1. Tënë ti bê ti mo na ndö ti tâ tënë ayeke so wa?

 AWAKUA ti Jéhovah aye mingi tâ tënë so ayeke na yâ ti Bible. Ni la ayeke na gunda ti mabe ti e (aRom. 10:17). E hinga biani so Jéhovah asara si congrégation ti aChrétien aduti “pilier nga na gere ti tâ tënë.” (1 Tim. 3:15). E yeke nga na ngia ti woko terê ti e na gbe ti azo “so ayeke mû li ni” na popo ti e so ayeke fa na e nda ti atâ tënë ti Bible nga ala yeke fa lege na e alingbi na ye so bê ti Nzapa aye.—aHéb. 13:17.

2. Tongana ti so Jacques 5:19 afa, nyen la apeut ti si na e na peko ti so e manda tâ tënë?

² Ye oko, na peko ti so e yeda na tâ tënë nga e yeda so e bezoin ti mû peko ti fango lege ti bungbi ti Jéhovah, mbeni ye apeut ti gue na e ayo. (Diko Jacques 5:19.) Tongana e zia ti sara confiance na Bible wala na fango lege ti bungbi ti Jéhovah, a yeke nzere ande na Satan mingi.—aÉph. 4:14.

3. Ngbanga ti nyen la e doit ti hule na terê ti tâ tënë? (aÉphésien 6:​13, 14).

³ Diko aÉphésien 6:​13, 14. Fafadeso, Satan ayeke sara kua na atënë ti mvene ti handa amara kue tongaso si ala ke Jéhovah (Apoc. 16:​13, 14). E hinga nga so Satan ayeke gi ande lege ngangu ti handa awakua ti Jéhovah (Apoc. 12:9). Tongaso, a yeke kota ye ti tene e gi ti hinga kangbi so ayeke na popo ti tâ tënë nga na mvene nga e sara ye alingbi na tâ  tënë (aRom. 6:17; 1 Pi. 1:22). Tongana e sara ni ayeke sara si e sö kuâ na kota ye ti vundu.

4. Nyen la e yeke bâ na yâ ti article so?

⁴ Na yâ ti article so, e yeke gi ti hinga asarango ye use so e bezoin ni ti aidé e ti hinga tâ tënë so ayeke na yâ ti Bible nga ti yeda na fango lege ti bungbi ti Jéhovah. Na pekoni, e yeke bâ aye ota so e doit ti sara ti ngbâ ti hule na terê ti tâ tënë.

ASARANGO YE SO AYEKE AIDÉ E TI HINGA TÂ TËNË

5. Kpengo mbeto ti Jéhovah ayeke aidé e tongana nyen ti hinga tâ tënë?

⁵ Kpengo mbeto ti Jéhovah. Ti kpe mbeto ti Jéhovah aye ti tene e ye lo mingi na e ye lâ oko ape ti sara mbeni ye so ayeke zia vundu na bê ti lo. E ye mingi ti hinga kangbi so ayeke na popo ti ye so ayeke na lege ni nga na ye so ayeke na lege ni ape nga na kangbi so ayeke na popo ti tâ tënë na mvene, tongaso si e peut ti zia ngia na bê ti Jéhovah (aProv. 2:​3-6; aHéb. 5:14). E doit lâ oko ape ti zia si mbeto ti zo ahon ndö ti yengo so e ye na Jéhovah, ndali ti so fani mingi ye so anzere na azo anzere na Jéhovah ape.

6. Nyen la asara si amokonzi bale-oko ti Israël aba yâ ti tâ tënë?

⁶ Tongana e sara mbeto ti azo mingi ahon Nzapa, e peut ti gue ayo na tâ tënë. Bâ tapande ti amokonzi 12 ti Israël so abembe ndo lani na yâ ti kodro so Jéhovah amû zendo ti mû ni na azo ti Israël. Ti amokonzi bale-oko na popo ti ala, mbeto ti azo ti Canaan ahon ndö ti ndoye so ala yeke na ni na mbage ti Jéhovah. Ala tene na amba ti ala azo ti Israël, atene: “E kpa ti gue ti tiri na azo so pëpe, ngbanga ti so ala yeke ngangu mingi ahon e.” (Nom. 13:​27-31). Na bango ndo ti zo, azo ti Canaan ayeke ngangu ahon azo ti Israël, na tënë so ayeke tâ tënë. Me zo so atene so azo ti Israël apeut ti hon awato ti ala na ngangu ape apensé na Jéhovah ape. Azo ti bembengo ndo bale-oko so adoit fade  ti zia li ti ala na ndö ti ye so Jéhovah aye ti tene azo ti Israël asara. Ala doit nga fade ti gbu li na ndö ti aye so Jéhovah asara ndali ti ala ade ti ninga ape. Tongana ala sara fade tongaso, ala yeke bâ so ngangu ti azo ti Canaan ayeke ye oko ape tongana a haka ni na ngangu ti Jéhovah so ahon angangu kue. Nde na azo ti bembengo ndo so ayeke na mabe ape so, Josué na Caleb aye lani ti zia ngia na bê ti Jéhovah. Ala tene na azo ni, atene: “Tongana bê ti Jéhovah anzere na mbage ti e, lo yeke gue na e biani na yâ ti kodro so, na lo yeke mû ni na e.”—Nom. 14:​6-9.

7. Tongana nyen la e peut ti kpe mbeto ti Jéhovah mingi ahon ti kozo? (Bâ nga foto.)

⁷ Ti kpe mbeto ti Jéhovah mingi ahon ti kozo, e doit ti pensé na ye so ayeke zia ngia na bê ti lo na ngoi kue so e yeke mû mbeni desizion (Ps. 16:8). Na ngoi so mo yeke diko Bible, hunda terê ti mo: ‘Tongana mbi la ye tongaso asi na mbi, desizion wa la mbi yeke mû?’ Na tapande, imaginé so mo yeke mä amokonzi bale-oko ti Israël so ayeke tene so azo ti Israël apeut ti mû sese ti Canaan ape. Eskê mo yeke yeda na tënë so ala tene nga mbeto ayeke hon ndö ti mo, wala ndoye ti mo ndali ti Jéhovah nga nzara so mo yeke na ni ti zia ngia na bê ti lo ayeke hon ndö ti mbeto ti zo so asara mo? Azo ti Israël kue ti ngoi ni so ake ti yeda na tâ tënë so Josué na Caleb atene. Ye so asara si Jéhovah amû lege na ala ape ti lï na Sese ti zendo.—Nom. 14:​10, 22, 23.

8. Sarango ye wa la e doit ti sara ngangu ti duti na ni? Ngbanga ti nyen?

⁸ Sarango terê kete. Jéhovah ayeke fa tâ tënë na azo so asara terê ti ala kete (Mat. 11:25). E sara lani terê ti e kete e yeda ti manda tâ tënë (Kus. 8:​30, 31). Me e doit ti sara hange ti tene baba alï e ape. Tongana baba alï e, e peut ti komanse ti pensé so abango ndo ti e alingbi tâ na amama-ndia ti Bible nga na afango lege ti bungbi ti Jéhovah.

9. Nyen la e peut ti sara ti ngbâ ti sara terê ti e kete?

⁹ Ti ngbâ ti sara terê ti e kete, e doit ti girisa ape so e yeke kete mingi tongana a haka e na Jéhovah (Ps. 8:​3, 4). E peut nga ti hunda Jéhovah ti aidé e ti sara terê ti e kete mingi nga ti yeda ti tene a fa ye na e. Jéhovah ayeke aidé e ti bâ na nene ni mingi apensé ti lo, so e manda ni na yâ ti Bible nga na lege ti bungbi ti lo, ahon apensé ti e wani. Na ngoi so mo yeke diko Bible, gi ti hinga aye so afa so Jéhovah aye mingi sarango terê kete nga lo ke fandara. Nga sara ngangu kue ti ngbâ ti sara terê ti mo kete na ngoi so a mû na mo mbeni kua so asara si mo yeke na komandema wala so asara si azo abâ mo.

AYE SO E PEUT TI SARA TI HULE NA TERÊ TI TÂ TËNË

10. Azo wa la Jéhovah asara lani kua na ala ti fa ye nga ti fa lege na azo ti lo?

¹⁰ Ngbâ ti sara confiance na fango lege ti bungbi ti Jéhovah. Ândö na Israël, Jéhovah asara kua na Moïse nga na pekoni na Josué ti fa na azo ti Lo aye so ala doit ti sara (Jos. 1:​16, 17). Aye atambela lani nzoni na azo ti Israël na ngoi so ala bâ akoli so tongana azo so ayeke sara kua na iri ti Jéhovah Nzapa. Angu ngbangbo mingi na pekoni, na ngoi so a zia na sese congrégation ti aChrétien, abazengele 12 la ayeke fa lani na ala aye so ala doit ti sara (Kus. 8:​14, 15). Ambeni ngoi na pekoni, na yâ ti groupe so a yeke wara ambeni ancien na Jérusalem. So aita asara ye lani alingbi na fango lege so ala wara na mbage ti akoli be-ta-zo so, “acongrégation angbâ ti kpengba na yâ ti mabe na wungo ti aita ni ayeke gue na li ni lâ na lâ.”  (Kus. 16:​4, 5). Na ngoi ti e, Jéhovah ayeke sara nga tufa na ndö ti e tongana e sara ye alingbi na fango lege so e wara na mbage ti bungbi ti lo. Me tongana e ke ti yeda na fango lege ti azo so Jéhovah asoro ala ti mû li ni, a yeke sara lo tongana nyen? Ti kiri tënë na hunda so, zia e bâ ye so asi lani na ngoi so azo ti Israël ayeke gue na Sese ti zendo.

11. Nyen la asi lani na azo ti Israël ti ândö so asara kpengba-li na Moïse so Nzapa asoro lo ti mû li ni? (Bâ nga foto.)

¹¹ Na ngoi so azo ti Israël ayeke gue na Sese ti zendo, a si na mbeni ngoi, akoli so iri ti ala awu mingi asara kpengba-li na Moïse nga ala ye ti mû kua so Jéhovah amû na lo. Ala tene: “Azo ti Israël kue [me gï Moïse ape] ayeke nzoni-kue, na Jéhovah ayeke na popo ti ala.” (Nom. 16:​1-3). Atâa so a yeke tâ tënë so na lê ti Nzapa “azo ti Israël kue” ayeke nzoni-kue, Jéhovah asoro lani Moïse ti mû li ni na popo ti azo ti lo (Nom. 16:28). So azo ti kpengba-li ni ayeke kasa lani Moïse, ti vrai ni, Jéhovah la ala kasa lo so. Ala zia lani li ti ala pëpe na ndö ti ye so Jéhovah aye; ala zia li ti ala na ndö ti ye so ala ye, so ayeke ti wara komandema nga ti tene azo ahinga ala mingi ahon ti kozo. Nzapa afâ lani azo so amû li ni na yâ ti kpengba-li so nga na azo saki mingi so amû mbage ti ala (Nom. 16:​30-35, 41, 49). Laso, e peut ti duti sûr so azo so abâ na nene ni ape afango lege ti bungbi ti Jéhovah, ala zia vundu na bê ti lo.

12. Ngbanga ti nyen la e peut ti ngbâ ti sara confiance na bungbi ti Jéhovah?

¹² E peut ti ngbâ ti sara confiance na bungbi ti Jéhovah. Tongana a yeke polele so a bezoin ti sara mbeni changement na yâ ti fason so e mä na yâ ti mbeni tâ tënë ti Bible wala a bezoin ti changé mbeni fason so e yeke sara na kua ti Royaume, aita so ayeke mû li ni ayeke sara mbeto ape ti sara ni (aProv. 4:18). Ala yeke sara ni ndali ti so ala  ye ti zia ngia na bê ti Jéhovah ahon aye kue. Ala yeke sara nga kue ti mû adesizion so ague oko na Bible, so ayeke mbeti so awakua ti Jéhovah kue adoit ti sara ye alingbi na ni.

13. “Anzoni tënë so a zia ni tongana tapande” ayeke nyen? Nyen la e doit ti sara na ni?

¹³ “Ngbâ ti bata anzoni tënë so a zia ni tongana tapande”. (2 Tim. 1:13). “Anzoni tënë so a zia ni tongana tapande” aye ti sara tënë ti afango ye ti aChrétien so ayeke na yâ ti Bible (Jean 17:17). Afango ye so la ayeke gunda ti aye kue so e mä na bê na ni. Bungbi ti Jéhovah afa na e ti hule na terê ti anzoni tënë so. Na ngoi kue so e yeke sara ni, Jéhovah ayeke sara tufa na ndö ti e.

14. Tongana nyen la ambeni Chrétien azia ti hule na terê ti “anzoni tënë so a zia ni tongana tapande”?

¹⁴ Nyen la apeut ti si tongana e gue nde na “anzoni tënë so a zia ni tongana tapande”? Gbu li na ndö ti tapande so. Na ngoi ti akozo Chrétien, na bango ni, ambeni Chrétien ayeke sara lani si mbeni tënë ti mvene so atene lâ ti Jéhovah asi awe amû ndo. Peut-être mbeni lettre ayeke lani dä, so azo apensé so bazengele Paul la asû ni, so tënë ni so ayeke na yâ ni. Sân ti mû ngoi ti gi ti hinga ye na ndö ti tënë ni, ambeni Chrétien ti Thessalonique ayeda na ni nga ala sara même si a mû ndo. Tongana fade ala dabe ti ala na aye so Paul afa lani na ala na ngoi so lo ngbâ na terê ti ala, ka a yeke handa ala ape (2 aThes. 2:​1-5). Paul awa lani aita ti lo ti yeda pëpe na atënë kue so ala mä. Ti tene mara ti ye tongaso asi na azo ti Thessalonique encore ape, Paul ahunzi use lettre ti lo na ala na tënë so: “So bara ti mbi Paul la, so mbi wani mbi sû na maboko ti mbi, so ayeke fä so ayeke na yâ ti ambeti ti mbi oko oko kue. So lege ti sungo mbeti ti mbi la.”—2 aThes. 3:17.

15. Tongana nyen la e peut ti bata terê ti e si atënë ti mvene so akpa tâ tënë ahanda e ape? Fa mbeni tapande ni. (Bâ nga afoto.)

¹⁵ Nyen la e peut ti manda na lege ti tënë so Paul atene na azo ti Thessalonique? Tongana e mä mbeni tënë so ague nde na aye so e manda na yâ ti Bible wala e mä mbeni  mbaï so ahon gbungo li ti zo, e doit ti sara ye na ndara. Na ngbene Union soviétique, awato ti e amû lani na aita mbeni lettre so ala tene alondo na kota ndokua ti e. Na yâ ti lettre ni, a wa lani ambeni ita-koli ti sigi na mbeni bungbi nde. Mbeti ni akpa lettre so alondo na kota ndokua ti e. Me lettre ni ahanda pëpe aita so ayeke be-ta-zo. Ala bâ lani so lettre ni ague oko na aye so a fa na ala ape. Laso, awato ti tâ tënë apeut ti sara kua na aye tongana Internet nga na aréseaux sociaux ti sara si li ti e aga kirikiri nga ti ga na kangbi popo ti e. E yeke zia pëpe si “li ti [e] aga kirikiri hio”, me e peut ti bata terê ti e tongana e gi ti bâ wala tënë so e mä wala e diko ague oko na atâ tënë so e hinga ni awe.—2 aThes. 2:2; 1 Jean 4:1.

16. Ti gue oko na aRomain 16:​17, 18, nyen la a yeke nzoni e sara tongana ambeni ita ague nde na tâ tënë?

¹⁶ Ngbâ ti duti beoko na azo so ayeke be-ta-zo na Jéhovah. Nzapa aye ti tene e na aita ti e, e voro lo beoko. Tongana e hule na terê ti tâ tënë, e yeke ngbâ beoko. Azo kue so ague nde na tâ tënë ayeke ga na kangbi na yâ ti congrégation, ni la Nzapa awa e ti tene e ‘si nduru na ala pëpe.’ Tongaso ape, e peut ti gue ayo na tâ tënë.—Diko aRomain 16:​17, 18.

17. Anzoni ye wa la e yeke wara tongana e hinga tâ tënë nga e hule na terê ni?

¹⁷ Tongana e hinga tâ tënë nga e hule na terê ni, e yeke ngbâ nduru na Jéhovah nga mabe ti e ayeke ngbâ ti kpengba (aÉph. 4:​15, 16). Afango ye ti mvene nga na asabango ti Satan ayeke handa e ape, nga Jéhovah ayeke bâ ndo na ndö ti e na ngoi ti kota ye ti vundu si sioni ye asi na e ape. Ngbâ ti hule na terê ti ye so ayeke tâ tënë, “na Nzapa ti siriri ayeke duti ande na [mo].”—aPhil. 4:​8, 9.