1. Jésus atisa azo ti gingo asusu osio ti sara nyen? Nyen la ala sara na pekoni?

PIERRE, André, Jacques na Jean, so ayeke adisciple ti Jésus, ayeke lani azo so ayeke gi asusu na ala yeke kä ni. Imaginé tongana nyen la bê ti ala adö lani tongana ala mä tisango ndo ti Jésus so: “Ala mû peko ti mbi, na mbi yeke sara si ala ga azo ti gingo azo.” * Nyen la ala sara na pekoni? Bible atene: “Hio, ala zia agbanda ni, ala mû peko ti lo.” (Mat. 4:18-22). Desizion so achangé gigi ti ala biani biani. Ahon ti tene ala gbu avrai susu, ala ‘yeke gbu lani azo’. (Luc 5:10). Laso, Jésus atisa nga azo so aye biani tâ tënë ti gbu azo (Mat. 28:19, 20). Eskê mo yeda awe na tisango ndo ti Jésus ti ga zo ti gingo azo?

2. Ngbanga ti nyen la a lingbi e bâ desizion ti ga zo ti gingo azo tongana kete ye ape? Nyen la ayeke mû maboko na e ti mû desizion so?

² Peut-être mo manda Bible ague ayo awe na mo sara achangement na yâ ti fini ti mo. Fadeso, mo bezoin ti mû desizion ti ga mbeni wafango nzoni tënë wala pëpe. Tongana mbeto asara mo ti yeda na tisango ndo ti Jésus so, découragé ape. Peut-être mbeto asara mo ndali ti so mo hinga so desizion so ayeke kota mingi. Tâ tënë, Bible atene so Pierre na amba ti lo adö lani “hio” avrai gbanda ti ala azia. Ye oko, Pierre na ita ti lo ti koli amû desizion so gï hio tongaso ape. Ala hinga Jésus lani  nga ala yeda so lo yeke Messie ahon nze omene awe (Jean 1:35-42). Legeoko nga, peut-être mo manda aye mingi awe na ndö ti Jéhovah na Jésus, nga mo ye ti ngbâ ti ga nduru na Jéhovah. Me kozo si mo mû desizion ti ga mbeni wafango tënë, mo doit ti gbu li nzoni na ndö ni. Nyen la amû lani maboko na Pierre nga na ambeni zo ti mû desizion so?

3. Asarango ye wa la ayeke sara si mo ye mingi ti yeda na tisango ndo ti Jésus?

³ Akozo disciple ti Jésus aye lani mingi ti sara kua ti ala, ala hinga kua ti ala nzoni, ala sara ye na mbeto ape nga ala sara ngangu ti sara ye so ala doit ti sara. Kite ayeke dä ape so asarango ye so amû maboko na ala lani ti ga anzoni zo ti gingo azo. Article so ayeke fa na e tongana nyen la e lingbi ti duti na asarango ye so tongaso si e lingbi ti fa nzoni tënë nzoni nga e lingbi ti fa ye na azo nzoni.

4. Ngbanga ti nyen la Pierre ayeke gbu lani asusu?

⁴ Pierre ayeke gbu lani asusu ti bâ lege ti sewa ti lo, me lo sara ni pëpe gï ndali ti so a yeke kua ti lo. Na bango ni, Pierre aye lani gbungo asusu mingi (Jean 21:3, 9-15). Na ngoi so lo yeke sara kua ti gingo azo, lo komanse nga ti ye ni. Na mungo maboko ti Jéhovah, Pierre aga mbeni zo so asara kua so nzoni mingi.—Kus. 2:14, 41.

5. Ti gue oko na Luc 5:8-11, ngbanga ti nyen la Pierre asara lani mbeto? Nyen la alingbi ti mû maboko na e ti hon ndö ti mara ti apensé so?

⁵ E yeke fa tënë ndali ti so e ye Jéhovah; a yeke kota ye so la apusu e ti sara kua so. Ndoye ti e na mbage ti Jéhovah alingbi ti mû maboko na e ti hon ndö ti apensé kue so alingbi ti pusu e ti bâ so e lingbi na kua ni ape. Na ngoi so Jésus atisa lani Pierre ti ga zo ti gingo azo, lo tene na lo, lo tene: “Mo zia ti sara  mbeto.” (Diko Luc 5:8-11.) Mbeto agbu lani Pierre ape ndali ti ye so alingbi ti si tongana lo ga mbeni disciple. Me na ngoi so Jésus amû maboko na ala ti gbu gbâ ti asusu lani, bê ti Pierre adö lani ngangu mingi. Lo hinga so a yeke lani mbeni miracle la Jésus asara, ni la lo bâ so lo lingbi ape ti sara kua legeoko na Jésus. Legeoko tongana Pierre, peut-être mo nga kue mbeto asara mo na ngoi so mo hinga aye so a lingbi mbeni disciple ti Christ asara. Tongana a yeke tongaso, gi ti ndoye Jéhovah, Jésus nga na amba ti mo mingi, na pekoni bê ti mo ayeke pusu mo ti yeda na tisango ndo ti Jésus ti ga mbeni zo ti gingo azo.—Mat. 22:37, 39; Jean 14:15.

6. Ambeni raison nde wa la apusu e ti fa tënë?

⁶ Gbu li na ndö ti ambeni raison so apusu e ti fa tënë. E ye ti sara ye alingbi na commandement ti Jésus so: “Ala gue, ala sara si azo . . . aga adisciple.” (Mat. 28:19, 20). E yeke fa nga tënë ndali ti so “a sara pasi na [azo] nga yâ ti ala akangbi kirikiri” na ala bezoin mingi ti hinga tâ tënë na ndö ti Royaume (Mat. 9:36). Jéhovah aye ti tene mara ti azo nde nde kue awara tâ hingango ye na ndö ti tâ tënë na ala sö fini ti ala.—1 Tim. 2:4.

7. Tongana nyen la aRomain 10:13-15 afa so kua ti fango tënë ayeke kota ye?

⁷ Tongana e pensé na ye so fango tënë ti e alingbi ti sara na ndö ti azo, a yeke pusu e ti sara kua ti songo azo so. Nde na mbeni zo ti gbungo asusu so ayeke kä wala ayeke te asusu so lo gbu, e yeke “gbu” ti e azo ti sö fini ti ala.—Diko aRomain 10:13-15; 1 Tim. 4:16.

8-9. Nyen la mbeni zo ti gbungo asusu adoit ti hinga? Ngbanga ti nyen?

⁸ Na ngoi ti Jésus, mbeni zo ti Israël so ayeke zo ti gbungo asusu adoit ti hinga mara ti asusu wa la lo lingbi ti gbu ni (Lév. 11:9-12). Lo doit ti hinga nga ndo so lo lingbi ti wara asusu dä. Mingi ni, asusu ayeke ngbâ na mbeni ndo so ala ye ngu ni nga so gbâ ti kobe ayeke dä. Ngoi so mbeni zo ti gbungo asusu ayeke gue ti gi asusu ayeke nga kota ye. Mbeni missionnaire so ayeke na mbeni zoa ti Pacifique ahinga lani kozo ape so mbeni nzoni ngoi ti gbungo asusu ayeke dä. Mbeni Témoin ti ndo ni atisa lo ti gue ti gbu asusu. Missionnaire ni atene: “Kekereke mbi yeke wara mo na ngbonga gumbaya ti ndapre.” Ita ni atene: “Mo comprendre ape. A lingbi e gue na ngoi so ayeke nzoni ngoi ti gbungo asusu, me pëpe na ngoi so ayeke nzoni ngoi ndali ti e.”

⁹ Legeoko nga, na ngoi ti akozo Chrétien, azo ti gingo azo ayeke gue na ando so azo ayeke dä nga na ngoi so ala lingbi ti duti na ndo ni so. Na tapande, adisciple ti Jésus afa tënë lani na temple, na yâ ti asynagogue, da na da nga na yâ ti gara (Kus. 5:42; 17:17; 18:4). E nga kue a lingbi e hinga asarango ye ti azo so alango na yâ ti territoire ti e. A lingbi e duti nduru ti changé yâ ti kapa ti e si e fa tënë na ndo so e lingbi ti wara azo dä mingi nga na ngoi so e lingbi ti wara ala mingi.—1 aCor. 9:19-23.

10. Agbakuru wa la bungbi ti Jéhovah amû na e?

¹⁰ Zo ti gingo asusu abezoin anzoni gbakuru ti gbungo na asusu nga a lingbi lo hinga tongana nyen ti sara kua na ni. E nga kue e bezoin anzoni gbakuru ti fango na tënë. E bezoin nga ti hinga tongana nyen ti sara kua na agbakuru so. Jésus afa lani polele na adisciple ti lo tongana nyen ti gi azo. Lo fa na ala aye so ala yeke mû na terê ti ala, ndo so ala yeke fa tënë dä nga ye so ala yeke tene (Mat. 10:5-7; Luc 10:1-11). Laso, bungbi ti Jéhovah amû na e agbakuru so e yeke fa na ye na azo, agbakuru so aga na anzoni ye mingi. * Bungbi ti Jéhovah afa nga  na e tongana nyen ti sara kua na agbakuru so. Fango ye so amû maboko na e ti sara ye na mbeto ape na ngoi so e yeke fa tënë nga ti hinga tongana nyen ti fa ye nzoni.—2 Tim. 2:15.

11. Ngbanga ti nyen la a lingbi azo so ayeke gi azo asara ye na mbeto ape?

¹¹ A lingbi azo so ayeke gi asusu na ayeke kä ni asara ye na mbeto ape ndali ti so ala lingbi ti hinga ape wala lê ti nduzu ayeke duti ande nzoni wala nzoni ape nga mbeni kota pupu alingbi ti ya gï hio tongaso. Fani mingi, ala yeke sara kua na bï. A lingbi azo so ayeke gi azo nga asara ye na mbeto ape. Na ngoi so e komanse ti fa tënë nga e fa na azo so e yeke aTémoin ti Jéhovah, azo ti sewa ti e alingbi ti kanga lege na e, akamarade ti e alingbi ti he e nga ambeni zo alingbi ti ke ti mä tënë so e fa. Me bê ti e adö ape. Jésus atene lani so lo yeke tokua adisciple ti lo ti fa tënë na azo so ayeke ke ala.—Mat. 10:16.

12. Ti gue oko na Josué 1:7-9, aye wa la alingbi ti mû maboko na e ti sara ye na mbeto ape?

¹² Aye wa la mo lingbi ti sara ti sara ye na mbeto ape? Kozoni, duti na confiance so, Jésus angbâ na yayu kâ lo yeke fa lege na kua ti fango tënë (Jean 16:33; Apoc. 14:14-16). Na pekoni, gi ti duti na mabe mingi na zendo so Jéhovah amû ti bâ lege ti mo (Mat. 6:32-34). Tongana mabe ti mo akpengba mingi, mo yeke sara ye mingi na mbeto ape. Pierre na amba ti lo afa so ala yeke na kota mabe na ngoi so ala dö kua ti ala ti gingo asusu azia ti mû peko ti Jésus. Legeoko nga, mo fa so mo  yeke lani na kota mabe na ngoi so mo tene na akamarade ti mo nga na azo ti sewa ti mo so aTémoin ti Jéhovah akomanse ti manda Bible na mo nga so mo komanse ti gue na abungbi ti ala. Kite ayeke dä ape so, ti mû lege na mo ti sara ye alingbi na aye so Jéhovah ahunda, mo changé lani aye mingi na yâ ti asarango ye ti mo nga na yâ ti fason so mo yeke vivre na ni. So kue ahunda ti sara ye na mabe nga na mbeto ape. So mo ngbâ ti sara ye na mbeto ape, mo lingbi ti duti na confiance so ‘Jéhovah Nzapa ti mo ayeke na mo na ndo kue so mo yeke gue dä.’—Diko Josué 1:7-9.

13. Tongana nyen la gbungo li nga na sambela alingbi ti mû maboko na mo ti sara ye na mbeto ape?

¹³ Ambeni ye nde wa la mo lingbi ti sara ti sara ye na mbeto ape? Sambela Jéhovah ti mû maboko na mo ti sara ye na mbeto ape (Kus. 4:29, 31). Jéhovah ayeke kiri tënë na asambela ti mo nga lo yeke zia mo lâ oko ape. Lo yeke duti dä lakue ti mû maboko na mo. Mo lingbi nga ti gbu li ti mo na ndö ti aye so Jéhovah asara ti sö azo ândö. Gbu li nga na ndö ti aye so Jéhovah asara ti mû maboko na mo ti hon ndö ti akpale ti mo nga ti mû ngangu na mo ti changé aye na yâ ti fini ti mo. Biani, Lo so ahon na azo ti lo na yâ ti Ngu Bengba alingbi ti mû maboko na mo ti ga mbeni disciple ti Christ (Ex. 14:13). Mo lingbi ti duti na oko mabe ti zo ti sungo psaume so atene: “Jéhovah ayeke na terê ti mbi; mbeto ayeke sara ande mbi pëpe. Nyen la zo apeut ti sara na mbi nyen?”—Ps. 118:6.

14. Nyen la mo manda na lege ti ye so asi na Masae nga na Tomoyo?

¹⁴ Mbeni ye nde so e lingbi ti sara ti sara ye na mbeto ape ayeke ti hinga tongana nyen la Jéhovah amû maboko na azo ti kamene ti ga fadeso azo so asara ye na mbeto ape. Gbu li na ndö ti ye so asi na Ita-wali Masae. Lo yeke lani zo ti kamene na lo pensé so lo lingbi lâ oko ape ti sara kua ti fango tënë. Lo bâ so ti sara lisoro na azo so lo hinga ala ape ayeke ngangu mingi, a yeke tongana ti so zo ayeke gi ti monté mbeni gbagba so ayo mingi, na lo pensé so lo lingbi lâ oko ape ti sara ni. Lo sara ngangu mingi ti ye Nzapa nga na amba ti lo mingi ahon ti kozo. Lo gbu li na ndö ti ngoi so e yeke dä, so ayeke ngoi so a lingbi e sara ye hio nga lo sambela Jéhovah ti mû maboko na lo ti duti na nzara mingi ti fa tënë. Lo hon ndö ti mbeto ti lo na lo sara même kua ti pionnier permanent. Jéhovah alingbi nga ti mû maboko na afini wafango tënë ti “sara ye na mbeto pëpe”. Gbu li na ndö ti ye so asi na Ita-wali Tomoyo. Na ngoi so lo komanse lani ti fa tënë da na da, kozo zo so lo wara lo adekongo, atene: “Mbi ye ti sara tënë na aTémoin ti Jéhovah ape!” na lo kanga porte na ngangu. Na mbeto ape, Tomoyo atene na mba ti lo so lo na lo afa tënë, lo tene: “Mo mä tënë so lo tene so? Ade mbi sara même tënë ape, lo hinga so mbi yeke Témoin ti Jéhovah. A nzere na mbi mingi!” Tomoyo ayeke laso pionnier permanent.

15. Tongana kua ti fango tënë ayeke ngangu na e, tongana nyen la e lingbi ti sara ye tongana azo ti gingo asusu? Ngbanga ti nyen la a yeke kota ye ndali ti aChrétien?

¹⁵ Azo ti gingo asusu so asara kua ti ala nzoni ayeke sara ngangu ti sara aye so ala doit ti sara. Na tapande, a lingbi ala londo hio na ndapre, ala sara kua juska ahunzi nga ala ngbâ ti sara kua atâa lê ti nduzu ayeke nzoni ape. E nga a lingbi e sara ye so e doit ti sara ti ngbâ ti sara kua ti e nga ti hunzi ni.—Mat. 10:22.

16. Tongana nyen la e lingbi ti sara aye so e doit ti sara?

¹⁶ A dü e dungo pëpe na ngangu ti sara aye so e doit ti sara. Fani mingi, e ye ti sara ye so a yeke ngangu ape ti sara ni. Ti sara aye so e doit ti sara, a lingbi e kanga nzara ti bê ti e. Tongaso, e bezoin ti tene a mû maboko na e ti  sara aye so alingbi ti duti ngangu na e ti sara. Jéhovah ayeke mû na e maboko so na lege ti yingo vulu ti lo.—aGal. 5:22, 23.

17. Na 1 aCorinthien 9:25-27, nyen la Paul atene a lingbi lo sara ti sara aye so lo doit ti sara?

¹⁷ Bazengele Paul asara lani ngangu ti sara aye so lo doit ti sara. Me lo yeda so a lingbi lo “pika” terê ti lo ti tene lo sara ye so ayeke na lege ni. (Diko 1 aCorinthien 9:25-27.) Lo wa nga amba ti lo ti sara ngangu ti sara aye so ala doit ti sara nga ti sara aye kue “na lege ni nga na yâ ti wusuwusu pëpe.” (1 aCor. 14:40). A lingbi e sara ngangu ti ngbâ ti voro Jéhovah nga ti fa nzoni tënë ti Royaume lakue.—Kus. 2:46.

18. Nyen la ayeke sara si Jéhovah abâ so e sara kua ti e nzoni?

¹⁸ Zo ti gingo asusu ayeke bâ so lo sara kua ti lo nzoni tongana lo gbu gbâ ti asusu. Me ti e, a yeke pëpe wungo ti azo so e ga na ala na yâ ti bungbi ti Jéhovah la afa so e sara kua ti e nzoni (Luc 8:11-15). Tongana e ngbâ ti fa nzoni tënë nga ti fa ye na azo, Jéhovah ayeke bâ so e sara kua ti e nzoni. Ngbanga ti nyen? Ngbanga ti so e ngbâ ti mä yanga ti lo na Molenge ti lo.—Marc 13:10; Kus. 5:28, 29.

19-20. Mbeni ye nde so apusu e ti fa tënë fadeso ayeke so wa?

¹⁹ Na ambeni kodro, a mû lege na azo ti gi asusu gï na yâ ti ambeni nze. Na yâ ti akodro so, tongana ngoi ti gingo asusu aga nduru ti hunzi, azo ti gingo asusu alingbi ti bâ so a lingbi ala sara kua ni hio. So e yeke azo ti gingo azo, mbeni ye nde so apusu e ti fa tënë fadeso ayeke so: Hunzingo ti aye ti ngoi so aga nduru mingi. Ngoi so angbâ ti sara kua ti songo fini ti azo so ayeke gï kete. Ku pëpe ti tene aye kue aga mbilimbili-kue na yâ ti fini ti mo awe si mo sara kota kua so.—Zo-ti. 11:4.

²⁰ Gi laso ti duti na nzara mingi ti fa tënë, ti hinga aye mingi na ndö ti Bible, ti sara ye na mbeto ape nga ti sara aye so mo doit ti sara. Sara kua legeoko na azo ti gingo azo so wungo ti ala ahon kutu miombe awe, na mo yeke duti ande na ngia so alondo na Jéhovah. (Néh. 8:10). Leke na bê ti mo ti fa tënë mingi nga ti ngbâ ti sara ni juska ahunzi. Article ti peko ayeke sara tënë na ndö ti aye ota so e lingbi ti sara ti ngbâ ti fa nzoni tënë ti Royaume.