1. Pierre asara ye tongana nyen na ngoi so Jésus asara miracle ala gbu gbâ ti asusu?

 PIERRE abi gbanda na mbeni bï kue sân ti gbu mbeni susu. Li ti lo akpe so Jésus atene na lo, atene: “Pusu na ndo so ngu ni alï, na ala bi agbanda ti ala ti gbu asusu.” (Luc 5:4). Pierre ayeke na kite so lo yeke gbu asusu, me lo sara tongana ti so Jésus atene. Pierre na akoli so lo na ala ayeke sara kua agbu gbâ ti asusu asara si agbanda ni akomanse ti suru. Tongana ala comprendre so miracle la Jésus asara so, “bê ti Pierre nga na ti azo so ayeke na terê ti lo adö ngangu mingi”. Pierre atene: “Seigneur, hon yongoro na terê ti mbi, ngbanga ti so mbi yeke wasiokpari.” (Luc 5:​6-9). Na bango ni, peut-être Pierre abâ so lo lingbi pëpe ti duti na terê ti Jésus.

2. Tongana e gbu li na ndö ti tapande ti Pierre ayeke aidé e tongana nyen?

² Pierre ayeke lani na raison, lo yeke “wasiokpari.” Mbeti ti Nzapa afa so, na ambeni ngoi, lo tene ambeni tënë wala lo sara ambeni ye so na pekoni lo regretté. Eskê na ambeni ngoi mo pensé tongana Pierre? Eskê mo yeke na mbeni sarango ye so mo yeke sara ngangu ti maï ni wala mbeni wokongo so aninga awe la mo yeke gi ti hon ndö ni? Tongana a yeke tongaso, tapande ti Pierre apeut ti kpengba mo. Na lege wa? Gbu li kete: Jéhovah apeut lani ti sara si a sû awokongo ti Pierre na yâ ti Bible ape. Me lo sara si a sû ni ti tene e manda ye dä (2 Tim. 3:​16, 17). Ti manda ye na ndö ti koli so, so ayeke lani na awokongo nga na apensé so e yeke na ni, apeut ti aidé e ti bâ so Jéhovah ahunda na e ape ti duti mbilimbili-kue. Lo ye ti tene e ngbâ ti sara na lo atâa awokongo ti e.

3. Ngbanga ti nyen la e bezoin ti gbu ngangu?

 ³ Ngbanga ti nyen la e bezoin ti gbu ngangu? Ngbanga ti so tongana e ngbâ ti sara mbeni ye, e yeke sara ni nzoni. Na tapande, tongana mbeni zo ayeke manda ti pika guitare, a peut ti sara ngu mingi si lo hinga ni nzoni. Na ngoi so lo yeke manda ni, peut-être lo yeke pika ni nzoni ape, me tongana lo ngbâ ti manda ni, lo yeke pika ni nzoni. Même tongana lo ga nzoni zo ti pikango mozoko, na ambeni ngoi lo peut ti sara faute. Me lo yeke ngbâ ti pika ni. Lo yeke ngbâ ti pika ni si lo maï kode ti pikango ni. Legeoko nga, même na peko ti so e bâ so e hon ndö ti mbeni wokongo ti e, e peut ti kiri ti sara ni. Me e yeke ngbâ ti gi ti hon ndö ni. E kue e yeke tene ambeni tënë wala e yeke sara ambeni ye so na pekoni e regretté ni, me tongana e découragé ape, Jéhovah ayeke aidé e ti sara ye nzoni ahon ti kozo (1 Pi. 5:10). Zia e bâ tapande ti Pierre so lo ngbâ ti gbu ngangu. So Jésus abâ mawa ti lo atâa awokongo ti lo apeut ti pusu e ti ngbâ ti sara na Jéhovah.

4. Tongana ti so Luc 5:​5-10 afa, Pierre atene nyen na ndö ti lo wani? Jésus adë bê ti lo tongana nyen?

⁴ Bible afa ape ndani so Pierre atene so lo yeke “wasiokpari” wala asiokpari wa la lo yeke pensé lani na ni. (Diko Luc 5:​5-10.) Me peut-être lo sara lani ambeni kota faute. Jésus ahinga so mbeto asara Pierre, peut-être ndali ti so Pierre abâ so lo lingbi ape. Jésus ahinga nga so Pierre apeut ti ngbâ be-ta-zo. Tongaso, na nzoni bê, Jésus atene na Pierre ti “zia ti sara mbeto.” Confiance so Jésus ayeke na ni na Pierre achangé gigi ti lo. Na pekoni, Pierre na ita ti lo André adö kua ti ala ti gingo susu azia na ala ga azo so amû peko ti Messie na ngoi kue, mbeni desizion so aga na ala atufa mingi.—Marc 1:​16-18.

5. So Pierre ahon ndö ti mbeto ti lo nga lo yeda ti mû peko ti Jésus, atufa wa la lo wara?

⁵ Anzoni ye mingi asi na Pierre ndali ti so lo mû peko ti Christ. Lo bâ Jésus asava azo ti kobela, atomba asioni yingo nga azingo même akuâ (Mat. 8:​14-17; Marc 5:​37, 41, 42). b Pierre abâ nga lani vision ti Jésus so ayeke na yâ ti gloire ti lo ti Royaume, na lo girisa ye so lâ oko ape (Marc 9:​1-8; 2 Pi. 1:​16-18). Pierre abâ lani aye so lo peut ti bâ ni lâ oko ape tongana lo mû peko ti Jésus ape. Kite ayeke dä ape so terê ti lo anzere lani mingi so lo hon ndö ti asioni pensé so lo yeke na ni nga lo wara atufa so.

6. Eskê Pierre ahon ndö ti awokongo ti lo hio? Fa ndani so mo tene tongaso.

 ⁶ Atâa aye so Pierre abâ na lo mä, lo ngbâ lani ti tiri ti hon ndö ti awokongo ti lo. Bâ ambeni tapande ni. Na ngoi so Jésus afa na adisciple ti lo so lo yeke bâ pasi nga lo yeke kui ti tene aprophétie ti Bible aga tâ tënë, Pierre asuku na lo (Marc 8:​31-33). Fani mingi, Pierre na tanga ti abazengele apapa ti hinga zo so ayeke kota na popo ti ala (Marc 9:​33, 34). Na bï so na ndade ni Jésus akui, Pierre afâ mê ti mbeni koli (Jean 18:10). Na oko bï ni so, mbeto asara Pierre na lo tene fani ota so lo hinga kamarade ti lo Jésus ape (Marc 14:​66-72). Ye so asara si Pierre atoto sioni.—Mat. 26:75.

7. Na peko ti so a zingo Jésus na kuâ, lo mû lege na Pierre ti sara nyen?

⁷ Jésus adö lani bazengele ti lo so adécouragé kue so azia pëpe. Na peko ti so a zingo Jésus na kuâ, lo mû lege na Pierre ti fa so lo ngbâ ti ye lo. Jésus atisa Pierre ti sara terê ti lo kete ti sara kua tongana berger ti ataba ti lo (Jean 21:​15-17). Pierre ayeke nduru ti sara ye so Jésus atene na lo. Pierre ayeke lani na Jérusalem na lango ti Pentecôte nga lo yeke na popo ti akozo zo so a soro ala na lege ti yingo vulu ti gue na yayu.

8. Kota faute wa la Pierre asara lani na Antioche?

⁸ Même na peko ti so a soro Pierre ti gue na yayu, lo ngbâ ti tiri na awokongo ti lo. Na ngu 36, Pierre ayeke lani dä na ngoi so a soro Corneille, so ayeke Juif ape, ti gue na yayu, ye so afa polele so “Nzapa ayeke sara kangbi na popo ti azo pëpe,” nga so azo so ayeke Juif ape apeut ti ga na yâ ti congrégation ti aChrétien (Kus. 10:​34, 44, 45). Na pekoni, Pierre akomanse ti te ye na azo so ayeke aJuif ape, mbeni ye so lâ oko lo peut ti sara kozo ape (aGal. 2:12). Ye oko, ambeni Juif so ayeke aChrétien abâ so a yeke nzoni aJuif nga na azo so ayeke aJuif ape ate ye place oko ape. Na ngoi so ambeni zo so ayeke na mara bango ndo tongaso aga na Antioche, Pierre azia ti te ye na aita so ayeke aJuif ape, peut-être ndali ti so lo ye pëpe ti son bê ti aChrétien so ayeke aJuif. Bazengele Paul abâ so Pierre asara ye ti handango lê ti zo na lo suku na lo na lê ti azo kue (aGal. 2:​13, 14). Atâa faute so Pierre asara, lo ngbâ ti sara na Jéhovah. Nyen la a-aidé lo?

9. Jean 6:​68, 69 afa nyen na ndö ti dutingo be-ta-zo ti Pierre?

⁹ Pierre ayeke lani be-ta-zo, lo zia lege na mbeni ye oko ape ti kanga lege na lo ti mû peko ti Jésus. Lo fa lani so lo yeke be-ta-zo na ngoi so Jésus atene mbeni tënë so adisciple ti lo amä yâ ni ape. (Diko Jean 6:​68, 69.) Adisciple mingi azia ti mû peko ti Jésus sân ti gi ti hinga nda ti tënë ni. Me Pierre ape. Lo hinga lani so gï Jésus la ayeke na “atënë so amû na zo fini ti lakue lakue.”

10. Tongana nyen la Jésus afa so lo yeke na confiance na Pierre? (Bâ nga foto.)

¹⁰ Jésus adö lani Pierre azia ape. Na ndangba bï ti Jésus na sese, lo hinga lani so Pierre na tanga ti abazengele ni ayeke dö lo ti zia. Ye oko, Jésus ayeke lani na confiance so Pierre ayeke kiri ti wara ngangu nga lo yeke ngbâ be-ta-zo (Luc 22:​31, 32). Jésus ahinga lani so “yingo ti zo ayeke na nzara ti sara ye, me mitele awoko.” (Marc 14:38). Tongaso, même na peko ti so Pierre atene so lo hinga Jésus ape, Jésus adécouragé na terê ti bazengele ti lo so ape. Jésus so a zingo lo na akuâ asi na Pierre, na bango  ni na ngoi so Pierre ayeke gï lo oko (Marc 16:7; Luc 24:34; 1 aCor. 15:5). Ye so adoit lani ti kpengba bazengele so mingi, so lo découragé ngangu ndali ti ye so lo sara.

11. Tongana nyen la Jésus adë bê ti Pierre so Jéhovah ayeke mû maboko na lo?

¹¹ Jésus adë bê ti Pierre so Jéhovah ayeke mû maboko na lo. Jésus so a zingo lo na kuâ akiri asara mbeni miracle so asara si Pierre na amba ti lo abazengele agbu asusu (Jean 21:​4-6). Kite ayeke dä ape so miracle so asara si Pierre ahinga so a yeke ngangu ape na Jéhovah ti mû na lo aye so lo bezoin ni. Peut-être bazengele ni adabe ti lo na tënë ti Jésus so lo tene Jéhovah ayeke mû na azo so ayeke “gi kozoni Royaume” aye so ala bezoin ni (Mat. 6:33). Aye so kue a-aidé Pierre ti zia kua ti fango tënë kozo na kua ti gingo susu. Na lango ti Pentecôte ti ngu 33, lo fa tënë sân mbeto, lo aidé azo saki mingi ti yeda na nzoni tënë (Kus. 2:​14, 37-41). Na pekoni, lo aidé azo ti Samarie nga na azo so ayeke aJuif ape ti yeda na Christ (Kusala 8:​14-17; 10:​44-48). Biani, Jéhovah asara kua na Pierre na mbeni lege so ayeke nde mingi ti ga na mara ti azo kue na yâ ti congrégation.

12. Tongana nyen la tapande ti Pierre apeut ti aidé e tongana a ninga awe la e yeke tiri na mbeni wokongo?

¹² Jéhovah apeut ti aidé e ti ngbâ ti sara na lo. A peut ti duti lakue kete ye ape tongana a ninga awe la e yeke tiri na mbeni wokongo. Na ambeni ngoi, awokongo ti e apeut ti duti ngangu ahon ti Pierre. Me Jéhovah apeut ti mû na e ngangu ti tene e ngbâ ti sara na lo (Ps. 94:​17-19). Na tapande, mbeni ita-koli ayeke bungbi lani na amba ti lo koli teti angu mingi kozo si lo manda tâ tënë. Lo dö lege ni lo zia biani biani. Me na ambeni ngoi nzara ni ayeke sara lo. Nyen la a-aidé lo kiri ti sara ni ape? Lo tene: “Jéhovah amû na mbi ngangu.” Lo kiri lo tene: “Grâce na yingo ti Jéhovah . . . , mbi hinga so lege ayeke dä ti [ngbâ] ti sara ye alingbi na tâ tënë . . . Jéhovah asara kua na mbi, atâa so mbi yeke mbilimbili-kue ape lo ngbâ ti kpengba mbi.”

13. Tongana nyen la e peut ti mû tapande ti Pierre, tongana ti so a fa na Kusala 4:​13, 29, 31? (Bâ nga foto.)

¹³ Tongana ti so e bâ fade, fani mingi Pierre asara mbeto ti zo. Me so lo sambela ti wara ngangu, lo wara lege ti sara ye na mbeto ape. (Diko Kusala 4:​13, 29, 31.) E nga  kue e peut ti hon ndö ti mbeto so asara e. Bâ ye so asi na Horst, mbeni ita-koli so ade maseka, so ayeke lani na Allemagne na ngoi ti aNazi. Fani mingi azo apusu lo ti tene “Heil Hitler!” na lo tene ni. Babâ na mama ti Horst asuku na lo ape, me ala sambela Jéhovah legeoko na lo ti tene lo wara courage. So babâ na mama ti Horst a-aidé lo nga lo zia bê ti lo na Jéhovah, lo wara ngangu ti dö sese. Ambeni ngoi na pekoni, lo tene: “Jéhovah azia mbi lâ oko ape.” c

14. Tongana nyen la a-ancien so ayeke azo so apensé na zo apeut ti dë bê ti azo so adécouragé?

¹⁴ Jéhovah na Jésus ayeke dö e ande ti zia ape. Na peko ti so Pierre atene lo hinga Jésus ape, lo doit lani ti mû mbeni kota desizion. Eskê lo yeke kiri na peko wala lo yeke ngbâ ti duti disciple ti Christ? Jésus avoro lani yanga na Jéhovah ti tene mabe ti Pierre awoko ape. Jésus asara lani tënë ti sambela so na Pierre nga lo fa so lo yeke na confiance so Pierre ayeke wara lege ti kpengba aita ti lo (Luc 22:​31, 32). Bê ti Pierre adoit lani ti dë mingi na ngoi so lo dabe na atënë ti Jésus. Tongana e yeke na mbeni kota desizion ti mû, Jéhovah apeut ti sara kua na a-ancien so ayeke azo so apensé na zo ti tene na e tënë ti dengo bê so e bezoin ni ti ngbâ be-ta-zo (aÉph. 4:​8, 11). Paul, so ayeke mbeni ancien so aninga na kua ni, agi ti dë bê ti azo tongaso. Lo yeke hunda na azo so adécouragé ti gbu li na ndö ti fason so Jéhovah agboto ala ândö na yâ ti tâ tënë. Na pekoni lo yeke tene na ala so, so Jéhovah ayeke na tâ ndoye na mbage ti ala, lo yeke dö ala ti zia ape. Lo tene: “Mbi bâ gbâ ti azo so  adécouragé so angbâ ti gbu ngangu grâce na mungo maboko ti Jéhovah.”

15. Tongana nyen la tapande ti Pierre na ti Horst afa so Matthieu 6:33 ayeke tâ tënë?

¹⁵ Gï tongana ti so Jéhovah amû na Pierre nga na tanga ti abazengele aye so ala yeke na bezoin ni, lo yeke mû nga na e aye so e bezoin ni tongana e zia kua ti fango tënë kozo (Mat. 6:33). Na peko ti Use bira so amû sese kue, Horst, so e sara tënë ti lo fade, apensé lani ti sara kua ti pionnier. Me, lo yeke lani wayere mingi nga lo yeke na kite so lo peut ti wara aye so lo bezoin ni ti sara kua ti ngoi kue. Lo yeke sara tongana nyen? Lo mû lani desizion ti tara Jéhovah ti bâ wala lo yeke mû na lo biani aye so lo bezoin ni. Tongaso, na ngoi ti vizite ti surveillant lo fa tënë na yâ ti yenga ni kue. Na hunzingo ti yenga ni, li ti lo akpe kue na ngoi so surveillant ni amû na lo mbeni enveloppe so nginza ayeke na yâ ni, me lo fa na Horst ape zo wa la amû na lo nginza ni. Nginza so a mû na lo alingbi ti aidé lo ti sara kua ti pionnier teti anze mingi. Horst abâ so cadeau so afa so Jéhovah ayeke aidé lo. Lo zia Royaume na kozo ndo na yâ ti tanga ti gigi ti lo kue.—Mal. 3:10.

16. Ngbanga ti nyen la a yeke nzoni e manda ye na ndö ti tapande ti Pierre nga na aye so lo sû na yâ ti alettre ti lo?

¹⁶ Terê ti Pierre adoit lani ti nzere mingi so Jésus adö lo azia ape tongana ti so lo hunda. Christ angbâ lani ti fa ye na Pierre ti tene lo duti mbeni bazengele so ayeke be-ta-zo nga mbeni nzoni tapande ndali ti aChrétien. E manda apendere ye mingi na lege ti aye so Jésus afa na lo. Pierre afa ambeni ye ti manda ni nga na ambeni nde na yâ ti alettre use so lo tokua na acongrégation na ngoi ti akozo Chrétien. Article ti peko ayeke sara tënë na ndö ti ambeni tënë ti dango bê so ayeke na yâ ti alettre so nga tongana nyen la e peut ti sara ye alingbi na ni laso.