Jéhovah aye biani ti tene azo use so asara mariage aduti na ngia nga ala duti na kpengba songo so aninga (Mat. 19:4-6). Tongana mo ye ti sara mariage, tongana nyen la mo peut ti wara mbeni nzoni zo ti sara mariage na lo? So Jéhovah la acréé e, lo hinga ye so e doit ti sara ti duti na ngia na yâ ti mariage ti e. Tongaso, tongana mo sara ye alingbi na amama-ndia so lo mû na e, mo yeke duti biani na ngia. Bâ ambeni mama-ndia ni.

Kozo ni, a lingbi e hinga ye so na ndö ti e wani: “Bê ti zo ayeke handa zo mingi ahon ambeni ye kue, nga a yeke sioni mingi.” (Jér. 17:9). Na ngoi so azo use so aye ti sara mariage akomanse ti bâ terê, hio ala peut ti ye mba. Tongana a si tongaso, a yeke duti ngangu na ala ti mû anzoni desizion. Tongana azo use amû desizion ti sara mariage gï ndali ti so ala ye terê, ala peut ti wara vundu na pekoni (aProv. 28:26). Ndani la a yeke na lege ti ndara ape ti tene azo so ayeke bâ terê atene hio na mba so ala ye terê wala amû zendo na mba kozo si ala hinga terê nzoni.

A-Proverbe 22:3 atene: “Zo so lê ti lo ahan abâ kpale, na lo honde terê ti lo, me azo so ahinga ndo mingi pëpe ague gï guengo na lê ni, na ala wara ye ti peko ni.” Kpale wa la mbeni zo alingbi ti wara tongana lo gi ti wara mbeni zo na lege ti Internet ti sara mariage na lo? Mawa ni ayeke so ambeni zo awara azo so ala hinga ala ape na ndö ti Internet, ala komanse ti gi ti hinga mba ndali ti mariage, me na nda ni ala ga ti bâ so azo ni ahanda ala. Na ndö ni, asioni zo azi acompte na ndö ti Internet so ayeke na lege ni ape ti handa azo so lê ti ala ahan ape ti nzi nginza na maboko ti ala. Na ambeni ngoi, asioni zo so atene ala yeke aTémoin.

Bâ mbeni kpale ni nde. Ambeni site so azo ayeke gue dä ti wara koli wala wali ayeke sara kua na mbeni ye so ayeke na yâ ti ordinateur ti mû maboko na azo ti hinga zo wa la a yeke nzoni ala bâ terê na lo. Ye oko afa ape so akode ni so aga na ye ti nzoni. A yeke duti na lege ti ndara ape ti sara confiance na mbeni ye so ayeke na yâ ti ordinateur so azo la asara ti mû kota desizion so ayeke ti soro mbeni nzoni zo ti sara mariage na lo. E lingbi pëpe ti sara confiance na aye so ayeke na yâ ti ordinateur tongana ti so e sara confiance na amama-ndia ti Bible.—aProv. 1:7; 3:5-7.

Mbeni mama-ndia so ayeke na aProverbe 14:15 atene: “Zo so lê ti lo ahan pëpe amä na bê na tënë kue, me zo so lê ti lo ahan agbu li kozo si lo bi gere ti lo.” Kozo ti tene mo bâ so mo peut ti sara  mariage na mbeni zo, mo bezoin ti hinga lo nzoni si. Me a peut ti duti ngangu ti hinga mbeni zo nzoni tongana mo wara lo na ndö ti Internet. Même tongana ala peut ti bâ asango na ndö ti mba nga ala mû ngoi mingi ti sara lisoro na lege ti Internet, eskê mo peut ti tene biani so mo hinga zo ni? Ambeni zo so apensé so ala wara awe zo so ala ye lo, bê ti ala ason na ngoi so na nda ni ala wara terê na zo ni.

Mbeni zo ti sungo psaume atene: “Mbi sara kamarade pëpe na azo ti handa; mbi kpe azo so ahonde vrai sarango ye ti ala.” (Ps. 26:4). Azo mingi abâ so a yeke na lege ni ti tene mvene na yâ ti asango so abâ ala so ala zia na ndö ti Internet ti sara si azo aye ala mingi. Ala peut ti honde asioni sarango ye ti ala wala zo apeut ti bâ asioni sarango ye ti ala ape na ngoi so ala yeke tokua message na azo na lege ti Internet. Atâa so ambeni zo apeut ti fa so ala yeke aTémoin ti Jéhovah, eskê ala yeke biani aChrétien so awara batême? Eskê ala yeke na nzoni songo na Jéhovah? Eskê azo ane ala na yâ ti congrégation ti ala? Eskê ala yeke sara ye na ndara ape wala ala yeke même “asioni zo”? (1 aCor. 15:33; 2 Tim. 2:20, 21). Eskê Bible amû lege na ala ti sara mariage? Mo doit ti wara kiringo tënë na ahunda so, me a yeke duti ngangu ti wara ni tongana mo lingbi pëpe ti sara lisoro na ambeni Témoin so ahinga zo ni nzoni (aProv. 15:22). Ti vrai ni, mbeni wakua be-ta-zo ti Jéhovah ayeke pensé même pëpe ti ‘bungbi oko na gbe ti joug’ na mbeni zo so amä na bê pëpe.—2 aCor. 6:14; 1 aCor. 7:39.

So gingo mbeni zo na lege ti Internet ti sara mariage na lo ayeke ga na akpale, ambeni lege ayeke dä so ayeke nzoni mingi ti wara mbeni zo ti gi ti hinga lo si mo peut ti sara mariage na lo. Tongana nyen la mo peut ti wara mbeni zo so ayeke nzoni zo ti sara mariage na lo? Tongana a kanga lege na azo ti sara abungbi ape, aTémoin ti Jéhovah apeut ti wara terê na amba ti ala na ngoi ti abungbi, akota bungbi nga na ambeni ngoi nde so e bungbi ti sara ngia.

Tongana lege ti bungbi ndo oko ayeke dä ape, na tapande na ngoi so sioni kobela ti COVID-19 ayeke mû ndo, e yeke sara kua na aye tongana téléphone wala tablette ti sara abungbi, na ngoi ni, lege ayeke dä ti tene e wara terê na aTémoin so ayeke akumbamba. Mo peut ti bâ tongana nyen la ala yeke mû mbage na abungbi ni nga ti mä atënë ti mabe ti ala so ala yeke fa (1 Tim. 6:11, 12). Ala peut nga ti sara lisoro na mba na peko ti bungbi. Tongana aTémoin airi terê na groupe na lege ti téléphone wala tablette ti sara ngia, mo peut ti bâ tongana nyen la zo so agbu bê ti mo ayeke sara ye na azo, na mo peut ti bâ vrai sarango ye ti lo (1 Pi. 3:4). Tongana ngoi ayeke hon si ala hinga terê nzoni, mo peut ti bâ wala aye so ala leke na bê ti ala ti sara ayeke oko, nga wala ala use kue ayeke anzoni zo ndali ti mba tongana ala sara mariage.

Tongana akumbamba ayeke gi mbeni zo ti sara mariage na lo na lege so ague oko na amama-ndia ti Bible, peut-être ala yeke hinga tâ tënë ti proverbe so, so atene: “Zo so awara nzoni wali [wala koli] awara mbeni ye so ayeke nzoni, na Jéhovah ayeke bâ lo na nzoni lê.”—aProv. 18:22.