Mo diko a-article ti Tour ti Ba Ndo so asigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

A lingbi e sara ye na mbage ti aChrétien so a soro ala ti gue na yayu tongana nyen?

E bâ na nene ni mabe so ala yeke na ni, me e yeke gboto lê mingi na ndö ti ala ape. E kpe ti “gonda” ala ahon ndö ni (Jude 16). E yeke hunda ala pëpe na atënë so abâ gï ala so andu beku ti ala.—w20.01, l. 29.

Nyen la afa na mo so Jéhovah azia lê ti lo na ndö ti mo?

Bible afa so lo hinga mo même kozo ti tene a dü mo. Lo yeke mä nga asambela ti mo. Lo hinga ye so ayeke na yâ ti bê ti mo nga lo hinga wala mo yeke na ngia wala vundu. Aye so mo yeke sara ayeke sara si lo yeke na ngia wala vundu (1 Chron. 28:9; aProv. 27:11). Lo la lo gboto mo na mbage ti lo.—w20.02, l. 12.

Na ngoi wa la a lingbi e sara tënë nga na ngoi wa la a lingbi e duti kpô?

A nzere na e ti duti lakue nduru ti sara tënë na ndö ti Jéhovah. A lingbi e sara tënë na mbeni zo so amû mbeni sioni lege. A lingbi a-ancien amû wango na mbeni zo so abezoin ni. E yeke hunda pëpe anzene nzene tënë na ndö ti fason so aita ayeke sara kua ti fango tënë na yâ ti akodro so a kanga lege na kua ti e dä, nga aita so avivre na yâ ti akodro so ayeke fa pëpe anzene nzene ye na ndö ti fason so ala voro na Jéhovah kâ. E yeke fa pëpe atënë so zo kirikiri adoit ti mä ni ape.—w20.03, l. 20-21.

Tongana nyen la agbadora so a sara tënë ti ala na Joël chapitre 2 ayeke nde na ala so a sara tënë ti ala na Apocalypse chapitre 9?

Na Joël 2:20-29, Nzapa atene so lo yeke pusu agbadora so yongoro nga lo yeke kanga dû ti ye so agbadora so asara. Na pekoni, Nzapa ayeke tuku yingo ti lo na ndö ti awafango tënë ti lo. Ambage ti prophétie so aga tâ tënë na ngoi so aturugu ti Babylone alï na ngangu na Israël nga na ambeni ngoi na pekoni. Apocalypse 9:1-11 asara tënë ti awakua ti Jéhovah so a soro ala ti gue na yayu na ngoi ti e so ayeke tongana agbadora, ala yeke fa tënë ti angbanga ti Nzapa na ndö ti sioni dunia so; ye so asara si azo so amû mbage ti dunia ni ayeke nzoni oko ape.—w20.04, l. 3-6.

Zo wa la ayeke gbia ti nord laso?

A yeke Russie na akodro so amû maboko na lo. Ala sara ngangu na ndö ti azo ti Nzapa, ala kanga lege na kua ti fango tënë nga ala sara aye ti ngangu na aTémoin. Gbia ti nord ayeke gi ti hon ndö ti gbia ti sud.—w20.05, l. 13.

Ambage ti “lengo ti yingo” kue la a fa ni na aGalate 5:22, 23 so?

Ên-ën. Yingo vulu amû maboko na e ti duti na ambeni pendere sarango ye, na tapande sarango ye mbilimbili (aÉph. 5:8, 9).—w20.06, l. 17.

Mbeni kpale wa la ziango aye na ndö ti aréseaux sociaux alingbi ti ga na ni na mo?

Acommentaire, afoto, wala avidéo so mo zia dä apeut ti sara si azo abâ so mo sara terê ti mo kete ape me mo yeke pika kate ti mo.—w20.07, l. 6-7.

Nyen la awafango tënë alingbi ti manda na mbage ti azo ti gingo asusu so ahinga kua ni nzoni?

Ala yeke sara kua na ngoi nga na ndo so ala lingbi ti wara asusu dä. Ala yeke manda ti sara kua na anzoni gbakuru. Ala yeke sara kua na mbeto ape atâa aye achangé. E lingbi ti sara nga tongaso na yâ ti kua ti e ti fango tënë.—w20.09, l. 5.

Ambeni ye wa la e lingbi ti sara ti aidé a-étude ti e ti ye Jéhovah mingi?

E lingbi ti wa ala ti diko Bible lâ oko oko nga ti gbu li na ndö ti ye so ala diko. E lingbi nga ti fa na ala ti sambela.—w20.11, l. 4.

Na 1 aCorinthien 15:22, a tene: “Na yâ ti Christ ala kue ayeke wara fini.” Azo wa la ayeke na popo ti azo so?

Bazengele Paul aye pëpe ti tene so a yeke zingo azo kue na kuâ. Me lo yeke sara tënë ti aChrétien so a soro ala ti gue na yayu so “a zia ala nde tongana azo so asara beoko na Christ Jésus”. (1 aCor. 1:2; 15:18).—w20.12, l. 5-6.

Nyen la azo so a soro ala ti gue na yayu ayeke sara na peko ti so ‘a changé terê ti ala tongana ti so zo ayeke ko lê ti lo, na ngoi ti ndangba trompette’?—1 aCor. 15:51-53.

Ala yeke mû peko ti Christ, tongana aberger, ala yeke fa lege na azo na barre ti wen (Apoc. 2:26, 27).—w20.12, l. 12-13.