Na tongo nda ti angu 1940, aTémoin ti Jéhovah ayeke manda lani Bible na babâ na mama ti mbi. Atâa so ala zia lege ti mandango Bible ni, mama ti mbi angbâ ti wara Tour ti Ba Ndo na Zingo na lango! Na ngu 1950, a sara mbeni assemblée internationale na gbata ti New York City, na sewa ti mbi ayeda ti gue.

Kete na pekoni, Ita Lawrence Jeffries akomanse ti sara vizite na e. Lo gi ti aidé mbi ti hinga tâ tënë. Na tongo nda ni, mbi na lo e mä terê ape ndali ti so aTémoin ti Jéhovah ayeke sara poroso nga na kua ti turugu ape. Mbi tene na lo so tongana azo ti États-Unis kue ake ti sara bira, awato apeut ti ga amû kodro ni kue. Ita Jeffries akangba bê lo hunda mbi, lo tene: “Mo pensé nyen la Jéhovah Nzapa ayeke sara tongana azo ti États-Unis kue ayeke sara na lo na awato aga ti sara bira na ala?” Tënë so lo tene na ndö ti tënë so nga na ambeni nde a-aidé mbi ti bâ so mbi yeke na raison ape. A sara si mbi ye ti hinga ye mingi na ndö ti Bible.

Mbi mû ngoi mingi ti diko angbene Tour ti Ba Ndo nga na Zingo na lango! so mama ti mbi abata ni lani. A si na mbeni ngoi, mbi ga ti bâ so mbi yeke manda tâ tënë la, tongaso mbi yeda ti tene Ita Jeffries amanda Bible na mbi. Mbi komanse nga ti gue na abungbi lakue. Mbi ye mingi aye so mbi yeke manda ni, na mbi ga wafango nzoni tënë. Aye so mbi leke na bê ti mbi ti sara achangé na ngoi so mbi hinga so “kota lâ ti Jéhovah aga nduru [awe]”. (Soph. 1:14.) Mbi ye ti gue na université encore ape, me mbi ye ti aidé azo ti hinga atâ tënë ti Bible.

Mbi hunzi mandango mbeti na lycée na lango 13 ti juin, ngu 1956. Lango ota na pekoni mbi  wara batême na mbeni kota bungbi ti circonscription. Mbi hinga lani ape so mbi yeke wara anzoni ye mingi na mbage ti Jéhovah ndali ti so mbi soro ti mû fini ti mbi ti manda ye nga ti fa ye na azo na ndö ti lo.

Nze omene na peko ti batême ti mbi, mbi ga pionnier permanent. Na yâ ti Kusala ti Royaume ti décembre 1956, a yeke wara mbeni article so li ni ayeke: “Mo peut ti gue ti fa tënë na ndo so abezoin awafango tënë dä mingi?” Mbi peut lani ti sara ni. Mbi ye lani ti aidé na ndo so awafango tënë ayeke dä mingi ape.—Mat. 24:14.

Mbi gue na Edgefield, na Caroline du Sud. Awafango tënë ti congrégation ni ayeke gï osio. Mbi ga dä e ga oku. E sara abungbi na da ti mbeni ita-koli. Nze oko oko, mbi yeke fa tënë ngbonga 100. Mbi yeke lani na aye mingi ti sara ndali ti so mbi yeke mû li ni na kua ti fango tënë nga mbi yeke sara ambage ti bungbi. So mbi yeke sara akua mingi na yâ ti congrégation, mbi manda aye mingi na ndö ti Jéhovah.

Mbeni wali so mbi yeke manda lani Bible na lo ayeke na mbeni ndokua ti bango lege ti akuâ na Johnston, mbeni kete gbata so ayo mingi ape. Na nzoni bê, lo mû na mbi ambeni kua, nga lo mû lege na e ti sara abungbi na yâ ti mbeni kete da ti lo.

Ita Jolly Jeffries, molenge ti ita-koli so amanda lani Bible na mbi, alondo na Brooklyn, na New York, aga, na mbi na lo e sara kua ti pionnier. Mbeni ita-koli amû na e mbeni kete da.

Na mbage ti sud, a yeke payé lani azo ti kua nzoni ape. E yeke wara lani dollar use wala ota ndali ti kua ti lango oko. Mbeni lâ, mbi mû tanga ti kete pata so mbi yeke na ni ti vo na kobe na yâ ti mbeni magazin. Na ngoi so mbi sigi, mbeni koli aga ahunda mbi, atene: “Mo ye ti sara kua? Mbi yeke futa mo l’heure oko dollar oko.” Lo mû na mbi kua ti lango ota ti zi asaleté na mbeni ndo so a yeke leke da dä. Na mbi, a yeke lani polele so Jéhovah la ayeke aidé mbi ti ngbâ na Edgefield. Me mbi gue lani na assemblée internationale ti 1958 so a sara na New York City.

Na use lango ti kota bungbi ni, mbeni kota ye asi. Mbi wara terê na Ruby Wadlington, so ayeke pionnier permanent na Gallatin, na Tennessee. So e use kue e ye ti ga amissionnaire, e gue na bungbi so a sara na azo so aye ti gue na Galaad na ngoi ti kota bungbi ni. Ambeni ngoi na pekoni, e komanse ti tokua mbeti na mba. Na pekoni, a tisa mbi ti gue ti mû diskur na Gallatin. A yeke na ngoi ni so la mbi hunda lo ti tene e sara mariage. Na pekoni, mbi gue na congrégation ti Ruby, na e sara mariage na 1959.

Na ngoi so mbi yeke na ngu 23, a mû mbi serviteur ti congrégation (so laso a iri ni coordinateur ti bungbi ti a-ancien) na Gallatin. Congrégation ti  e ayeke kozo congrégation so Charles Thompson asara vizite dä na ngoi so lo ga surveillant ti circonscription. Lo sara kua ti Jéhovah mingi; me lo hunda ti hinga bango ndo ti mbi na ndö ti abezoin ti aita nga tongana nyen la asurveillant ti circonscription so ahon kozo na lo abâ lege ti abezoin so. Na lege ti lo, mbi manda so a yeke nzoni ti hunda atënë nga ti hinga aye kue na ndö ti mbeni tënë kozo ti mû mbeni desizion.

Na mai 1964, a tisa mbi ti gue na Ekole ti kusala ti Royaume, so aninga nze oko, na South Lansing, na New York. Aita so amû li ni na yâ ti ekole ni asara si mbi ye ti manda ye mingi na ndö ti Jéhovah nga ti ga nduru mingi na lo.

Na janvier 1965, a tisa mbi na Ruby ti sara kua ti circonscription. Territoire ti circonscription ti e akono mingi, a londo na Knoxville, na Tennessee, a si nduru na Richmond, na Virginie. A yeke wara nga dä acongrégation ti Caroline du nord, Kentucky nga na Virginie-Occidentale. Mbi sara vizite gï na acongrégation ti azo vuko ndali ti so na ngoi ni so na sud ti États-Unis, azo vuko na amunzu apeut ti sara bungbi ndo oko ape. Aita ni ayeke awayere, na e manda ti kangbi ye so e yeke na ni na ala so abezoin ni. Mbeni surveillant ti circonscription so aninga na yâ ti kua ni afa na mbi mbeni kota ye. Lo tene: “Sara si aita abâ so mo yeke ita ti ala, me sara ye tongana patron ti ala ape. Tongana ala bâ mo tongana ita ti ala, mo peut ti aidé ala.”

Na ngoi so e yeke sara vizite na mbeni kete congrégation, Ruby akomanse ti manda Bible na mbeni maseka-wali so ayeke na bébé ti wali ti ngu oko. So mbeni zo na yâ ti congrégation ni apeut ti sara étude ti lo ape, Ruby asara ni na lege ti lettre. Na vizite ti e ti peko, wali ni aga na abungbi kue. Na ngoi so aita-wali use so ayeke apionnier spécial ague kâ, a mû na ala étude ni, na kete na pekoni lo wara batême. Ngu 30 tongaso na pekoni, na ngu 1995 na Béthel ti Patterson, mbeni wali afa terê ti lo na Ruby. A yeke molenge ti wali so Ruby amanda lani Bible na lo. Molenge-wali ni na koli ti lo ayeke a-élève ti klase 100 ti Ekole ti Galaad.

Use circonscription ti e ayeke lani na centre ti Floride. Na ngoi ni so, e bezoin mbeni oto, na e vo mbeni na nzoni ngere. Me gï na kozo yenga ni, moteur ni abuba. E yeke na nginza ti leke na ni ape. Mbi iri mbeni ita so mbi pensé lo peut ti aidé e. Mbeni zo ti kua ti lo aleke ni, me ita ni ake ti tene e payé ni. Lo tene: “Mbi sara ni senge senge.” Lo mû même na e mbeni nginza. So ayeke mbeni pendere tapande so afa tongana nyen la Jéhovah ayeke bâ lege ti awakua ti lo. A dabe ti e ti duti azo so amû ye mingi na azo.

Lakue tongana e sara vizite na mbeni congrégation, e yeke lango na ndö ti aita. A sara si e wara gbâ ti anzoni kamarade. Mbeni lâ, mbi komanse ti pika rapport ti mbeni congrégation na machine ti pikango na mbeti. Mbi hon na mbi zia rapport ni angbâ na yâ ti machine ni. Tongana mbi kiri na lakui ni, mbi mä so molenge ti yanga-da ni ti ngu ota apete abouton ti machine ni na ngoi so rapport ti mbi angbâ na yâ ni. Mbi tene na lo tënë ti ngia mbi tene lo “aidé” mbi ti hunzi rapport ni la. Mbi he lo angu mingi na pekoni.

Na 1971, mbi wara lettre so na yâ ni a tokua mbi surveillant ti district na New York City. Li ti e akpe kue. Na ngoi so e si kâ, mbi yeke lani gï na ngu 34. Aita ni ayamba mbi nzoni, mbi yeke kozo surveillant ti district ti ala so ayeke zo vuko.

So mbi yeke lani surveillant ti district, mbi yeke fa ye na azo na ndö ti Jéhovah na anda-yenga kue na ngoi ti akota bungbi ti circonscription, na a nzere na mbi. Mingi ti asurveillant ti circonscription ni aninga na yâ ti kua ni ahon mbi. Mbeni oko ti ala la amû lani diskur ti batême ti mbi. Ambeni ngoi na pekoni, mbeni ita ni, Theodore Jaracz, aga lani membre ti Bebungbi. Na popo ti aita so, a yeke wara nga gbâ ti aita so ayeke sara kua na Béthel ti Brooklyn. Mbi kiri singila so asurveillant ti circonscription nga na aBéthelite so asara si mbeto asara mbi ape. Mbi bâ so aita so ayeke aberger so asara ye na ndoye, ala yeke na confiance na Bible nga ala mû maboko na bungbi ti Jéhovah. So ala sara terê ti ala kete asara si kua ti district ayapu na mbi.

Na 1974, Bebungbi atokua mbeni groupe ti asurveillant ti circonscription ti sara kua ti district, na mbi doit ti kiri ti sara kua ti surveillant ti circonscription, ti so ni so na Caroline du sud. E yeke na ngia so na ngoi ni so, acongrégation ti amunzu nga na ti azo vuko ayeke oko, na a nzere na aita mingi.

Na 1976, a tokua mbi na circonscription ti Géorgie na popo ti Atlanta na Columbus. Mbi dabe ti mbi na ngoi so mbi mû diskur ti lungo kuâ ti amolenge oku so ayeke azo vuko so akui na ngoi so azo agbi da ti ala. A gbanzi mama ti ala na hôpital ndali ti akä so lo wara. Gbâ ti aita, azo vuko na amunzu, ague lakue na hôpital ni ti dë bê ti babâ na mama ni. Mbi bâ so aita aye terê mingi. Tongana awakua ti Nzapa afa mara ti bango mawa tongaso na mbage ti mba, a yeke sara si ala gbu ngangu na yâ ti angangu kpale.

Na 1977, a tisa e ti gue na Béthel ti Brooklyn teti ambeni nze ti aidé na mbeni kua. Na ngoi so kua ni aye ti hunzi, aita use ti Bebungbi ahunda mbi na Ruby eskê e peut ti yeda ti ngbâ na Béthel biani biani. E yeda.

Mbi sara kua ngu 24 na Ndokua ti kusala, fani mingi aita so ayeke sara kua na ndokua so ayeke bâ lege ti atënë so ayeke ngangu. Teti angu mingi, Bebungbi ayeke sigi na afango lege so ague oko na amama-ndia ti Bible. Afango lege so a-aidé aita ti kiri tënë na akota hunda nga ti fa ye na asurveillant ti circonscription, a-ancien nga na apionnier. Fango ye so a-aidé aita mingi ti ga aChrétien so akpengba. A sara nga si bungbi ti Jéhovah akpengba.

Ti londo na 1995 ti si na 2018, mbi sara vizite na gbâ ti afiliale tongana ita so aga na iri ti kota ndokua ti e, so kozo a iri lo surveillant ti zone. Mbi sara bungbi na amembre ti aKomite ti filiale, aBéthelite nga na amissionnaire ti kpengba ala nga ti aidé ala na akpale ti ala. Lakue tongana mbi na Ruby e mä aye so asi na aita, so ala fa ni na e, a kpengba e. Na tapande, na ngu 2000, e sara vizite na Rwanda. So e mä tongana nyen la aita nga na sewa ti Béthel asö kuâ na ngoi ti fango gbâ ti azo na 1994, a ndu bê ti e mingi. Aita mingi aperdre azo so ala ye ala mingi. Atâa akpale so aita so agbu ngangu dä, ala fa so ala yeke na mabe, beku nga na ngia.

Ngu ti e ahon fadeso  80 awe. A sara ngu 20 awe la mbi yeke membre ti Komite ti filiale ti États-Unis. Mbi gue lâ oko na université ape; me mbi wara mbeni fango ye so mara ni ayeke dä ape na mbage ti Jéhovah nga na bungbi ti lo. Ye so a-aidé mbi ti fa na azo atâ tënë ti Bible so apeut ti aidé ala lakue lakue (2 aCor. 3:5; 2 Tim. 2:2). Mbi bâ tongana nyen la Bible a-aidé azo ti changé fini ti ala nga a-aidé ala ti duti na nzoni songo na Nzapa so acréé ala (Jacq. 4:8). Lakue tongana lege ayeke dä, mbi na Ruby e yeke wa azo ti bâ na nene ni mingi pasa so ala yeke na ni ti manda ye na ndö ti Jéhovah nga ti fa na azo atâ tënë ti Bible. So ayeke kota pasa so mbeni wakua ti Jéhovah apeut ti wara ni.