1. Laso, nyen la azo mingi azia li ti ala na ndö ni?

 LASO, peut-être mo bâ so azo mingi ayeke pensé gï na ala wani. Na tapande, ambeni zo ayeke sara kua na aréseaux sociaux ti pika kate na ndö ti ala wala na ndö ti aye so ala sara. Me azo so aye ti mû gloire na Jéhovah Nzapa ayeke mingi ape. Na yâ ti article so, e yeke bâ ye so aye ti tene ti mû gloire na Jéhovah nga ndani so a yeke nzoni e sara ni. E yeke bâ nga tongana nyen la e peut ti mû na Nzapa gloire so lo lingbi tâ na ni nga tongana nyen la fafadeso lo wani lo yeke mû gloire na iri ti lo.

TI MÛ GLOIRE NA JÉHOVAH AYE TI TENE NYEN?

2. Tongana nyen la Jéhovah afa lani gloire ti lo na ndö ti Hoto ti Sinaï? (Bâ nga couverture.)

² Tënë “gloire” aye ti tene nyen? Na yâ ti Bible, tënë “gloire” aye ti sara tënë ti ye kue so asara si mbeni zo ayeke kota mingi. Kete na peko ti so Jéhovah azi mara ti Israël na ngbâa na Égypte, lo fa na ala gloire ti lo. Imaginé ye so: Azo ti Israël kutu mingi abungbi na gere ti Hoto ti Sinaï ti mä tënë so Nzapa ti ala aye ti tene na ala. Mbeni vuko mbinda amû ndö ti hoto ni. Gï hio tongaso, guru amû ndö ti hoto ni. Sese ayengi ngangu, wâ ti bekpa aza, bekpa asungba nga go ti mbeni didi atoto ngangu (Ex. 19:​16-18; 24:17; Ps. 68:8). Na ngoi so Jéhovah asara lani aye so, li ti azo ti Israël akpe kue ti bâ kota gloire ti lo.

3. Ti mû gloire na Jéhovah aye ti tene nyen?

³ Me ti e azo ayeke tongana nyen? Eskê e peut biani ti mû  gloire na Jéhovah? En, e peut ti sara ni. Mbeni lege ti mû gloire na Jéhovah ayeke ti fa na azo so lo yeke na ngangu so apika bê mingi nga lo yeke na apendere sarango ye. E yeke mû nga gloire na Nzapa tongana e gonda lo ndali ti aye kue so lo aidé e ti sara ni (És. 26:12). Gbia David ayeke mbeni zo so amû lani gloire mingi na Jéhovah. Na yâ ti mbeni sambela so David asara na devant ti congrégation ti azo ti Israël, lo tene na Nzapa, lo tene: “Jéhovah, mo yeke kota mingi, mo yeke ngangu mingi, kota ti mo apika bê mingi, mo yeke na gloire nga kota ti mo ayeke na ndö ti aye kue, ndali ti so aye kue so ayeke na yayu nga na sese ayeke ti mo.” Na peko ti so David ahunzi sambela ni, “congrégation ni kue asepela Jéhovah”.—1 Chron. 29:​11, 20.

4. Tongana nyen la Jésus amû lani gloire na Jéhovah?

⁴ Na ngoi so Jésus ayeke lani na sese, lo mû gloire na Babâ ti lo na lege so lo tene na azo lo tene Jéhovah la amû na lo ngangu ti sara amiracle (Marc 5:​18-20). Jésus amû nga gloire na Jéhovah na lege ti fason so lo sara tënë na ndö ti Babâ ti lo nga na lege so lo sara ye na azo. Mbeni lâ, Jésus ayeke fa ye na yâ ti mbeni synagogue, na popo ti azo so ayeke mä lo, mbeni wali ayeke dä so mbeni sioni yingo asara pasi na lo na yâ ti ngu 18. Sioni yingo ni asara si lo ba, lo peut ti luti droit ape. So ye ti mawa! Jésus abâ mawa ti lo, lo ga nduru na lo nga na nzoni bê lo tene na lo, lo tene: “Wali, a zi mo awe na yâ ti ye so ayeke woko mo so.” Na pekoni, lo zia maboko ti lo na ndö ti wali ni, gï na lê ni lê ni lo luti droit na lo “to nda ti mû gloire na Nzapa.” Lo kiri lani singila mingi na Jéhovah so asara si lo kiri lo wara nzoni seni (Luc 13:​10-13). Wali so ayeke na nzoni raison ti mû gloire na Jéhovah, e nga kue.

NYEN LA AYEKE PUSU E TI MÛ GLOIRE NA JÉHOVAH?

5. Araison wa la e yeke na ni ti ne Jéhovah?

⁵ E yeke mû gloire na Jéhovah ndali ti so e ne lo mingi. E yeke na araison mingi ti ne lo. Ngangu ti Jéhovah ahon angangu kue nga lo yeke fatigué lâ oko ape (Ps. 96:​4-7). A yeke bâ kota ndara ti lo na yâ ti aye so lo sara. Lo la lo mû na e fini nga na aye kue so e bezoin ni ti vivre (Apoc. 4:11). Lo yeke be-ta-zo (Apoc. 15:4). Ye kue so lo sara ayeke ga nzoni nga lo yeke sara ye lakue alingbi na azendo ti lo (Jos. 23:14). Ndani la prophète Jérémie atene tënë so na ndö ti Jéhovah, lo tene: “Na popo ti azo ti ndara kue so ayeke na popo ti amara nde nga na popo ti aroyaume ti ala kue, mbeni zo oko ti lingbi na mo ayeke dä pëpe.” (Jér. 10:​6, 7). Kite ayeke dä ape so e yeke na anzoni raison ti ne Babâ ti e ti yayu. Aye so Jéhovah asara apusu e ti ne lo mingi, me lo yeke nga na apendere sarango ye so apusu e ti ye lo mingi.

6. E ye Jéhovah ngbanga ti nyen?

⁶ E yeke mû gloire na Jéhovah ndali ti so e ye lo mingi. Gbu li na ndö ti ambeni sarango ye ti Jéhovah so asara si e ye lo. Lo yeke sara ye na nzoni bê nga lo bâ mawa ti zo (Ps. 103:13; És. 49:15). Tongana mbeni ye asara e vundu, lo nga kue lo yeke na vundu (Zach. 2:8). Lo aidé e ti hinga lo nga ti ga akamarade ti lo (Ps. 25:14; Kus. 17:27). Lo yeke sara nga terê ti lo kete; “lo kuku ti bâ yayu na sese; lo yô na nduzu azo ti mawa so ayeke na yâ ti fuku ti sese.” (Ps. 113:​6, 7). Ndali ti araison so kue, e ye ti mû gloire na kota Nzapa ti e.—Ps. 86:12.

7. Kota pasa wa la e yeke na ni?

⁷ E yeke mû gloire na Jéhovah ndali ti so e ye ti tene azo ahinga lo. Azo mingi ahinga tâ tënë na ndö ti Jéhovah ape. Ngbanga ti  nyen? Ngbanga ti so Satan asara si bibe ti azo avuko na lege so lo tene asioni mvene na ndö ti Jéhovah (2 aCor. 4:4). Satan ayeke sara si azo ayeda so Jéhovah ayeke Nzapa so aye ngonzo, lo yeke pensé na e ape nga lo sara si azo ayeke bâ pasi mingi na yâ ti dunia. Me e hinga tâ tënë na ndö ti Nzapa ti e. E yeke na kota pasa ti fa na azo mara ti Nzapa wa la lo yeke ni biani nga ti aidé ala ti mû gonda na lo (És. 43:10). Psaume 96 asara tënë mingi na ndö ti mungo gloire na Jéhovah. Na lege ti psaume so, e yeke bâ tongana nyen la e peut ti mû na Jéhovah gloire so lo lingbi na ni.

TONGANA NYEN LA E PEUT TI MÛ NA JÉHOVAH GLOIRE SO LO LINGBI NA NI?

8. Mbeni lege ti mû gloire na Jéhovah ayeke so wa? (Psaume 96:​1-3).

⁸ Diko Psaume 96:​1-3. E peut ti mû gloire na Jéhovah na lege ti atënë so e tene na ndö ti lo. Aversê so ahunda na e ti “he bia na Jéhovah”, ti “sepela iri ti lo”, ti “fa nzoni tënë ti salut ti lo” nga ti “fa tënë ti gloire ti lo na popo ti amara”. Sarango aye so kue ayeke mbeni lege so e peut ti mû gloire na Babâ ti e ti yayu. A-Juif so ayeke be-ta-zo nga na akozo Chrétien asara lani mbeto ape ti fa na azo anzoni ye so Jéhovah asara ndali ti ala nga ti zi zonga so a bi na ndö ti iri ti lo (Dan. 3:​16-18; Kus. 4:29). Tongana nyen la e nga kue e peut ti sara tongaso?

9-10. Nyen la mo peut ti manda na lege ti ye so asi na Angelina? (Bâ nga foto.)

⁹ Bâ ye so asi na Angelina, a mbeni ita-wali so ayeke na États-Unis. Sân mbeto, lo fa tënë ti Jéhovah na azo na place ti kua ti lo. So Angelina akomanse kua ni fini fini, a tisa lo nga na ambeni zo so akomanse kua ni fini fini na mbeni bungbi. Na ngoi ti bungbi ni, zo oko oko ayeke na pasa ti fa na azo ni mbeni ye na ndö ti fini ti lo. Angelina aleke ti fa ambeni foto so afa ngia so lo yeke na ni ndali ti so lo yeke Témoin ti Jéhovah. Me kozo ti tene lo sara tënë, mbeni mba ti lo ti place ti kua ni afa so lo kono na yâ ti sewa ti aTémoin ti Jéhovah. Lo komanse ti tene sioni tënë ti aTémoin ti Jéhovah nga na aye so ala mä na bê na ni. Angelina atene: “Bê ti mbi afâ. Me mbi hunda terê ti mbi, mbi tene: ‘Eskê mbi yeke zia si mbeni zo atene asioni mvene na ndö ti Jéhovah? Wala mbi yeke gbu koko ti lo?’”

¹⁰ Na ngoi so mba ti Angelina ahunzi ti sara  tënë, lo tene mbeni nduru sambela na yâ ti bê ti lo. Na pekoni, na nzoni bê lo tene na lo, lo tene: “Gigi ti mbi ayeke nga tongana ti mo. Mbi kono na yâ ti sewa ti aTémoin ti Jéhovah na mbi ngbâ Témoin ti Jéhovah juska laso.” Atâa so ye ni ayeke lani ngangu, Angelina asara mbeto ape. Lo fa na amba ti lo ti place ti kua ni afoto so lo na akamarade ti lo asara na ngoi so ala yeke sara na Jéhovah na ngia; na nengo zo, lo fa na ala aye so lo mä na bê na ni (1 Pi. 3:15). Ye ti peko ni ayeke lani nyen? Na ngoi so Angelina ahunzi tënë ti lo, bê ti koli ni ason encore ape. Lo fa même ambeni nzoni ye so lo wara na ngoi so lo de maseka nga lo ngbâ ti sara songo na aTémoin ti Jéhovah. Angelina atene: “Jéhovah alingbi ti tene a gbu koko ti lo. Ti fâ tâ tënë na ndö ti lo na azo ayeke mbeni pasa.” E nga kue e peut ti mû gonda na Jéhovah même na ngoi so azo ane lo ape.

11. Tongana nyen la ngbene ye giriri ti ga na ni atâ wakua ti Nzapa asara ye alingbi na mama-ndia so ayeke na Psaume 96:8?

¹¹ Diko Psaume 96:8. E peut ti mû gloire na Jéhovah na aye ti e ti ngangu ngere. Atâ wakua ti Jéhovah amû gonda na lo lakue tongaso (aProv. 3:9). Na tapande, azo ti Israël amû lani nginza nga na aye ti ngangu ngere ti mû maboko na kua ti lekengo temple nga na bango lege ni (2 aGbia 12:​4, 5; 1 Chron. 29:​3-9). Ambeni disciple ti Jésus amû lani “aye ti ala” na lo nga na abazengele ti lo tongaso si ala wara aye so ala bezoin ni (Luc 8:​1-3). Bible atene nga so na ngoi so ambeni Chrétien ayeke bâ pasi na nzara, aita ti ala so ayeke na ambeni ndo nde atokua na ala nginza (Kus. 11:​27-29). Laso, e nga kue e peut ti mû gloire na Jéhovah na lege ti a-offrande so e mû na bê ti e wani.

12. Tongana nyen la a-offrande ti e apeut ti mû gloire na Jéhovah? (Bâ nga foto.)

¹² Bâ gï mbeni tapande oko so afa tongana nyen la a-offrande ti e ayeke mû gloire na Jéhovah. Na ngu 2020 na Zimbabwe, ndo ahule aninga. Azo ahon kutu oko, so ita ti e Prisca ayeke na popo ti ala, ayeke lani na yâ ti kpale ti nzara ndali ti so ala yeke na kobe ape. Atâa so ye ni ayeke lani ngangu, Prisca angbâ ti sara ye so lo yeke sara ka ti fa tënë lakue na mercredi nga na vendredi, même na ngoi ti fango yaka. Avoizin ti lo ayeke he lo ndali ti so lo yeke gue ti fa tënë ahon ti gue ti sara kua na yaka ti lo, ala tene: “Nzara ayeke fâ mo ande.” Prisca ayeke lani sûr so Jéhovah  ayeke bâ lege ti lo, tongaso lakue lo yeke tene na ala: “Jéhovah adö awakua ti lo lâ oko azia ape.” A ninga ape lo wara aye so bungbi ti Jéhovah ayeke mû ka na aita tongana mbeni kota kpale asi. Bungbi ti Jéhovah awara lege ti aidé Prisca nga na ambeni zo grâce na a-offrande so e oko oko kue e mû. A nzere na avoizin ti Prisca mingi na ala tene na lo: “Nzapa azia mo lâ oko ape, tongaso e ye ti hinga ye mingi na ndö ti lo.” Avoizin ti lo mbasambala akomanse ti ga na abungbi.

13. Tongana nyen la sarango ye ti e apeut ti mû gloire na Jéhovah? (Psaume 96:9).

¹³ Diko Psaume 96:9. E peut ti mû gloire na Jéhovah na lege ti sarango ye ti e. Aprêtre so ayeke sara lani kua ti Jéhovah na tabernacle nga na pekoni na temple adoit ti duti saleté ape (Ex. 40:​30-32). E nga kue e doit ti duti propre na lege so e sara si terê ti e aduti saleté ape nga e kpe ti sara aye so Jéhovah ake (Ps. 24:​3, 4; 1 Pi. 1:​15, 16). E doit ti sara ngangu ti zi “ngbene zo”, so ti tene, ti ke abango ndo nga na asarango ye so ayeke na lege ni ape nga ti yü “fini zo”, so ti tene, ti pensé tongana Jéhovah nga ti sara ye tongana lo (aCol. 3:​9, 10). Na mungo maboko ti Jéhovah, même azo so asara aye so ayeke tâ sioni mingi apeut ti changé nga ti yü fini zo.

14. Nyen la mo manda na lege ti ye so asi na Jack? (Bâ nga foto.)

¹⁴ Na tapande, Jack ayeke lani mbeni koli so ayeke sioni mingi nga lo sara ye ti ngangu mingi, a iri même lo Démon. A dë ngbanga ti kuâ na li ti lo ndali ti asioni ye so lo sara. Me, na ngoi so lo yeke ku ti tene a fâ lo, lo yeda ti tene mbeni ita-koli so ayeke sara vizite na da ti kanga amanda Bible na lo. Atâa asioni ye so Jack asara lani, lo zi ngbene zo, na pekoni lo wara batême. Jack achangé lani mingi asara si na lango ti fango lo ambeni garde ti da ti kanga ni atoto na ngoi so ala yeke bara lo. Mbeni turugu so ayeke sara kua na da ti kanga ni atene: “Na da ti kanga so, Jack ayeke lani sioni mingi. Me fadeso, lo ga oko ti azo so ayeke nzoni mingi.” Na yenga so aga na peko ti so a fâ Jack, aita-koli so ayeke mû li ni na bungbi na da ti kanga yenga oko oko awara terê na mbeni zo ti kanga so aga na bungbi ti kozoni. Nyen la apusu lo ti ga? So Jack achangé apika bê ti lo mingi na lo ye ti hinga ye so lo doit ti sara ti voro Jéhovah. A yeke  polele so sarango ye ti e apeut ti mû gloire na Babâ ti e ti yayu.—1 Pi. 2:12.

TONGANA NYEN LA JÉHOVAH AYEKE MÛ GLOIRE NA IRI TI LO FAFADESO?

15. Tongana nyen la fafadeso Jéhovah ayeke fa so lo lingbi ti tene azo kue avoro lo? (Psaume 96:​10-13).

¹⁵ Diko Psaume 96:​10-13. Andangba versê ti Psaume 96 afa Jéhovah tongana Juge nga Gbia so ayeke sara ye na lege ni. Tongana nyen la Jéhovah ayeke mû gloire na iri ti lo fafadeso? Lo yeke sara ni na lege ti angbanga so lo yeke fâ. Fafadeso, lo yeke futi Babylone, Ngangu gbata so aga na zonga na ndö ti iri ti lo so ayeke nzoni-kue (Apoc. 17:​5, 16; 19:​1, 2). Ambeni zo so abâ futingo Babylone, Ngangu gbata apeut ti ga ti voro Jéhovah legeoko na e. Na nda ni, na Harmaguédon, Jéhovah ayeke futi ande dunia ti Satan kue nga na azo kue so ake lo nga atene mvene na ndö ti lo, me lo yeke sö azo so aye lo, so amä yanga ti lo nga so anzere na ala ti mû gloire na lo (Marc 8:38; 2 aThes. 1:​6-10). Na peko ti ndangba tara so ayeke ga na hunzingo ti Komandema ti Christ ti ngu saki oko, Jéhovah ayeke fa ande so lo lingbi ti tene azo kue avoro lo (Apoc. 20:​7-10). Na ngoi ni so, “hingango ye na ndö ti gloire ti Jéhovah ayeke si singo na ndö ti sese tongana ti so ngu asi yâ ti ngu-ingo.”—Hab. 2:14.

16. Nyen la mo leke na bê ti mo ti ngbâ ti sara? (Bâ nga foto.)

¹⁶ Tongana azo kue so ayeke na fini amû na Jéhovah gloire so lo lingbi na ni, a yeke nzere ande mingi. Me juska ti si kâ, e peut ti sara kue ti mû gloire na Nzapa ti e na alege kue so azi na e. Ti aidé e ti zia li ti e na ndö ti kota tënë so, Bebungbi asoro Psaume 96:8 tongana versê ti e ti ngu 2025: “Ala mû na Jéhovah gloire so alingbi na iri ti lo.”