1. Apendere ye wa la ayeke ku e na ngoi ti Komandema ti ngu ti saki oko ti Christ?

 NA NGOI so zingongo ti akuâ ayeke komanse ande ge na ndö ti sese na ngoi ti Komandema ti ngu saki oko ti Christ ayeke duti ande pendere mingi. Azo kue so aperdre azo so ala ye ala mingi ayeke ku kungo ti kiri ti bâ ala. Ti Jéhovah nga kue a yeke tongaso (Job 14:15). Imaginé tongana nyen la terê ti azo kue na ndö ti sese ayeke nzere ande mingi na ngoi so a zingo na kuâ azo so ala ye ala mingi. Tongana ti so e bâ na yâ ti article so ahon, “azo ti mbilimbili”, so a sû iri ti ala na yâ ti mbeti ti fini, ayeke zingo ande na kuâ ti “wara fini”. (Kus. 24:15; Jean 5:29). Peut-être gbâ ti azo so e ye ala ayeke duti ande na popo ti azo so a yeke zingo ande ala na kuâ kete na peko ti Harmaguédon. * Na ndö ni, “azo so ayeke mbilimbili pëpe”, na tapande, azo so awara lani lege nzoni ape ti hinga Jéhovah wala so asara na lo ape kozo ti kui, a yeke zingo ala ande na kuâ “ti wara ngbanga”.

2-3. (a) Tongana ti so a fa na Ésaïe 11:9, 10, na ngoi ti kota kapa ti fango ye so ade a sara mara ni lâ oko ape, aye wa la a yeke fa ni na azo? Ngbanga ti nyen? (b) Nyen la e yeke bâ na yâ ti article so?

² Azo kue so a zingo ala na kuâ ayeke ande na bezoin ti tene a fa ye na ala (És. 26:9; 61:11). Tongaso, a bezoin ande ti sara mbeni kota kapa ti fango ye so ade a sara mara ni lâ oko ape.  (Diko Ésaïe 11:9, 10.) Ngbanga ti nyen? Ngbanga ti so azo so ayeke mbilimbili pëpe so azingo na kuâ abezoin ande ti hinga ye na ndö ti Jésus Christ, Royaume ti Nzapa, ye so a futa ti zi azo, iri ti Jéhovah so ayeke kota mingi nga ndani so gï lo oko la lo yeke na droit ti komande dunia. Même azo so ayeke mbilimbili abezoin ande ti hinga aye so Jéhovah afa ni yeke yeke na azo ti lo na ndö ti ye so lo leke na bê ti lo ti sara ndali ti sese. Na popo ti azo ti mbilimbili so, ambeni akui ngoi mingi kozo si a hunzi sungo Bible. Azo so ayeke mbilimbili ape na azo so ayeke mbilimbili ayeke ande na aye mingi ti manda.

³ Na yâ ti article so, e yeke kiri tënë na ahunda so: A yeke sara ande kota kapa ti fango ye na azo so tongana nyen? Nyen la ayeke si ande na azo so asara ye alingbi na aye so a fa na ala? Nyen la ayeke si ande na azo so ake ti sara ye alingbi na ni? A yeke kota ye ti tene e hinga kiringo tënë na ahunda so laso. Tongana ti so e yeke bâ ande, ambeni pendere prophétie so ayeke na yâ ti mbeti ti Daniel nga na ti Apocalypse ayeke aidé ande e ti comprendre nzoni aye so ayeke passé ande na ngoi so a yeke zingo akuâ. Kozoni, zia e bâ apendere ye so a sara tënë ni na yâ ti prophétie ti Daniel 12:1, 2.

4-5. Daniel 12:1 afa nyen na ndö ti lâ ti nda ni?

⁴ Diko Daniel 12:1. Mbeti ti Daniel afa molongo so aye so apika bê mingi ayeke si ande na ni na lâ ti nda ni. Na tapande, Daniel 12:1 afa so Michel, so ayeke Jésus Christ, “ayeke luti ndali ti azo ti [Nzapa]”. Mbage ti prophétie so akomanse ti ga tâ tënë na ngu 1914, na ngoi so a zia Jésus Gbia ti Royaume ti Nzapa na yayu.

⁵ Ye oko, a tene nga lani na Daniel so Jésus “ayeke luti” na “mbeni ngoi [so] kota vundu ayeke duti ande dä, mara ti ngoi tongaso ade ti si pëpe ngbene ye so amara abâ gigi juska na ngoi ni so.” “Ngoi ti kota vundu” so ayeke “kota ye ti vundu” so a sara tënë ni na Matthieu 24:21. Jésus ayeke luti, wala lo yeke tiri ndali ti azo ti Nzapa, na hunzingo ti ngoi ti kota vundu, so ti tene, na Harmaguédon. Mbeti ti Apocalypse airi azo so azo mingi mingi so “asigi na yâ ti kota ye ti vundu”.—Apoc. 7:9, 14.

6. Nyen la ayeke si na peko ti so azo mingi mingi asö kuâ na ngoi ti kota ye ti vundu? Fa ndani so mo tene tongaso. (Bâ nga “Atënë so azo ahunda” na ndö ti zingongo na kuâ ti wara fini na ndö ti sese, so ayeke na yâ ti Tour ti Ba Ndo so.)

⁶ Diko Daniel 12:2. Nyen la ayeke si na peko ti so azo mingi mingi asö kuâ na ngoi ti kota ti vundu? Prophétie so aye pëpe ti sara tënë ti zingongo na kuâ na lege ti fä, so ti tene, kiringo ti awakua ti Nzapa na fini na lege ti yingo na lâ ti nda ni, tongana ti so e tene lani. * Me atënë so aye ti sara tënë ti zingongo ti akuâ so ayeke si ande na yâ ti fini dunia. Ngbanga ti nyen la e tene tongaso? Tënë so a kiri peko ni ge “na gbe ti sese”, a kiri peko ni na Job 17:16 na “fuku ti sese.” Atënë so angoro Job 17:16 afa so tënë ni aye ti sara tënë ti “Dû ti kuâ”. Ye so afa so Daniel 12:2 aye ti sara tënë ti vrai zingongo ti akuâ so ayeke si na peko ti so lâ ti nda ni ahunzi nga na peko ti bira ti Harmaguédon.

7. (a) So Bible atene ambeni zo ayeke zingo ti wara “fini ti lakue lakue” aye ti tene nyen? (b) Na lege wa la “zingongo ti akuâ so ayeke nzoni ahon ti so asi kozo”?

⁷ Me, so Daniel 12:2 atene so ambeni zo ayeke zingo ti wara “fini ti lakue lakue” aye ti  tene nyen? A ye ti tene so azo so a zingo ala na kuâ na so agi ti hinga Jéhovah na Jésus, wala so angbâ ti gi ti hinga ala, nga amä yanga ti ala na ngoi ti Komandema ti ngu saki oko ti Christ ayeke wara ande fini ti lakue lakue (Jean 17:3). So ayeke duti ande “zingongo ti akuâ so ayeke nzoni ahon ti so asi kozo.” (aHéb. 11:35). Ngbanga ti nyen? Ngbanga ti so azo so a zingo ala lani na kuâ, so ayeke mbilimbili-kue ape, akiri akui.

8. Tongana nyen la ambeni zo so a zingo ala na kuâ ayeke “ga ye ti hengo ni nga ye so a ne ni pëpe teti lakue lakue”?

⁸ Me azo kue so a zingo ala na kuâ la ayeke yeda ande ti tene Jéhovah afa ye na ala ape. Prophétie ti Daniel atene so a yeke zingo ambeni zo na kuâ “ti ga ye ti hengo ni nga ye so a ne ni pëpe teti lakue lakue.” So ala yeke fa ande so ala yeke azo ti kpengba-li, a yeke sû iri ti ala na yâ ti mbeti ti fini ape nga ala yeke wara fini ti lakue lakue ape. Me ala yeke ga ande “ye so a ne ni pëpe teti lakue lakue”, wala a yeke futi ala. Tongaso, Daniel 12:2 ayeke sara tënë ti ye so ayeke si na nda ni na azo kue so a zingo ala na kuâ alingbi na ye so ala sara na peko ti so ala zingo na kuâ (Apoc. 20:12). * Ambeni ayeke wara fini ti lakue lakue; ambeni ayeke wara ni ape.

9-10. Mbeni ye nde wa la ayeke si ande na peko ti kota ye ti vundu? Azo wa la “ayeke za ande tongana lumière ti lê ti nduzu”?

⁹ Diko Daniel 12:3. Mbeni ye nde wa la ayeke si ande na peko ti “ngoi ti kota vundu”? Na ndö ti Daniel 12:2, versê 3 aye ti sara tënë ti mbeni ye so ayeke si na peko ti kota ye ti vundu.

¹⁰ Azo wa la “ayeke za ande tongana lumière ti lê ti nduzu”? Matthieu 13:43 a-aidé e ti hinga azo ni, versê ni atene: “Na lâ ni so, azo ti mbilimbili ayeke su tongana lâ na yâ ti Royaume ti Babâ ti ala.” Atënë so angoro versê so afa so Jésus ayeke sara lani tënë ti “amolenge ti Royaume”, so ti tene, aita ti lo so a soro ala ti gue na yayu so ayeke komande ande legeoko na lo na yâ ti Royaume ti yayu (Mat. 13:38). Tongaso, Daniel 12:3 adoit ti sara tënë ti azo so a soro ala ti gue na yayu nga na kua so ala yeke sara na ngoi ti Komandema ti ngu saki oko ti Christ.

11-12. Kua wa la azo 144 000 ayeke sara ande na ngoi ti Komandema ti ngu saki oko ti Christ?

¹¹ Tongana nyen la azo so a soro ala ti gue na yayu ayeke mû ande “maboko na azo mingi ti sara ye mbilimbili”? Ala yeke sara ande kua maboko na maboko na Jésus Christ ti mû li ni na ndö ti kapa ti fango ye na azo so a yeke sara ande ni na sese ge na yâ ti ngu 1 000. Azo 144 000 ayeke komande ande tongana agbia nga ala yeke sara kua tongana aprêtre (Apoc. 1:6; 5:10; 20:6). Tongaso, ala yeke mû maboko ti ‘sava kobela ti amara’ nga ala yeke aidé azo ti kiri ti ga mbilimbili-kue yeke yeke (Apoc. 22:1, 2; Ézéch. 47:12). Terê ti azo so a soro ala ti gue na yayu ayeke nzere ande mingi.

¹² Azo wa la ayeke duti ande na popo ti “azo mingi” so a yeke mû maboko na ala ti sara ye mbilimbili? A yeke duti ande azo so a zingo ala na kuâ nga na azo so asö kuâ na Harmaguédon na amolenge so a yeke dü ala ande na yâ ti fini dunia. Na hunzingo ti ngu 1 000, azo kue so ayeke na ndö ti sese ayeke ga ande mbilimbili-kue. Tongaso, na ngoi wa la a yeke  sû ande iri ti ala biani biani na yâ ti mbeti ti fini na encre me na crayon ape?

13-14. Nyen la azo kue so ayeke mbilimbili-kue so ayeke na ndö ti sese abezoin ande ti fa kozo si ala wara fini ti lakue lakue?

¹³ A lingbi e girisa ape so tongana mbeni zo ayeke mbilimbili-kue aye ti tene ape so nyen na nyen lo yeke wara fini ti lakue lakue. Gbu li na ndö ti Adam na Ève. Ala yeke lani mbilimbili-kue, me ala bezoin lani ti fa so ala mä yanga ti Jéhovah Nzapa kozo si ala wara fini ti lakue lakue. Me mawa ni ayeke so ala mä lani yanga ti lo ape.—aRom. 5:12.

¹⁴ Dutingo ti azo so ayeke na ndö ti sese ayeke duti ande tongana nyen na hunzingo ti ngu 1 000? Azo kue ayeke ga ande mbilimbili-kue. Eskê azo kue so ayeke mbilimbili-kue ayeke mû ande mbage ti komandema ti Jéhovah na bê ti ala kue teti lakue lakue? Wala ambeni ayeke sara ande ye tongana Adam na Ève so, atâa so ala yeke lani mbilimbili-kue, ala ga azo so ayeke be-ta-zo ape? E bezoin ti kiri tënë na ahunda so, me e yeke kiri tënë na ni tongana nyen?

15-16. (a) Lawa la lege ayeke zi ande na azo kue ti fa so ala yeke be-ta-zo na Jéhovah? (b) Ye ti peko ti ndangba tara ni ayeke duti ande nyen?

¹⁵ A yeke kanga ande Satan teti ngu 1 000. Na ngoi ni so, lo yeke duti na ngangu ti handa  azo ape. Me na peko ti so ngu 1 000 ahunzi, a yeke zi ande Satan na kanga. Lo yeke gi ande ti handa azo so ayeke mbilimbili-kue. Na ngoi ti tara so, lege ayeke zi na azo kue so ayeke mbilimbili-kue so ayeke na ndö ti sese ti fa polele wala ala ne iri ti Nzapa nga ala mû mbage ti komandema ti lo (Apoc. 20:7-10). Ye so ala yeke sara na ngoi ni so ayeke fa wala a doit ti sû iri ti ala biani biani na yâ ti mbeti ti fini.

¹⁶ Bible atene na e so ambeni zo ayeke duti ande be-ta-zo ape tongana Adam na Ève, na ala yeke ke komandema ti Jéhovah. Nyen la ayeke si ande na ala? Apocalypse 20:15 atene na e, atene: “Zo kue so a wara iri ti lo na yâ ti mbeti ti fini pëpe, a bi lo na yâ ti lac ti wâ ni.” A yeke futi ande azo so asara kpengba-li so biani biani. Me mingi ti azo ayeke ngbâ be-ta-zo na yâ ti ndangba tara ni. A yeke sû ande iri ti ala biani biani na yâ ti mbeti ti fini.

17. Mbeni ange atene na Daniel so nyen la ayeke si na ngoi ti e? (Daniel 12:4, 8-10).

¹⁷ A nzere na e mingi ti gbu li na ndö ti aye so ayeke si ande so. Ye oko, mbeni ange atene nga na Daniel ambeni kota tënë so abâ ngoi ti e, so ti tene, “ngoi ti nda ni.” (Diko Daniel 12:4, 8-10; 2 Tim. 3:1-5). Ange ni atene na Daniel, atene: “Tâ hingango ye ayeke  ga mingi.” Biani, azo ti Nzapa ayeke mä yâ ti atënë so ayeke na yâ ti prophétie so nzoni mingi. Ange ni atene nga so na ngoi ni so, “azo ti sioni ayeke sara ande sioni, nga mbeni zo ti sioni ayeke mä yâ ti aye so pëpe”.

18. Fafadeso, nyen la ayeke si ande na asioni zo?

¹⁸ Laso, na bango ni, a punir asioni zo ape ndali ti asioni ye so ala sara (Mal. 3:14, 15). Me fafadeso, Jésus ayeke fâ ngbanga na ndö ti azo so ayeke tongana angasa nga lo yeke zia ala nde na azo so ayeke tongana ataba (Mat. 25:31-33). Asioni zo ayeke sö ande kuâ pëpe na ngoi ti kota ye ti vundu, a yeke zingo nga ande ala na kuâ ape ti wara fini na yâ ti fini dunia. Iri ti ala ayeke duti ande pëpe na yâ ti “buku ti dango bê” so a sara tënë ni na Malachie 3:16.

19. Nyen la a yeke nzoni e sara ni fadeso? Ngbanga ti nyen? (Malachie 3:16-18).

¹⁹ Fadeso ayeke ngoi ti tene e fa so e yeke na popo ti asioni zo ape. (Diko Malachie 3:16-18.) Jéhovah ayeke bungbi azo so lo bâ ala tongana ‘ye ti lo so mara ni ayeke use pëpe’, wala azo so ayeke ye ti ngangu ngere na lê ti lo. E ye biani ti duti na popo ti ala.

20. Ndangba zendo wa la a mû lani na Daniel? Ngbanga ti nyen la mo yeke ku kungo ti tene zendo so aga tâ tënë?

²⁰ Biani, e yeke na ngoi so akpengba ye ayeke passé. Me aye so apika bê ti zo mingi aga nduru ti si awe. Fafadeso, e yeke bâ futingo asioni ye kue. Na pekoni, e yeke bâ gango tâ tënë ti zendo so Jéhovah amû na Daniel, so lo tene: “Mo yeke londo ande ti wara part ti mo na nda ti alango ni.” (Dan. 12:13). Eskê mo yeke ku kungo ngoi so Daniel, nga na azo so mo ye ala, ayeke kiri ti “londo”? Tongana a yeke tongaso, sara kue ti duti be-ta-zo laso, na mo peut ti duti sûr so iri ti mo ayeke ngbâ ande na yâ ti mbeti ti fini ti Jéhovah.