1. Nyen la e kue e doit ti sara so ayeke kete ye ape?

 LÂ OKO OKO, e doit ti mû adesizion. A yeke ngangu ti mû ambeni desizion ape, na tapande, ye so e yeke te na ndapre wala l’heure so e ye ti gue ti lango. Me ti ambeni, a yeke kete ye ape. A peut ti ndu seni ti e, ngia ti e, azo so e ye ala wala vorongo Jéhovah. E ye ti tene adesizion so e mû aga na ye ti nzoni na e nga na azo ti sewa ti e. Kota ye ni ayeke so e ye ti tene adesizion ti e anzere na Jéhovah.—aRom. 12:​1, 2.

2. Aye wa la apeut ti aidé mo ti mû anzoni desizion?

² Mo peut ti mû anzoni desizion tongana (1) mo gi ti hinga ye nzoni na ndö ti tënë ni, (2) mo gi ti hinga bango ndo ti Jéhovah na ndö ti tënë ni nga (3) mo gbu li nzoni na ndö ti aye nde nde so mo peut ti sara. Na yâ ti article so, e yeke sara tënë na ndö ti aye ni so na a yeke aidé nga e ti hinga tongana nyen la e peut ti manda ti sara kua nzoni na ngangu ti gbungo li ti e.—aProv. 2:11.

GI TI HINGA YE NZONI NA NDÖ TI TËNË NI

3. Tapande wa la apeut ti aidé e ti hinga ndani so e doit ti gi ti hinga ye nzoni na ndö ti mbeni tënë kozo ti mû mbeni desizion?

³ Kozo ye so e doit ti sara ti mû mbeni nzoni desizion ayeke ti gi ti hinga ye nzoni na ndö ti tënë ni. Ngbanga ti nyen la a yeke kota ye? Imaginé so mbeni zo ti kobela ague ti bâ mbeni docteur ndali ti mbeni ngangu kpale ti seni. Eskê docteur ni ayeke mû na lo yorö sân ti gi ti hinga kobela ni wala ti hunda na lo atënë? Oko ape. Mo nga kue mo yeke mû anzoni desizion tongana kozoni mo gbu li nzoni na ndö ti aye so mo hinga na ndö ti tënë ni. Mo peut ti sara ni tongana nyen?

4. Ti gue oko na aProverbe 18:​13, nyen la mo peut ti sara ti duti sûr so mo hinga ye nzoni na ndö ti mbeni tënë? (Bâ nga foto.)

 ⁴ Fani mingi, mo peut ti hinga ye nzoni na ndö ti mbeni tënë tongana mo hunda atënë. Na tapande, imaginé so a tisa mo ti tene mo na ambeni zo asara ngia. Eskê a yeke nzoni mo gue? Tongana mo hinga zo so a leke ngia ni ape wala mo hinga ape aye so lo leke ti tene a sara na ngoi ni, mo bezoin ti hunda lo na ambeni tënë tongana: “A yeke sara ni na ndo wa nga lawa? Azo oke la ayeke gue? Zo wa la ayeke bâ ndo na ndö ti aye ni? Azo wa la ayeke gue? Aye wa la a leke ti sara na ngoi ni? Eskê a yeke mû sämba na azo?” Kiringo tënë na ahunda so ayeke aidé mo ti mû nzoni desizion.—Diko aProverbe 18:13.

5. Na peko ti so mo hinga ye nzoni na ndö ti ngia ni awe, a yeke nzoni mo sara nyen?

⁵ Na peko ti so mo hinga ye nzoni na ndö ti ngia ni awe, gbu li nzoni na ndö ti aye kue so mo hinga. Na tapande, ka tongana mo hinga so azo so ayeke gue ande ane amama-ndia ti Bible ape wala so azo apeut ti nyon ye ti bê ti ala? Eskê mo bâ so ngia ni apeut ti ga mbeni pumba ti kirikiri? (1 Pi. 4:3). Ka tongana l’heure so a yeke sara na ngia ni ayeke l’heure so mo yeke gue na bungbi wala na fango tënë? Tongana mo gbu li na ndö ti aye kue so mo hinga na ndö ti ngia ni, a yeke duti ngangu na mo ape ti mû nzoni desizion. Me mo doit ti sara nga mbeni ye. Mo hinga ye so mo peut ti sara, me Jéhovah abâ ti lo ni tongana nyen?—aProv. 2:6.

 GI TI HINGA BANGO NDO TI JÉHOVAH

6. Ti gue oko na Jacques 1:​5, ngbanga ti nyen la a yeke nzoni e sambela Jéhovah ti aidé e?

⁶ Hunda Jéhovah ti aidé mo ti hinga bango ndo ti lo na ndö ti tënë ni. Jéhovah amû zendo ti mû na e ndara ti bâ wala mbeni desizion so e ye ti mû ayeke nzere na lo. Lo yeke mû ndara tongaso “mingi na azo kue na lo yeke suku ndali ni pëpe”.—Diko Jacques 1:5.

7. Tongana nyen la mo peut ti hinga pensé ti Jéhovah na ndö ti mbeni tënë? Fa mbeni tapande ni.

⁷ Na peko ti so mo sambela Jéhovah ti fa lege na mo, gi ti bâ tongana nyen la lo yeke kiri tënë na mo. Zia e bâ mbeni tapande: Tongana mo girisa na ngoi so mo yeke gue na mbeni ndo, mo peut ti hunda mbeni zo ti ndo ni ti aidé mo. Me eskê mo yeke hon kozo ti tene lo kiri tënë na mo? Oko ape. Na ngoi so lo yeke fa na mo lege ni, mo yeke mä lo nzoni. Legeoko nga, na peko ti so mo hunda Jéhovah ti mû na mo ndara, gi ti hinga kiringo tënë ti lo na lege so mo gi ti bâ andia nga na amama-ndia ti Bible so abâ dutingo ti mo. Na tapande, na ngoi so mo yeke mû desizion na ndö ti guengo na ngia so e sara tënë ni fade, mo peut ti gbu li na ndö ti ye so Bible atene na ndö ti apumba ti kirikiri, asioni kamarade nga na ziango aye ti Royaume kozo na aye so mo ye ti sara.—Mat. 6:33; aRom. 13:13; 1 aCor. 15:33.

8. Nyen la mo peut ti sara tongana mo bezoin mungo maboko ti wara sango so mo yeke gi? (Bâ nga foto.)

⁸ Me na ambeni ngoi, peut-être mo bezoin  mungo maboko ti wara sango so mo yeke gi. Peut-être mo peut ti hunda wango na mbeni ita so aninga na yâ ti bungbi. Me tongana mo sara recherche mo wani apeut nga ti aidé mo. Mo peut ti wara gbâ ti anzoni sango na yâ ti ambeti ti e tongana Mbeti ti sarango na recherche ndali ti aTémoin ti Jéhovah nga na Aversê so ayeke aidé e ti sara na Jéhovah. Girisa ape ye so mo ye ti si dä so ayeke ti mû desizion so anzere na Jéhovah.

9. Tongana nyen la e peut ti hinga biani so desizion so e mû ayeke zia ngia na bê ti Jéhovah? (aÉphésien 5:17).

⁹ Tongana nyen la e peut ti hinga biani so desizion so e mû ayeke zia ngia na bê ti Jéhovah? Kozoni kue, e bezoin ti hinga lo nzoni. Bible atene: “Ti hinga Nzapa so ayeke nzoni-kue ahon aye kue ayeke lege ti hingango ndo.” (aProv. 9:10). Biani, zo ayeke wara tâ hingango ndo tongana lo hinga apendere sarango ye ti Jéhovah, ye so lo leke na bê ti lo ti sara, aye so lo ye wala aye so lo ke. Hunda terê ti mo: ‘Ti gue oko na ye so mbi hinga na ndö ti Jéhovah, desizion wa la mbi peut ti mû so ayeke zia ngia na bê ti lo?’—Diko aÉphésien 5:17.

10. Ngbanga ti nyen la amama-ndia ti Bible ayeke kota mingi ahon ngobo ti sewa ti e wala ti ndo so e yeke dä?

¹⁰ Ti zia ngia na bê ti Jéhovah, na ambeni ngoi e doit ti zia vundu na bê ti azo so ayeke nduru na e. Na tapande, na nzoni bibe, ambeni babâ na mama apeut ti pusu molenge ti ala ti wali ti sara mariage na mbeni zo so ayeke na nginza mingi wala zo so apeut ti kä kota nginza na peko ti lo, atâa so zo ni ayeke na nzoni songo na Jéhovah ape. A yeke na lege ni so ala ye ti tene lo duti nzoni, me zo wa la ayeke aidé lo ti duti na kpengba songo na Jéhovah? Jéhovah abâ ti lo ni tongana nyen? E wara kiringo tënë na ahunda so na Matthieu 6:33. Na yâ ni, a hunda na aChrétien ti ngbâ ti “gi kozoni Royaume”. Atâa so e yeke ne babâ na mama ti e nga na azo so e na ala e yeke ndo oko, ye so ayeke kota ye na lê ti e ayeke ti zia ngia na bê ti Jéhovah.

GBU LI NZONI NA NDÖ TI AYE NDE NDE SO MO PEUT TI SARA

11. A-Philippien 1:​9, 10 asara tënë na ndö ti sarango ye wa so ayeke aidé mo ti gbu li nzoni na ndö ti aye nde nde so mo peut ti sara?

¹¹ Tongana mo hinga awe amama-ndia ti Bible so andu desizion so mo ye ti mû, mo doit ti gbu li ti mo nzoni na ndö ti aye nde nde so mo peut ti sara. (Diko aPhilippien 1:​9, 10.) Bango yâ ti aye nzoni ayeke aidé mo ti imaginé ye so apeut ti si na peko ti ye oko oko so mo peut ti sara. Na ambeni ngoi, a peut ti duti ngangu ape ti mû mbeni desizion. Me a yeke ngangu ti mû ambeni desizion. Bango yâ ti aye nzoni ayeke aidé mo ti mû anzoni desizion, même ati so a yeke ngangu ti mû ni.

12-13. Tongana nyen la bango yâ ti ye nzoni apeut ti aidé mo ti mû nzoni desizion na ndö ti kua ti nginza?

¹² Imaginé so mo yeke gi mbeni kua so apeut ti aidé mo ti bâ lege ti sewa ti mo. Mo wara kua use. Mo gbu li na ndö ti aye kue, na tapande mo gbu li na ndö ti kua ni, ngoi so mo yeke sara na kua ni, ngoi so mo yeke mû ti si na place ti kua ni nga na ambeni ye tongaso. Kua ni use kue, Chrétien apeut ti sara. Peut-être mo ye mbeni kua ni ndali ti so a nzere na mo nga nginza ni akono. Me ambeni ye ayeke dä so mo doit ti gbu li ti mo dä kozo si mo mû desizion.

¹³ Na tapande, eskê mbeni kua ni ayeke kanga lege na mo ti gue na abungbi? Eskê mbeni kua ni ayeke mû ngoi so mo bezoin ni ti aidé azo ti sewa ti mo ti bâ so ala yeke nzoni, ala yeke na ngia nga ala yeke nduru na Jéhovah? Ti hunda ahunda so ayeke aidé mo ti zia “aye so ayeke akota ye mingi ahon atanga ni”, so ti tene vorongo Nzapa nga na abezoin ti azo ti  sewa ti mo, kozo na aye ti sese. Na pekoni, mo peut ti mû desizion so Jéhovah ayeke sara tufa dä.

14. Tongana nyen la ti bâ yâ ti ye nzoni nga ti sara ye na ndoye ayeke aidé e ti kpe ti sara si amba ti e apika gere ti ala?

¹⁴ Bango yâ ti ye nzoni ayeke pusu nga e ti gbu li na ndö ti ye so desizion ti e ayeke sara na ndö ti azo tongaso si e “ga pëpe mbeni ye ti pikango gere ndali ti ambeni zo.” (aPhil. 1:10). Ye so ayeke kota ye mingi na ngoi so e yeke soro bongo so e yeke yü nga na fason so e yeke leke na kuä ti li ti e. Na tapande, peut-être e ye mbeni fason ti yungo bongo wala fason so e yeke leke terê ti e pendere. Me ka tongana a son bê ti azo wala aita ti congrégation? Bango yâ ti ye nzoni ayeke aidé e ti ne bango ndo ti ala. Ndoye ayeke pusu e ti gi ye so asara nzoni na ‘amba ti e’ nga ti bâ terê ti e kete (1 aCor. 10:​23, 24, 32; 1 Tim. 2:​9, 10). Na pekoni, e yeke mû desizion so afa so e ye amba ti e nga e ne ala.

15. Nyen la a yeke nzoni mo gbu li ti mo na ndö ni kozo si mo sara ye alingbi na mbeni kota desizion so mo mû?

 ¹⁵ Tongana mo yeke mû mbeni kota desizion, gbu li na ndö ti aye so mo bezoin ti sara tongaso si mo sara ye alingbi na desizion ni. Jésus afa na e ti “diko ngere” ti ye so e ye ti sara (Luc 14:28). Tongaso, gbu li na ndö ti ngoi so mo bezoin ni, aye so mo bezoin ni nga na effort so mo bezoin ti sara tongaso si ye so mo ye ti sara atambela nzoni. Na yâ ti ambeni ye, mo peut ti hunda azo ti sewa ti mo ti bâ ye so zo oko oko adoit ti sara tongaso si ye so mo mû desizion ti sara atambela nzoni. Ngbanga ti nyen la a yeke kota ye ti sara tongaso? A peut ti fa so mo bezoin ti sara ambeni changement ti sara ye alingbi na desizion so mo mû wala mo peut ti sara mbeni ye nde so ayeke nzoni ahon ti so mo pensé fade. Tongana mo sara lisoro na azo ti sewa ti mo nga mo mä pensé ti ala, ala yeke duti nduru ti aidé mo ti sara ye alingbi na desizion so mo mû.—aProv. 15:22.

MÛ DESIZION SO AYEKE GA NA ANZONI YE

16. Aye wa la ayeke aidé mo ti mû mbeni desizion so ayeke ga na anzoni ye? (Bâ nga encadré “ Lege ti mû anzoni desizion.”)

¹⁶ Tongana mo sara aye kue so a fa na nduzu so awe, andâ mo yeke nduru ti mû mbeni nzoni desizion. Mo hinga ye nzoni na ndö ti tënë ni nga mo bâ amama-ndia so ayeke aidé mo ti mû mbeni desizion so ayeke zia ngia na bê ti Jéhovah. Fadeso, mo peut ti hunda Jéhovah ti aidé mo ti sara si desizion ni aga na anzoni ye.

17. Kota ye wa la ayeke aidé mo ti mû anzoni desizion?

¹⁷ Même tongana mo mû adesizion mingi so ayeke nzoni na yâ ti angoi so ahon, girisa ape so kota ye so ayeke aidé mo ti mû nzoni desizion ayeke ti zia bê ti mo na ndö ti hingango ye ti mo wala ye so mo vivre ape, me na ndö ti ndara ti Jéhovah. Gï lo la lo peut ti mû na mo hingango ye, hingango ndo nga na kode ti bâ yâ ti aye nzoni, aye so ayeke sara si mo yeke na ndara (aProv. 2:​1-5). Jéhovah apeut ti aidé mo ti mû adesizion so azia ngia na bê ti lo.—Ps. 23:​2, 3.