1. Nyen la Jéhovah asara ndali ti mo?

MO GA Témoin ti Jéhovah tongana nyen? Peut-être mo mä nzoni tënë ti kozoni na yanga ti babâ na mama ti mo, na yanga ti mbeni mba ti mo ti place ti kua wala ti ekole wala na lege ti fango tënë da na da (Marc 13:10). Na pekoni, mbeni zo amû gbâ ti ngoi nga lo sara effort ti manda Bible na mo. Na ngoi ti mandango ye ni, mo komanse ti ye Jéhovah nga mo manda so lo nga kue lo ye mo. Jéhovah agboto lani mo na yâ ti tâ tënë nga laso, so mo yeke disciple ti Jésus Christ, mo yeke na beku ti ngbâ na fini lakue lakue (Jean 6:44). Kite ayeke dä ape so mo kiri singila na Jéhovah so apusu mbeni zo ti fa na mo tâ tënë nga Lo yeda ti tene mo ga mbeni wakua ti Lo.

2. Nyen la e yeke bâ na yâ ti article so?

² So e hinga tâ tënë awe, e yeke na pasa ti mû maboko na ambeni zo ti tene e na ala e tambela na ndö ti lege so ague na fini. Peut-être e bâ so a yeke ngangu na e ape ti fa tënë da na da, me e peut ti bâ so a yeke ngangu ti hunda na azo ti manda Bible na ala na ti sara ni. Mo bâ tongaso? Tongana a yeke tongaso, peut-être awango so ayeke na yâ ti article so ayeke aidé mo. E yeke bâ ye so apusu e ti mû maboko na kua ti sarango adisciple. E yeke bâ nga tongana nyen la e peut ti hon ndö ti akpale so apeut ti kanga lege na e ti manda Bible na mbeni zo. Kozo ni, zia e bâ ndani so a lingbi e fa nzoni tënë na azo nga e fa ye na ala.

3. E yeke fa tënë ngbanga ti nyen?

³ Na ngoi so Jésus ayeke lani na sese, lo mû akua use na adisciple ti lo. Kozo ni, lo tene na ala ti fa nzoni tënë ti Royaume, na lo fa na ala tongana nyen ti sara ni (Mat. 10:7; Luc 8:1). Na tapande, Jésus afa na adisciple ti lo ye so ala doit ti sara tongana azo ayeda na tënë ti Royaume wala ala ke ni (Luc 9:2-5). Lo fa nga so ala yeke fa tënë na azo mingi nga na ando mingi, tongana lo tene ala yeke fa tënë ni tongana “mbeni tënë ti témoin ndali ti amara kue.” (Mat. 24:14; Kus. 1:8). Atâa azo asara ye tongana nyen, adisciple adoit ti fa na ala tënë ti Royaume nga na aye so Royaume ni ayeke sara.

4. Ti gue oko na Matthieu 28:18-20, na ndö ti so e yeke fa tënë ti Royaume, nyen la e doit ti sara?

⁴ Use kua so Jésus amû na adisciple ti lo ayeke nyen? Lo tene lani na adisciple ti lo ti fa na azo ti sara ye alingbi na aye kue so lo mû yanga na ala ti sara. Ambeni zo atene so yanga so Jésus amû ti fa tënë nga ti fa ye abâ gï akozo Chrétien. Eskê tënë so ayeke tâ tënë? Ên-ën, Jésus afa lani so a yeke ngbâ ti sara kota kua so même juska na ngoi ti e, so ti tene, “juska na lâ ni so aye ti ngoi so ayeke gue ti hunzi.” (Diko Matthieu 28:18-20.) Peut-être Jésus amû yanga ti tene a sara kua so na ngoi so lo si na adisciple ti lo so wungo ti ala ahon 500 (1 aCor. 15:6). Na pekoni, na yâ ti vision so Jésus afa na Jean, lo fa polele so lo ye ti tene adisciple ti lo kue amû maboko na azo ti hinga Jéhovah.—Apoc. 22:17.

5. Na 1 aCorinthien 3:6-9, tapande wa la Paul amû ti fa kamba so ayeke na popo ti fango tënë nga na fango ye?

⁵ Bazengele Paul ahaka kua ti sarango adisciple na lungo lê ti kobe, ti fa so e doit ti ngbâ gï na ndö ti lungo angongoa ni ape. Lo tene na aita ti Corinthe, lo tene: “Mbi lu ye lani, Apollos atuku ngu dä . . . Ala yeke yaka ti Nzapa so a ngbâ ti dë ni.” (Diko 1 aCorinthien 3:6-9.) So e yeke sara kua na yâ ti “yaka ti Nzapa”, e yeke lu angongoa ni, e yeke tuku ngu dä nga e yeke bâ lakue wala aye so e lu ayeke kono (Jean 4:35). Na oko ngoi ni, e hinga so Nzapa la asara si ngongoa ni akono.

6. Kua ti e ti awafango ye andu nyen?

⁶ E yeke gi azo so “ayeke nduru ti yeda na tënë ni ti wara fini ti lakue lakue”. (Kus. 13:48). Ti sara si azo so aga adisciple, e doit ti aidé ala (1) ti comprendre, (2) ti yeda nga (3) ti sara ye alingbi na aye so ala manda na yâ ti Bible (Jean 17:3; aCol. 2:6, 7; 1 aThes. 2:13). Azo kue na yâ ti congrégation apeut ti aidé azo so ayeke manda Bible na lege so ala ye ala nga ala yamba ala na ngoi so ala ga na abungbi (Jean 13:35). Ita so ayeke manda Bible na zo ni ayeke mû peut-être ngoi mingi nga lo yeke sara ngangu ti mû maboko na zo ni ti kinda aye so lo mä na bê na ni wala asarango ye “so gere ni aluti ngangu.” (2 aCor. 10:4, 5). Ti mû maboko na mbeni zo ti gue na li ni juska na batême apeut ti sara anze mingi. Me effort so e sara ayeke ngbâ senge ape.

7. Nyen la apusu e ti fa tënë nga ti sara adisciple?

⁷ Ngbanga ti nyen la e yeke fa tënë nga e yeke sara adisciple? Kozo ni, a yeke ndali ti so e ye Jéhovah. Tongana mo sara kue ti sara ye alingbi na yanga so a mû ti fa tënë nga ti sara adisciple, andâ mo yeke fa so mo ye Nzapa (1 Jean 5:3). Gbu li kete: Yengo so mo ye na Jéhovah la apusu mo ti fa tënë da na da. Eskê a yeke lani kete ye na mo ti sara ye alingbi na commandement so? Peut-être a yeke lani kete ye ape. Na ngoi so ti kozoni mo gue ti fa tënë  da na da, mbeto asara lani mo? Kite ayeke dä ape so mbeto asara lani mo. Me mo hinga lani so a yeke kua so Jésus aye ti tene mo sara, na mo mä yanga ti lo. Na peko ti so mo fa tënë teti ambeni ngoi, peut-être mbeto asara mo encore ape. Ka ti mandango Bible na mbeni zo? Mo bâ ni tongana nyen? Eskê tongana mo pensé na ni, mbeto asara mo? Peut-être mbeto asara mo. Me tongana mo hunda Jéhovah ti aidé mo ti hon ndö ti mbeto ti mo na ti hunda mbeni zo ti manda Bible na lo, lo yeke aidé mo ti duti na nzara mingi ti sara adisciple.

8. Ti gue oko na Marc 6:34, mbeni ye nde wa la apeut ti pusu e ti fa ye na azo?

⁸ Use ni, so e ye azo apusu e ti fa na ala tâ tënë. Mbeni lâ, Jésus na adisciple ti lo afatigué ngangu na peko ti so ala fa tënë mingi. Ala bezoin lani mbeni ndo so ala peut ti wu terê ti ala dä, me gbâ ti azo aga awara ala. Mawa ti azo ni asara Jésus na lo komanse ti fa “aye mingi” na ala. (Diko Marc 6:34.) Lo sara kua ngangu atâa so lo fatigué. Ngbanga ti nyen? Jésus azia lani terê ti lo na place ti gbâ ti azo ni. Lo ye lani ti mû maboko na ala ndali ti so lo bâ so ala yeke bâ pasi mingi nga ala bezoin ti tene a mû na ala beku. Dutingo ti azo laso ayeke nga tongaso. Tongana mo bâ so ala yeke na ngia, zia si a handa mo ape. Ala yeke tongana ataba so agirisa na so ayeke na berger ti fa lege na ala ape. Bazengele Paul atene azo tongaso ahinga Nzapa ape na ala yeke na beku ape (aÉph. 2:12). Ala yeke na ndö ti “lege so ayeke gue na futingo”. (Mat. 7:13). Tongana e gbu li na ndö ti bezoin so azo ti territoire ti e ayeke na ni ti hinga Nzapa, ndoye nga na bango mawa ti zo ayeke pusu e ti mû maboko na ala. Nzoni lege ti mû maboko na ala ayeke ti hunda ti manda Bible na ala.

9. Ti gue oko na aPhilippien 2:13, tongana nyen la Jéhovah alingbi ti mû maboko na mo?

⁹ Peut-être mbeto ayeke sara mo ti hunda ti manda Bible na mbeni zo ndali ti so mo hinga so mo doit ti mû ngoi ti leke étude ni nga ti sara ni. Tongana a yeke ye so asi na mo la, fa ni na Jéhovah. Hunda na lo ti aidé mo ti wara nzara ti wara mbeni étude na ti sara ni. (Diko aPhilippien 2:13.) Bazengele Jean atene na e so Nzapa ayeke kiri tënë na asambela so ague oko na ye so bê ti Lo aye (1 Jean 5:14, 15). Tongaso, mo lingbi ti hinga na bê ti mo kue so Jéhovah ayeke aidé mo ti wara nzara ti sara adisciple.

10-11. Nyen la apeut ti kanga lege na e ti manda Bible na mbeni zo?

¹⁰ E bâ kua ti fango ye so a mû na e na nene ni mingi, atâa so e yeke wara akpale so apeut ti kanga lege na e ti sara kua ti sarango adisciple mingi tongana ti so e ye. Zia e bâ ambeni kpale ni nga tongana nyen la e peut ti hon ndö ni.

¹¹ Peut-être e bâ so dutingo ti e amû lege na e ti sara aye kue ape. Na tapande, ambeni wafango tënë ayeke ambakoro wala ala yeke na kpale ti seni. Eskê a yeke kpale ti mo la? Tongana a yeke ni la, bâ mbeni ye so e manda lani na lege ti kobela ti COVID-19 so amû ndo. E manda lani so e lingbi ti manda Bible na azo na lege ti aye tongana téléphone wala tablette. Tongaso, mo peut ti duti nzoni na yanga-da ti mo, mo komanse ti manda Bible na mbeni zo. Mbeni nzoni ti ngbango na yanga-da ti sara étude ayeke nga dä. Ambeni zo aye ti manda Bible, me ala yeke dä ape na ngoi so aita ayeke fa ka tënë. Ye oko, a peut ti wara ala hio na ndapre wala na bï. Eskê mo peut ti manda Bible na zo na angoi ni so?  Jésus afa ye lani na Nicodème na bï, a yeke ngoi so Nicodème aye lani la.—Jean 3:1, 2.

12. Aye wa la asara si e hinga na bê ti e biani so e lingbi ti duti anzoni wafango ye?

¹² Peut-être e bâ so e peut ti manda Bible na mbeni zo ape. Peut-être e bâ so a yeke nzoni e hinga ye mingi wala e duti na akode mingi tongaso si e lingbi ti manda Bible na mbeni zo. Tongana a yeke bango ndo ti mo la, zia e bâ aye ota so apeut ti zi mbeto na yâ ti mo. Kozo ni, Jéhovah abâ so mo lingbi ti fa ye na azo (2 aCor. 3:5). Use ni, Jésus, so ayeke na “komandema kue na yayu nga na sese”, amû yanga na mo ti fa ye (Mat. 28:18). Ota ni, mo lingbi ti zia bê ti mo na aita ti aidé mo. Jésus azia lani bê ti lo na ye so Babâ ti lo afa na lo ti tene, mo nga mo lingbi ti sara tongaso (Jean 8:28; 12:49). Na ndö ni, mo peut ti hunda na surveillant ti groupe ti fango tënë ti mo, mbeni nzoni pionnier wala mbeni ita so ahinga ti fa ye ti aidé mo ti komanse mbeni étude na ti sara ni. Mbeni lege ti zi mbeto na yâ ti mo ayeke ti duti dä na ngoi so mbeni ita so e sara tënë ti ala so ayeke manda Bible na mbeni zo.

13. Ngbanga ti nyen la a lingbi e changé akode ti fango ye ti e?

¹³ E peut ti bâ so a yeke ngangu ti sara kua na afini kode nga na afini gbakuru. Fason so e yeke manda na Bible na azo achangé awe. Ti manda Bible na azo na yâ ti buku Ngbâ na fini lakue lakue!, e doit ti leke terê ti e nga e manda Bible na azo na mbeni fason so ayeke nde na ti so e yeke sara ândö. E yeke diko aparagraphe mingi ape me e yeke sara lisoro mingi na zo so e yeke manda ye na lo. Na ngoi so e yeke fa ye, e yeke sara kua mingi na avidéo, aye so ayeke na ndö ti site ti e nga na JW Library^®. Tongana mo hinga ti sara kua na agbakuru so ape, sara tënë ni na mbeni zo so apeut ti aidé mo ti hinga ti sara kua na ni. E azo e ye mingi ti sara aye so e hinga ti sara. A yeke kete ye na e ape ti sara kua na afini kode. Me grâce na mungo maboko ti Jéhovah nga na ti amba ti mo, mo yeke bâ so a yeke ngangu ape ti sara kua na afini kode nga a yeke nzere même na mo mingi ti manda Bible na azo. Tongana ti so mbeni pionnier atene, kode ti mandango ye na azo so “anzere mingi na zo so ayeke manda ye ni nga na zo so ayeke fa ye na lo.”

14. Tongana e yeke fa tënë na yâ ti territoire so azo ayeda ti mä e ape, nyen la a yeke nzoni e girisa ape? Kozo mbeti na aCorinthien 3:6, 7 akpengba e tongana nyen?

¹⁴ Peut-être e yeke na yâ ti mbeni territoire so a yeke ngangu ti komanse ti manda Bible na azo. Ambeni zo asara sanka ti tënë so e fa wala ala ke ni. Nyen la apeut ti aidé e ti ngbâ ti duti na nzoni bango ndo na yâ ti mara ti territoire tongaso? Girisa ape so dutingo ti azo apeut ti changé hio na yâ ti dunia so aye ayeke kirikiri dä so, na azo so asara lani sanka ti tënë so e fa apeut ti bâ so ala yeke na bezoin ti tene Nzapa afa lege na ala (Mat. 5:3). Ambeni zo so ândö ayeke ke lakue ti mû ambeti ti e ayeda ti tene a manda Bible na ala. E hinga nga so Jéhovah la ayeke Wa ti kua ti fango akobe ti yaka ni (Mat. 9:38). Lo ye ti tene e ngbâ ti lu ye nga ti tuku ngu dä, me Lo la lo yeke sara si a kono (1 aCor. 3:6, 7). Atâa e wara lege ti sara étude na mbeni zo laso ape, Jéhovah ayeke futa e alingbi na a-effort so e sara, me pëpe alingbi na a-étude so e sara. Ti dabe ti e na tënë so akpengba e mingi. *

15. Tongana mbeni zo ayeda ti manda Bible nga lo sara ye alingbi na aye so lo yeke manda, a yeke sara Jéhovah tongana nyen?

¹⁵ A yeke nzere na Jéhovah tongana mbeni zo ayeda na atâ tënë ti Bible nga lo fa ni na azo  (aProv. 23:15, 16). A doit ti nzere na Jéhovah mingi ti bâ aye so ayeke passé laso. Na tapande, atâa so mbeni sioni kobela amû ndo na yâ ti ngu ti kusala ti ngu 2020, a manda Bible na azo 7 705 765 asara si azo 241 994 amû terê ti ala na Jéhovah na awara batême. Afini disciple so ayeke manda nga Bible na azo nga ala yeke sara adisciple (Luc 6:40). Kite ayeke dä ape so e yeke zia ngia na bê ti Jéhovah na ngoi so e yeke mû maboko na kua ti sarango adisciple.

16. Nyen la ayeke mbeni nzoni ye ti gi ti sara?

¹⁶ Kua ti sarango adisciple ayeke kete kua ape, me grâce na mungo maboko ti Jéhovah, e peut ti mû mbage na yâ ti kua ti fango na afini zo ti ye Babâ ti e ti yayu. Eskê mo peut ti leke ti komanse ti manda Bible na mbeni zo kamême oko? Li ti e apeut ti kpe ti bâ ye so ayeke si tongana e sara kue ti hunda azo so e wara ala ti manda Bible na ala. E lingbi biani ti hinga so Jéhovah ayeke sara tufa na ndö ti a-effort so e sara.

17. A yeke sara e tongana nyen tongana e wara lege ti manda Bible na mbeni zo?

¹⁷ E yeke na kota pasa ti fa tënë nga ti fa ye na ndö ti tâ tënë na azo. Kua so amû na e ngia mingi. Bazengele Paul, so amû lani maboko na azo mingi na Thessalonique ti ga adisciple, afa atënë ti bê ti lo, atene: “Beku ti e, wala ngia ti e wala couronne ti e so e yeke pika ande kate ngbanga ni na gbele Seigneur ti e Jésus na ngoi so lo yeke duti dä so ayeke nyen? A yeke ala ape? Biani, ala la si ayeke gloire ti e nga na ngia ti e.” (1 aThes. 2:19, 20; Kus. 17:1-4). Aita mingi apensé tongaso laso. Stéphanie, mbeni ita-wali so lo na koli ti lo amû maboko na azo mingi ti wara batême, atene: “Mbeni ngia ti lingbi na ngia so zo ayeke wara tongana lo mû maboko na azo ti mû terê ti ala na Jéhovah ayeke dä ape.”