1. Nyen la ayeke aidé awakua ti Jéhovah ti ngbâ ti voro lo atâa ala wara akpale?

 BIBLE afa so ngoi so e yeke dä ayeke “angoi ti akpale so ayeke ngangu na zo ti kanga bê dä”. (2 Tim. 3:1). Awakua ti Jéhovah ayeke wara akpale so azo kue so ayeke na yâ ti sioni dunia ti Satan ayeke wara ni. Me a yeke sara nga aye ti ngangu na e ndali ti so e yeke sara na Jéhovah. Nyen la a-aidé e ti ngbâ ti voro Jéhovah atâa akpale so? Mbeni kota ye ni ayeke so e hinga so Jéhovah ayeke “Nzapa so ayeke na fini”.—Jér. 10:10; 2 Tim. 1:12.

2. Nyen la e hinga na ndö ti Jéhovah so apeut ti kpengba e?

² Jéhovah abâ akpale kue so e yeke wara nga lo ye lakue ti aidé e (2 Chron. 16:9; Ps. 23:4). Tongana e bâ lo tongana Nzapa so ayeke na fini, a peut ti aidé e ti gbu ngangu na yâ ti akpale kue so e wara. Bâ tongana nyen la aye so asi na Gbia David afa so tënë so ayeke tâ tënë.

3. Na ngoi so David atene “Jéhovah ayeke na fini”, lo ye ti tene nyen la?

³ David ahinga lani Jéhovah nga lo zia bê ti lo na ndö ti lo. Na ngoi so Gbia Saül nga na ambeni zo ayeke gi lani ti fâ David, lo sambela Jéhovah ti aidé lo (Ps. 18:6). Na peko ti so Nzapa akiri tënë na sambela ti David nga lo sö lo, David atene: “Jéhovah ayeke na fini!” (Ps. 18:46). So David atene tongaso, lo ye gï pëpe ti tene so Nzapa ayeke dä. Mbeni mbeti atene so David ayeke fa lani so lo yeke na confiance na Jéhovah so ayeke “Nzapa so ayeke na fini so ayeke aidé lakue awakua ti lo.” Biani, aye so asi na David afa na lo so Nzapa ti lo ayeke na fini, ye so asara si lo leke na bê ti lo ti ngbâ ti sara na Jéhovah nga ti sepela lo.—Ps. 18:​28, 29, 49.

4. Tongana e hinga so Jéhovah ayeke Nzapa so ayeke na fini, a yeke aidé e tongana nyen?

 ⁴ Tongana e hinga na bê ti e kue so Jéhovah ayeke Nzapa so ayeke na fini, a peut ti aidé e ti yapu na sarango kua ti lo. E yeke wara ngangu ti gbu ngangu na yâ ti akpale nga bê ti e ayeke pusu e ti ngbâ ti sara aye mingi na yâ ti kua ti lo. E yeke leke nga na bê ti e ti ngbâ nduru na Jéhovah.

NZAPA SO AYEKE NA FINI AYEKE KPENGBA MO

5. Nyen la apeut ti mû na e ngangu na ngoi so e wara akpale? (aPhilippien 4:13).

⁵ E yeke wara lege ti gbu ngangu na yâ ti akpale kue, atâa akota ni wala akete ni, tongana e girisa ape so Jéhovah ayeke na fini nga lo yeke dä ti mû maboko na e. Lo peut ti aidé e ndali ti so mbeni kpale so ayeke ngangu mingi so apeut ti kara lo ayeke dä ape. Lo yeke Nzapa so ngangu ti lo ahon angangu kue nga lo peut ti mû na e ngangu ti gbu ngangu. (Diko aPhilippien 4:13.) Tënë so amû na e ngangu na ngoi ti akpale. Tongana Jéhovah a-aidé e na yâ ti akete kete kpale, e yeke hinga biani so lo yeke aidé e na yâ ti akota kpale.

6. Nyen la asi na David na ngoi so lo de maseka so asara si lo sara confiance mingi na Jéhovah?

⁶ Bâ aye use so asi na David so asara si lo sara confiance mingi na Jéhovah. Na ngoi so lo yeke lani berger so ade maseka, mbeni ours nga na mbeni bamara amû ataba ti babâ ti lo ahon na ni. Na angoi ni so, sân mbeto, David atomba peko ti anyama ni na lo sö ataba ni. Me David apensé lani ape so lo sara aye so na ngangu ti lo wani. Lo hinga lani so Jéhovah la amû na lo ngangu ti sara ni (1 Sam. 17:​34-37). David agirisa aye so asi so lâ oko ape. So lo gbu li na ndö ni asara si lo yeke na confiance so Nzapa so ayeke na fini ayeke mû na lo ngangu na yâ ti angoi so ayeke ga.

7. Nyen la David azia lani li ti lo na ndö ni so a-aidé lo ti tiri na Goliath?

⁷ Ambeni ngoi na pekoni, na ngoi so ade David awara ngu bale-use ape, lo gue lo sara vizite na camp ti azo ti Israël. Na ngoi ti vizite ni, lo bâ so mbeto ahon ndö ti aturugu ni ndali ti so mbeni yongoro Philistin, so iri ti lo Goliath, asigi ti “gi yanga ti azo ti Israël.” (1 Sam. 17:​10, 11). Mbeto ahon ndö ti aturugu ni lani ndali ti so ala zia li ti ala na ndö ti konongo ti Goliath nga na ndö ti tënë so lo yeke tene lani na ala (1 Sam. 17:​24, 25). Me David azia lani li ti lo na ndö ti mbeni ye nde. David ahinga lani so na ngoi so Goliath ayeke he aturugu ti azo ti Israël, lo yeke zonga “Nzapa so ayeke na fini” la (1 Sam. 17:26). David apensé kozoni na Jéhovah. David ayeke lani na confiance so Nzapa so a-aidé lo na ngoi so lo yeke berger ayeke aidé lo ti tiri na Goliath. So lo hinga so Nzapa ayeke aidé lo, lo tiri na Goliath na lo sö benda.—1 Sam. 17:​45-51.

8. Nyen la apeut ti aidé e ti duti na confiance so Jéhovah ayeke aidé e na ngoi so e wara akpale? (Bâ nga foto.)

⁸ E nga kue e peut ti hon ndö ti akpale tongana e girisa ape so Nzapa so ayeke na fini ayeke nduru ti aidé e (Ps. 118:6). E peut ti duti na confiance so Jéhovah ayeke aidé e tongana e gbu li na ndö ti aye so lo sara ândö. Diko ambaï ti Bible so adabe ti mo na fason so Jéhovah asö awakua ti lo ândö (És. 37:​17, 33-37). Bâ na ndö ti site jw.org aye so asi so a fa peko ni so afa tongana nyen la Jéhovah a-aidé aita ti ngoi ti e. Dabe ti mo nga na angoi so Jéhovah asara mbeni ye ndali ti mo. Tongana mo dabe ti mo pëpe na mbeni ye so apika bê, so a peut ti haka ni na tiringo na mbeni ours wala mbeni bamara, gi bê ti  mo ape. Ngbanga ti nyen? Ngbanga ti so Jéhovah asara aye mingi ndali ti mo. Lo tisa lani mo ti ga kamarade ti lo (Jean 6:44). Même laso, grâce na lo la mo ngbâ na yâ ti tâ tënë. Tongaso, hunda Jéhovah ti aidé mo ti dabe ti mo na angoi so lo kiri tënë na asambela ti mo, lo mû na mo ye so mo yeke tâ na bezoin ni na tâ ngoi ni wala lo bâ lege ti mo na yâ ti mbeni kpale. Tongana mo gbu li ti mo na ndö ni, a yeke aidé mo ti hinga biani so Jéhovah ayeke ngbâ ti sara ye ndali ti mo.

9. Na ngoi so e wara akpale, nyen la e doit ti girisa ape? (aProverbe 27:11).

⁹ Tongana e hinga so Jéhovah ayeke Nzapa so ayeke na fini, a yeke aidé e ti duti na nzoni bango ndo na ndö ti akpale ti e. E tene tongaso ngbanga ti nyen? Tongana e wara akpale, e doit ti zia li ti e na ndö ti ye so ayeke kota mingi. Zabolo atene so tongana e wara akpale, e yeke dö Jéhovah ti zia. Tongaso, sarango ye ti e na ngoi so e wara akpale ayeke zia ngia wala vundu na bê ti Jéhovah (Job 1:​10, 11; diko aProverbe 27:11). Tongana e ngbâ be-ta-zo na Jéhovah atâa akpale so e wara, e yeke fa so e ye lo nga Zabolo ayeke zo ti mvene. Peut-être gouvernement ti ndo so mo yeke dä akanga lege na awakua ti Jéhovah, peut-être mo yeke na kpale ti nginza, wala nzoni tënë agbu bê ti azo ape wala peut-être mo yeke na yâ ti mbeni kpale nde. Tongana a yeke tongaso, girisa ape so kpale so mo yeke na yâ ni amû lege na mo ti zia ngia na bê ti Jéhovah. Girisa nga ape so lo yeke zia lâ oko ape si atara ahon ngangu ti mo (1 aCor. 10:13). Lo yeke mû na mo ngangu ti gbu ngangu.

NZAPA SO AYEKE NA FINI AYEKE FUTA MO

10. Nyen la Nzapa so ayeke na fini ayeke sara ndali ti azo so ayeke voro lo?

¹⁰ Jéhovah ayeke futa lakue azo so avoro lo (aHéb. 11:6). Lo mû na e siriri ti bê nga lo sara si e yeke na ngia laso, na lo yeke mû ande na e fini ti lakue lakue na yâ ti angoi so ayeke ga. E hinga na bê ti e kue so Jéhovah  aye ti futa e nga lo yeke na ngangu ti sara ni. Ndani la e yeke ngbâ ti sara ye kue so e peut ti sara ti voro lo, tongana ti so awakua ti lo ti ândö asara. A yeke ye so Timothée asara lani na ngoi ti akozo Chrétien.—aHéb. 6:​10-12.

11. Nyen la apusu lani Timothée ti sara kua ngangu na yâ ti congrégation? (1 Timothée 4:10).

¹¹ Diko 1 Timothée 4:10. Timothée ayeke lani na beku na Nzapa so ayeke na fini. Ndani la lo sara kua ngangu ndali ti Jéhovah nga na azo. Lo sara ni tongana nyen? Bazengele Paul awa lo lani ti ga zo so ahinga ti fa ye nzoni mingi na fango tënë nga na yâ ti congrégation. Paul atene nga lani na lo ti zia nzoni tapande na amba ti lo aChrétien, amaseka nga na ambakoro. A mû nga lani na lo ambeni kua so ayeke ngangu, na tapande, ti mû ngangu wango na azo so abezoin ni, me lo doit ti sara ni na ndoye (1 Tim. 4:​11-16; 2 Tim. 4:​1-5). Na ambeni ngoi, azo abâ kua so Timothée asara ape, wala a kiri singila na lo ndali ni ape, me lo hinga lani biani so Jéhovah ayeke futa lo.—aRom. 2:​6, 7.

12. Nyen la ayeke pusu a-ancien ti ngbâ ti sara kua ngangu na yâ ti congrégation? (Bâ nga foto.)

¹² Laso, a-ancien apeut nga ti hinga biani so Jéhovah abâ apendere kua so ala yeke sara nga lo bâ ni na nene ni. Na ndö ti so a-ancien ayeke sara vizite na aita ti kpengba ala, ala yeke fa ye nga ala yeke fa tënë; a-ancien mingi ayeke mû maboko na yâ ti kua ti lekengo ada so a yeke sara kua ti Jéhovah dä nga ala yeke mû maboko na ngoi so ngangu kpale asi. Ambeni ancien ayeke na yâ ti Bungbi ti aita so ayeke gue na yâ ti ada-nganga ti bâ aita so ayeke na kobela wala ala yeke na yâ ti Komite so abâ lege ti songo na ada-nganga. A-ancien ahinga so congrégation ayeke ti Jéhovah me a yeke ti mbeni zo ape. Ye so asara si ala yeke sara akua ti ala na âme ti ala kue nga ala hinga biani so Nzapa ayeke futa ala ndali ti kua ti ala.—aCol. 3:​23, 24.

13. Jéhovah abâ a-effort so e yeke sara ti sara na lo tongana nyen?

 ¹³ Aita kue apeut ti ga a-ancien ape. Me e kue e yeke na mbeni ye ti mû na Jéhovah. Tongana e sara ye kue so e peut ti sara ndali ti Jéhovah, a yeke nzere na lo mingi. Lo yeke bâ a-offrande so e yeke mû ndali ti kua ti e na yâ ti dunia kue, atâa a yeke kete. Lo yeke na ngia mingi na ngoi so e yôro maboko e mû commentaire na ngoi ti abungbi, atâa so kamene asara e, nga na ngoi so e pardonné azo so ason bê ti e. Même tongana mo bâ so mo sara aye mingi ape ndali ti Jéhovah, hinga so lo bâ na nene ni ye so mo peut ti sara. Lo ye mo ndali ni nga lo yeke futa ande mo.—Luc 21:​1-4.

NGBÂ NDURU NA NZAPA SO AYEKE NA FINI

14. Tongana e ngbâ nduru na Jéhovah, a yeke aidé e tongana nyen ti ngbâ be-ta-zo na lo? (Bâ nga foto.)

¹⁴ Tongana e hinga biani so Jéhovah ayeke dä, a yeke duti ngangu na e ape ti ngbâ be-ta-zo na lo. Tënë so ayeke lani tâ tënë na ndö ti Joseph. Lo ke lani na kuru go ti sara lango-sioni. Lo hinga biani so Nzapa ayeke dä nga lo ye ti zia vundu na bê ti lo ape (Gen. 39:9). Ti hinga biani so Jéhovah ayeke dä, e doit ti mû ngoi ti sambela lo nga ti manda Bible. Tongana e sara ni, songo ti e na lo ayeke kpengba mingi. Legeoko tongana Joseph, tongana e yeke na kpengba songo na Jéhovah, e yeke ye ande ape ti sara mbeni ye so ayeke zia vundu na bê ti Lo.—Jacq. 4:8.

15. Nyen la e peut ti manda na lege ti ye so asi na azo ti Israël na yâ ti benyama? (aHébreu 3:12).

¹⁵ Azo so agirisa so Jéhovah ayeke Nzapa so ayeke na fini, a yeke ngangu na ala ape ti gue ayo na lo. Gbu li na ndö ti ye so asi na azo ti Israël na ngoi so ala yeke na yâ ti benyama. Ala hinga lani so Jéhovah ayeke dä, me ala komanse ti dë kite so lo yeke mû na ala aye so ala bezoin ni. Ala hunda même ndo, atene: “Jéhovah ayeke na popo ti e? wala lo yeke na popo ti e ape?” (Ex. 17:​2, 7). A sara si ala sara kpengba-li na Nzapa. Kite ayeke dä ape so e ye ape ti mû sioni tapande ti ala.—Diko aHébreu 3:12.

16. Nyen la apeut ti sara si a yeke ngangu na e ti ngbâ ti duti na kpengba mabe?

 ¹⁶ Dunia so asara si a yeke ngangu na e ti ngbâ ti duti nduru na Jéhovah. Azo mingi ake ti yeda so Nzapa ayeke dä. Fani mingi, na bango ni, azo so asara sanka ti aye so Nzapa ahunda, gigi ti ala ayeke nzoni. Tongana e bâ tongaso, a peut ti duti ngangu na e ti duti na kpengba mabe. Atâa so e mä na bê so Nzapa ayeke dä, e peut ti komanse ti duti na kite so lo yeke aidé e. Na mbeni ngoi, zo ti sungo Psaume 73 apensé nga lani tongaso. Lo bâ lani so azo so angoro lo so asara sanka ti andia ti Nzapa, gigi anzere na ala. Ye so asara si lo komanse ti hunda terê ti lo wala a yeke nzoni ti sara na Nzapa.—Ps. 73:​11-13.

17. Nyen la ayeke aidé e ti ngbâ nduru na Jéhovah?

¹⁷ Nyen la a-aidé lani zo ti sungo psaume ni ti changé bango ndo ti lo? Lo gbu li na ndö ti ye so ayeke si na azo so azia ti sara confiance na Jéhovah (Ps. 73:​18, 19, 27). Lo gbu nga li na ndö ti anzoni ye so zo so ayeke sara na Nzapa ayeke wara (Ps. 73:24). E nga kue e peut ti gbu li na ndö ti anzoni ye so Jéhovah asara na e. Imaginé gigi ti e ayeke duti fade tongana nyen tongana e yeke sara na Jéhovah ape. Tongana e girisa ape ndani so a yeke nzoni e sara na Jéhovah, a yeke aidé e ti ngbâ be-ta-zo na lo. Nga legeoko tongana zo ti sungo psaume ni, e yeke tene: “Ti mbi, ti ga nduru na Nzapa asara nzoni na mbi.”—Ps. 73:28.

18. Ngbanga ti nyen la e bezoin ape ti sara mbeto ti ye so ayeke si kekereke?

¹⁸ E peut ti gbu ngangu na yâ ti akpale kue so e wara na lâ ti nda ni so ndali ti so e yeke “sara kua tongana angbâa na tâ Nzapa so ayeke na fini”. (1 aThes. 1:9). Nzapa ti e ayeke pensé na e nga lo yeke mû maboko na e lakue. Lo yeke lani na terê ti awakua ti lo ti ândö, lo yeke nga na terê ti e laso. Fafadeso, e yeke tingbi na kota ye ti vundu so ade mara ni asi lâ oko ape. Me e yeke duti gï e oko ape (És. 41:10). Zia e kue e “sara mbeto oko pëpe na e tene: ‘Jéhovah ayeke zo ti mungo maboko na mbi; mbeto ayeke sara ande mbi pëpe.’”—aHéb. 13:​5, 6.