A DÜ mbi na ngu 1926 na Crooksville, Ohio na États-Unis. Babâ na Mama amä na bê lani na Nzapa ape, me ala tene na e amolenge ti ala miombe kue ti gue na eglize. Mbi gue lani na Eglize Méthodiste. Na ngoi so mbi yeke lani na ngu 14, pasteur ni amû na mbi mbeni cadeau ndali ti so na yâ ti ngu oko mbi manke bungbi ti dimanche oko ape.

Na ngoi ni so, mbeni voizin ti e Témoin ti Jéhovah, so iri ti lo Margaret Walker, ayeke ga abâ mama ti mbi na lo yeke sara lisoro na lo na ndo ti Bible. Mbeni lâ, mbi tene mbi kue mbi yeke duti dä. Mama abâ atene mbi yeke buba yâ ti mandango ye ti lo, tongaso lo tomba mbi ti sigigi. Me mbi ngbâ lakue ti gi ti mä lisoro ti ala ni. Na peko ti so Margaret aga fani mingi, lo hunda mbi lo tene: “Mo hinga iri ti Nzapa?” Mbi tene, “Azo kue ahinga so: A yeke Nzapa.” Lo tene: “Mû Bible ti mo, mo zi ni na Psaume 83:18 (Psaume 83:19, La sainte Bible en sango).” Mbi zi ni na mbi ga ti bâ so iri ti Nzapa ayeke Jéhovah. Mbi sigigi na loro mbi gue na mbage ti akamarade ti mbi, mbi tene na ala: “Tongana ala kiri na yanga-da na lakui so, ala zi Bible ti ala na Psaume 83:18 na ala bâ iri ti Nzapa.” Peut-être mo tene so gi hio tongaso mbi komanse ti fa tënë awe la.

 Mbi manda lani Bible na mbi wara batême na ngu 1941. Kete na pekoni, a hunda na mbi lani ti mû li ni na ngoi ti mandango buku ti congrégation. Mbi tene na mama ti mbi nga na aita ti mbi ti ga na bungbi ni, na ala kue akomanse ti ga na bungbi ti mandango buku so mbi mû li ni dä. Me, a nzere lani na Papa ape.

A mû na mbi gbâ ti kua na yâ ti congrégation, na mbi leke bibliothèque ti mbi. Mbeni lâ, Papa afa ambeti ti mbi, lo tene: “Mo bâ aye so kue so? Mbi ye ti tene a sigigi na ni na yâ ti da so, mo kue mo mû pekoni.” Mbi sigigi na da ni na mbi wara mbeni da nduru na Zanesville, na Ohio, me mbi yeke ga ka ti kpengba afami ti mbi.

Papa agi lani ti kanga lege na Mama ti gue na abungbi. Na ambeni ngoi, tongana lo yeke na lege ti gue na bungbi lo tomba peko ti lo, lo gbu lo lo kiri na lo na da. Me Mama asigigi na mbeni porte ni nde na lo gue na bungbi. Mbi tene na Mama, mbi tene: “Sara mbeto ape. Lo yeke fatigué ande na tombango peko ti mo.” A si na mbeni ngoi, Papa azia lani ti kanga lege na Mama, na lo gue na abungbi sân tënë.

Na ngu 1943, congrégation ti e akomanse ti sara Ekole ti Kusala ti aChrétien, na mbi komanse ti sara adiskur so a yeke mû ka na a-élève na ekole ni. Awango so a mû na mbi lani na peko ti adevoir ti mbi na ekole ni amû maboko na mbi ti maï akode ti sarango tënë ti mbi.

Na ngu 1944, na ngoi ti Use Bira so Amû Sese Kue, a hunda na mbi ti lï turugu. Mbi gue na Fort Hayes so ayeke poste ti aturugu na Columbus, Ohio, ti tene a sara examen ti mbi ti bâ wala mbi peut ti sara kua ti turugu nga ti remplir ambeni mbeti. Mbi tene nga na kota zo ti lapolice ni so mbi yeke ga turugu ape. Ala zia mbi, mbi kiri na yanga-da. Ambeni lango kete na pekoni, mbeni kota zo ti lapolice ni aga na yanga-da ti mbi na lo tene na mbi, lo tene: “Corwin Robison, a hunda na mbi ti ga ti gbu mo.”

Yenga use na peko ti so mbi yeke na da-ngbanga, juge ni atene: “Tongana a yeke gi mbi, mo yeke sara kanga na yâ ti gigi ti mo kue. Mo yeke na mbeni tënë ti tenengo ni?” Mbi kiri tënë, mbi tene: “Kota zo, a yeke nzoni a bâ mbi tongana mbeni wakua ti Nzapa. Yanga-da ti azo kue ayeke pupitre ti mbi, na mbi fa nzoni tënë ti Royaume na azo mingi.” Juge ni atene na tanga ti azo ti fango ngbanga ni, a tene: “Ala yeke ge pëpe ti bâ wala maseka-koli so ayeke wakua ti Nzapa. Me ala yeke ge ti bâ wala lo lingbi na kua ti turugu.” A sara nga penze-ngbonga bale-ota na pekoni ape, azo ti fango ngbanga ni amû desizion atene mbi lingbi na kanga. Juge ni adë ngbanga ti ngu oku na li ti mbi, na a tokua mbi na da ti kanga na Ashland, Kentucky.

Mbi sara lani dimanche use na da ti kanga na Columbus, Ohio. Na kozo lango ni, mbi ngbâ lani na da ti kanga ni. Mbi sambela Jéhovah lani, mbi tene: “Mbi peut ti ngbâ na kanga ngu oku ape. Mbi hinga ye so mbi yeke sara ape.”

Na ndade ni, azo ti batango azo ti kanga ni azi mbi na gigi. Mbi gue na mbage ti mbeni zo ti kanga ni so lo yo, lo kono na mbi na lo e luti na e yeke bâ ndo na lê ti fenêtre. Lo hunda mbi, lo tene: “Nduru zo, a kanga mo ngbanga ti nyen?” Mbi tene na  lo: “Mbi yeke Témoin ti Jéhovah.” Lo hunda mbi, lo tene: “Mo yeke Témoin ti Jéhovah? Ka mo yeke ge ngbanga ti nyen.” Mbi tene na lo: “A-Témoin ti Jéhovah ayeke sara bira ape nga ala yeke fâ zo ape.” Lo tene: “Ala kanga mo ndali ti so mo ye ti fâ zo ape. Ala kanga ambeni ndali ti so ala fâ azo. A yeke na lege ni la?” Mbi tene na lo: “Ên-ën, a yeke na lege ni oko ape.”

Na pekoni lo tene: “Mbi sara lani ngu 15 na yâ ti mbeni da ti kanga, kâ mbi diko mbeni mbeti ti ala.” Mbi sambela, mbi tene: “Jéhovah, mû maboko na mbi ti sara si koli so amû mbage ti mbi.” Na ngoi ni so, zo ti kanga ni so iri ti lo ayeke Paul atene: “Tongana mbeni zo ti kanga andu mo, dekongo. Mbi yeke bâ lege ti lo.” Tongaso, na ngoi so mbi yeke na da ti kanga ni, mbi wara tënë pëpe na azo ti kanga 50 so ayeke kâ.

Na ngoi so akota zo so ayeke bâ ndo na ndo ti azo ti kanga ni atokua mbi na da ti kanga ti Ashland, mbi wara tere lani na ambeni ita kâ so akpengba na lege ti yingo. Ala mû maboko na mbi nga na ambeni ita ti ngbâ ti kpengba na lege ti yingo. Ala fa na e ambeni versê ti Bible so e yeke diko yenga na yenga nga e yeke leke ambeni hundango ndo nga na akiringo tënë ndali ti abungbi so aita ni aleke ti tene e sara. Mbeni ita ayeke nga dä so ayeke bâ lege ti territoire ti e. E yeke lani na yâ ti mbeni kota da ti kanga so a zia agbogbo ni na tere ti amur. Ita so ayeke bâ lege ti territoire atene lani na mbi atene: “Robison, mo yeke bâ lege ti agbogbo so ti si na aso kâ. Zo so a mû na lo gbogbo so ayeke zo ti territoire ti mo. Sara kue ti fa tënë na lo kozo si lo hon.” A yeke tongaso la a leke lani ti tene e fa tënë na lege ni.

Use Bira so Amû Sese Kue ahunzi lani na ngu 1945, me ambeni ngoi na pekoni mbi ngbâ lani na kanga. Mbi yeke gi bê ti mbi lani na ndo ti afami ti mbi ndali ti so Papa atene lani na mbi, a tene: “Tongana mbi hunzi na mo, mbi yeke bâ lege ti atanga ni so.” Na ngoi so a zi mbi na kanga, mbeni ye so mbi ku tere ti mbi na ni ape adö bê ti mbi na amû ngia na mbi mingi. Atâa kangango lege ti Papa, azo mbasambala na yâ ti fami ti mbi ayeke gue na abungbi nga mbeni ita ti mbi ti wali awara lani batême.

Na ngoi so Bira ti Corée akomanse lani na ngu 1950, a hunda na mbi ti fani use ni ti lï turugu na mbi gue na Fort Hayes. Na peko ti so ala sara examen ti mbi awe, mbeni kota zo ti lapolice ni atene na mbi: “Mo lingbi tâ na kua ti turugu ni ahon azo kue ti yâ ti groupe ti mo.” Mbi tene: “So ayeke  nzoni, me mbi yeke lï turugu ape.” Mbi fa na lo tënë so ayeke na 2 Timothée 2:3 na mbi tene: “Mbi yeke turugu ti Christ awe.” Lo duti kpô aninga, na pekoni lo tene: “Mo peut ti hon.”

Kete na pekoni, mbi gue na mbeni bungbi so a sara ndali ti ala so aye ti gue na Béthel na ngoi ti mbeni kota bungbi na Cincinnati, Ohio. Ita Milton Henschel atene na e so tongana mbeni ita-koli aye ti sara kua ngangu ndali ti Royaume, bungbi ti Jéhovah ayeke iri lo ti sara kua na Béthel. A yeda na demande ti mbi ti sara kua na Béthel na mbi gue na Béthel ti Brooklyn na nze ti août, ngu 1954. Mbi ngbâ na Béthel juska fadeso.

Lani na Béthel mbi yeke lakue na kua mingi ti sarango ni. Angu mingi, mbi yeke leke amachine ti kporongo na ngu so ayeke na yâ ti place so a yeke imprimé ambeti dä nga na yâ ti abureau ti Béthel. Mbi yeke leke nga ambeni machine nde nga mbi yeke leke aclé so abuba. Mbi sara nga kua lani na aDa ti assemblée na New York City.

Mbi ye lani mingi aye so a yeke sara na Béthel, aye tongana vorongo Nzapa na ndapre, Mandango Tour ti Ba Ndo nga fango tënë legeoko na congrégation. Tongana mo gbu li ti mo na ndo ni, mo yeke bâ so a yeke aye so a lingbi asewa ti aTémoin ti Jéhovah kue asara ni lakue. Tongana ababâ na amama na amolenge ti ala agi nda ti tënë ti Nzapa lâ oko oko na sewa, ala voro Nzapa lakue na sewa nga ala gue na bungbi na ala kiri tënë nga ala fa nzoni tënë, kite ayeke pëpe so azo kue ti yâ ti sewa ni ayeke ngbâ nduru na Jéhovah.

Mbi wara akamarade mingi na Béthel nga na yâ ti congrégation. Ambeni ayeke aChrétien so a soro ala ti gue na yayu na ala kui ala gue na yayu ti wara futa ti ala awe. Ambeni a soro ala ti gue na yayu ape. Me awakua ti Jéhovah kue, même aBéthelite, ayeke na siokpari na tere ti ala. Tongana mbi na mbeni ita e wara tënë mbi yeke gi lakue ti duti na siriri na lo. Mbi yeke gbu li ti mbi na ndo ti Matthieu 5:23, 24 nga na ndo ti fason so a lingbi e leke na tënë ni. A yeke kete ye ape ti hunda pardon, me a yeke ngangu ti tene akpale angbâ na popo ti mbi na mbeni kamarade ti mbi na peko ti so mbi hunda pardon na lo.

A yeke ngangu na mbi fadeso ti fa tënë da na da, ndali ti so ngu ti mbi ague na li ni mingi, me mbi  zia lege ni ape. Mbi manda yanga ti Chinois Mandarin kete na mbi ye mingi ti fa tënë na aChinois na ndo ti lege. Na ambeni ndapre mbi yeke zia apériodique 30 wala 40 na azo so aye ni.

Mbi sara même lani vizite na Chine! Mbeni lâ, mbeni pendere molenge-wali ahe ngia na mbi, na ngoi so lo yeke sara sabango ti mbeni ndo ti kango alê ti keke. Mbi he ngia na mbi mû na lo Tour ti Ba Ndo na Réveillez-vous ! na yanga ti Chinois. Lo mû ni na lo fa na mbi so iri ti lo ayeke Katie. Na pekoni, ndo kue so lo bâ mbi dä lo yeke ga ti sara tënë na mbi. Mbi fa na lo iri ti alê ti keke na ti akugbe-kasa na Anglais, na lo yeke tene pekoni oko na oko. Mbi fa nga nda ti aversê ti Bible na lo, mbi mû na lo buku Bible afa nyen. Ye oko, ayenga mingi na pekoni, mbi bâ lo encore ape.

Anze mingi na pekoni, mbi mû apériodique na mbeni molenge-wali so ayeke sara sabango ti aye. Na yenga ti peko, lo mû na mbi téléphone ti lo na lo tene: “Sara tënë na mbeni zo na Chine.” Mbi tene na lo: “Mbi hinga zo oko na Chine ape.” Me lo ngbâ gi ti mû ni na mbi, tongaso mbi mû ni na mbi tene: “Bara ala, mbi Robison la.” Zo ni atene: “Robby, mbi Katie la. Mbi kiri na Chine awe.” Mbi tene: “Na Chine?” Katie atene: “En, me mo hinga molenge-wali so amû na mo téléphone so? Ita ti mbi la. Mo fa lani na mbi apendere ye mingi. Pardon, fa na lo aye so mo fa lani na mbi so.” Mbi tene na lo: “Katie, mbi yeke sara ye so mbi peut ti sara. Singila so mo fa na mbi ndo so mo yeke dä.” Kete na pekoni, mbi sara tënë na ita ti Katie ti ndangba ni. Mbi hinga so, ndo kue so ala yeke dä ala yeke manda ye mingi na ndo ti Jéhovah.

Mbi sara kua so ayeke nzoni-kue na Jéhovah teti ngu 73. A nzere na mbi mingi so lo mû lani maboko na mbi ti ngbâ ti duti nde na dunia so nga ti ngbâ ti duti be-ta-zo na lo na ngoi so mbi yeke na kanga. Aita ti mbi atene nga na mbi so ala sara lani mbeto ape ndali ti so mbi gbu ngangu na gbele kangango lege ti Papa, na mbi zia lege ni ape. Yeke yeke, Mama nga na aita ti mbi omene awara lani batême. Même Papa nga kue achangé bango ndo ti lo na lo komanse ti gue na abungbi kozo si lo kui.

Tongana Jéhovah aye, lo lingbi ti zingo afami nga na akamarade ti mbi so akui awe ti tene ala wara fini na yâ ti fini dunia. Tara ti bâ ngia so e yeke wara ande na ngoi so e yeke voro Jéhovah legeoko na azo so e ye ala mingi na yâ ti ngoi so ayeke ga teti lakue lakue. *