1-2. Tisango ndo wa la Jéhovah atisa awakua ti lo so ayeke be-ta-zo?

 TONGANA mbeni zo ahunda mo, atene: “Jéhovah ayeke zo wa ti mo?” Mo yeke tene nyen? Mo peut ti tene: ‘Jéhovah ayeke Babâ ti mbi, Nzapa ti mbi nga Kamarade ti mbi.’ Mo peut nga ti pensé na ambeni titre so asara tënë ti Jéhovah. Me eskê mo yeke bâ nga lo tongana Zo so ayamba mo na ndo ti lo?

² Gbia David ahaka lani songo ti kamarade so ayeke na popo ti Jéhovah na awakua be-ta-zo ti lo na songo so ayeke na popo ti agene na zo so ayamba ala. Lo hunda lani ndo, lo tene: “Jéhovah, zo wa la mo yeke yamba lo na yâ ti tente ti mo? Zo wa la ayeke sara kodro na ndö ti hoto ti mo so ayeke nzoni-kue?” (Ps. 15:1). Na lege ti versê so e manda so e peut ti ga gene na yâ ti tente ti Jéhovah, so ti tene e peut ti ga akamarade ti lo. Tisango ndo ti Jéhovah so ayeke kota mingi.

JÉHOVAH AYE TI TENE E DUTI AGENE TI LO

3. Kozo gene ti Jéhovah ayeke zo wa? Tënë ti bê ti Jéhovah na ti gene ti lo na ndö ti mba ayeke tongana nyen?

³ Kozo ti tene Jéhovah acréé aye, lo yeke lani gï lo oko. Me a si na mbeni ngoi, lo yamba kozo Molenge ti lo so lo créé lo na yâ ti tente ti lo na lege ti fä. Fini kua ti Jéhovah ti yambango azo anzere lani na lo mingi. Bible afa so Jéhovah ‘aye lani Molenge ti lo mingi’. Molenge ti lo nga ‘ayeke na ngia na gbele lo lakue’.—aProv. 8:30.

4. Azo wa la na pekoni Jéhovah atisa lani ala ti duti agene na yâ ti tente ti lo?

 ⁴ Na pekoni, Jéhovah acréé lani a-ange na lo tisa nga ala ti duti agene ti lo. Bible airi a-ange “amolenge ti Nzapa” nga afa so a nzere na ala ti duti na terê ti Jéhovah (Job 38:7; Dan. 7:10). Teti angu mingi mingi, agene ti Jéhovah ayeke lani gï a-ange so ayeke na terê ti lo na yayu. Na pekoni, lo créé azo na ala nga apeut ti duti agene ti lo. Ambeni gene ti lo ni ayeke lani Hénok, Noé, Abraham nga na Job. Bible airi ala akamarade ti Jéhovah ndali ti so ala mä yanga ti lo.—Gen. 5:24; 6:9; Job 29:4; És. 41:8.

5. Nyen la e peut ti manda na lege ti prophétie so ayeke na Ézéchiel 37:​26, 27?

⁵ Teti angu ngbangbo mingi, Jéhovah angbâ ti tisa akamarade ti lo ti duti agene ti lo. (Diko Ézéchiel 37:​26, 27.) Na tapande, na lege ti prophétie ti Ezéchiel, e manda so Nzapa aye biani ti tene awakua be-ta-zo ti lo aduti na kpengba songo na lo. Lo mû zendo ti te mbele ti siriri na ala. Prophétie so aye ti sara tënë ti ngoi so awakua ti Jéhovah so ayeke na beku ti gue na yayu na ala so ayeke na beku ti vivre na ndö ti sese ayeke duti ande beoko na yâ ti tente ti lo tongana “kundu oko ti ataba”. (Jean 10:16). Ngoi ni so la e yeke dä so.

NZAPA AYEKE BÂ LEGE TI E NA NDO KUE SO E YEKE DÄ

6. Zo ayeke ga gene ti Jéhovah tongana nyen? A peut ti wara tente ti lo na ndo wa?

⁶ Ândö, tente ayeke ndo so zo apeut ti duti dä ti wu terê ti lo nga ti bata terê ti lo si lâ asu lo ape wala ngu apika lo ape. Zo so aga gene na yâ ti mbeni tente ayeke ku ti tene wa ti tente ni abâ lege ti lo. Na ngoi so e mû fini ti e na Jéhovah, e ga agene na yâ ti tente ti lo na lege ti fä (Ps. 61:4). E yeke na aye kue so e bezoin ni ti ngbâ ti duti na kpengba songo na Jéhovah nga e yeke akamarade ti azo so aga agene ti lo. Me tente so Jéhovah atisa e ti ga gene na yâ ni ayeke gï na mbeni ndo oko ape. Peut-être mo voyagé lani na ambeni kodro ndali ti mbeni kota bungbi so ayeke nde, na mo wara azo so ayeke na ngia ti duti na yâ ti tente ti Nzapa. Tente ti Jéhovah ayeke na ndo kue so awakua be-ta-zo ti lo ayeke dä.—Apoc. 21:3.

7. Ngbanga ti nyen la e peut ti tene so azo so akui be-ta-zo angbâ lakue agene na yâ ti tente ti Jéhovah? (Bâ nga foto.)

⁷ Ka ti azo so ayeke be-ta-zo so akui awe?  Eskê e peut ti tene so ala ngbâ lakue agene na yâ ti tente ti Jéhovah? En. E tene tongaso ngbanga ti nyen? Ngbanga ti so Jéhovah abata ala na yâ ti li ti lo. Jésus atene: “Na ndö ti tënë ti akuâ so a yeke zingo ala, même Moïse afa tënë ni na yâ ti mbaï so asara tënë ti keke ti sisi, tongana lo iri Jéhovah ‘Nzapa ti Abraham, Nzapa ti Isaac na Nzapa ti Jacob.’ Lo yeke Nzapa ti akuâ pëpe, me ti azo so ayeke na fini, ndali ti so na lê ti lo ala kue ayeke na fini.”—Luc 20:​37, 38.

ANZONI YE SO E WARA NGA NA AYE SO E DOIT TI SARA

8. So e yeke na yâ ti tente ti Jéhovah, anzoni ye wa la e wara ?

⁸ Tente ti Jéhovah abata agene ti lo si mbeni ye abuba songo ti lo na ala ape nga amû na ala tâ beku ndali ti kekereke. Tongana e ngbâ nduru na Jéhovah, Satan alingbi pëpe ti sara na e mbeni sioni ye so ayeke ngbâ lakue lakue (Ps. 31:23; 1 Jean 3:8). Na yâ ti fini dunia, Jéhovah ayeke ngbâ ande ti bata akamarade ti lo so ayeke be-ta-zo si mbeni ye abuba songo ti lo na ala ape nga si kuâ amû ala ape.—Apoc. 21:4.

9. Aye wa la Jéhovah ahunda na agene ti lo ti sara?

⁹ A yeke biani mbeni kota pasa ti duti na yâ ti tente ti Jéhovah. E peut ti duti na kpengba songo ti kamarade na lo so apeut ti ngbâ lakue lakue. Tongana e ye ti ngbâ ti duti agene ti lo, a yeke nzoni e sara ye tongana nyen? Tongana mbeni zo atisa mo na ndo ti lo, mo yeke gi ti duti nzoni gene. Na tapande, lo peut ti hunda na mo ti zi poro kozo si mo lï na da ti lo na mo yeke duti nduru ti sara ni. Legeoko nga, e ye biani ti hinga aye so Jéhovah ahunda na azo so aye ti ngbâ ti duti agene na yâ ti tente ti lo. Yengo so e ye na Jéhovah apusu e ti sara ye kue so e peut ti sara “ti mû ngia mingi na lo”. (aCol. 1:10). Tongana e bâ nga Jéhovah tongana Kamarade ti e, e yeke bâ so lo yeke nga Nzapa ti e, Babâ ti e so alingbi ti tene e ne lo (Ps. 25:14). A yeke nzoni e girisa tënë so lâ oko ape nga lakue e doit ti ne lo mingi. Tongana e ne lo mingi, a yeke aidé e ti sara pëpe mbeni ye so ayeke son bê ti lo. E ye lakue ti tambela na Nzapa ti e na ‘bango terê ti e kete’.—Mi. 6:8.

JÉHOVAH ASARA LANI KANGBI NA POPO TI AZO APE NA YÂ TI BENYAMA

10-11. Tongana nyen la sarango ye ti Jéhovah na mbage ti azo ti Israël na yâ ti benyama ti Sinaï afa so lo sara kangbi na popo ti azo ape?

¹⁰ Jéhovah asara kangbi na popo ti agene ti lo ape (aRom. 2:11). E peut ti hinga ni na lege ti fason ti sarango ye ti lo na mbage ti azo ti Israël na yâ ti benyama ti Sinaï.

¹¹ Na peko ti so Jéhovah azi lani azo ti lo na ngbâa na Égypte, lo mû aprêtre ti sara kua na tabernacle. Lo mû lani azo ti mara ti Lévi ti sara ambeni kua na tabernacle. Eskê Jéhovah ayeke bâ lani lege ti azo so ayeke sara kua na tabernacle wala azo so asara camp nduru na ni nzoni mingi ahon tanga ti azo ni? Ên-ën. Jéhovah ayeke sara ka kangbi na popo ti azo ape.

12. Tongana nyen la Jéhovah afa so lo sara kangbi pëpe na popo ti azo ti fini mara ti lo? (Exode 40:38). (Bâ nga foto.)

¹² Zo ti Israël oko oko kue apeut ti duti kota kamarade ti Jéhovah atâa lo yeke sara kua na tabernacle wala pëpe, atâa lo sara camp nduru na ni wala pëpe. Na tapande, Jéhovah asara lani kue ti tene mara ni kue abâ mbinda nga na wâ so aluti na ndö ti tabernacle ni. (Diko Exode 40:38.) Na ngoi so mbinda ni akomanse ti hon na mbeni fini ndo, même azo so asara camp  ayo na tabernacle ni apeut ti bâ ni. Tongaso, ala peut ti bungbi aye ti ala, ti zi yâ ti tente ti sewa ti ala nga ti hon legeoko na tanga ti azo ni (Nom. 9:​15-23). Azo ni kue apeut lani ti mä totongo ti atrompette use ti argent so afa so zo kue abezoin ti komanse ti hon (Nom. 10:2). A yeke polele so ti lango nduru na tabernacle ayeke lani pëpe ye so afa so zo ni ayeke kota kamarade ti Jéhovah. Me azo ti Israël kue apeut lani ti duti agene ti Jéhovah nga ti hinga biani so lo yeke fa lege na ala nga lo yeke bata ala. Legeoko nga laso, atâa kodro wa la e yeke dä, Jéhovah aye e, lo yeke bâ lege ti e nga lo yeke bata e.

JÉHOVAH AYEKE SARA KANGBI NA POPO TI AZO LASO APE

13. Ngbanga ti nyen la e peut ti tene so Jéhovah asara kangbi na popo ti azo laso ape?

¹³ Ambeni wakua ti Nzapa laso alango nduru na kota ndokua ti e wala nduru na mbeni filiale ti aTémoin ti Jéhovah. Ambeni ayeke sara kua na ando ni so. Ye so asara si ala peut ti sara mingi ti akua so a yeke sara ni kâ nga ala peut ti sara kua maboko na maboko na aita so ayeke mû li ni. Ambeni wakua ti Jéhovah ayeke asurveillant so ayeke gue na ando nde nde wala ambeni ayeke sara gï kua ti ngoi kue nde. Tongana mo yeke na popo ti gbâ ti aita so ayeke sara mbeni oko ti akua so ape, hinga biani so Jéhovah so ayamba e aye azo kue so lo tisa ala so azia ngia na bê ti lo. Lo hinga mo nzoni mingi nga lo yeke mû na mo aye so mo bezoin ni (1 Pi. 5:7). Jéhovah ayeke mû kobe ti yingo na awakua ti lo kue, lo yeke fa lege na ala nga lo yeke bata ala.

14. Mbeni lege nde so Jéhovah afa so lo sara kangbi na popo ti azo ape ayeke so wa?

¹⁴ Mbeni lege nde so Jéhovah afa so lo sara kangbi na popo ti azo ape ayeke so lo sara si laso azo na yâ ti dunia kue apeut ti wara Bible. Na tongo nda ni, a sû lani Mbeti ti Nzapa na ayanga ti kodro ota: Hébreu,  Araméen nga na Grec. Eskê azo so apeut ti diko Bible na ayanga ti kodro so a sû na ni ândö ayeke na kpengba songo na Jéhovah ahon azo so apeut ti diko ni na ayanga ti kodro ni so ape? Ên-ën, a yeke tongaso ape.—Mat. 11:25.

15. Nyen la afa so Jéhovah asara kangbi na popo ti azo ape? (Bâ nga foto.)

¹⁵ A yeke pëpe hingango mbeti ti e wala so e hinga yanga ti kodro so a sû na Bible ândö la ayeke sara si e ga akamarade ti Jéhovah. Jéhovah asara si azo kue na yâ ti dunia apeut ti wara ndara ti lo me gï pëpe azo so ahinga mbeti mingi. A kiri na peko ti Bible na ayanga ti kodro saki mingi, tongaso azo na yâ ti dunia kue apeut ti bâ nzoni na lege ti afango ye so ayeke na yâ ni nga ti hinga aye so ala peut ti sara ti ga akamarade ti lo.—2 Tim. 3:​16, 17.

NGBÂ TI “NZERE NA LÊ TI NZAPA”

16. Ti gue oko na Kusala 10:​34, 35, tongana nyen la e peut ti ngbâ ti nzere na lê ti Jéhovah?

¹⁶ Ti tene Jéhovah ayamba e tongana agene na yâ ti tente ti lo na lege ti fä ayeke mbeni kota pasa. Lo sara ye na nzoni bê mingi, lo ye e mingi nga lo hinga ti yamba agene nzoni mingi ahon tanga ti azo kue. Na ndö ni, lo yeke sara kangbi na popo ti azo ape. Lo yamba e kue atâa ndo wa la e yeke dä, ngobo ti e ayeke so wa, e hinga mbeti wala e hinga mbeti ape, mara ti e ayeke so wa, ngu ti e ayeke oke, atâa e yeke koli wala wali. Me Jéhovah ayeke yamba gï azo so amä yanga ti lo.—Diko Kusala 10:​34, 35.

17. Na ndo wa la e yeke wara ambeni tënë na ndö ti dutingo gene na yâ ti tente ti Jéhovah?

¹⁷ Na Psaume 15:​1, David ahunda lani atënë so: “Jéhovah, zo wa la mo yeke yamba lo na yâ ti tente ti mo? Zo wa la ayeke sara kodro na ndö ti hoto ti mo so ayeke nzoni-kue?” David akiri lani tënë na ahunda so. Article ti peko ayeke sara tënë na ndö ti ambeni ye so e doit ti sara ti zia ngia na bê ti Jéhovah nga ti ngbâ akamarade ti lo.