1. E hinga tongana nyen so kua ti sarango adisciple ayeke mbeni kua so ayeke sö fini ti azo?

KUA ti sarango adisciple ayeke mbeni kua so ayeke sö fini ti azo. E hinga ni tongana nyen? Na ngoi so Jésus amû commandement so ayeke na Matthieu 28:19, 20, lo tene: ‘Ala gue, ala sara si azo aga adisciple. Ala batize ala.’ Eskê a yeke kota ye ti wara batême? A lingbi e wara batême tongana e ye ti sö fini ti e. Mbeni zo so aye ti wara batême adoit ti mä na bê so lo lingbi ti wara fini ti lakue lakue gï ndali ti so Jésus akui ndali ti e nga a zingo lo na kuâ. Ndani la bazengele Pierre atene na amba ti lo aChrétien, atene: ‘Batême ayeke sö ala fadeso na lege ti zingongo ti Jésus Christ na kuâ.’ (1 Pi. 3:21). Tongaso, na ngoi so mbeni fini disciple awara batême, lo lingbi ti duti na beku ti wara fini ti lakue lakue.

2. Ti gue oko na 2 Timothée 4:1, 2, a lingbi e so e yeke fa ye e gi ti sara nyen?

² Ti sara si azo aga adisciple, a lingbi e gi ti duti na “kode ti fa ye na zo.” (Diko 2 Timothée 4:1, 2.) Ngbanga ti nyen? Ngbanga ti so Jésus amû yanga na e, lo tene: ‘Ala gue, ala sara si azo aga adisciple. Ala fa ye na ala.’ Bazengele Paul atene na e ti “ngbâ gï” na yâ ti kua so, ‘ndali ti so na sarango tongaso e yeke sö ande e wani nga na ala so ayeke mä e.’ Tongaso, Paul ayeke na nzoni raison ti tene: “Mo sara hange lakue na . . . fango ye ti mo.” (1 Tim. 4:16). So ti sara adisciple a lingbi e fa ye na azo, e ye ti fa ye nzoni mingi.

3. Na yâ ti article so, nyen la e yeke bâ na ndö ti sarango étude na azo?

³ E yeke manda Bible na azo kutu mingi na yâ ti dunia. Me  tongana ti so article so ahon atene, e ye ti hinga tongana nyen la e lingbi ti mû maboko na mingi ti ala ti wara batême ti ga adisciple ti Jésus Christ. Na yâ ti article so, e yeke bâ ambeni ye oku so a lingbi azo kue so ayeke sara étude na azo asara ti mû maboko na ala ti gue na li ni juska na batême.

4. Ngbanga ti nyen la a lingbi mbeni wafango ye asara tënë ahon ndö ni ape na ngoi so lo yeke sara mbeni étude? (Bâ kete tënë na gbe ni.)

⁴ E ye mingi aye so ayeke na yâ ti Bible so e yeke fa ni na azo. Tongaso, peut-être e ye ti sara tënë mingi na ndö ni. Ye oko, atâa e yeke mû li ni na Mandango Tour ti Ba Ndo, na Mandango Bible ti Congrégation wala e yeke sara étude na mbeni zo, a lingbi e sara tënë ahon ndö ni ape. Ti tene mbeni wafango ye asara kua na Bible na ngoi so lo yeke fa ye, a lingbi lo sara tënë ahon ndö ni ape nga lo gi pëpe ti fa aye kue so lo hinga na ndö ti mbeni versê wala mbeni tënë * (Jean 16:12). Haka hingango ye so mo yeke na ni lani na ngoi ti batême ti mo na ti so mo yeke na ni laso. Na ngoi ti batême ti mo lani, peut-être mo hinga gï akozo fango ye ti Bible (aHéb. 6:1). Mo manda aye so mo hinga ni laso na yâ ti angu mingi, tongaso gi pëpe ti fa na mbeni fini wamandango ye aye kue gï na yâ ti ngoi oko.

5. (a) Ti gue oko na 1 aThessalonicien 2:13, nyen la e ye ti tene étude ti e ahinga? (b) Tongana nyen la e lingbi ti wa lo ti sara tënë ti aye so lo yeke manda na azo?

⁵ E ye ti tene étude ti e ahinga so aye so lo yeke manda alondo na Bible. (Diko 1 aThessalonicien 2:13.) E lingbi ti sara ni tongana nyen? Wa lo ti sara tënë ti aye so lo yeke manda na azo. Ahon ti tene lakue mo fa nda ti aversê na lo, hunda na lo ti fa nda ti ambeni na mo. Mû maboko na lo ti hinga tongana nyen la aye so Bible atene abâ lo. Hunda na lo atënë so alingbi ti mû maboko na lo ti fa apensé ti lo na ndö ti aversê so lo diko (Luc 10:25-28). Na tapande, hunda lo: “Tongana nyen la versê so afa na mo mbeni sarango ye ti Jéhovah?” “Tongana nyen la tâ tënë ti Bible so alingbi ti mû maboko na mo?” “Mo pensé nyen na ndö ti ye so mo londo ti manda so?” (aProv. 20:5). A yeke pëpe gbâ ti aye so zo ni ahinga la ayeke kota ye, me a yeke yengo so lo ye na aye so lo hinga nga sarango ye alingbi na aye ni.

6. Ngbanga ti nyen la peut-être a yeke nzoni ti tene e na mbeni wafango ye so ahinga ti fa ye nzoni e gue e sara étude ti e?

⁶ Eskê mo na mbeni ita so ahinga ti fa ye nzoni ague asara étude ti mo lâ oko awe?  Tongana a yeke tongaso, mo lingbi ti hunda lo ti fa na mo pensé ti lo na ndö ti fason so mo sara na étude ni nga ti hunda lo wala mo sara kua nzoni na Bible. Nga, hunda lo ti bâ wala lo pensé so zo ni amä yâ ti ye so lo manda so. Tongana mo ye ti fa ye nzoni mingi, a lingbi mo sara terê ti mo kete. (Bâ Kusala 18:24-26.) Tongana teti yenga oko wala ahon ni mo yeke duti dä ape, mo lingbi ti hunda na lo ti sara étude ni na place ti mo. A yeke sara si zo ni asara étude ti lo lakue nga lo yeke hinga so étude ti lo ayeke kota ye. Tene lâ oko ape so a yeke gï étude ti mo na mbeni zo nde apeut ti sara ni ape. Mo ye ye so ayeke sara nzoni mingi na étude ti mo, tongaso si lo lingbi ti ngbâ ti manda aye mingi na ndö ti tâ tënë.

7. Nyen la ayeke sara si aye so étude ti mo ayeke manda anzere na lo?

⁷ A lingbi étude ti mo abâ so mo ye atâ tënë so ayeke na yâ ti Bible nga mo mä na bê na ni (1 aThes. 1:5). A yeke sara peut-être si aye so lo yeke manda anzere na lo. Peut-être mo lingbi ti fa na lo tongana nyen la sarango ye alingbi na amama-ndia ti Bible amû maboko na mo. A yeke sara si lo hinga so anzoni wango so ayeke na yâ ti Bible alingbi nga ti mû maboko na lo.

8. Ambeni ye nde wa la mo lingbi ti sara ti mû maboko na étude ti mo? Mo yeke sara ni ngbanga ti nyen?

⁸ Na ngoi ti étude ni, fa na lo atapande ti azo so awara mara ti akpale so lo yeke na ni nga so ala hon ndö ni. Mo na mbeni ita so tapande ti lo alingbi ti mû maboko na étude ni alingbi ti gue ti sara ni. Wala mo lingbi ti wara atapande ti aita, so akpengba zo, na ndö ti site jw.org na yâ ti molongo ti a-article so li ni ayeke “Bible achangé fini ti azo.” * Mara ti a-article so nga na avidéo so ayeke mû maboko na étude ti mo ti hinga so a yeke na lege ti ndara ti sara ye alingbi na amama-ndia ti Bible na yâ ti fini ti lo.

9. Tongana nyen la mo lingbi ti wa étude ti mo ti sara tënë ti aye so lo yeke manda na azo ti sewa ti lo nga na akamarade ti lo?

⁹ Tongana zo ni asara mariage wala lo yeke vivre na mbeni koli wala mbeni wali, eskê koli ti lo wala wali ti lo nga ayeke sara étude? Tongana lo yeke sara étude ape, tisa lo ti sara étude ni legeoko na ala. Wa étude ti mo ti sara tënë ti aye so lo yeke manda na azo ti sewa ti lo nga na akamarade ti lo (Jean 1:40-45). Mo yeke sara ni tongana nyen? Mo lingbi ti hunda  lo: “Tongana nyen la mo yeke fa tâ tënë so na azo ti sewa ti mo?” wala “Versê wa la mo yeke sara kua na ni ti fa na mbeni kamarade ti mo so tënë so ayeke tâ tënë?” Na sarango tongaso, mo yeke fa na étude ti mo ti duti mbeni wafango ye. Na ngoi so lo lingbi ti fa tënë tongana mbeni wafango tënë so ade awara batême ape, lo lingbi ti komanse ti sigi na fango tënë. Mo lingbi ti hunda lo wala lo hinga mbeni zo so aye ti sara étude. Tongana zo ni ayeke dä, gi ti wara terê na lo hio nga tene na lo so mo ye ti manda Bible na lo. Fa na lo vidéo E yeke manda Bible na azo tongana nyen? *

10. Tongana ti so 1 aThessalonicien 2:7, 8 afa, tongana nyen la mbeni wafango ye alingbi ti mû tapande ti Paul?

¹⁰ A lingbi awafango ye apensé na a-étude ti ala. Ala bâ ala tongana azo so alingbi ti ga ande aita ti ala. (Diko 1 aThessalonicien 2:7, 8.) A yeke kete ye na ala ape ti zia lege ti akamarade ti ala ti dunia so nga ti sara achangement kue so a lingbi ala sara ti sara na Jéhovah. A lingbi e mû maboko na ala ti wara atâ kamarade na yâ ti congrégation. Duti kamarade ti étude ti mo, mû ngoi ti duti na lo gï na ngoi ti étude ape me nga na ambeni ngoi nde. Tongana mo iri lo na téléphone, mo tokua na lo message wala mo sara nduru vizite na lo na lango ti étude ni ape, mo yeke fa na lo so mo pensé na lo mingi.

11. Nyen la e ye ti tene a-étude ti e awara na yâ ti congrégation? Ngbanga ti nyen?

¹¹ Mbeni mato atene: “Ti bata mbeni molenge, a bezoin mungo maboko ti azo kue ti mbeni kete kodro.” E lingbi ti tene: “Ti sara mbeni disciple, a bezoin mungo maboko ti azo kue ti mbeni congrégation.” Ndani la anzoni wafango ye ayeke mû maboko na a-étude ti ala ti hinga aita ti congrégation so alingbi ti mû maboko na ala ti ga nduru na Jéhovah. Na pekoni, a yeke nzere na ala ti sara songo na awakua ti Nzapa, na aita so alingbi ti mû maboko na ala ti lë kpengba songo ti kamarade na Jéhovah nga ti kpengba ala na ngoi so ala yeke na akpale. E ye ti tene zo oko oko kue so e sara étude na lo abâ so lo yeke na place na yâ ti congrégation nga so lo yeke mbage ti sewa ti e ti aita. E ye ti ga na lo na yâ ti sewa ti e ti aChrétien so aye terê. Na pekoni, a yeke duti ande ngangu na lo ape ti zia lege ti sarango songo na azo so ayeke mû maboko na lo ape ti ye Jéhovah (aProv. 13:20). Tongana angbene kamarade ti lo ake lo, lo yeke hinga so lo lingbi ti wara atâ kamarade na yâ ti bungbi ti Jéhovah.—Marc 10:29, 30; 1 Pi. 4:4.

12. Ngbanga ti nyen la a lingbi e sara tënë na étude ti e na ndö ti mungo terê na Nzapa nga na batême?

¹² Tene na étude ti mo polele so a yeke kota ye ti tene mbeni zo amû terê ti lo na Nzapa nga lo wara batême. Ndani so e yeke sara étude na mbeni zo ayeke ti mû maboko na lo ti sara na Jéhovah nga ti wara batême. Tongana zo ni asara étude a sara ambeni nze awe nga mbilimbili tongana lo komanse ti ga na abungbi, lo doit ti hinga so e ye ti mû maboko na lo ti ga Témoin ti Jéhovah.

13. Aye wa la mbeni étude adoit ti sara ti gue na li ni ti wara batême?

¹³ Aye mingi ayeke dä so mbeni étude so aye ti wara batême adoit ti sara. Kozoni, lo gi ti hinga Jéhovah, ti ye lo nga ti mä na bê na Lo (Jean 3:16; 17:3). Lo ga kamarade ti Jéhovah nga na ti aita ti congrégation (aHéb. 10:24, 25; Jacq. 4:8). Lo ke asioni sarango ye ti lo nga lo changé bê ti lo ndali ti asiokpari ti lo (Kus. 3:19). Nga, mabe ti lo apusu lo ti fa tâ tënë na azo (2 aCor. 4:13). Na pekoni, lo mû terê ti lo na Jéhovah nga lo fa ni na lege ti batême (1 Pi. 3:21; 4:2). Na lango ni so, terê ti azo kue ayeke nzere mingi. Na ngoi so lo yeke sara aye so lo bezoin ti sara ti wara batême, gonda lo mingi nga wa lo ti ngbâ ti sara ni.

14. Tongana nyen la mbeni wafango ye alingbi ti hinga so étude ti lo ayeke gue na li ni?

¹⁴ A lingbi e kanga bê na ngoi so e yeke mû maboko na mbeni étude ti e ti gue na li ni ti mû terê ti lo na Nzapa nga ti wara batême. Me a lingbi e gi ti hinga nga wala lo ye ti sara na Jéhovah Nzapa. Eskê mo bâ na yâ ti asarango ye ti lo ambeni ye so afa so lo yeke gi ti sara ye alingbi na acommandement ti Jésus? Wala lo ye gï ti hinga aye so Bible afa.

15. Aye wa la ayeke fa na mbeni wafango ye so mbeni étude ti lo ayeke gue na li ni?

¹⁵ Gi lakue ti bâ guengo na li ni ti étude ti mo. Na tapande, eskê lo yeke fa apensé ti lo na ndö ti Jéhovah? Lo yeke sambela Jéhovah? (Ps. 116:1, 2). A nzere na lo ti diko Bible? (Ps. 119:97). Lo yeke gue lakue na abungbi? (Ps. 22:22). Lo sara ambeni changement so lo bezoin ti sara na yâ ti fini ti lo? (Ps. 119:112). Lo komanse ti sara tënë ti aye so lo manda na azo ti sewa ti lo nga na akamarade ti lo? (Ps. 9:1). Nga kota ye ni, eskê lo ye ti ga Témoin  ti Jéhovah? (Ps. 40:8). Tongana lo sara aye so kue ape, na kode gi ti hinga ndani nga na pekoni sara lisoro na lo na ndö ni na nzoni bê me polele. *

16. Na ngoi wa la a yeke nzoni mo zia lege ti sarango étude na mbeni zo?

¹⁶ Ngoi na ngoi, gi ti bâ wala a yeke nzoni mo ngbâ ti sara étude na mbeni zo. Hunda terê ti mo: ‘Eskê étude ni ayeke leke terê ti lo pëpe ndali ti étude ni? Lo ye ti gue na abungbi ape? Lo ngbâ ti duti na asioni sarango ye? Lo ngbâ membre ti mbeni bungbi ti vorongo nzapa ti wataka?’ Tongana kiringo tënë ti ahunda so ayeke en, ti ngbâ ti sara étude na lo ayeke tongana ti so mo yeke gi ti fa na mbeni zo so aye ti tene ngu amouillé lo ape ti nagé. Tongana lo bâ na nene ni ape aye so lo yeke manda nga lo yeke nduru ti sara achangement ape, zia lege ti sarango étude ni.

17. Ti gue oko na 1 Timothée 4:16, nyen la a lingbi awafango ye kue asara?

¹⁷ E bâ kua ti e ti sarango adisciple na nene ni, nga e ye ti mû maboko na a-étude ti e ti gue na li ni juska na batême. Ndani la e yeke sara kua na Bible na ngoi so e yeke fa ye nga e yeke fa so e ye aye so e yeke fa nga e mä na bê na ni. E yeke wa étude ti e ti wara akamarade na yâ ti congrégation. E yeke sara tënë lakue na lo na ndö ti mungo terê na Nzapa nga na batême, nga ngoi na ngoi e yeke gi ti bâ guengo na li ni ti lo. (Bâ encadré “ Aye so mbeni wafango ye adoit ti sara.”) A nzere na e mingi so e lingbi ti mû mbage na yâ ti kua ti songo fini ti azo so. Zia e ngbâ ti leke na bê ti e ti sara kue ti mû maboko na a-étude ti e ti gue na li ni juska na batême.