Na 1 aCorinthien 15:8, Paul atene: “Ndangba ti azo ni kue so lo si na lo ayeke mbi, tongana mbeni molenge so a dü lo kozo si ngoi ti dungo lo alingbi.” Ândö, e tene so, na bango ni, Paul ayeke sara tënë ti ye so asi na lo na ngoi so lo bâ mbeni vision so na yâ ni lo bâ Jésus so ayeke na yâ ti gloire na yayu. A yeke mo bâ mo tene lo wara pasa ti tene a dü lo, wala a zingo lo na kuâ ti ga zo ti yingo kozo si ngoi ni alingbi, so ti tene, angu ngbangbo mingi kozo si mara ti zingongo ti akuâ so abâ gigi. Ye oko, na peko ti so e kiri e gbu li nzoni na ndö ti versê so, e bâ so a yeke nzoni e changé fason so e fa na ndani.

A yeke tâ tënë so, ge, Paul ayeke sara tënë ti ye so asi na lo na ngoi so lo ga Chrétien. Me so lo tene “a dü lo kozo si ngoi ti dungo lo alingbi” lo ye ti tene nyen la? Nda ti tënë ni apeut ti duti mingi.

Lo ga Chrétien gï hio tongaso nga na mbeni fason so ayeke ngangu. Dungo mbeni molenge kozo si ngoi ti dungo lo alingbi ayeke si ka gï gbagburu tongaso. Na ngoi so Saul (so na pekoni a iri lo Paul) ayeke lani na lege ti gue na Damas ti sara ye ti ngangu na aChrétien kâ, gbagburu tongaso lo bâ vision ti Jésus so a zingo lo na kuâ. So Paul aga Chrétien ahon gbungo li ti lo nga na ti aChrétien so lo leke ti sara ye ti ngangu na ala na yâ ti gbata so. Na ndö ni, ye so asi na lo so ayeke lani ngangu mingi asara si lo bâ ndo ape teti mbeni ngoi.​—Kus. 9:1-9, 17-19.

Lo ga lani Chrétien na “nzoni ngoi ape.” Tënë ti Grec so a kiri peko ni na tënë “molenge so a dü lo kozo si ngoi ti dungo lo alingbi”, a peut nga ti kiri peko ni na tënë “molenge so a dü lo na nzoni ngoi ape.” Bible de Jérusalem akiri peko ni tongaso: “A yeke mo bâ mo tene a dü mbi na ngoi so zo oko aku terê ti lo na ni ape.” Na ngoi so Paul aga lani Chrétien, Jésus akiri na yayu awe. Azo so Paul asara tënë ti ala na yâ ti aversê so aga kozo na versê so abâ lani Jésus so a zingo lo na kuâ kozo si lo monté na yayu, me Paul abâ lani lo ape (1 aCor. 15:4-8). So Jésus asi na Paul gï gbagburu tongaso amû lege na Paul ti bâ lo, atâa so na bango ni a yeke na “nzoni ngoi ape.”

Lo yeke sara lani tënë ti lo wani na mbeni lege so afa so lo bâ terê ti lo kete. Ambeni wandara atene so tënë so Paul asara kua na ni ge akpa kasango ndo. Tongana a yeke tongaso, andâ Paul ayeda so lo lingbi ape ti duti mbeni bazengele. Lo kiri lo tene: “Mbi yeke zo so ayeke kete mingi na popo ti abazengele ni kue, mbi lingbi ti tene a iri mbi bazengele pëpe, ngbanga ti so mbi sara lani ye ti ngangu na congrégation ti Nzapa. Me na lege ti kota nzobe ti Nzapa mbi ga zo so ala yeke bâ lo fadeso.”​—1 aCor. 15:9, 10.

Tongaso, na bango ni, Paul aye ti sara tënë ti ngoi so Jésus asi lani na lo gï gbagburu tongaso nga na mbeni fason so ayeke ngangu, wala lo ye ti tene so lo ga Chrétien na nzoni ngoi ape wala lo ye ti tene so lo lingbi ape ti tene a fa na lo mara ti ye tongaso, so ahon gbungo li ti zo. Atâa ye ni ayeke so wa, ye so asi na Paul so ayeke lani kota ye mingi na lo. A sara si lo hinga biani so a zingo lani Jésus na kuâ. So fani mingi lo sara tënë ti ye so asi na lo so na ngoi so lo yeke fa tënë na ndö ti zingongo ti Jésus na kuâ na ambeni zo, a dö bê ti e ape.​—Kus. 22:6-11; 26:13-18.