Bazengele Paul asû lani mbeti na Timothée, so ayeke mba ti lo ancien, lo tene: “Mbi wa mo mingi na lê ti Nzapa, na lê ti Christ Jésus nga na lê ti a-ange so Nzapa asoro ala, ti sara aye so mbi fa so, mo fâ ngbanga na ndö ni na yâ ti bê ti mo kozoni pëpe, mo bâ yâ ti azo bango pëpe si mo sara ye na ala.”—1 Tim. 5:21.

Kozoni, a-ange so alingbi pëpe ti duti azo 144000. Na ngoi so Paul asû mbeti so na Timothée, ade a komanse ti zingo aChrétien ti gue na yayu ape. Abazengele nga na ambeni zo so a soro ala ti gue na yayu ade aga acréature ti yingo ape, tongaso “a-ange so Nzapa asoro ala” apeut ti duti ala ape.—1 aCor. 15:​50-54; 1 aThes. 4:​13-17; 1 Jean 3:2.

Na ndö ni, “a-ange so Nzapa asoro ala” alingbi pëpe ti duti a-ange so asara kpengba-li na ngoi ti Kota ngu so apika. A-ange so amû lani peko ti Satan, ala ga asioni yingo, ala yeke awato ti Jésus (Gen. 6:2; Luc 8:​30, 31; 2 Pi. 2:4). Na yâ ti angoi so ayeke ga, a yeke bi ande ala na yâ ti dû so alï mingi teti ngu 1000 na pekoni a yeke futi ala legeoko na Zabolo.—Jude 6; Apoc. 20:​1-3, 10.

“A-ange so Nzapa asoro ala” so Paul asara tënë ti ala adoit ti duti a-ange so ayeke na yayu so ayeke mû maboko na “Nzapa nga na Christ Jésus,” so a sara tënë ti ala na yâ ti oko versê so.

A-ange so ayeke be-ta-zo ayeke saki mingi (aHéb. 12:​22, 23). Na bango ni, Jéhovah amû oko kua na a-ange kue ape (Apoc. 14:​17, 18). Na tapande, Jéhovah ahunda lani gï na mbeni ange oko ti fâ aturugu ti Assyrie 185000 (2 aGbia 19:35). Me peut-être a yeke hunda na gbâ ti a-ange ti “zi na yâ ti Royaume ti [Jésus] aye kue so ayeke sara si zo apika gere ti lo nga na azo so ayeke kpe ndia pëpe.” (Mat. 13:​39-41). A peut ti mû na ambeni kua ti “bungbi na ndo oko azo ti lo so a soro ala” ti gue na yayu (Mat. 24:31). Nga a peut ti hunda na ambeni ti ‘bata e na yâ ti alege ti e kue.’—Ps. 91:11; Mat. 18:10; bâ Matthieu 4:11; Luc 22:43.

“A-ange so Nzapa asoro ala” so a sara tënë ti ala na 1 Timothée 5:​21, kua ti ala ayeke peut-être ti bâ lege ti atënë so andu congrégation. Na yâ ti atënë so angoro versê so, Paul amû wango na ndö ti kua ti a-ancien so ala lingbi ti tene aita ti congrégation ane ala. Paul atene na a-ancien so a yeke nzoni ala ‘fâ ngbanga na ndö ti aye na yâ ti bê ti ala kozoni pëpe’ wala ala ‘bâ yâ ti azo bango pëpe si ala sara ye na ala’ nga a yeke nzoni ala mû pëpe adesizion sân ti gbu li. Mbeni kota raison so ndali ni ala doit ti sara ye alingbi na wango so Paul amû ayeke so ala yeke sara kua na “lê ti Nzapa, na lê ti Christ Jésus nga na lê ti a-ange so Nzapa asoro ala”. Tongaso, a yeke polele so a mû na ambeni ange kua ti bâ ndo na ndö ti congrégation, na tapande ti bata ni, ti bâ ndo na ndö ti kua ti fango tënë nga ti fa na Jéhovah aye so ala bâ.—Mat. 18:10; Apoc. 14:6.