ARTICLE TI MANDANGO NI 5
BIA 108 Tâ ndoye ti Nzapa
Anzoni ye so e wara ndali ti so Jéhovah aye e
“Christ Jésus aga na dunia so ti sö awasiokpari.”—1 TIM. 1:15.
KOTA TËNË TI ARTICLE NI
Na yâ ti article so, e yeke bâ tongana nyen la e bâ nzoni na lege ti ye so a futa ti zi azo nga tongana nyen la e peut ti fa singila ti e na Jéhovah.
1. Nyen la e peut ti sara ti zia ngia na bê ti Jéhovah?
IMAGINÉ so mo mû na mbeni zo so mo ye lo mbeni pendere cadeau so lo bezoin ni. Vundu ayeke sara mo tongana zo ni azia cadeau ni na yâ ti mbeni carton na lo girisa na ndö ni. Me tongana lo sara kua na cadeau ni nga lo kiri singila na mo ndali ni, a yeke nzere na mo. Nyen la e manda dä? Jéhovah amû Molenge ti lo ndali ti e. Tongaso, terê ti lo ayeke nzere mingi tongana e kiri singila ndali ti pendere cadeau so nga ndali ti ndoye so apusu lo ti mû na e ye so a futa ti zi azo.—Jean 3:16; aRom. 5:7, 8.
2. Nyen la e yeke bâ na yâ ti article so?
2 Tongana ngoi ayeke hon, e peut ti komanse ti bâ cadeau so, so ayeke ye so a futa ti zi azo, tongana senge ye. Me tongana e kiri singila na Nzapa ndali ti ye so a futa ti zi azo encore ape, a yeke mo bâ mo tene e zia pendere cadeau ti Nzapa so na mbeni ndo so e bâ ni encore ape nga e pensé na ni encore ape. Ti tene mara ti ye tongaso asi ape, e doit ti kiri singila lakue na Nzapa nga na Christ ndali ti aye so ala sara ndali ti e. Article so ayeke aidé e ti sara ni. E yeke bâ tongana nyen la e peut ti bâ nzoni na lege ti ye so a futa ti zi azo laso nga na yâ ti angoi so ayeke ga. E yeke bâ nga aye so e peut ti sara ti kiri singila na Jéhovah, mbilimbili na ngoi ti Mémorial, ndali ti so lo ye e.
ANZONI YE SO E WARA LASO
3. Na mbeni lege wa la e yeke bâ nzoni na lege ti ye so a futa ti zi azo laso?
3 E yeke wara laso aye ti nzoni na lege ti ye so a futa ti zi azo. Na tapande, na lege ni, Jéhovah apardonné asiokpari ti e. Lo doit gï ti pardonné e ape, me lo ye ti sara ni. Mbeni zo ti sungo psaume akiri singila so Nzapa apardonné lo, lo tene: “Jéhovah, mo yeke nzoni nga mo yeke nduru ti pardonné zo.”—Ps. 86:5; 103:3, 10-13.
4. Jéhovah amû ye so a futa ti zi azo ndali ti azo wa? (Luc 5:32; 1 Timothée 1:15).
4 Ambeni zo apeut ti bâ so ala lingbi ape ti tene Jéhovah apardonné ala. Ti vrai ni, e kue e lingbi na ni ape. Bazengele Paul ahinga lani so lo ‘lingbi ti tene a iri lo bazengele pëpe’. Me lo tene: “Na lege ti kota nzobe ti Nzapa mbi ga zo so ala yeke bâ lo fadeso.” (1 aCor. 15:9, 10). Tongana e sara siokpari na e changé bê ti e, Jéhovah ayeke pardonné e. Ngbanga ti nyen? Ngbanga ti so lo ye e me pëpe ndali ti so e lingbi na ni. Tongana mo yeke gi bê ti mo ndali ti so mo bâ so mo yeke ye oko ape, girisa ape so Jéhovah amû ye so a futa ti zi azo ndali ti azo so asara siokpari na achangé bê ti ala, me pëpe ndali ti azo so siokpari ayeke na terê ti ala ape.—Diko Luc 5:32; 1 Timothée 1:15.
5. Eskê e peut ti pensé so Jéhovah adoit gï ti sara nzoni bê na e? Fa ndani so mo tene tongaso.
5 A yeke nzoni zo oko na popo ti e apensé ape so Jéhovah adoit gï ti sara nzoni bê na e même tongana e sara na lo angu mingi awe. Ti vrai ni, Jéhovah abâ na nene ni dutingo be-ta-zo ti e (aHéb. 6:10). Lo mû na e ye so a futa ti zi azo senge senge, me pëpe ndali ti akua so e sara na lo. Tongana e tene so e lingbi na nzoni bê so lo sara na e wala so lo doit ti sara mbeni ye so ayeke nde ndali ti e, a yeke mo bâ mo tene e tene so Christ akui gï senge senge.—Bâ aGalate 2:21.
6. Ngbanga ti nyen la Paul asara lani kua ti Jéhovah ngangu?
6 Paul ahinga lani so atâa lo sara kua ti Jéhovah mingi, Lo doit gï ti pardonné lo ape. Tongaso, lo sara kua ti Jéhovah ngangu tongaso ngbanga ti nyen? Lo sara ni ti kiri singila na Jéhovah so asara nzoni bê na lo (aÉph. 3:7). Tongana Paul, zia e ngbâ ti sara kua ti Jéhovah na bê ti e kue ti kiri singila na lo ndali ti nzoni bê ti lo atâa so e lingbi na ni ape.
7. Na mbeni lege nde wa la e yeke bâ nzoni na lege ti ye so a futa ti zi azo laso? (aRomain 5:1; Jacques 2:23).
7 Mbeni lege nde so e yeke bâ nzoni na lege ti ye so a futa ti zi azo laso ayeke so e peut ti duti na kpengba songo na Jéhovah. a Tongana ti so article so ahon afa, tongana a dü e, e yeke na songo na Nzapa ape. Me grâce na ye so a futa ti zi azo, e peut ti duti na “siriri na Nzapa” nga ti ga nduru na lo.—Diko aRomain 5:1; Jacques 2:23.
8. Ngbanga ti nyen la a yeke nzoni e kiri singila na Jéhovah ndali ti pasa so lo mû na e ti sambela lo?
8 Bâ gï mbeni ye oko so e yeke na ni grâce na songo ti e na lo: pasa ti sambela lo. Jéhovah ayeke mä asambela ti azo ti lo so abungbi ndo oko si a sara ni, me lo yeke mä nga ti e oko oko. Sambela alingbi ti sara si bê ti e adë, amû na e siriri ti bê me nga aga na e ambeni nzoni ye. A peut ti kpengba songo ti e ti kamarade na Nzapa (Ps. 65:2; Jacq. 4:8; 1 Jean 5:14). Na ngoi so Jésus ayeke lani na sese, lo sambela lakue ndali ti so lo hinga so Jéhovah ayeke mä lo nga so sambela ayeke aidé lo ti ngbâ ti duti na kpengba songo na Babâ ti lo (Luc 5:16). E kiri singila mingi na Jéhovah so, grâce na sandaga ti Jésus, e peut ti ga akamarade ti Lo nga même ti sara tënë na lo na lege ti sambela.
ANZONI YE SO E PEUT TI WARA ANDE
9. Anzoni ye wa la ye so a futa ti zi azo ayeke ga na ni na e ande?
9 Anzoni ye wa la ye so a futa ti zi azo ayeke ga na ni na e ande? Jéhovah ayeke mû na e awakua ti lo fini ti lakue lakue. Azo mingi apensé so ye so apeut ti si ape ndali ti so na yâ ti angu saki mingi, azo ayeke kui gï kuingo. Me ye so Jéhovah aleke kozo lani ti sara ndali ti azo ayeke ti tene ala ngbâ na fini lakue lakue. Tongana Adam asara lani siokpari ape, zo oko ayeke pensé ape so zo apeut ape ti ngbâ na fini lakue lakue. Nga, atâa so na ndembe so a yeke ngangu ti imaginé ti vivre lakue lakue, e peut ti yeda na ni ndali ti so e hinga so Jéhovah afuta ngere so ayeke ngangu mingi, so ti tene fini ti Molenge ti lo, ti sara si ye so aga tâ ye.—aRom. 8:32.
10. Nyen la aChrétien so a soro ala ti gue na yayu nga na ambeni taba ayeke ku ni kungo?
10 Atâa so ti ngbâ na fini lakue lakue ayeke mbeni ye so angbâ na devant, Jéhovah aye ti tene e pensé na ni laso. A-Chrétien so a soro ala ti gue na yayu ayeke ku kungo ti gue kâ ti tene ala na Christ akomande na ndö ti sese (Apoc. 20:6). Ambeni taba ayeke ku kungo ti ngbâ na fini na yâ ti Paradis na ndö ti sese so pasi na vundu ayeke dä ape (Apoc. 21:3, 4). Eskê mo yeke oko ti ambeni taba so ayeke na beku ti ngbâ na fini lakue lakue na ndö ti sese? Ti wara fini na ndö ti sese ayeke kete futa ahon ti wara fini na yayu ape. Ye so a leke zo ndali ni la. Fini na ndö ti sese ayeke nzere ande na e mingi.
11-12. Ambeni nzoni ye wa la e yeke ku kungo ti wara na yâ ti Paradis? (Bâ nga afoto.)
11 Imaginé gigi ti mo na ngoi so sese ayeke ga ande Paradis. Mo yeke gi bê ti mo ape na ndö ti tingo kobela wala kuâ (És. 25:8; 33:24). Jéhovah ayeke mû na e ande ye kue so e sara nzara ni. Nyen la mo ye ti manda ye na ndö ni ande? Eskê mo ye ti manda ye mingi na ndö ti anyama? Eskê mo ye ti manda ti pika mbeni ye ti pikango mozoko? Eskê mo ye ti manda ti sara dessin? Kite ayeke dä ape so e yeke duti ande na bezoin ti azo ti sarango plan ti ada, azo ti lekengo ni nga na azo ti fango yaka. E yeke duti nga na bezoin ti azo ti tongo kobe, lekengo agbakuru ti kua nga lungo afleur na bango lege ni (És. 35:1; 65:21). So e yeke na fini lakue lakue, e yeke wara ande ngoi ti sara aye so kue nga na gbâ ti ambeni ye nde.
12 Terê ti e ayeke nzere ande mingi ti yamba azo so a zingo ala na kuâ (Kus. 24:15). Imaginé nga tongana nyen la a yeke nzere ande na mo ti manda ye mingi na ndö ti Jéhovah na bango gbâ ti aye so lo créé (Ps. 104:24; És. 11:9). Ye so ayeke pendere mingi ayeke so a yeke nzere ande na e mingi ti voro Jéhovah na ti bâ so tënë ayeke na li ti e ape. Eskê mo yeke dö apendere ye so kue ti zia ti “wara ngia na yâ ti siokpari gï ndali ti kete ngoi”? (aHéb. 11:25). Oko ape! Atufa so ayeke nzoni ahon sacrifice kue so e peut ti sara laso. Girisa ape so Paradis ayeke duti lakue ye so e yeke ku ni kungo ape, me a yeke ga tâ ye. E peut ti wara aye so kue ndali ti so Jéhovah aye e mingi nga lo mû Molenge ti lo tongana ye so a futa ti zi azo.
Anzoni ye wa la mo ku kungo ti wara na yâ ti Paradis? (Bâ paragraphe 11-12)
KIRI SINGILA NA JÉHOVAH NDALI TI NDOYE TI LO
13. Tongana nyen la e peut ti kiri singila na Jéhovah ndali ti ndoye ti lo? (2 aCorinthien 6:1).
13 Tongana nyen la e peut ti kiri singila na Jéhovah ndali ti ye so a futa ti zi azo? A yeke na lege so e zia kua ti lo na kozo ndo na yâ ti fini ti e (Mat. 6:33). E doit ti sara ni ndali ti so Jésus akui “si ala so ayeke na fini, ala lingbi ti ngbâ na fini ndali ti ala wani mbeni pëpe, me ndali ti lo so akui ndali ti ala na so a zingo lo na kuâ.” (2 aCor. 5:15). E ye ti hon nde pëpe na ye so kota nzobe ti Jéhovah aye ndali ti e.—Diko 2 aCorinthien 6:1.
14. Tongana nyen la e peut ti fa so e sara confiance na Jéhovah nga e mû peko ti fango lege ti lo?
14 E peut nga ti kiri singila na Jéhovah so aye e tongana e sara confiance na lo nga e mû peko ti fango lege ti lo. E yeke sara ni tongana nyen? Tongana e yeke na adesizion ti mû, na tapande, e yeke manda mbeti juska ti si na ndo wa wala kua ti nginza wa la a yeke nzoni e sara, e doit ti gbu li na ndö ti ye so Jéhovah aye ti tene e sara (1 aCor. 10:31; 2 aCor. 5:7). Tongana e sara ye na mabe ayeke sara si mabe ti e na Jéhovah nga na songo ti e na lo ayeke kpengba mingi. Beku ti e ayeke ga tâ ye.—aRom. 5:3-5; Jacq. 2:21, 22.
15. Tongana nyen la e peut ti kiri singila na Jéhovah na ngoi ti Mémorial?
15 Mbeni lege nde ayeke dä so e peut ti kiri singila na Jéhovah ndali ti ndoye ti lo. A yeke ti sara ye kue so e peut ti sara na ngoi ti Mémorial ti kiri singila na lo ndali ti ye so a futa ti zi azo. Na ndö ti so e leke ti duti dä, e peut ti tisa nga azo ti ga (1 Tim. 2:4). Fa na azo so mo tisa ala ye so ayeke passé na ngoi ti Mémorial ni. A yeke duti nzoni tongana mo fa na ala avidéo Jésus akui ngbanga ti nyen? nga na Dabe ti mo na kuâ ti Jésus. A yeke nzoni a-ancien asara kue ti tisa aita so aga na bungbi encore ape. Imaginé ngia so ayeke duti na yayu nga na sese tongana ambeni taba ti Jéhovah so agirisa akiri na yâ ti kundu ti lo (Luc 15:4-7). Na lango ti Mémorial, zia e leke na bê ti e ti bara mba, me mbilimbili ti bara afini zo so aga nga na azo so a ninga ala ga na Mémorial ape. E ye ti tene ala bâ so a yamba ala nzoni.—aRom. 12:13.
16. Ngbanga ti nyen la a yeke nzoni e fa tënë mingi na ngoi ti Mémorial?
16 Eskê mo peut ti fa tënë mingi na ngoi ti Mémorial? A yeke mbeni nzoni lege ti kiri singila na Jéhovah nga na Jésus ndali ti aye kue so ala sara ndali ti e. Tongana e fa tënë mingi, e yeke bâ so Jéhovah amû maboko na e mingi nga e yeke sara confiance na lo mingi (1 aCor. 3:9). Nga, sara kue ti diko aversê so a zia ndali ti Mémorial na yâ ti Gingo nda ti Tënë ti Nzapa lâ oko oko wala na yâ ti mbeti ti bungbi. Mo peut même ti sara kua na aversê so na ngoi ti mandango ye.
17. Nyen la azia ngia na bê ti Jéhovah? (Bâ nga encadré “ Alege ti kiri singila ndali ti ndoye ti Jéhovah.”)
17 Ti vrai ni, peut-être dutingo ti mo amû lege na mo ape ti sara aye kue so a fa na yâ ti article so. Me girisa ape so Jéhovah ayeke haka ye so mo sara na ti amba ti mo ape. Lo hinga so mo ye lo. Tongana lo bâ so mo kiri singila ndali ti pendere cadeau so ayeke ye so a futa ti zi azo, a zia ngia na bê ti lo.—1 Sam. 16:7; Marc 12:41-44.
18. Ngbanga ti nyen la e kiri singila na Jéhovah Nzapa nga na Jésus Christ?
18 Ndali ti ye so a futa ti zi azo, a pardonné asiokpari ti e, e ga akamarade ti Jéhovah nga e yeke na beku ti ngbâ na fini lakue lakue. Zia e kiri singila na Jéhovah ndali ti ndoye ti lo so apusu lo ti mû na e anzoni ye so (1 Jean 4:19). Zia e kiri nga singila na Jésus so aye e mingi si lo mû fini ti lo ndali ti e.—Jean 15:13.
BIA 154 Tâ ndoye la
a Jéhovah apardonné lani awakua ti lo ti ândö kozo ti tene Jésus amû fini ti lo tongana ye so a futa ti zi azo. Lo peut lani ti sara ni ndali ti so lo hinga na bê ti lo kue so Molenge ti lo ayeke ngbâ ande be-ta-zo juska na kuâ. Tongaso, na lê ti Nzapa, ye ni ayeke mo bâ mo tene a futa awe ye so a futa ti zi azo.—aRom. 3:25.
