na mbage ti lo. Me azo amû lani peko ti lo ndali ti so lo ndu nga bê ti ala (Luc 24:15, 27, 32). A lingbi étude ti mo ahinga so Jéhovah ayeke dä biani nga so lo lingbi ti lë songo na lo na ti bâ lo tongana Babâ ti lo, Nzapa ti lo nga Kamarade ti lo (Ps. 25:4, 5). Na ngoi so mo yeke manda ye na étude ni, gboto lê ti lo na ndö ti apendere sarango ye ti Nzapa ti e (Ex. 34:5, 6; 1 Pi. 5:6, 7). Sara ni na angoi kue so mo yeke manda ye na lo. Mû maboko na lo ti bâ na nene ni apendere sarango ye ti Jéhovah: ndoye ti lo, nzoni bê ti lo nga so lo yeke bâ mawa ti zo. Jésus atene so ti “ndoye Jéhovah Nzapa ti mo” ayeke “commandement so ayeke kota ahon atanga ni kue” nga ayeke kozo commandement (Mat. 22:37, 38). Gi ti mû maboko na étude ni ti ndoye Jéhovah mingi.

13. Fa mbeni tapande so afa tongana nyen la mo lingbi ti mû maboko na mbeni étude ti hinga asarango ye ti Jéhovah.

¹³ Na ngoi so mo yeke fa ye na étude ti mo, fa na lo ndani so mo ye Jéhovah mingi. A lingbi ti mû maboko na lo ti hinga so a lingbi lo wani lo lë kpengba songo na Nzapa (Ps. 73:28). Na tapande, eskê na yâ ti mbeti so ala yeke manda ye dä mbeni mbage wala mbeni versê afa mbeni ye na ndö ti Jéhovah, na tapande, ndoye ti lo, ndara ti lo, mbilimbili ti lo wala ngangu ti lo so andu bê ti mo? Fa ni na étude ti mo nga fa na lo so a yeke mbeni ye so asara si mo ye Babâ ti e ti yayu. Ambeni ye ayeke nga dä so a lingbi a-étude kue asara tongaso si ala gue na li ni ti wara batême.

14. Nyen la aHébreu 10:24, 25 atene na ndö ti abungbi so alingbi ti mû maboko na mbeni étude ti gue na li ni?

¹⁴ E kue e ye ti tene a-étude ti e ague na li ni ti wara batême. Mbeni kpengba ye so e lingbi  ti sara ti mû maboko na ala ayeke ti wa ala ti gue na abungbi. Awafango ye so aninga na yâ ti kua ni atene so a-étude so ague na li ni hio ayeke ala so akomanse ti gue na abungbi hio (Ps. 111:1). Ambeni wafango ye afa na a-étude ti ala so, na ngoi ti bungbi, aye mingi ayeke dä so ala yeke manda so ala manda na ngoi ti étude ti ala ape. Diko na lo aHébreu 10:24, 25 na fa na lo ndani so a yeke nzoni lo ga na abungbi. Fa na lo vidéo E yeke sara abungbi ti e tongana nyen? * Mû maboko na lo ti leke na bê ti lo ti manke mbeni bungbi ape.

15. Nyen la e lingbi ti sara ti wa mbeni étude ti e ti ga lakue na abungbi?

¹⁵ Nyen la mo lingbi ti sara tongana étude ti mo ade aga na mbeni bungbi ape wala lo yeke ga lakue lakue ape? Fa na lo na ngia mbeni ye so mo manda na ngoi ti mbeni bungbi ade ti ninga ape. Tongana lo bâ so a nzere na mo ti gue na abungbi, peut-être lo yeke ye ti ga na abungbi. Mû na lo Tour ti Ba Ndo wala Mbeti ti Bungbi: Kusala ti e nga na gigi ti e ti Chrétien so e yeke manda ye dä. Fa na lo ye so e yeke bâ ni na bungbi ti peko, nga hunda lo mbage wa la agbu bê ti lo mingi. Ye kue so étude ti mo ayeke bâ nga lo yeke mä ande na ngoi ti kozo bungbi ti lo ayeke duti nzoni mingi ahon ti mbeni bungbi ti vorongo nzapa nde (1 aCor. 14:24, 25). Lo yeke tingbi na azo so lo lingbi ti mû nzoni tapande ti ala nga so alingbi ti mû maboko na lo ti gue na li ni ti wara batême.

16. Aye wa la e doit ti sara ti mû maboko na mbeni étude ti gue na li ni juska na batême?

¹⁶ Aye wa la e lingbi ti sara ti mû maboko na étude ti e ti gue na li ni juska na batême? E lingbi ti mû maboko na lo ti bâ étude ni na nene ni na lege so e wa lo ti sara ni yenga oko oko na ti leke terê ti lo lakue ndali ni. E wa lo nga ti sara lisoro lâ na lâ na Jéhovah nga ti lë songo lo wani na Lo. E zia nzara ti guengo na abungbi na yâ ti lo. (Bâ encadré “ Aye so mbeni étude adoit ti sara.”) Ye oko, article ti peko ayeke fa nga ambeni ye oku so azo so ayeke sara étude na azo alingbi ti sara ti mû maboko na ala ti gue na li ni juska na batême.